Marocohacha Laenai 5
5
Cadara batane niha suujua cuhane moconajaaera letono siricha cachane
(Mt 8.28-34; Lc 8.26-39)
1-2Nitohaneein cuhin inae nemuri jerau turuuruha Cadara batane que jana, iniha cuha Jesosone jana jetaote, que tacaain coinetiha cue leinjiin cacha suujua cuhane moconajaaera letono siricha. Nii cacha jetaote atane bana caje uhin ai, 3ecu ichaohane jaun. Nitohaneein rai suujua cuhane moconajaaera letono sirihane jaun jetaote, cadena que niha natiin ichohana nainene chuni. 4Araai saain tijia aina biji ichohacuruha cadena quene niha natiin jetaote, molomolonijihanaane jaun, chatohaneein tenaa nainene nii chuni. 5Nii jaun jetaote, janotiin, jiichoo netojoeeinchuru ichatane janaauru amuhemujueein, atane banaauru ichoae amuhemujueein, eeheehejeein, ajeri jaberoco ichoae comohin, naaonjoain amuhemujue nii cacha. 6Nii jaun jetaote, coriaae uujiha Jesosone coaariin, jeluhariin coineteein nacatiha neseeonriaain ehequiin jetao:
7“Jiaonriha caniha nenoaain carerojoecaaine, acaihanijin nenaa Cana Coaunera Calaohi Jesoso. Jiaonriha atiin nohane Cana Coaunera coreniha chatohaneein caeteeine”, nae jetao 8nii cacha suujua cuhane nenaa moconajaaera letono. Nii cacha suujua jianeein amuhane coina: “Nii cacha suujua cuhane neein, cacha suujua aasaequine caje mituhin amuura moconajaaera letono”, naa Jesosone jaun. 9Niritiin jetaote:
“Tonaa ii curuaa”, naain caje bajaa Jesosone jana jetao:
“Jataain araaichaanune jaunte Lejion ne canu curuaara”, nae jetao Jesoso rai.
10Nejetaote, jelai batane caje jaoha Jesosone caohate jataain nii moconajaaera letono nii cacha suujueniha nenaa. 11Nii jana ichatane ucuuno rohan lenoniha neeuruha arajiin coosichurune jaun jetaote:
12“Atiin taa coosichuru suujua cuhane canacaanu letoaau”, naaure jetao Jesoso rai, nii moconajaaera letonocuru cacha suujua cuhane nenacaauru.
13Nii jaun caje bajaauruhane rijitojoeein jeriha Jesosone jaun jetaote, nii coosichuru suujuaniha enooruhane jaun, ucuhi caje nemaroteein acauhanau naluhin, acau que nereeonohin oore nii coroata oaraancai coosichuru.
14Nii jaun jetaote, nii coaraain jelai caje sorohin, neseu cuhin, nenaanajaauru, naaonjoainu cuhecujueein biha cuuruha nii coosichuru beraihurerane jaun jetao, turuhin coaraa cuure cachaauru. 15Nii jana jetaote, nii niha Jesosone jaun turuuruhane jana jetao, cojurihu cacha caohachaneein nenaa tocohaneein necoreeteein laujuae, nii suujua cuhane arajiin moconajaaera letono coitucuchuhi siricha cacha. Nii jana coaraain nesoonetooruha nii coaraa cunacaauru cachaaurune jana jetaote, 16nii coosichuru suujua cuhane enooruha nii moconajaaera letonocurune jana, ooruha nii coosichurune jana, nerautaa nii moconajaaera letono siricha cachane beeure nii coaraa cunacaauru rai, nii ecu neein coarajeeurera cachaauru. 17Nii jaun jetaote, chajaain erojoeein jelai caje amuha Jesosone luhecaaure cachaauru.
18Nii jana, inae jelaiha bote cuhane fauha cuha Jesosone jana jetaote, aina cuhane coina rai aite nii moconajaaera letono sirihane caje nerautanaa cacha. 19Nejetaote, aina cuhane jerelanaala:
“Chajaaincha chenenajaun cauhin, charaaichuru rene turuhin, cairichaaojoaain ii coaraain itolere ichaa iniha Cana Coaunerane benihu acaauru rai”, nae jetao rai Jesoso.
20Nii jaun jetaote, Decapolis batane que nenacaauru nenaanajaauru cuhecujueein, itolere ichaa coreniha Jesosone biha nii cachane jaun jetao, satiin cojoelatoore aonajeeurera cachaauru.
