Marocohacha Laenai 6
6
Nasarete cuha Jesosone
(Mt 13.53-58; Lc 4.16-30)
1Nii baiha jetaote, aina nerelanacauru aina jiniiquiin, jelai caje cuhin rai natane cauha cue Jesoso. 2Inae natane turuhin, nebetacanaa cojoanonaa bana sinacoca asae enohin cachaauru relaane nunuhetiha Jesosone jana jetaote, nii relanajaa Jesosone aonajeein jetao:
“Chuna nerelaete toritiin itolere coitucuhin que cacha relae. Chaa cajena itolere coitucutiin, chabana coaaraai cojoelanaacojoai ichaane coinane maajeein nerelae. 3Tana caa, Mariha calaohichuru Saantiaao, Jose, Jodasi, Simoon, naaonjoainuri nejera, tabara caje itolere rucuhele icharaneein nenaa carfinteroneein nerejetohane. Tana chaaen rai baihuru cau cana aina ichaaoruhane”, naain jetao ita caje bajaaure cojoelatiin, nii ecu arajiin nenacaauru cachaauru. 4Niritiin rai nere tonorana jerecurenihane jaun jetaote:
“Itolere banate niqui cuhane jaaunru, Cana Coaunera ere bera profeta que suujua acateein esenetaain neeure cachaauru. Nete laen rai natane nenacaauru naraaichuru que suujua acateein esenetana jerecurene. Niheichu nii nihane jaan loreri asaae nenacaauru niha natiin esenetaauruhi”, nae jetao acaauru rai Jesoso.
5Niritiin jetaote, ecu cojoelanaacojoai ichaelanaala, coroatajajeein ecu nenacaauru cunaitenacaauruhacha mucuhin rautanajae. 6Nitohaneein esenetana jerecureniha cachaaurune jaun jetaote, acaauru cojoelate Jesoso.
Cana Coaunera cojoanonaa beebejeeuruhane coina aina nerelanacauru letoaa Jesosone
(Mt 10.5-15; Lc 9.1-6)
Nii baiha jetaote, Nasarete rohan nenacaauru neseeuru cuhecujueein, cachaauru relaa cue Jesoso. 7Nitohaneein jetaote, leeocha neseeuru cuhecujueein cacha suujua cuhane nenacaauru moconajaaera letonocuru coitucuchuichuru sitaain cachaauru rautaauruhane coina nii lechoonca coroatajaain aina nerelanacauru cotijiaain cocoainanajaain letoanajae coroatajaanana coroatajaananaain Jesoso. 8Nitohaneein letoanajaain jetaote, acaauru atora, acaauru achano, coriqui, naaonjoain amaelanaala, 9acaauru safatocuruhacha curujuaain, nii necoreeteeuruhane coina acaauru cajione amaelanaala, acaauru biji achuneecha baaejeein bero cuhane cuuruhane coina acaauru rai aite. 10Niritiin letoanajaain jetaote:
“Leinjiin loreri asae turuhichene, ecu sinihuche inaraacha ichai nainaain jelai caje amuhichene reentiaain. 11Chunijihun turuhichene jaaunru, caohachaain inara coaana jerelanaala inara aohana jerecurenihane, jelai caje amuuche, inara safato que nenaa utoone riariaain ratiriin, inae nitajeeuruhane rai neeuruhane que nainacuruhane coina”, naain jetao nii aina nerelanacauru letoae Jesoso.
12Nitohaneein cuhin jetaote, nacoaauneein Cana Coaunera coitucuhin aca jerihane rijijieein neeuruha cachaaurune coina acaauru rai aitiin, 13arajiin moconajaaera letono sirichaauru cachaaurune maajeein raautaain, arajiin cunaitenacaauru rautaaure erene que rujuanajaain nii aina nerelanacauru.
Oha Joaan Baotisitane
(Mt 14.1-12; Lc 9.7-9)
14Nitohaneein itolere ichaa Jesosone beeuruha itolere sacuritaainne jaun jetaote, Erodesi netonai coitucue.
Chaaen jetaotechu: “Joaan Baotisitate ichanacaihara. Nii jaunte, nii itolere cojoelanaacojoai ichana naineraneein necaihara”, naa Erodesine jana jetaote; 15“Jerihanete Profeta Erihasinecaihara”, naaure leeochaauru. Nii jana leeochaauru jetaote: “Inoaenlu profetacuru rijijieein nenaa profetate aicaihara”, naaure. 16Nejetaote, niritocuruhane aonajihane jaun: “Acate Joaan ne. Rai nuluno moloeratihanulu natiinte, inae nacoaauneein oo caje ichanacaihara”, nae jetao Erodesi.
