San Lucas 5
5
Quiriꞌ uxrá nij tuvi̱ꞌ Simón Pedró xcuaj, quiꞌyaj Jesús a
1Dan me se ꞌo̱ güii canicunꞌ Jesús tuꞌva na laguaná cuꞌna̱j Genesaret, ne̱ cuchiꞌ uxrá yuvii̱ rej nicu̱nꞌ soꞌ, ne̱ cunuu chre̱ꞌ ndoꞌo nij soꞌ cheꞌé se guun rá nij soꞌ cuno̱ nij soꞌ snana̱ Yaꞌanj a. Ne̱ nda̱a xraan maꞌa̱n mán nij soꞌ xꞌnúú Jesús a. 2Dan me se queneꞌen Jesús vi̱j rihoo na̱j tuꞌva na laguaná, ne̱ síí uta xcuaj me nij síí siꞌya̱j rihoo yoꞌ, ne̱ tanáj nij soꞌ se‑riho̱o̱ nij soꞌ ꞌo̱ orá nii, ne̱ caꞌanj naꞌnu̱ꞌ nij soꞌ xnánj nij soꞌ a. 3Dan me se catúj Jesús rá ꞌo̱ rihoo, ne̱ se‑riho̱o̱ síí cuꞌna̱j Simón me yoꞌ, ne̱ cachíín niꞌya̱j Jesús rihaan Simón se vaa quiꞌya̱j soꞌ se ndoꞌo cuxu̱u̱n soꞌ rihoo gu̱un ga̱nꞌ yoꞌ do̱j tzínꞌ tuꞌva na a. Ga̱a ne̱ caꞌanj ca̱yáán Jesús rque rihoo, ne̱ tucuꞌyón soꞌ snana̱ Yaꞌanj man nij yuvii̱ ma̱n tuꞌva na a. 4Quisíj tucuꞌyón Jesús man nij yuvii̱, ga̱a ne̱ cataj soꞌ rihaan Simón a:
―Ni̱caj so̱ꞌ rihoo caꞌa̱nj so̱ꞌ rej cunu̱u̱ doj na, ga̱a ne̱ ti̱guíj soj nanj rá na á ―taj Jesús rihaan soꞌ a.
5Tza̱j ne̱ cataj Simón rihaan Jesús a:
―Niga̱nꞌ quiꞌyaj suun uxrá núj, tiguíj ndoꞌo núj nanj rá na, tza̱j ne̱ a̱ ꞌó xcuaj ne quiri̱ꞌ núj, maan maestro. Tza̱j ne̱ ma̱an cheꞌé se ma̱ꞌán so̱ꞌ cataj, ne̱ caꞌa̱nj ti̱guíj uún núj nanj rá na na̱nj á ―taj Simón rihaan Jesús a.
6Dan me se caꞌanj ti̱guíj uún nij tuvi̱ꞌ Simón nanj rá na, ne̱ quiriꞌ uxrá nij soꞌ xcuaj nda̱a quisinꞌ maꞌa̱n xnánj nij soꞌ, quiꞌyaj xcuaj a. 7Cheꞌé dan canacúún raꞌa nij soꞌ man tuviꞌ nij soꞌ síí nu̱u̱ rque ꞌó rihoo, cheꞌé rej ra̱cuíj tuviꞌ nij soꞌ man nij soꞌ a. Dan me se caꞌnaꞌ nij tuviꞌ nij soꞌ yan nicu̱nꞌ nij soꞌ, ne̱ caraa uxrá nij soꞌ xcuaj rque ro̱j rihoo a. Ne̱ uxrá caraa ro̱j rihoo, ne̱ da̱j doj se caꞌanj ni̱j ro̱j rihoo rque na na̱nj á. 8Dan me se queneꞌen Simón Pedró se vaa quiꞌyaj Jesús, ga̱a ne̱ caꞌanj ca̱yáán ru̱j soꞌ rihaan Jesús, cataj soꞌ a:
―Naxu̱u̱n so̱ꞌ mán so̱ꞌ rihanj cheꞌé se síí ata̱ ndoꞌo cacunꞌ mej na̱nj á ―taj Simón rihaan Jesús a.
