Lucas 7
7
Jesupi Romano Jo'yaëre Jujuye
(Mt 8.5-13)
1Jesús coca ca tëjini saji'i, Capernaum yejana. 2Ja̱rote romano soldado pa̱i capitán i̱ jo'yaë i̱ oiquëre papi ju̱ni huesë tëjiquëre paquëpi paji'i. 3Ja̱je pa'ina, capitánpi Jesure asani jëjo saopi, judío aiohua'i acohua'ini, dani i̱ jo'yaëre jujucaija̱'quëre se̱ni daja̱'cohua'ire caquë. 4Ja̱ohua'i Jesure tsioja̱ni ai se̱ huëohuë, ñeje cajë:
“Iye capitán de'oquë api, më'ëpi i̱te co̱cati'ñe pa'i a'ë. 5Cui'ne judío pa̱ire oiquë api. Ja̱je yo'oquëpi pa̱i tsi'si huë'e sa̱icaina, mai se̱core nehuë.”
6Ja̱je cajëna, Jesús asani i̱ohua'i ja̱'re co̱ni saji'i. Saijë i̱ huë'e ti̱'añe ja'i macare pa'ijëna, capitánpi jëjo daopi i̱ cajeohua'ire Jesure ñeje quëaja̱'cohua'ire:
“Ëjaë, ai yo'oma'ë pa'ijë̱'ë. Ja̱je pa'ina, cayë yë'ë co'aquë huë'ena daima'ë pa'ijë̱'ë. 7-8Yë'ë ëjaohua'i cua̱ñeñere yo'oquë pa'iquëpi yë'ë soldado pa̱ire meñe cua̱ñequëna, sehuocohua'ire payë. Ja̱je paquëpi yë'ëpi cayë, ja̱ohua'i aquëni: ‘Saijë̱'ë,’ caëna, saiji. Cui'ne yequëni ‘daijë̱'ë’ caru, daiji. Cui'ne yë'ë jo'yaëni: ‘ja̱re nejë'ë’ cua̱ñeru neji. Ja̱je më'ëpi co'yajë̱'ë cua̱ñeru, yë'ë jo'yaëpi co'yasipi asayë, yë'ë. Ja̱je pa'ina, daima'ë cua̱ñejë'ë, yë'ë jo'yaë co'yaja̱quë.”
9Ja̱je case'ere asani Jesús ai sihuapi, ta̱'ñe caquëre papi pa'iquë'ni caquë. Ja̱je cuasani i̱te tuicohua'ire capi:
“Ti ñama'ë paë'ë, Israel pa̱ipi ja̱je yë'ëre necaija̱'quë api cuasacohua'ire iquë yo'ose'eje̱ care paye.”
10Ja̱ maca i̱ jëjo daosicohua'i huë'ena co'ini capitán jo'yaë tsoe co'yasiquëni ti̱'ahuë.
Po̱së Ju̱'isiquëre Huëoye
11Iye yo'osi jeteyo'je Jesús saji'i, Naín hue'e daripëna. Saina, cui'ne i̱ ye'yacohua'i cui'ne jai pa̱i co̱ni saë'ë. 12Pa̱i daripë eta sa'rona ja'ye ti̱'asi maca ju̱'isiquëni ta̱ñu'u cajë sacohua'ire ñapi. Jai pa̱i co̱ni saë'ë, i̱ti daripë acohua'ije̱. Pëca ja'quë ju̱quëna, hua'jeopi te'ire nëcoquëpi ju̱'isiquë paji'i. 13Ja̱je saijëna, Ëjaëpi ja̱ote teaye ñani oi capi:
“Oima'o.”
14Ja̱ maca Jesús tsioja̱ni mahuëna patopi. Patoquëna, i̱ti sacohua'i nëcaja̱ë'ë. Ja̱ maca Jesús ju̱'isiquëni capi:
“Po̱së, yë'ëpi cayë më'ëre, huëijë̱'ë.”
15Caquëna, i̱ti ju̱'isiquëpi huëni ja'runi coca ca huëopi. Pëca ja'cona huëoni i̱sipi, Jesús. 16Ja̱ maca iyere ñani si'ahua'i quëquëni Maija'quëre de'oquëre pa'ni sihuajë ca huëohuë ñeje:
“Mai aquëpi Maija'quë quëacaiquë pa'iji, jerepa pa'ipi.”
Cui'ne cahuë:
“Maija'quëpi i̱ pa̱ire co̱casi'i caquë daji'i.”
17Ja̱je Jesús yo'ose'ere Judea pa'icohua'i cui'ne Judea yeja niamoa pa'icohua'ije̱ asahuë.