17Erodiasi coreniha jetaote, Joaan mucuerateein cadena que ichojoaain caresero cuhane terate Erodesi. Nii Erodiasi jetaote, Erodesi nejera Ferifi comasaineein nelu. Nejetaote, comasaineein sirilu Erodesi nii rai nejera comasainihane saijieein. 18Nii jaun jetaote:
“Jiaonriha ii comasaineein taa inejera comasai siriinera”, nae jetao Erodesi rai Joaan.
19Niritoha Erodesi rai nii Joaane caje coaauneein jetaote, nii Joaan cotaairiin sohin jaohene rijitojoeein nerejete Erodiasi. 20Nejetaote sohin jaonaa nainene, esinae rauhijiriin leinjiin cacha saantoneein Cana Coaunera letononeein nihane coitucuhane jaun, coasiha cocoaerateraneein niha Erodesine jaun. Nitohanihane jaun jetaote, iriha Joaane rautatiin aonaane jaun nii aina chatoanai niicha ichanenu coitucuelanaala ne Erodesi. 21Nejetaote, nejanoha bajaanaa bitoaane coina lenone jaain, que jauriineein nenacaauru curuaanaacuru, chaaen rai soondarooru curuaanaacuru, chaaen Calileea cocoaichacuru jataain nelatecuri cotijiaain beseta ichaa Erodesine jana jetao, Joaan sohin jaohene rijitojoenajaaocane jana, suujua rijijieein erue Erodiasi. 22Nii jana jetaote, nii beseta ichaane jaa coloheri asaae enohin raansaa cuha nii Erodiasi cacunune jana jetao, nii raansaane jana rautatiin coaraje Erodesi, nii ecu aina lenoniha nenacaauru aina jiniiquiin. Nii jana jetaote:
“Joaereen iicha jerei bajaau cacajene ichei tera. 23Cana Coaunera notaracaene chaelai, iicha jerei bajaain cacajene tereeunicha. Nainichaaun cataaun leruhin caa quiicha beraai atane tihanunera”, nae jetao araai saain nii ranuna rai Erodesi. 24Nii jaun jetaote, jelai caje mituhin:
“Cha bajareeun cajete oma”, naa cuha neba raine jana jetaote:
“Chajaain ena caje Joaan Baotisita couturi bajaau”, nae jetao nii ranuna neba.
25Nii jaun jetaote, jelaiha soroneein enohin jetao:
“Ena carai leinjiin plato cuhane Joaan Baotisita couturi teeinene jereeun”, naa jetao cue nii ranuna Erodesi rai.
26Nii jaun jetaote, jataain inaderae Erodesi. Nejetaote, satiin niicha cotihacuri urichoo Cana Coaunera notaracae aitohane jaun, nii caje niicha bajai tenaa nainenihane que aitona nainene. 27Nitohanihane jaun jetaote, nii rijieeoritiin leinjiin soondaro letoae Erodesi, Joaan couturi molohin raa cuhane coina. 28Nii jaun jetaote, caresero cuhane cuhin Joaan couturi molohin leinjiin plato cuhane uhaain, nii ranuna rai tiha soondarone jaun jetao, neba rai te nii ranuna.
29Nii jana jetaote, inae nitohaneein Joaan teeuruhane coitucuhin jetao, nii Joaan jaberoco raain conautiha cuure sacuureraauru.
Saoqui oaraancai cachaauru rai lenone faa Jesosone
(Mt 14.13-21; Lc 9.10-17; Jn 6.1-14)
30Nitohaneein letoanajaa Jesosone caje turuhin jetaote, aina netaojiaain itolere ichaain Cana Coaunera ere que cachaauru relaain, naaonjoaauruhane beeure Jesoso rai, nii lechoonca coroatajaain niicha cocoainaauri afosotoorune jana jetaote:
31“Chajaauchete neniha cachane jaun cuhin, jelai raotojoeein nebetacanichaachera”, nae jetao acaauru rai Jesoso, cauhajeeuruhane niha natiin arajiin turuhajeeuruha cachaaurune jaun, lenonecuruhane teeureniha acaauru raine jaun. 32Nii jaun jetaote, leinjiin bote cuhane fauhin neniha cachane jaun, jelai Jesoso aina cuure nii niicha cocoainaauri afosotooru. 33Nejetaote, arajiin cacha cuuruhane coarajihane jaun, nii cuuruhane jaan jelai coitucuhin, satiin neseeuru caje arajiin cuhin jetao, acaauru ajiniha soroneein jeluhariin cuhin turuure. 34Nitohaneein cuhin acaauru ajiniha turuuruhane jaun jetaote, ecu turuhin bote caje iniha cunajaun jetao, arajiin ecu cachaauru coaraa Jesosone jana, beraicha colane nenaa carenerocuru rijijieein aihuruhane jaun jetao, cairichaaojoaain acaauru coaraane jaun, ecu araai laurii niicha coitucuhi que relanajae Jesoso. 35Nii jana inae sohane jaun jetaote, rohan nichuuntaain:
“Inae soha. Coatiha nihei caa jana cacha. 36Chajaain cachaauru rai necoeeute ichuun nenacaauru nenaanajaauru, neseeuru, naaonjoainuri cuhin, chaelai lenone ariin coretiha cuuruhine”, naauruha aina nerelanacaaurune jana jetaote:
37“Niriimiin. Chajaain acaauru coroaateeuche inara”, naa Jesosone jana jetaote:
“Aihana jaunna, coroata fashai denario coreneein faan coretiha cuhacaanune jereei, acaauru coroaatichaachene coina”, naaure Jesoso rai aina nerelanacauru. Nii le denariote le jiichoo amihanenaa core ne. Niritocuruha aina nerelanacaaurune jaun jetaote:
38“Inatajaain faan siriquiche. Chajaain coaanihuche”, naa Jesosone jaun, coaraain jetaote, “Saoquijieein faan, ita que jerajejeein ate, naajeeinchate neeje”, naaure jetao aina nerelanacauru.