9Dan me se caꞌanj ndoꞌo rá nij tuvi̱ꞌ Simón se vaa quiriꞌ uxrá nij soꞌ xcuaj a. 10Ne̱ caꞌanj rá síí cuꞌna̱j Jacobo do̱ꞌ, Juan do̱ꞌ, cheꞌé xcuaj a. Ne̱ tuvi̱ꞌ Simón me ro̱j soꞌ, ne̱ taꞌníí síí cuꞌna̱j Zebedeo me ro̱j soꞌ a. Ne̱ dan me se cataj Jesús rihaan Simón a:
―Se̱ cuchuꞌvíꞌ so̱ꞌ maꞌ. ꞌO̱ se síí naquiꞌyaj chre̱ꞌ xcuaj mé so̱ꞌ, tza̱j ne̱ rej rihaan níꞌ me se guún so̱ꞌ síí naquiꞌya̱j chre̱ꞌ yuvii̱ canoco̱ꞌ yuvii̱ manj na̱nj á ―taj Jesús rihaan Simón a.
11Ga̱a ne̱ nica̱j nij soꞌ se‑riho̱o̱ nij soꞌ caꞌanj nij soꞌ nda̱a tuꞌva na a. Ga̱a ne̱ tanáj nij soꞌ cunuda̱nj nij rasu̱u̱n yoꞌ, ne̱ canocoꞌ nij soꞌ man Jesús, ne̱ caꞌanj nij soꞌ ga̱ soꞌ a.
Nahuun sa̱ꞌ ꞌo̱ síí ranꞌ luj riꞌyuj, quiꞌyaj Jesús a
12Dan me se ꞌo̱ güii caranꞌ Jesús ꞌo̱ chumanꞌ, ne̱ cuchiꞌ ꞌo̱ síí ranꞌ ndoꞌo luj riꞌyuj rihaan soꞌ a. Ga̱a queneꞌen síí ranꞌ yoꞌ man Jesús, ga̱a ne̱ caꞌanj ca̱yáán ru̱j soꞌ rihaan Jesús nda̱a canó rihaan soꞌ rihaan yoꞌóó, ne̱ cachíín niꞌya̱j soꞌ rihaan Jesús, cataj soꞌ a:
―Sese me rá so̱ꞌ, ne̱ caꞌve̱e naquiꞌya̱j sa̱ꞌ so̱ꞌ manj, Señor ―taj soꞌ rihaan Jesús a.
13Ga̱a ne̱ naxca̱j Jesús raꞌa soꞌ ne̱ canó raꞌa soꞌ man síí ranꞌ, ne̱ cataj Jesús a:
―Me raj qui̱ꞌyáj da̱nj á. Na̱huún so̱ꞌ, qui̱ꞌyáj ado̱nj ―taj Jesús rihaan soꞌ a.
Nu̱ꞌ da̱nj cataj Jesús, ne̱ nu̱ꞌ navij luj xráá síí ranꞌ a.
14Dan me se caꞌneꞌ Jesús suun rihaan síí nahuun yoꞌ se vaa se̱ cataj xnaꞌanj soꞌ rihaan a̱ ꞌó yuvii̱ cheꞌé se vaa quiranꞌ soꞌ maꞌ. Ga̱a ne̱ cataj uún Jesús rihaan soꞌ a:
―Caꞌa̱nj so̱ꞌ rihaan xrej, ne̱ ti̱haán so̱ꞌ mán so̱ꞌ rihaan xrej se vaa nahuún so̱ꞌ, ne̱ rque̱ so̱ꞌ rihaan Yaꞌanj se vaa cataj síí cuꞌna̱j Moisés ga̱a naá nda̱a vaa no̱ xcúún so̱ꞌ rque̱ so̱ꞌ rihaan Yaꞌanj cheꞌé se nahuún so̱ꞌ ado̱nj. Ga̱a ne̱ xca̱j nij xrej cuentá se vaa nahuún so̱ꞌ quiꞌyáj ado̱nj ―taj Jesús rihaan síí nahuun yoꞌ a.
15Tza̱j ne̱ doj a̱ chaꞌnuu̱ ndoꞌo nana̱ cheꞌé se vaa quiranꞌ síí nahuun yoꞌ quiꞌyaj Jesús, ne̱ cheꞌé dan cunuu chre̱ꞌ uxrá nij yuvii̱ rej va̱j Jesús a. Guun rá nij soꞌ cuno̱ nij soꞌ snana̱ Jesús, ne̱ guun rá nij síí ranꞌ xꞌne̱e̱ chiꞌii̱ xráá nij soꞌ uún a. 16Tza̱j ne̱ naxuun Jesús man soꞌ rihaan nij yuvii̱, ne̱ caꞌanj soꞌ rej tacaan, ne̱ cachíín niꞌya̱j ndoꞌo soꞌ rihaan Yaꞌanj a.