Juan Ti Doquë Jëjo Saocohua'i Jesuna
(Mt 11.2-19)
18-19Juanpi si'aye iye yo'ose'ere asapi, i̱te ye'yecohua'ipi quëajëna. Ja̱je asani daija̱'quë api ca nëosiquë ¿Cristorepa pa'ima'quë, panita'a ja̱ yë'ta'a yequëre uteye pa'iquë? cuasaquë i̱ ye'yacohua'ire cayahua'ire soini Jesús quë'rona jëjo saopi, se̱ni asaja̱'cohua'ire. 20Jëjo saosicohua'ipi Jesús quë'rona ti̱'ani cahuë:
“¿Cristo i̱ti daija̱'quë api ca nëosiquë pa'ima'quë më'ë? Pa̱nita'a ja̱ yë'ta'a ¿yequëre uteye pa'iquë? caquë Juan oco doquëpi yëquëre jëjo daopi.”
21Sa ti̱'ajëna, Jesupi jai pa̱ire ju̱'icohua'ire cui'ne ai yo'ocohua'ire huati quë'iohua'ire eto saoquë, cui'ne ñama'cohua'ire jujuquë yo'opi. 22Yo'oquëni se̱jëna, Jesupi sehuopi, ja̱ohua'ire:
“Sani Juanre cajë̱'ë: Mësaru ñajë cui'ne asase'ere quëajë̱'ë, ñama'cohua'i pa'isicohua'i ñañere, cu'ima'cohua'i pa'isicohua'ipi cu'iyere, ja̱'ju dahuë hue'ecohua'ipi peocohua'i to̱meñere, asama'cohua'ipi asayere, ju̱'isicohua'ipi huëiyere, cui'ne teaye ai yo'ocohua'ini huaso coca quëayere. 23Coa asani yë'ëre i̱re papi caquë jëa coeye pa̱quëpi sihuaquë de'oye pasipi.”
24Juan jëjo daosicohua'ipi co'isi maca Jesupi pa̱ire ca huëopi, Juan ayere ñeje:
“¿I̱quere sani ñare'ni, cue̱ne yeja saisicohua'i? ¿Tutupi ca̱tëna ju'aquëna, huahuëyere ñare? Pa̱ni. 25Ja̱je pa'ina, ¿i̱quere sani ñare'ni? ¿Ëja de'oni jai do'i ca̱ñare ju'iquëni ñare? Pa̱ni. Ja̱je pa'ina, mësarupi ñacohua'i a'ë, pa̱i ëjaohua'i huë̱'ña pa'icohua'ipi jai do'i ca̱ñare ju'ijë pa'icohua'ire. 26Ti̱jupë cayë, ja̱je pa'ito: ¿I̱queini sani ñare'ni, Maija'quë jëjo daoquë? Ja̱je pa'ijë̱'ë. Nuñerepa cayë, Maija'quë quëacaiquë jerepa pa'i api. 27Toyase'e cato caji:
Jëjo saosi'i, yë'ëre quëacaiquëre më'ë sai hue̱'ñana
Më'ëre ma'a ne de'huacaija̱'quëre.
28Ja̱je pa'ina, cayë, mësarute. Pa̱i pa'i hue̱'ñana iquë Juan oco doquëje̱ pa'i ti peopi, Maija'quë quëacaiquë jerepa pa'i. Ja̱je pa'iquëta'are ai a'riquë macapi Maija'quë pa'i te̱'te jerepa pa'i pa'ija̱'quë api.”
29Ja̱je caquëna, asani si'aohua'i Juanre oco do cua̱ñosicohua'i co'a pa̱i cui'ne pa'i do'i curi se̱cohua'i Maija'quë de'oyerepa yo'ose'ere sihuajë nuñerepa pa'i api, Maija'quë. 30Ja̱je pa'iquëta'are Juan oco do cua̱ñoma'cohua'ipi fariseo pa̱ipi cui'ne cua̱ñese'e ye'yacohua'ipi Maija'quë i̱ohua'ire caquë yo'oyere asacaiye coereña, co'aye a'ë cajë. 31Ëjaëpi yequeje̱ capi:
“¿I̱quena co̱ni iye'në pa̱ire ja̱ yo'oyeje̱ pa'iohua'i a'ë caquë quëara'ye? ¿I̱que yo'oyeje̱ pa'iohua'i ña cua̱ñoñe'ni? 32De'oji, ja̱je pa'ito tsi̱pi jai pa̱i pa'i hue̱'ñana ca̱'a yo'oñu'u cajë ja'rusicohua'ipi caje tsi̱ni pi̱'cohuëre jucacaitoje̱ bailaye pa̱huë. Cui'ne oiyeje̱ pa'iohua'ita'a jë̱jëñere jë̱jëcaitoje̱ oire paye pa̱huë. Yure pa'icohua'i cui'neje pa'iyë. 33Juan oco doquëpi ai a̱ima'quëpi cui'ne o'sa u̱cuma'quëpi pa'ina, mësarupi i̱te huati quë'i api cayë. 34Ja̱ jeteyo'je Pa̱i Mamaquë daji'i, a̱o a̱iquëpi cui'ne o'sa u̱cuquëpi. Ja̱je pa'ina, mësarupi jaiye a̱iquë api cui'ne jaiye o'sa u̱cuquë api, co'aye yo'ocohua'i cajeipi cui'ne pa'i do'ire curi se̱cohua'i cajeipi cayë. 35Ja̱je pa'iquëta'are Maija'quë mamajëpi i̱ i̱ñoñere cayahua'i yo'oye de'oji, asayë.”
Fariseohua'i Aquë Simón Huë'ere Pa'iye
36Fariseo aquëpi Jesure soipi, i̱ huë'ena sani a̱o a̱ijë'ë caquë. Soina, Jesús sani a̱o a̱i saihuëna ja'rupi. 37Ja'runi ñu'ina, i̱ti daripë, te'o nomio co'aye pa'isicopi asani i̱ pa'i hue̱'ña daco'ë, ai huëo së̱ ma'ña da'care quë̱na huëna daco. 38Dani i̱opi Jesús quë̱no macana do're ja'runi oio i̱o oi copi i̱ quë̱o tsoani jeteyo'je i̱o nañapi të̱no cue̱nani tsu̱'suco sihuaco huëo së̱ ma'ñapi i̱ quë̱oje doco. 39Ja̱je yo'ocona, fariseo Jesure soisiquëpi ñani cuasapi: “Iquë Maija'quë coca quëacaiquërepa pani i̱te co'a nomiopi papico yo'oye asara'pi, co'a nomiopi yo'oco caquë.” 40Cuasaquëna, Jesupi fariseore capi:
“Simón, më'ëre yeque maña caye payë.”
Caquëna, fariseopi sehuopi:
“Cajë̱'ë, ye'yaquë.”
41Jesupi capi:
“Curiquë prestaquëni caya ë̱mëohua'i curire co'yoye pa̱huë. Quinientos denario te'ipi do'i pa̱pi, yequëpi cincuenta denario do'i pa̱pi. 42Ja̱je do'i pacohua'ipi sa̱i ti̱'añe pa̱jëna, ñani curiquë prestasiquëpi ja̱ohua'ire oi i̱pi sa̱i de'huapi. Ja̱je pa'ito yure quëajë̱'ë. ¿Nepi ja̱ohua'i aquë ai jerepa oiye'ni, i̱te?”
43Caquëna, Simónpi sehuopi:
“I̱ti ai jaiye do'i pasiquëpi i̱te sa̱i de'huacaisiquëre ai oji'i, cuasayë.”
Ja̱je caquëna, Jesupi sehuopi:
“Nuñerepa cayë, më'ë.”
44Ja̱ maca Jesús nomiore ñani capi, Simónre:
“¿Ñaquë i̱o yo'oye? Më'ë huë'ena yë'ë caca maca më'ëpi oco dacaima'ë paë'ë, yë'ë nëcañoa tsoa ja̱'ñere. Ja̱je pa'iquëta'are icopi i̱o oisi ocopi tsoacaco'ë, nëcañoare cui'ne nañapi të̱no cue̱nao. 45Më'ëpi sihuaquë pëpama'ë. Ja̱je pa'iquëta'are i̱o cato caca macapi sihuao de'oyerepa pëpao, ja̱ yë'ta'a yo'oco. 46Më'ëpi yë'ëre si̱opë hui'yape pe̱'nama'ë paë'ë. Ja̱je pa'iquëta'are i̱o cato yë'ëre huëo së̱ ma'ñapi nëcañoana doo. 47Ja̱je pa'ina, më'ëre cayë, i̱o ai oio yo'oyepi i̱o jaiye co'aye yo'ose'ere sa̱i de'hua cua̱ñosico pa'io, i̱ñoco. Ja̱je pa'iquëta'are a'ri mañare sa̱i de'hua cua̱ñoquëpi a'ri maña oiyere i̱ñoji.”
48Ja̱je se cani capi, i̱ote:
“Më'ë co'aye yo'oco pa'ise'e sa̱i de'huacaë'ë.”
49Ja̱je caquëna, soisicohua'i ñu'icohua'ipi sa̱'ñe i̱ohua'ija̱'a ca huëohuë:
“¿I̱quei'ni, iquë ja̱je co'aye yo'ose'ere sa̱i de'huacaiquë?”
50Ja̱je cajëta'are Jesupi capi, i̱ote:
“Maija'quëpi huasoja̱'quë api cuasani yo'o do'ire huasosico pa'iyë, më'ë. Se̱ñaco de'oye saijë̱'ë.”
Currently Selected:
Lucas 7: sey
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2012, Wycliffe Bible Translators, Inc. All rights reserved.