San Lucas 4
4
Guun ndoꞌo rá Síí Chre̱e tiha̱ꞌ yuꞌunj soꞌ man Jesús a
1ꞌO̱ se nu̱u̱ Nimán Yaꞌanj nu̱ꞌ nimán Jesús, ne̱ cavii Jesús tuꞌva chráá cuꞌna̱j Jordán, ne̱ caꞌanj soꞌ, va̱j soꞌ rej tacaan, quiꞌyaj Nimán Yaꞌanj a. 2Ne̱ vi̱j chiha̱a̱ (40) ya̱ güii guun rá Síí Chre̱e tiha̱ꞌ yuꞌunj Síí Chre̱e man Jesús, cheꞌé rej canoco̱ꞌ Jesús man soꞌ a. Ne̱ a̱ ꞌó xcoꞌ ne cha̱ Jesús cunu̱ꞌ vi̱j chiha̱a̱ güii maꞌ. Ga̱a quisíj nu̱ꞌ vi̱j chiha̱a̱ güii, ga̱a ne̱ quinaꞌaan ndoꞌo rque Jesús a. 3Dan me se cataj Síí Chre̱e rihaan Jesús a:
―Sese ya̱ ya̱ Taꞌni̱j Yaꞌanj mé so̱ꞌ, ne̱ cata̱j so̱ꞌ rihaan yahij nihánj se vaa gu̱un yoꞌ rachrúún cha̱ so̱ꞌ á ―taj Síí Chre̱e rihaan Jesús a.
4Ga̱a ne̱ cataj Jesús rihaan soꞌ a:
―Danj Yaꞌanj taj a: “Né ina̱nj se chá me se achiin rihaan yuvii̱, ne̱ caꞌve̱e ca̱yáán sa̱ꞌ yuvii̱ maꞌ.” Ina̱nj da̱nj taj Danj Yaꞌanj a ―taj Jesús rihaan Síí Chre̱e yoꞌ a.
5Ga̱a ne̱ dan me se nica̱j Síí Chre̱e man Jesús cavii soꞌ ꞌo̱ quij xca̱a̱n, ga̱a ne̱ tihaa̱n soꞌ man cunuda̱nj nij chumanꞌ noco̱o na̱j rihaan chumii̱ rihaan Jesús rque o̱rúnꞌ orá nii a. 6Ga̱a ne̱ cataj soꞌ rihaan Jesús a:
―Caꞌve̱j ꞌu̱nj gu̱un chij so̱ꞌ rihaan cunuda̱nj nij chumanꞌ noco̱o yoꞌ, ne̱ cara̱a̱ cochro̱j yuvii̱ rihaan so̱ꞌ a. ꞌO̱ se a̱j caꞌvej Yaꞌanj gu̱un chij ꞌu̱nj rihaan nij chumanꞌ noco̱o yoꞌ, ne̱ cheꞌé dan caꞌve̱e qui̱ꞌyáj gu̱un chij náá guun yuvii̱ rihaan chumanꞌ noco̱o yoꞌ ado̱nj. 7Cheꞌé dan sese ca̱yáán ru̱j so̱ꞌ rihanj ne̱ cara̱a̱ gue̱e̱ so̱ꞌ rihanj, ne̱ gu̱un chij so̱ꞌ rihaan nu̱ꞌ nihánj, qui̱ꞌyáj ado̱nj ―taj Síí Chre̱e rihaan Jesús a.
8Ne̱ canica̱j Jesús cataj Jesús rihaan Síí Chre̱e a:
―ꞌO̱ se Danj Yaꞌanj taj nana̱ nihánj a: “Rihaan o̱rúnꞌ Yaꞌanj Si̱j ꞌNi̱j Raꞌa man níꞌ cara̱a̱ gue̱e̱ so̱ꞌ, ne̱ rihaan o̱rúnꞌ soꞌ cu̱nuû so̱ꞌ rihaan ado̱nj.” Da̱nj taj Danj Yaꞌanj ado̱nj ―taj Jesús rihaan Síí Chre̱e yoꞌ a.