39Nii jaun jetaote, joaenreen omane ichoae nelauriaauruha cachaaurune coina aitoha Jesosone jaun jetao, 40tabaauru le fashaain, tabaauru saoqui chooncaain, naaonjoaain neleruhin nelauriaaure cachaauru. 41Nitohaneein laurianaacane baiha jetaote, nii saoquii faan aina coroatajai ate raaoriin jabaaequiin dede coarajeein jetao, Cana Coaunera bajaain cataaun faan taturiin aina nerelanacauru rai te jetao Jesoso, cachaauru rai chaluuruhane coina. 42Nitohaneein jetaote, jerecuruhane jaaun tiaojoaain nainaain lenonecuruhane baiha, 43lechoonca coroata omariin, nii faan aina ate caute que omari memoaaure.
44Saoqui oaraancai cachaauru jetaote, nii saoquii faan que lenonecure, acaauru rai faa Jesosone jaun.
Acau choae amuha Jesosone
(Mt 14.22-27; Jn 6.16-21)
45Nii baiha jetaote, aina nerelanacauru letoae, bote cuhane fauhin nemuri jerau Betesaaidau ichoaichaniha turuuruhane coina. Nii tonohanau jetaote, ecu nedaain cachaauru rai necoe Jesoso. 46Inae cachaauru rai nocoihane baiha jetaote, ichatane ucuuno que cuhin Cana Coaunera bajaa cue. 47Nii jana jetaote, inae nocohejihane jana, nemuri cataaun cuujeeure nii aina nerelanacauru bote cuhane. Nii jana jetaote, ecu jelai atane choae jaiti nihane jana, 48acaauru que tacaain uha cujuanane jaun, necairichajeein taraacajeein cuujueeuruhane coaraje Jesoso. Nii jana inae janohe lalajihane jana jetaote, acaauru caaijie acau choae cuhin acaauru rohan situha cunaa rijijieein acaauru nichae cuujue. 49-50Nitohaneein acau choae cuujihane jana, satiin coaracuruhane jaun jetaote, nesoonetiin anucainiha beein auhaaocure. Nii rijieeoritiin jetaote, acaauru rai:
“Jiaonriha inacojoeein nesoonetiin casiichene. Canune aihunra”, naain, 51acaauru aina bote cuhane fauha Jesosone jana jetaote, inae nesuruha cujuanane jaun, jataain cojoelatoore, 52nii cojoelanaacojoaain faan faain acaauru notaacane sainejeein itolere ichana nainihane que nainelanaala, “Naaonjoaane jaunte catohanei ichae”, naain coitucunaa nainecurenihane jaun.
Jenesaree batane turuhin cunaitenacaauru rautaa Jesosone
(Mt 14.34-36)
53Nitohaneein cuhin nemuri jera jaooruhane jaun jetaote, Jenesaree batane turuhin, ecu acaauru bote jauriaain cositeeure. 54Inae bote cositeein caje inihuruhane rijieeoritiin jetaote, Jesoso nihane coitucuure nii cocoaichacuru cachaauru. 55Nii jaun jetaote, satiin nii jelai batane sacuritaain nii niha Jesosone jaan jelai coitucuhin jetao, rene cunaitenacaauru amaaure ela cuhane tijichanajaain. 56Chunijihun nenaanajaauru, neseeuru, berooru cuhane, naaonjoainu cuha Jesosone jaaunru jetaote, najiniha situnajaaunru jeloon ela choae cunaitenacaauru teein, Jesoso rai aitocure, cajione auha mucuuruhane coina. Nitohaneein satiin Jesoso cajione mucuurera cunaitenacaauru jetaote, nerautaacoaaure.
Currently Selected:
Marocohacha Laenai 6: URA
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2005, 2024, Wycliffe Bible Translators, Inc.