Lucas 8
8
Jesure Co̱caicohua'i Nomiohua'ipi
1Ja̱ jeteyo'je Jesús jai daripë̱ana cui'ne a'ri daripë̱ana si'a hue̱'ña cu'i quëaroja̱i, cui'ne Maija'quë cua̱ñe te̱'tena cacani de'oye pa'iyere quëapi. I̱te co̱huë, doce i̱ ye'yacohua'ipi. 2Cui'ne nomiohua'ipi huati quë'iohua'i pa'isicohua'i cui'ne i̱pi ju̱'i dahuëje̱ jujucaisicohua'ipi i̱te co̱ni cuahuë. Ja̱ohua'i ja̱'re co̱ni María Magdalena hue'ecoje̱ saco'ë, i̱ti siete huatiohua'ire eto cua̱ñosicopi. 3Cui'ne Herodes yëyere i̱se'e cuasaquë huë'e de'oye necaiquë Chuza i̱ nëjo Juana cui'ne Susana, cui'ne jai pa̱i yequë nomiohua'ije̱ i̱ohua'i co'amañapi co̱caë'ë, i̱te.
Ta̱quëpi Pa'iye
(Mt 13.1-9; Mr 4.1-9)
4Pa̱i daripë̱a ñape etani daë'ë, Jesure ñañu'u cajë. Ja̱je jai pa̱i datena, ñani quëapi, i̱ohua'i ñañe ayena. Caquë i̱ñoquë ñeje capi:
5“Ta̱quëpi ta̱si'i caquë tsiona sani i̱ti ca̱re je̱aquëna, ma'ana to̱mepi. To̱meina, cu'icohua'ipi tsacu huesohuë, cui'ne yequë ca̱re pi̱'api o̱cue huesohuë. 6Yequë ca̱pi to̱mepi, quë̱na yejana. To̱meni ai de'oquëta'a ocopi peoquëna, cue̱ne ju̱ji'i. 7Yequë ca̱pi to̱mepi miu pi̱si quë'rona. To̱meni ai de'oquëna, pi̱sije̱ te'e ai de'oni hue̱ hue̱api. 8Cui'ne yequë ca̱pi to̱mepi de'o yejana. To̱meni ai de'oni cien ca̱ jaiye i̱ti ñëa ñape quë̱ji'i.”
Ja̱je iyere Jesús ca tëjiquë ai tutu capi:
“Mësarupi ca̱joro quë'iohua'i pani asajë̱'ë.”
Me Ne Ja̱'ñere Pa̱i Ñañena Co̱ni Quëaë'ni
(Mt 13.10-17; Mr 4.10-12)
9Ja̱ maca i̱ ye'yacohua'ipi se̱i'ë: ¿I̱quere ja̱ më'ë ja̱je quëaë'ni, i̱ohua'i ñañena co̱ni? 10Cajëna, i̱pi ja̱ohua'ire sehuopi:
“Maija'quë i̱ te̱'te ayere pa̱ije asa ti̱'a ma'ñere i̱ñoquëna, de'hue asayë, mësaru. Ja̱je pa'iquëta'are yecohua'ini cayë iye yo'oyeje̱ pa'ye a'ë caquë i̱ohua'i ñañe ayepi i̱ti ñajëta'a ña ma'ñeje pa'iohua'i pa'iyere caquë. Cui'ne i̱tire asajë coa noni asa huesojë ti asa ti̱'añe pa̱jajë caquë.
Ta̱quë Quëase'e Ayere
(Mt 13.18-23; Mr 4.13-20)
11Iye a'ë. Iye quëase'e caye: I̱ti ca̱ cato Maija'quë cocaje̱ pa'ye. 12Ma'a cato quëaji, Maija'quë coca asacohua'ini. Ja̱je asacohua'ini huatipi dani i̱ohua'i joñoana de'huase'ere peo hue̱'ña jioni asama'cohua'ire neni ne huesoyere quëaji. 13Quë̱na yejana i̱ti ca̱ to̱mese'e cato Maija'quë cocare du'ru macarepa sihuajë asasicohua'ipi pa'ijëna, jeteyo'je ai yo'oyepi ti̱'asi maca yo'o jujani je̱ocohua'ini quëaji. 14Miu pi̱si quë'rona i̱ti ca̱ to̱mese'e cato quëaji. Asajëta'a ja̱ yë'ta'a i̱ohua'i ai cuasayere yo'ojë pa'icohua'ini ja̱je yo'ojë co'amaña jaiye payena cuasajë cui'ne yeja sihuayere yëjë co'a ju̱'ijëna, pi̱si meapi hue̱ hue̱añeje pa'ye yo'oquëna, i̱ti ca̱ quë̱ima'pë pa'iyere. 15Cui'ne yequë ca̱ de'o yejana to̱mese'e cato quëaji, de'o joyopi ja̱je yo'oñu'u cajë asacohua'ini cui'ne yëhuose'ere asani cui'ne yo'ocohua'ipi cui'ne yo'o jujama'cohua'ipi nuñerepa i̱tire pa'ijë i̱ti ca̱ quë̱icohua'ije̱ pa'icohua'i pa'iyere.
Miacaiye Ayere Quëaye
(Mr 4.21-25)
16Toa tsë̱oma'cohua'i a'ë, tsë̱oni jeteyo'je yequë co'amañapi si̱oja'coni panita'a ca̱i saihuë huë'ehuëna nëcoja̱'coni. Ja̱je yo'oye pa̱jë coa ai jerepa ë̱mëje'na nëcojë yecohua'i cacajëna, miacaija̱'core. 17Yahuese'epi ti yahue huesose'e pani huesoye peoji. Cui'ne pa̱i asa ma'ñepi ti asama'pëna, pa'iye peoji. Si'aye asa ja̱'ñe a'ë, ti̱ñarepa.
18Ja̱je pa'ito de'oye asajë̱'ë. Ja̱je pa'ina, paquëna ai jerepa se i̱si co̱ñe pa'iji. Ja̱je pa'iquëta'a peoquëni ai jerepa se si̱o co̱ñe pa'iji, i̱ payë, cuasase'e mañaque si'aye.”
Jesús Pëca Ja'co Cui'ne I̱ Yo'jeohua'i
(Mt 12.46-50; Mr 3.31-35)
19Ja̱ maca Jesús pëca ja'co cui'ne i̱ yo'je tsi̱ co̱ni ti̱tahuë, i̱ pa'i hue̱'ñana. Ti̱tasicohua'ita'a jai pa̱i pa'i do'ire i̱ pa'i hue̱'ña ti̱'añe pa̱huë. 20Ja̱je pa'ina, yecohua'ipi Jesure quëahuë:
“Më ja'co cui'ne më'ë yo'je tsi̱ co̱ni hue'sere pa'iyë, më'ëni ñañu'u cajë dani.”
21Cajëna, i̱pi capi:
“Maija'quë coca asani cui'ne i̱ti cayeje̱ yo'ocohua'ipi yë'ë ja'co cui'ne yë'ë yo'je tsi̱ pa'iyë.”
Jesupi Tuture Cui'ne To̱'añere Cua̱ñeñe
(Mt 8.23-27; Mr 4.35-41)
22Te'e mu'se Jesús jai yohuëna i̱ ye'yacohua'i ja̱'re co̱ni tu̱mëni capi:
“Jaira je te̱'tena je̱ñu'u.”
23Caëna, ja̱ je̱'ejëna, Jesús ca̱ji'i. Ca̱ina, ai tutu dapi. Jairare pa'ijëna, tutu dani co'poyepi yohuëna oco ti̱më huëopi, ea du'iye ja'i macarepa. 24Ña quëquëni ca̱iquëre sëtoni cahuë:
“Ye'yaquë, Ye'yaquë, ea du'iyë, mai.”
Cajëna, Jesús huëni nëcani tuture cui'ne co'poyere yo'oma'o capi. Ca macarepa tsi̱ña de'huaje̱ pa'iorepa de'opi, ti co'poma'co. 25Co'poma'co de'ona, i̱ ye'yacohua'ire capi:
“¿Je ja'ye tsoe Maija'quëpi necaija̱'quë api cuasaye je̱ore?”
Ja̱je caquëna, ja̱ohua'i cato quëquë huesësicohua'ipi ai ñahuë. Ñajë i̱ohua'ija̱'a sa̱'ñe cahuë:
“¿I̱queire pani, iquë, tutu cui'ne oco asani sehuocaiquërepa?”
Huatiohua'i Pa'ise'e Gadara Yeja Aquëre
(Mt 8.28-34; Mr 5.1-20)
26Ai yo'osi jeteyo'jere papi Gadara yejana ti̱'ahuë, Galilea je̱'ñerepa pa'icona. 27Ti̱'ajëna, Jesús tu̱maquëna, te'i ë̱më i̱ti daripë aquëpi tsio daji'i. Ai tsoe iquë huatire hue'equëpi, ju'i ca̱ñaje ju'ima'quëpi cui'ne huë'eje̱ pa'ima'quë paji'i. Ja̱je pa'ipi coa pa̱i ju̱'isicohua'ire ta̱ hue̱'ñare pare iquë paji'i. 28Ja̱je pa'ipi Jesure ñani ta̱ni do're ja'runi ai cuipi:
“¿Me yo'oquë Jesús yë'ëre jo̱sa yo'osi'quë daiquë'ni, Maija'quërepa mamaquëpi? Se̱ñë, më'ëre. Yë'ëre jo̱sa yo'oma'ë pa'ijë̱'ë.”
29Iye cato Jesupi huatire etani saijë̱'ë, cua̱ñequëna, ja̱ do'ire ja̱je capi. Iquë cato huatipi i̱te jo'ya nesiquëre papi ai tsoe. Ja̱je pa'ina, pa̱ipi i̱te quë̱na meapi sëahuë, saima'ë pa'ija̱'quë cajë. Ja̱je yo'ojëta'are huatipi tutu i̱siquëna, ne tëte saoquë saiquëpi pa̱i peo yejana huatipi saquëna. 30Jesupi capi, i̱te:
“¿I̱que mami a'ni, më'ë?”
Se̱ina, i̱pi sehuopi:
“Yë'ë Legión hue'equë a'ë.”
Ja̱je cani capi, huatiohua'ipi i̱na jai pa̱i cacani pa'i do'ire. 31Ja̱je pa'ijë huatiohua'ipi Jesure se̱i'ë. Jëjo saoma'ë pa'ijë̱'ë, nejo hue̱'ñare pana cajë. 32Coa se̱se quë'rona jëjo saojë̱'ë, yëquëre cahuë, ai cu̱tihuëre jai pa̱i se̱se nëijë a̱icohua'ina. Cajëna, Jesupi de'oji, sehuouna. 33Pa̱ite pa'isicohua'ipi etani se̱sena cacahuë. Cacajëna, se̱se jai hua'que të̱'tëpapi to̱mejë jairana dutu ju̱juhuë.
34Ja̱ maca i̱ti se̱sere ñacaicohua'ipi ña quëquëjë huë'huëni pa̱i darina cui'ne yequë hue̱'ñana i̱ti yo'ose'ere quëahuë. 35Quëarena, pa̱ipi ñañu'u cajë saë'ë. Saijë Jesús pa'i hue̱'ñana ti̱'ajë ñajëna, huati quë'i pa'isiquëpi i̱ quë̱no macare ju'i ca̱ su̱ñasiquëpi dahuëre pa'ipi yo'oma'quëpi ñuji'i. Ñu'ina, ñani ai ca'rahuë. 36Ja̱ maca i̱ti ñasicohua'ipi daripëpi daisicohua'ire quëahuë, huati quë'i pa'isiquëni Jesupi jujuse'ere, nuiñere cuasaquëre. 37Ja̱re asani Gadara yeja pa̱ipi si'ahua'i i̱ni ai ca'ra do'ire se̱i'ë. Saijë̱'ë. I̱ño pa'ima'ë pa'ijë̱'ë cajë. Ja̱je cajëna, asani Jesupi jai yohuëna aya mëni saji'i. 38Saina, i̱ti huatire eto sao cua̱ñosiquëpi sajë̱'ë yë'ëreje̱ caquë se̱ji'i. Se̱ina, Jesupi i̱te pëajë̱'ë, cani capi:
39“Co'ijë̱'ë, më'ë huë'ena. Co'ini si'aye më'ëre Maija'quë ne de'huase'ere quëajë̱'ë.”
Ja̱je caëna, sani si'a daripë cu'i quëapi, Jesús i̱te ne de'huase'ere.
Jairo Mamaco Cui'ne Jesús Ca̱ñare Patoco
(Mt 9.18-26; Mr 5.21-43)
40Ja̱je Jesús jaira je te̱'tepi co'ina, si'ahua'i i̱te utejë pa'isicohua'ipi sihuajë pëpahuë. 41Pëpa maca Jairo hue'equëpi pa̱i tsi'si huë'ere ñacaicohua'i ëjaëpi ti̱tapi. Ti̱tani Jesús quë̱o yë'quë maca do're ja'runi yë'ë huë'ena daijë̱'ë, caquë se̱ji'i. 42Te'o macare mamacore paquëni, doce o̱metëca pacopi, ju̱ni huesë tëjicona. Se̱quëna, jujucaija̱'quë Jesupi ja̱rona saji'i. Saina, jai pa̱i co̱ni qui'iyerepa saë'ë. 43Saquëna, saru dahuë ju̱'icopi ai yo'oco paco'ë, tsieje̱ tëcama'ona doce o̱metëca. Ja̱je pa'iopi jujucohua'ini juju cua̱ñosi'i caco si'aye i̱o curi sa̱io sao. Ja̱je yo'otoje̱ jujuye peopi. 44Ja̱je ai yo'ocopi Jesure tsioja̱ni tuni i̱ ju'i ca̱na patocona, ja̱re i̱ti macapi tsie tëcapi.
45Ja̱je patocona, Jesupi se̱ji'i:
“¿Nepi yë'ëre patore'ni?”
Caquëna, si'ahua'i cahuë:
“Pa̱huë, patoye.”
Cajëna, Pedro cui'ne i̱ cajeohua'i co̱ni cahuë:
“Ye'yaquë, jai pa̱i si'a te̱'ñapi jë'jejëna, ñaquëta'a se̱quë'ni, ¿nepi yë'ëre patore'ni?”
46Cajëna, Jesupi capi:
“Asayë, yë'ë tutupi yë'ëre patosicore jujuse'ere.”
47Ja̱ maca tsoe co'yasico pa'io yahue yo'ose'e peoquëna, tsoe asapi caco ca'raco tsa'sico dani do're ja'runi Jesús quë̱o yë'quë macapi quëao, si'ahua'i ñajëna, i̱o cuasani yo'ose'ere cui'ne i̱o pato macapi esa co'yase'ere. 48Quëa maca Jesupi capi:
“Huau, më'ëpi jujuja̱'quë api cuasani yo'osi do'ipi jujusico pa'iyë, më'ë. Se̱ñaco de'oye saijë̱'ë.”
49Ja̱ yë'ta'a Jesús cocare caquëna, Jairo huë'epi dani ti̱taquë Jairore capi:
“Më'ë mamaco tsoe ju̱co'ë. Ye'yaquëre ai jerepa jo̱sa yo'oma'ë.”
50Caquëna, Jesupi asani capi, Jairore:
“Quëquëma'ë pa'ijë̱'ë. Yë'ëpi jujuja̱'quë api caquë utejë̱'ë. Ja̱je cuasaquë utequëna, më'ë mamaco co'yasico pasio.”
51Huë'ena ti̱'asi maca te'ireje̱ co̱ñe pa̱pi, i̱ caca hue̱'ña. Coa Pedro, Jacobo, Juan cui'ne tsihua'o pëca ja'quë cui'ne pëca ja'co ja̱ohua'ise'e cacahuë, i̱ ja̱'re co̱ni. 52Si'ahua'i oë'ë, co'a ju̱ë'ë, i̱oni cuasajë. Ja̱je oijëna, Jesupi capi, ja̱ohua'ire:
“Oima'pë pa'ijë̱'ë. Tsihua'o ju̱'ima'o paco'ë. Coa ca̱ico.”
53Caquëna, tsoe ju̱'isiconi caji cajë i̱ cayere cue'cuejë sohuë. 54Ja̱ maca Jesupi ju̱'isico jë̱tëna tse̱ani capi:
“Tsihua'o huëijë̱'ë.”
55Ja̱je caquëna, i̱ti macapi pa'i huëo cui'naopi, nëcaco. Nëcacona, ja̱ maca Jesús a̱ore a̱ojë'ë cua̱ñepi. 56Pëca ja'quëohua'ipi ai cuasahuë, i̱ti yo'ose'ere. Ja̱ maca Jesupi cua̱ñepi, iye yo'ose'e yecohua'ire ti quëama'pë pa'ijë̱'ë, caquë.
Currently Selected:
Lucas 8: sey
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2012, Wycliffe Bible Translators, Inc. All rights reserved.