9Ga̱a ne̱ nica̱j Síí Chre̱e man Jesús caꞌanj soꞌ chumanꞌ Jerusalén, ne̱ tacavii soꞌ man Jesús raa̱ nuvií noco̱o, ne̱ cataj soꞌ rihaan Jesús a:
―Sese ya̱ Taꞌni̱j Yaꞌanj mé so̱ꞌ, ne̱ güe̱j so̱ꞌ, ne̱ nani̱j gue̱e̱ so̱ꞌ rihaan yoꞌóó á. 10ꞌO̱ se Danj Yaꞌanj taj a:
Caꞌne̱ꞌ Yaꞌanj suun rihaan nij se‑mo̱zó soꞌ
se vaa tu̱mé nij soꞌ mán so̱ꞌ a,
taj Danj Yaꞌanj, ne̱ taj uún yoꞌ a:
11Ca̱ráán raꞌa nij soꞌ mán so̱ꞌ,
se̱ gaa na̱nj cano̱ tacóó so̱ꞌ yahij maꞌ,
da̱nj aꞌmii Danj Yaꞌanj ―taj Síí Chre̱e rihaan Jesús ado̱nj.
12Ga̱a ne̱ cataj Jesús rihaan Síí Chre̱e a:
―Tza̱j ne̱ ne nó xcúnj qui̱ꞌyáj da̱nj maꞌ. ꞌO̱ se taj uún Danj Yaꞌanj a: “Se̱ guun ra̱ꞌyunj so̱ꞌ man Yaꞌanj Si̱j ꞌNi̱j Raꞌa man níꞌ, ne̱ ti̱háꞌ so̱ꞌ man soꞌ maꞌ.” Da̱nj aꞌmii Danj Yaꞌanj rihaan níꞌ ado̱nj ―taj Jesús rihaan Síí Chre̱e a.
13Da̱nj quiꞌyaj Síí Chre̱e, tza̱j ne̱ ga̱a ne nari̱ꞌ soꞌ se vaa cuno̱ Jesús rihaan soꞌ, ne̱ caꞌneꞌ rá soꞌ do̱j güii ga̱ Jesús a.
Tucuꞌyón Jesús snana̱ Yaꞌanj man nij yuvii̱ ma̱n estadó Galilea a
14Dan me se nanꞌ Jesús estadó Galilea, ne̱ ꞌo̱ racuíj ndoꞌo Nimán Yaꞌanj man soꞌ, ne̱ chaꞌnuu̱ nana̱ cheꞌé soꞌ rihaan nij yuvii̱ ma̱n nu̱ꞌ estadó Galilea a. 15Caꞌanj Jesús da̱j a̱ nij veꞌ tucuꞌyón nij yuvii̱ israelitá stucua̱nj Moisés, ne̱ tucuꞌyón soꞌ snana̱ Yaꞌanj man nij yuvii̱, ne̱ veꞌé uxrá caꞌmii ta̱ranꞌ nij yuvii̱ cheꞌé soꞌ a.
Nucuiꞌ Jesús chiháán soꞌ, ne̱ caꞌmii natáj soꞌ a
16Dan me se nucuiꞌ uún Jesús chiháán soꞌ chumanꞌ Nazaret rej cachij soꞌ a. Ga̱a quisíj güii naránj rá nij yuvii̱ israelitá, ne̱ catúj soꞌ rá veꞌ tucuꞌyón nij soꞌ stucua̱nj Moisés, ese da̱nj ina̱nj uꞌyón soꞌ ꞌyaj soꞌ a. Ga̱a ne̱ canicunꞌ caya̱ soꞌ naya̱a̱ soꞌ Danj Yaꞌanj rihaan nij yuvii̱ a. 17Síí tumé yanj roꞌ, quirii yanj no̱ nana̱ cachrón síí cuꞌna̱j Isaías síí nataꞌ snana̱ Yaꞌanj ga̱a naá, ne̱ caxríj soꞌ ston Jesús a. Nacuchraꞌ Jesús yanj, ne̱ nariꞌ soꞌ rej no̱ nana̱ nihánj a:
18Ya̱nj Nimán Yaꞌanj nimán ꞌu̱nj,
ne̱ cheꞌé dan narii Yaꞌanj manj
caꞌa̱nj caꞌmi̱i̱ natáj ꞌu̱nj nana̱ sa̱ꞌ rihaan nij síí nique̱ a.
Caꞌnéé Yaꞌanj manj
caꞌmi̱i̱ natáj ꞌu̱nj rihaan nij síí ꞌni̱j tagaꞌ
cata̱j ꞌu̱nj se vaa cu̱riha̱nj nij soꞌ cache̱e̱ u̱u̱n nij soꞌ a.
Ne̱ caꞌnéé Yaꞌanj manj
ra̱cuíj ꞌu̱nj man nij síí tuchri̱i naxra̱ꞌ rihaan nij soꞌ,
ne̱ caꞌnéé Yaꞌanj manj
ra̱cuíj ꞌu̱nj man nij síí ranꞌ sayuun uún na̱nj á.