Jairo cacunu aina leinjiin ene rautaa Jesosone
(Mt 9.18-26; Lc 8.40-56)
21Nii baiha jelaiha nemuri jerau cauha cuha Jesoso, bote cuhane jana jetaote, najiniha arajiin netaojiaain cohacuruha nemuri auhaniha cachaaurune jaun jetao, ecu turuhin ne nii cachaauru aina Jesoso. 22Nii jana jetaote, turuha cue leinjiin sinacoca curuaanaa neein nenaa Jairo. 23Turuhin jetaote:
“Onaa jeriha canu cacunune jaunne ii coaraa uun. Chajaaute atiin nohane turuhin nichoae ii biji meracaute nerautaain ichaohine”, nae jetao Jesoso acatiha neseeonriaain nii Jairo.
24Nii jaun jetaote, aina cuha Jesosone jana, jiniichaain cuuruha arajiin cachaaurune jaun jetao, jataain arajiin cachaauru cataaun cuujue. 25Nii arajiin cunacaauru cachaauru jana jetaote cue, leinjiin ene lechoonca coroata jaanacaain jaberoco caje ichana jaohajeein nenaa. 26Aca jetaote, nii rai chaque nelatejeecane que airijiin jitariin niicha sirii jaohin arajiin cacha coichaeraauru que necoicharatihane niha natiin nerautasilanaala jataain taeneein cuujue nii rai cunai. 27Nii ene jetaote, Jesoso benaa inaaoriin cuhin coaraain, leeochaauru cachaauru jana cutiin, Jesoso janori nichae marotiin cajione auha mucuuri, 28“Caa cajione auha mucuurihanune niha natiine nerautareeunni”, naain esenetaane jaun. 29Nii Jesoso cajione mucuhane rijieeoritiin nesuruha ichanane jana jetaote, inae nerautanaaneein naonae rai jaberoco. 30Nii jana caje mituha niicha ichana nainei cacha rautaane jaaque nainaain jetaote, nii cachaauru coaraain:
“Chana toon cacajione mucue”, naa Jesosone jana jetaote:
31Tana jeranu ii sururucuruha cachaaurune coaraainete. “Chana toon cacajione mucue”, naain bajaai, naaure jetao Jesoso rai nii aina nerelanacauru.
32Nejetaote, rai cajione mucuera coaraane coina, nii rohan nenacaauru cachaauru cajanaain coarae Jesoso. 33Nii jaun jetaote, nesoone caaun rijijijianeein nacatiha neseeonriaain, nii suujue lanaala esinae rauhijiriin, “Naaonjoaain ii cajione mucuhanune rijieeoritiinne caa canu cunai caje nerautaaun”, naain be nii ene. 34Nii jaun jetaote:
“Ii rautana nainichaaunne esenetaaine jaunte, inae nerautaai. Raotojoeein raurohin caunihun”, nae jetao nii ene rai Jesoso. 35Niritiin ereereeca nii ene rai Jesosone jana jetaote, nii ranuna inaca sinacoca curuaanaa Jairo loreri caje turuha uure cachaauru. Rene turuhin jetaote:
“Inae oha ii cacunu. Coa inacojoeein nii cacha relaera reroecaa”, naaure jetao nii cachaauru. 36Nejetaote, nii acaauru aohana jerelanaala nii sinacoca curuaanaa rai jetao:
“Jiaonriha acaauru esenetaain nesooneeine. Raujiaaincha rautaanune esenetaau”, nae jetao Jesoso.
37-38Nitohaneein inae nii sinacoca curuaanaa loreri asae turuuruhane jana tonijiaain cojioriin chanaauruha cachaaurune jana jetaote, aina cuuruha leeochaaurune jerelanaala, Fedoro, Saantiaao, chaaen nii Saantiaao nejera Joaan, naaonjoainuri aina jiniiquiin enohin jetao:
39“Chanuna niritiin cojioriin chanaaiche. Coatiha ohane jaun aihei caa ranuna. Sinihane jaunte ai”, naa Jesosone jana jetaote, 40Jesoso coenacure cuu nenacaauru cachaauru. Nii jana jetaote, satiin nii cuu nenacaauru cachaauru mitaain, nii ranuna inaca aina neba, chaaen corihaniha cunacaauru, naaonjoainuri aina jiniiquiin nii ranuna rene enohin jetao, 41biji que mucuuriin:
“Talita coom”, nae jetao nii ranuna rai Jesoso. “Icheine aitoon ranuna. Nimichuu”, naa jetaote aite Jorioocuru ere cuhane.
42Nii rijieeoritiin nimichuhin ruharuhaca nii lechoonca coroata jaanacai ranunane jana jetaote, cojoelatiin coarajeeure nii cuu neein coarajeeurera cachaauru. 43Nii jana jetaote, jataain chuni rai beeuruhane caohatihane baiha jetao, nii ranuna coroaateeuruhane coina aite Jesoso.
Currently Selected:
Marocohacha Laenai 5: URA
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2005, 2024, Wycliffe Bible Translators, Inc.