Tinavij Jesús cacunꞌ tumé ꞌo̱ síí naꞌvee cache̱e̱ a
17ꞌO̱ güii me se ya̱nj Jesús rá ꞌo̱ veꞌ, ne̱ tucuꞌyón soꞌ man yuvii̱, ne̱ ya̱nj do̱j síí fariseo ga̱ síí naquiꞌyaj cu̱u stucua̱nj Moisés rá veꞌ yoꞌ, ne̱ síí cavii chumanꞌ Jerusalén do̱ꞌ, ꞌó nij chumanꞌ na̱j estadó Judea do̱ꞌ, nij chumanꞌ na̱j estadó Galilea do̱ꞌ, me nij soꞌ a. Ne̱ Yaꞌanj Si̱j ꞌNi̱j Raꞌa man níꞌ roꞌ, racuíj ndoꞌo man Jesús, ne̱ nahuun ndoꞌo nij síí ranꞌ, quiꞌyaj Jesús a. 18Dan me se táá ꞌo̱ síí naꞌvee cache̱e̱ rihaan yuvéé, ne̱ táá chiha̱ nii man soꞌ caꞌnaꞌ nii rihaan Jesús a. Tza̱j ne̱ ma̱n ndoꞌo yuvii̱ rá veꞌ ya̱nj Jesús, ne̱ nanoꞌ nij soꞌ rej catu̱u̱ nij soꞌ rá veꞌ cuchru̱j nij soꞌ man síí ranꞌ rihaan Jesús a. 19Tza̱j ne̱ taj se qui̱ꞌyáꞌ caꞌve̱e cache̱n nij soꞌ scaꞌnúj nij yuvii̱ ri̱i̱ a. Cheꞌé dan cavii nij soꞌ xráá veꞌ, ne̱ cayaꞌ nij soꞌ yuꞌuj xráá veꞌ, cheꞌé rej caꞌve̱e ti̱nanij nij soꞌ man síí ranꞌ tanu̱u̱ rej ma̱n nij yuvii̱ rihaan Jesús a. 20Ga̱a queneꞌen Jesús se vaa cuchumán uxrá rá nij tuvi̱ꞌ síí ranꞌ yoꞌ se vaa caꞌve̱e nahu̱un soꞌ quiꞌya̱j Jesús, ga̱a ne̱ cataj Jesús rihaan síí ranꞌ yoꞌ a:
―Navij cacunꞌ xráá so̱ꞌ, na̱nj tinu̱j ―taj Jesús rihaan soꞌ a.
21Ne̱ cuno nij síí fariseo do̱ꞌ, nij síí naquiꞌyaj cu̱u stucua̱nj Moisés do̱ꞌ, nana̱ caꞌmii Jesús, ga̱a ne̱ nuchruj ra̱a̱ nij soꞌ a: “Da̱j si̱j me síí nihánj, ne̱ aꞌmii soꞌ nana̱ qui̱j cheꞌé Yaꞌanj ga̱. O̱rúnꞌ Yaꞌanj uun nucua̱j tinavi̱j cacunꞌ ta̱j xráá yuvii̱ na̱nj á.” Da̱nj guun rá nij soꞌ a.
22Queneꞌen Jesús da̱j nuchruj ra̱a̱ nij soꞌ, ne̱ cheꞌé dan cataj soꞌ rihaan nij soꞌ a:
―Me cheꞌé nuchruj ra̱a̱ soj nana̱ vaa da̱nj ga̱. 23Tuꞌva rma̱ꞌán ꞌu̱nj se vaa navij cacunꞌ xráá síí nihánj, rá soj a̱ naꞌ. Caꞌve̱e cata̱j u̱u̱n níꞌ navij cacunꞌ xráá síí nihánj naꞌ. Ase caꞌve̱e doj cata̱j níꞌ na̱xagaa soꞌ, ne̱ cache̱e̱ soꞌ cuaj, cata̱j níꞌ xa̱ꞌ. 24Dan me se me rá ꞌu̱nj xca̱j soj cuentá se vaa no̱ xcúún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, ti̱navíí ꞌu̱nj cacunꞌ xráá nij yuvii̱ ma̱n rihaan chumii̱ nihánj ado̱nj ―taj Jesús rihaan nij soꞌ a.