19Caꞌnéé Yaꞌanj manj
cata̱j xnaꞌanj ꞌu̱nj se vaa ya̱j roꞌ,
me rá Yaꞌanj cavi̱i̱ sa̱ꞌ nij síí noco̱ꞌ man soꞌ quiꞌya̱j soꞌ ado̱nj.
Nu̱ꞌ nihánj me nana̱ nayaa Jesús a.
20Ga̱a ne̱ nacué uún soꞌ yanj ne̱ nagoꞌ uún soꞌ man síí tumé yanj, ga̱a ne̱ caꞌanj quita̱j soꞌ chruun xlá ti̱haa̱n soꞌ man yuvii̱ a. Tza̱j ne̱ niꞌya̱j uxrá cunuda̱nj nij yuvii̱ ma̱n rque veꞌ yoꞌ man soꞌ, 21ne̱ guun cheꞌe̱ soꞌ caꞌmii soꞌ, cataj soꞌ a:
―Veé cuano̱ nihánj me se a̱j quisíj ya̱ nu̱ꞌ nana̱ nihánj, ne̱ ꞌu̱nj si̱j nayaa nana̱ nihánj cuno soj me síí quiꞌya̱j nu̱ꞌ se vaa taj nana̱ nihánj ado̱nj ―taj Jesús rihaan nij soꞌ a.
22Sa̱ꞌ uxrá caꞌmii Jesús, cataj nij yuvii̱, ne̱ caráyaꞌa̱nj nij soꞌ cuno nij soꞌ se vaa veꞌé uxrá vaa nana̱ caꞌmii Jesús a. Ga̱a ne̱ dan me se xnáꞌanj nij soꞌ man tuviꞌ nij soꞌ sese né taꞌni̱j José síí ya̱nj chiháán nij soꞌ me soꞌ a. 23Cheꞌé dan me caꞌmii Jesús nana̱ nihánj rihaan nij soꞌ a:
―Neꞌén ꞌu̱nj se vaa cata̱j soj nana̱ nihánj rihanj a: “Sese ya̱ si̱j naquiꞌyaj conoꞌó man yuvii̱ mé so̱ꞌ, ne̱ naquiꞌya̱j conoꞌó so̱ꞌ man ma̱ꞌán so̱ꞌ á”, cata̱j soj rihanj cheꞌé se cuno soj se vaa queꞌe̱e̱ suun sa̱ꞌ noco̱o quiꞌyáj chumanꞌ Capernaum a. Ne̱ cata̱j soj rihanj se vaa qui̱ꞌyáj suun sa̱ꞌ noco̱o chumanꞌ chiháán níꞌ nihánj uún a. 24Tza̱j ne̱ vaa nana̱ nihánj nana̱ cata̱j ma̱ꞌanj rihaan soj uún a: “Xa̱ꞌ síí nataꞌ snana̱ Yaꞌanj, tza̱j ne̱ ne amán rá nij síí ma̱n chiháán soꞌ niꞌya̱j nij soꞌ man soꞌ maꞌ”, me nana̱ taj ꞌu̱nj rihaan soj a.
25’Dan me se cuno̱ soj caꞌmi̱j á. Ga̱a cayáán Elías síí nataꞌ snana̱ Yaꞌanj ga̱a naá, ne̱ cachén vaꞌnu̱j yoꞌ táá néé, ne̱ ne cama̱nꞌ, ne̱ cheꞌé dan guun uxrá xꞌnaa nu̱ꞌ chiháán nij síí israelitá a. Yoꞌ dan me se cayáán queꞌe̱e̱ chana̱ caviꞌ nica̱ chiháán nij síí israelitá, 26tza̱j ne̱ ne caꞌne̱j Yaꞌanj man Elías ra̱cuíj soꞌ man nij noꞌ maꞌ. Tana̱nj rihaan ꞌo̱ chana̱ nique̱ yaníj ya̱nj Sarepta chumanꞌ noco̱ꞌ man Sidón caꞌnéé Yaꞌanj man Elías, ne̱ racuíj Elías man noꞌ ado̱nj.
27’Ne̱ neꞌen soj se vaa queꞌe̱e̱ yuvii̱ quiranꞌ ndoꞌo luj riꞌyuj cayáán chiháán nij síí israelitá ga̱a cayáán síí cuꞌna̱j Eliseo síí nataꞌ snana̱ Yaꞌanj ga̱a naá a. Tza̱j ne̱ a̱ ꞌó nij soꞌ ne nahu̱un maꞌ. Tana̱nj o̱rúnꞌ síí cuꞌna̱j Naamán síí cavii rej yaníj cuꞌna̱j Siria nahuun, quiꞌyaj Eliseo ado̱nj ―taj Jesús rihaan nij síí ma̱n rá veꞌ tucuꞌyón nii stucua̱nj Moisés veꞌ ya̱nj chiháán Jesús a.
28Cuno nij yuvii̱ nda̱a vaa cavii sa̱ꞌ nij síí ma̱n chumanꞌ yaníj, ne̱ guun xco̱j ruva̱a̱ rá nij soꞌ, ne̱ cuyanj rá nij soꞌ niꞌya̱j nij soꞌ man Jesús a. 29Naxuma̱a̱n nij soꞌ nica̱j nij soꞌ man Jesús caꞌanj nij soꞌ tuꞌva chumanꞌ a. Ne̱ dan me se chumanꞌ yoꞌ roꞌ, naj xráá ꞌo̱ tacaan ruva̱a̱ ndoꞌo a. Ne̱ nica̱j nij soꞌ man Jesús caꞌanj nij soꞌ rej ruva̱a̱, ne̱ guun rá nij soꞌ ta̱nij nij soꞌ man Jesús rej ruva̱a̱ a. 30Tza̱j ne̱ cachén u̱u̱n Jesús scaꞌnúj nij yuvii̱, ne̱ caꞌanj soꞌ na̱nj ado̱nj.
Quirii Jesús man ꞌo̱ nana̱ chre̱e nimán ꞌo̱ snóꞌo a
31Ga̱a ne̱ caꞌanj Jesús chumanꞌ Capernaum chumanꞌ na̱j estadó Galilea, ne̱ güii naránj rá nij yuvii̱ israelitá caꞌanj Jesús veꞌ tucuꞌyón nij soꞌ stucua̱nj Moisés, ne̱ tucuꞌyón soꞌ snana̱ Yaꞌanj man nij yuvii̱ a. 32Ne̱ caráyaꞌa̱nj nij yuvii̱ cheꞌé stucua̱nj soꞌ, cheꞌé se ase vaa aꞌmii ꞌo̱ síí uun chij ndoꞌo roꞌ, da̱nj caꞌmii soꞌ rihaan nij yuvii̱ a.
33Ne̱ dan me se yáán ꞌo̱ síí nu̱u̱ nana̱ chre̱e nimán rá veꞌ yoꞌ, ne̱ nucua̱j ndoꞌo caguáj soꞌ, ne̱ cataj soꞌ a:
34―Jesús si̱j cavii Nazaret, me cheꞌé raꞌyunj so̱ꞌ man núj ga̱. ꞌNáꞌ so̱ꞌ ti̱ríꞌ so̱ꞌ man núj naꞌ. Neꞌenj mán so̱ꞌ se vaa Síí Sa̱ꞌ Ina̱nj cavii rihaan Yaꞌanj mé so̱ꞌ ado̱nj ―taj soꞌ quiꞌyaj nana̱ chre̱e nu̱u̱ nimán soꞌ a.
35Ga̱a ne̱ canica̱j Jesús caxríj yuva̱a̱ soꞌ man nana̱ chre̱e nu̱u̱ nimán snóꞌo yoꞌ, ne̱ cataj soꞌ a:
―Dínj tuꞌvá so̱ꞌ cu̱riha̱nj so̱ꞌ cuaj nimán síí nihánj á ―taj Jesús rihaan nana̱ chre̱e yoꞌ a.
Ne̱ tinaxruꞌ nana̱ chre̱e man snóꞌo rihaan nij yuvii̱, ga̱a ne̱ curiha̱nj nana̱ chre̱e nimán snóꞌo, tza̱j ne̱ ne quira̱nꞌ chiꞌii̱ snóꞌo a̱ maꞌ. 36Ga̱a ne̱ caꞌanj uxrá rá nij yuvii̱, ne̱ xnáꞌanj nij soꞌ man tuviꞌ nij soꞌ, cataj nij soꞌ a:
―Da̱j si̱j me síí aꞌmii nana̱ nihánj, ne̱ uun chij soꞌ rihaan nana̱ chre̱e, ne̱ uriha̱nj nij nana̱ chre̱e nimán yuvii̱ ꞌyaj síí nihánj ga̱ ―taj nij yuvii̱ niꞌya̱j nij yuvii̱ man Jesús a.
37Ga̱a ne̱ chaꞌnuu̱ nana̱ cheꞌé Jesús rihaan cunuda̱nj nij yuvii̱ ma̱n nichru̱nꞌ rej yoꞌ a.
Nahuun nii che̱j Simón Pedró, quiꞌyaj Jesús a
38Dan me se curiha̱nj Jesús rá veꞌ tucuꞌyón nij síí israelitá stucua̱nj Moisés, ne̱ caꞌanj soꞌ tucuá síí cuꞌna̱j Simón a. Ne̱ ranꞌ nii che̱j Simón chiꞌii̱ nacaa yuva̱a̱, ne̱ cheꞌé dan cachíín niꞌya̱j nii rihaan Jesús cheꞌé noꞌ a. 39Ga̱a ne̱ caꞌanj Jesús canicunꞌ soꞌ rej na̱j noꞌ, ne̱ caꞌneꞌ soꞌ suun rihaan chiꞌii̱ se vaa xꞌne̱e̱ chiꞌii̱ xráá noꞌ a. Ga̱a ne̱ nu̱ꞌ xꞌnéj chiꞌii̱ xráá noꞌ, quiꞌyaj Jesús a. Ne̱ veé ma̱an orá dan naxaga̱a̱ noꞌ, ne̱ quiꞌyaj chuvi̱i noꞌ cha̱ nij soꞌ na̱nj ado̱nj.
Nahuun queꞌe̱e̱ síí ranꞌ, quiꞌyaj Jesús a
40Cataꞌ güii, ne̱ nica̱j nij yuvii̱ cunuda̱nj tuviꞌ nij soꞌ síí ranꞌ queꞌe̱e̱ ndoꞌo chiꞌii̱, va̱j nij soꞌ rej ya̱nj Jesús a. Ne̱ caꞌanj Jesús, cutaꞌ soꞌ raꞌa soꞌ raa̱ nda̱a ꞌo̱ ꞌo̱ nij síí ranꞌ, ga̱a ne̱ nahuun ta̱ranꞌ nij soꞌ, quiꞌyaj Jesús a. 41Ne̱ queꞌe̱e̱ nij síí ranꞌ roꞌ, curiha̱nj nana̱ chre̱e nimán uún, ne̱ caguáj nij nana̱ chre̱e yoꞌ, ne̱ cataj nij soꞌ se vaa Taꞌníí Yaꞌanj me Jesús a. Tza̱j ne̱ nucua̱j caꞌmii Jesús rihaan nij nana̱ chre̱e, ne̱ ne caꞌve̱j Jesús caꞌmi̱i̱ nij soꞌ nana̱ vaa da̱nj a. ꞌO̱ se queneꞌen nij soꞌ se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me Jesús a.
Caꞌanj Jesús nu̱ꞌ nij veꞌ tucuꞌyón nij yuvii̱ israelitá stucua̱nj Moisés, ne̱ caꞌmii natáj soꞌ a
42Rej taxre̱j cavii Jesús chumanꞌ Capernaum caꞌanj soꞌ rej tacaan a. Ga̱a ne̱ nanoꞌ nij síí ma̱n Capernaum man soꞌ, ne̱ ga̱a nariꞌ nij soꞌ man Jesús, ga̱a ne̱ caráán nij soꞌ chrej rihaan Jesús se̱ caꞌanj soꞌ rej yaníj a. 43Tza̱j ne̱ cataj Jesús rihaan nij soꞌ a:
―Vaa ndoꞌo suun rihaan ꞌu̱nj caꞌa̱nj ꞌu̱nj ꞌó nij chumanꞌ uún, ne̱ nata̱ꞌ ꞌu̱nj nana̱ sa̱ꞌ cheꞌé da̱j vaa uun chij Yaꞌanj na̱nj ado̱nj. ꞌO̱ se cheꞌé nana̱ sa̱ꞌ nihánj me caꞌnéé Yaꞌanj manj ado̱nj ―taj Jesús rihaan nij síí ma̱n Capernaum a.
44Ga̱a ne̱ caꞌanj Jesús nij chumanꞌ ya̱nj nij yuvii̱ israelitá, ne̱ catúj soꞌ rá nij veꞌ tucuꞌyón nij yuvii̱ israelitá stucua̱nj Moisés, ne̱ caꞌmii natáj soꞌ nana̱ sa̱ꞌ a.
Currently Selected:
San Lucas 4: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica