Tobikisami Mpo Na Kosala | Eteni 4Mwa ndambo

KOSALA MOSALA ELONGO | ESPRIT D’EQUIPE

Kati na lisolo oyo, liloba “Bankulutu” elimboli mpenza mpenza mibange te, kasi bato oyo bazali na mibu mingi oyo bazali na bokonzi likolo na basusu. Tosengeli kososola ete atako boyangeli ya Ezipito ezalaki konyokola Bayisalaele, Ba Ebre’ bazalaki ntango nyonso na ebongiseli malamu mpe bazalaki na lolenge na bango moko ya boyangeli. Libota mokomoko ezalaki na bakambi na bango oyo bayebanaki na nkombo ya Bankulutu).Ntango nyonso oyo tozali kokutana na mikakatano, tosengeli te kozala na mobulu mpe na mobulungano, soki te, Zabolo akosalela libaku yango mpo na kobulunganisa biso lisusu mingi mpe tokokoka te kolongwa na mokakatano yango. Lokola lingomba ya Klisto, lokola moto moko to libota moko, totika te ete bopusi ya bato to ya Zabolo epekisa biso kosala makambo na molongo. Zabolo alingaka kobeta bato oyo bazangi molongo.

Ya mibale, Mose asengelaki koloba liboso epai na bakonzi, kasi epai na bato nyonso te. Koteya bakonzi ezali koteya ekolo mobimba mpamba te bazali na nguya ya kosala bopusi likolo na basusu. Nzambe ayebaki ete soki Mose andimisi bakambi wana, Yisalaele mobimba bakondima mpe bakolanda ye. Yesu Klisto apesaki bato 12 formasyo na boumeli ya mbula misato na ndambo, kasi moko kati na bango batekaki ye. Ntango ozali kopesa bato formasyo, kozela te ete bango nyonso basala ndenge moko. Tya makanisi na yo kaka na mosala. Bayekoli 11 baningisaki mokili na nsango malamu na ndimbola oyo esili kokoma epai na biso, mpe tozali komema yango na mabota nyonso ya mokili. Nzambe azalaki kopesa Mose mwango ya kokokisa mokumba na ye, ezalaki bobele mosala kosangana mpo Mose asengelaki kokokisa mokumba wana ya moko te. Wana tozali kosalela Nzambe, tosengeli kozala na mwango mpe molimo ya kosala na bomoko. Ezali likambo ya kokamwa te ete Yesu atindaki soko moke te moyekoli moko na mosala ya misionere ye moko kasi mibale mibale. Nazali kolaba te ete okoki te kokende na mosala ya misionere yo moko to kosakola Klisto yo moko, Te. Filip asalaki yango ye moko mpe engumba mobimba ya Samaria eninganaki, nazali kolobela mosala ya etuluku. Soki tozali elongo, tozali makasi, kasi soki tozali na bomoko te, tokolemba. Ezali likambo ya mawa mingi ntango nzoto ya Klisto ekoki te koloba na mongongo moko to kozala na likanisi moko na makambo oyo matali Klisto to lingomba yango moko.

Libondeli: Tata Nzambe, natondi yo mpo na mokolo oyo, pesa ngai komikitisa oyo ekoki mpo na kolanda mwango na yo mpe molimo ya kosala elongo na basusu mpo na kotombola Bokonzi na yo. Nazali kobondela mpo na bomoko kati na nzoto ya Klisto mpamba te ndako oyo ekabwani ekoki te kotelema liboso na monguna. Tika ete totika moimi na biso mpe kotya matomba ya Bokonzi na yo na esika ya liboso. Na nkombo na Yesu, nabondeli, Amen.

Botangi mosusu: Kobima 4:29, 17:5-6, 18:7-13|Mosakoli 4:9|Masese 27:17