Dan me se cataj Jesús rihaan síí naꞌvee cache̱e̱ a:
―Rihaan so̱ꞌ si̱j naꞌvee cache̱e̱ taj ꞌu̱nj, ne̱ nacue̱ so̱ꞌ tuvéé so̱ꞌ, ne̱ na̱nꞌ so̱ꞌ tucuá so̱ꞌ á ―taj Jesús rihaan síí na̱j rihaan yuvéé yoꞌ a.
25Nu̱ꞌ da̱nj tuꞌva Jesús, ga̱a ne̱ nu̱ꞌ naxaga̱a̱ soꞌ niꞌya̱j ta̱ranꞌ nij yuvii̱ a. Ga̱a ne̱ nacué soꞌ tuvéé soꞌ, ga̱a ne̱ nanꞌ soꞌ tucuá soꞌ, ne̱ veꞌé uxrá caꞌmii soꞌ cheꞌé Yaꞌanj a. 26Dan me se caꞌanj rá ta̱ranꞌ nij yuvii̱, ne̱ cataj nij yuvii̱ se vaa veꞌé uxrá quiꞌyaj Yaꞌanj a. Ne̱ cuchuꞌviꞌ ndoꞌo nij yuvii̱, ne̱ cataj nij yuvii̱ a:
―Veꞌé uxrá vaa suun sa̱ꞌ noco̱o queneꞌen níꞌ cuanꞌ ado̱nj ―taj nij yuvii̱ yoꞌ a.
Nacúún Jesús man Leví, ne̱ canocoꞌ Leví man soꞌ a
27Quisíj nahuun síí ranꞌ yoꞌ, ga̱a ne̱ curiha̱nj Jesús xeꞌ, ne̱ queneꞌen soꞌ man ꞌo̱ síí aꞌnéj impuestó cuꞌna̱j Leví a. Ne̱ ya̱nj Leví rihaan mesá rej aꞌnéj nii impuestó man yuvii̱ a. Ga̱a ne̱ cataj Jesús rihaan soꞌ a:
―Ca̱nocóꞌ so̱ꞌ manj, caꞌa̱nj níꞌ á ―taj Jesús rihaan soꞌ a.
28Ga̱a ne̱ naxuma̱a̱n Leví, canocoꞌ soꞌ man Jesús, ne̱ tanáj nu̱ꞌ soꞌ se‑su̱u̱n soꞌ a.
Me rá Jesús ra̱cuíj soꞌ man nij síí tumé cacunꞌ a
29Ga̱a ne̱ canuû chaꞌanj naco̱o tucuá Leví cheꞌé Jesús, quiꞌyaj Leví a. Ne̱ ma̱n queꞌe̱e̱ ndoꞌo tuviꞌ soꞌ síí aꞌnéj impuestó do̱ꞌ, queꞌe̱e̱ ꞌó yuvii̱ do̱ꞌ, mán tucuá Leví, ne̱ ya̱nj nij soꞌ ga̱ nij tuvi̱ꞌ Jesús a. 30Dan me se ma̱n nij síí fariseo do̱ꞌ, síí naquiꞌyaj cu̱u stucua̱nj Moisés noco̱ꞌ man nij síí fariseo do̱ꞌ, ga̱a ne̱ caꞌmii chiꞌi̱i̱ nij soꞌ rihaan nij síí tucuꞌyón snana̱ Jesús a. Dan me se cataj nij síí fariseo ga̱ nij síí naquiꞌyaj cu̱u stucua̱nj Moisés a:
―Me cheꞌé chá soj ne̱ ꞌo soj na ga̱ nij síí aꞌnéj impuestó do̱ꞌ, ga̱ ꞌó nij síí tumé cacunꞌ do̱ꞌ ga̱ ―taj nij soꞌ, xnáꞌanj nij soꞌ man nij síí tucuꞌyón snana̱ Jesús a.
31Ga̱a ne̱ cataj maꞌa̱n Jesús rihaan nij soꞌ a:
―Síí vaa nucua̱j roꞌ, ne nanoꞌ nij soꞌ man doctor naquiꞌyaj conoꞌó man yuvii̱ maꞌ. Ma̱an se síí ranꞌ roꞌ, me síí nanoꞌ man doctor ado̱nj. 32ꞌO̱ se ne caꞌna̱ꞌ ꞌu̱nj canacu̱nj ꞌu̱nj man nij síí uun rá se vaa síí sa̱ꞌ me nij soꞌ maꞌ. Tana̱nj cheꞌé nij síí tumé cacunꞌ caꞌnaj se vaa ca̱nica̱j nimán nij soꞌ ne̱ ta̱náj nij soꞌ chrej chiꞌi̱i̱ ado̱nj ―taj Jesús rihaan nij soꞌ a.
Nataꞌ Jesús me cheꞌé ne tocoꞌ nij síí tucuꞌyón snana̱ soꞌ xꞌnaa man maꞌa̱n nij soꞌ a
33Ga̱a ne̱ nij síí fariseo ga̱ nij síí naquiꞌyaj cu̱u stucua̱nj Moisés me se cataj nij soꞌ rihaan Jesús a:
―Me cheꞌé, ne̱ nij síí tucuꞌyón snana̱ Juan Síí Utaꞌ Ne man yuvii̱ me se tocoꞌ nij soꞌ xꞌnaa man maꞌa̱n nij soꞌ do̱ꞌ, achíín niꞌya̱j nij soꞌ rihaan Yaꞌanj do̱ꞌ, ne̱ veé da̱nj ꞌyaj nij síí tucuꞌyón snana̱ núj si̱j fariseo do̱ꞌ, tza̱j ne̱ nij síí tucuꞌyón snana̱ so̱ꞌ me se ne tocoꞌ nij soꞌ xꞌnaa man maꞌa̱n nij soꞌ rihaan Yaꞌanj ga̱ ―taj nij soꞌ rihaan Jesús a.
34Ne̱ cataj Jesús rihaan nij soꞌ a:
―Ase vaa síí cuchruj saꞌanj vaa ꞌu̱nj, ne̱ asa̱ꞌ caꞌve̱e toco̱ꞌ nij síí ma̱n ga̱j xꞌnaa man maꞌa̱n nij soꞌ, rá soj ga̱. 35Tza̱j ne̱ vaa güii, ne̱ gu̱un yaníj ꞌu̱nj rihaan nij soꞌ, quiꞌya̱j yuvii̱, ga̱a ne̱ nano̱ rá nij síí nihánj, ga̱a ne̱ toco̱ꞌ nij soꞌ xꞌnaa man maꞌa̱n nij soꞌ ado̱nj ―taj Jesús rihaan nij síí fariseo ga̱ nij síí naquiꞌyaj cu̱u stucua̱nj Moisés yoꞌ a.
36Ga̱a ne̱ caꞌmii Jesús ꞌó nana̱ rihaan nij soꞌ, cataj soꞌ a:
―Ase vaa yatzíj sinꞌ vaa tucuáán nga̱ noco̱ꞌ soj, ne̱ se̱ guun cutzi̱nꞌ níꞌ yatzíj naca̱ ne̱ naꞌne̱j níꞌ man yatzíj nga̱ maꞌ. Sese da̱nj quiꞌya̱j níꞌ, ga̱a ne̱ quiri̱ꞌ nu̱ꞌ yatzíj naca̱ yoꞌ na̱nj ado̱nj. Ga̱a ne̱ ino̱ uxrá ga̱a̱ yatzíj naca̱ rihaan yatzíj nga̱ yoꞌ na̱nj ado̱nj. 37Ne̱ ase vaa na vinó naca̱ vaa nana̱ tucuꞌyón ꞌu̱nj, ne̱ se̱ guun cara̱a yuvii̱ na vinó naca̱ rque nuj nga̱ maꞌ. Sese da̱nj quiꞌya̱j yuvii̱, ne̱ cuya̱nj na vinó cunu̱u xe̱e̱ na vinó, ne̱ se̱ cacuá nuj nga̱ maꞌ. Cheꞌé dan canu̱u̱ yoꞌ, ne̱ caya̱nj na vinó rihaan yoꞌóó a. 38Cheꞌé dan araa nii na vinó naca̱ rque nuj naca̱, ne̱ ꞌo̱ mán sa̱ꞌ na vinó rque nuj yoꞌ na̱nj ado̱nj. 39Ne̱ taj síí gu̱un rá coꞌo̱ na vinó naca̱, sese a̱j coꞌo soꞌ na vinó nga̱ maꞌ. ꞌO̱ se sa̱ꞌ doj vaa na nga̱, cata̱j soꞌ na̱nj á ―taj Jesús rihaan nij síí fariseo do̱ꞌ, rihaan nij síí naquiꞌyaj cu̱u stucua̱nj Moisés do̱ꞌ a.
Currently Selected:
San Lucas 5: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica