Luk 24
24
Jisɔs ɛnyamɛ gɔ ɛbku
1Gɔ ngbɔga mbang ɛfong Ɛkɔbashi, fonfo brɛbrɛ, abǝkal kɔ akam na aking nfam nya bɔ lime nɔ tam na nya gɔ ɛlam bi bɔ ramɛ Jisɔs. 2Bɔ shɔng nyenɛ na ɛbtal mibangɛ gɔ nyɔ ɛlam, 3Na bɔ yɛlɛ gɔ atang; bɔ nyenim ngɔbjing a Ntol a Jisɔs. 4Na bɔ yimi ɔ jɔ kɛrɛ lagɛ, abolom abal shɔrɔ lɔng gɔ abara abɔmɔ nya kpe nyanɛ biyimi tɔb bɔ. 5Ɛfafal bɔb bɔ, bɔ kɔgɔ ashimar gɔ ndi, abolom banu kim bungɔ tɔng bɔ rɛ, “Jɛn ji wangɛ nkpe shɛbɛ nɛ abir gɔ ɛblɔngɔ akunɛ? 6Yɛ kpɛm le a; a nyamɛ! Bomo ji a tɔngɔ wan, gɔ garɛ nyi akpagɛ le na nanɛ gɔ Galili rɛ: 7‘Bɔ kpe fagɛ Mɔna Nlolom ka anɛ ba abi afɛm, komɛ gɔ ɛjangɛ ɛte ji bɔ shege na ntɛm, gɔ nfong ɛra a fɛrɛ nyamɛ gɔ ɛbku.’ ”
8Ɔwɔ abǝkal banu bomo alom ɛnye.
9Ɔji bɔ lɔngɔ gɔ ɛlam krɛ, bɔ bǝtɔrɔ nshɔl nyaa kpɛk kpɛ tɔng alɔgɔ ɛbtom Ɛshɔwɔ ɛwobo a nɛ awɔng na anɛ bagɔ kpɛk kpɛ. 10Abǝkal ba jɔlɔ ɔ, Mɛri Madalen na Joanna na Mɛri nyen a Jɛmshi na abǝkal bagɔ ba tɔb jɔlɔ ɔ bɔ ba tɔngɔ akpɛlɛ Jisɔs nshɔl nyaa kpɛk kpɛ. 11Wɔ akpɛlɛ Jisɔs tire rɛ abǝkal banu jɔ bungɔ ɛbgbɔlɔ, bɔ tamim tu bɔ. 12Pita mɛlɛ bɛ tam gɔ ɛlam; na akimɛ nɔ fang, anyɛnɛ abɔmɔ nyanya ɛjomjom akpɛm nyen. Ɔwɔ anyar lamɛ nɔ afɛrɛ krɛ jɔ kɛrɛ ji mǝlim.
Jisɔs tebe atɔtɔnɔ ɛbɛ ɛnɛ gɔ mbang a Ɛmmayɔs
(Mak 16.12,13)
13Ɛfong biyɔ fufɔ atɔtɔnɔ Jisɔs abal jɔ tamɛ gɔ ɛjabɛ ji bɔ lɔngɔ rɛ Ɛmmayɔs, ji kpe ringe malɛ ɛshima bɔmɔ gɔ Jɛrushɛlɛm. 14Bɔ jɔ tobo ɛka na atɛm lagɛ kpɛk kpɛ nshɔl nyi milim. 15Na bɔ jɔ tobo ɛka shɔngɔ, Jisɔs bǝyɛl bɔ gɔ ɛblɔng jɔ jɛn na bɔ; 16bɔ nyenenyen wɔ bɔ mɛ malim linge.
17Jisɔs kim babɛ bɔ rɛ, “Ɛjomaji nkpe bungɔ na atɛm, na nkpe jɛnɛ shɔngɔ?”
Bɔ bɔb yimi, na ashimar ndɔndɔn. 18Awɔng nɔ bɔ kpejɔ lɔngɛ rɛ, Kleopas, kimawɛ bab rɛ, “Wɔ njɛn nɛ nyi gɔ Jɛrushɛlɛm nɔ ki nyi nshɔl nyi milim gɔ abɔn afong ba?”
19Akim babɛ bɔ rɛ, “Nshɔl anyi?”
Bɔ fangɛ rɛ, “Ɛkpe bungɔ nshɔl nyi milim lagɛ Jisɔs nɛ a Nasarɛt, Nlolom nɔa jɔlɔ ntinge ateb Ɛshɔwɔ nɔ Ɛshɔwɔ na anɛ kpɛk kpɛ kɔyɛ nɔ na nɛ nɔ kpe ɛkɔ gɔ ɛjom ajingajingɛ ji ajɔ bung fɛrɛ lim. 20Atoboɛshi a bajɔmanjɔm Ɛshɔwɔ ɛnyarɛ na ba file aji kim ɛlam fagɛ ka rɛ bɔ wolɛ, ɔwɔ bɔ komɛ gɔ ɛjangɛ ɛte ji bɔ shege na ntɛm. 21Wɔ war jɔ tire rɛ yɛ wɔ kpe bagɛ jɔlɔ nɛ nɔ le tarɛ anɛ ba Isɛrɛl! Anu ɛring nfong ɛra lɛl nyi nshɔl nyaa kpɛk kpɛ lime nɔ. 22Rɛ nkpɛkpɛlɛ ɔ, abǝkal bandige gɔ gra ɛblɔng bungɔ ɛjom ji lamɛ war anyar; bɔ jɛ gɔ ɛlam lɛl fonfo, 23bɔ nyenim ngɔbjing ɛnye. Bɔ fɛrɛ bǝkeme tɔng war rɛ bɔ nyenɛ balɔgɔ ɛbtom Ɛshɔwɔ, ba tɔngɔ bɔ rɛ anyamɛ. 24Ɔwɔ ɛgɔɔm ɛjarɛ jindige jɛ gɔ ɛlam shɔng nyen naji abǝkal banu bungɔ nɔ, wɔ bɔ fufɔ mɛtɔbim nyen.”
25Ɔwɔ Jisɔs kim bungɔ tɔng bɔ rɛ, “Ngbɔlɔ shing, jɛn ji wangɛ nkigol bɛl ɛbtamɛ tu gɔ kpɛk kpɛ nshɔl nyi ntinge ateb Ɛshɔwɔ bungɔ nɔ! 26Nyim rɛ Krayis kpenyɛnɛ ɛrɛm gɔ nshɔl nyaa kpɛk kpɛ akim yɛlɛ gɔ ɛblobo ɛnɛ a?” 27Jisɔs kim lingɛ tɔng bɔ nya bɔ bungɔ nɔ lagɛ gɔ nwɛr Ɛshɔwɔ bɔmɔ gɔ nwɛr a Mosis ring gɔ nya ba atinge ateb Ɛshɔwɔ yɛlɛ nɔ.
28Na bɔ jɔ kabɛ ɛjabɛ ji bɔ fenɔ, Jisɔs jɔ lime na akpagɛ le shɔrashi ɛbjɛn.
29Wɔ bɔ gbɔngɛ rɛ atir, “Jɔl nabɔ; teb ngarɛ ɛjɛ ɛgong ɛkabɛ, ɛfong yagɛ mal.” Ɔwɔ atamɛ shɔng ji na bɔ. 30Na aji gɔ ɛkpokoro na bɔ, a kɔ ɛbrɛd, kag Ɛshɔwɔ sham, bag ka bɔ. 31Ɔwɔ amar lingɛ bɔ bɔ lingɛ, ashɔrɔ lamɛ bɔ mɛkpɛm nyen. 32Bɔ jɔ babɛ atɛm rɛ, “Ɛbtem jɔm yɛbɛ wara ɔji ajɔ bung na narɛ gɔ mbang lagɛ nwɛr Ɛshɔwɔ a?”
33Bɔ mɛlɛ tutu tam nyi Jɛrushɛlɛm. Ɔwɔ bɔ shɔng kpere alɔgɔ ɛbtom Ɛshɔwɔ ɛwobo a nɛ awɔng gba ɛkan na anɛ bagɔ 34jɔ bung rɛ, “Ɛlɔgɔlɔgɔ! Nshɔ ɛbnyamɛ gɔ ɛbku. Bǝlɔng gɔ ji Sayimɔn!”
35Ɔwɔ abolom abal banu kim jɔ tɔng bɔ ji lime gɔ mbang, na na bɔ lingɛ Jisɔs ɔji abagɛ ɛbrɛd.
Jisɔs lɔngɔ bǝtebe ɛnɛ gɔ ɛblɔng atɔtɔnɔ ɛbɛ
(Matiyu 28.16-20; Mak 16.14-18; Jɔn 20.19-23; Acts 1.6-8)
36Na abolom abal ba jɔ tɔng bɔ ɛka jiya, gɔ ndoando nyiɔ Jisɔs nfɔnɔ lɔng bǝyɛl bɔ gɔ ɛblɔng kim bungɔ rɛ “Ɛbkɔnɔ jɔl ananɛ.”
37Ɛfalfal bɔb bɔ, rɛ bɔ nyen ɛtɔgɔ nkunɛ. 38Ɔwɔ akim tɔngɔ bɔ rɛ, “Jɛn ji wangɛ nkpe ɛfige ɛnanɛ ayɔ? Jɛn ji wangɛ nki kpe ɛbtamɛ gɔ gana ntem? 39Bɔngɔ gɔ abɔ ɛnyamɛ na ata ɛnyamɛ, akpe nyenɛ rɛ mɛ nfɔnɔ wɔ! Lagim abɔ nɔngɔ wɔ nyen rɛ mɛwɔ; ɛtɔgɔ nim jɔ bɛl ngɔbjing na akab, na akpim nyenɛ nkpenɔ.”
40Ɔji abungɔ nɔ mal, akim tebe bɔ abɔ na ata ɛnye. 41Wɔ ɔji bɔ ki tir tamɛ, teb ɛyɛbɛbtem na anyar nya lamɛ bɔ, ɔwɔ akim babɛ bɔ rɛ, “Nkpekpe ɛjom alɛgɛ ajingajingɛ aa ji ɛlɛga?” 42Bɔ kayɛ ɛrɔgɔ nsharɛ nyi bɔ lamalam, 43a tarɛ li gɔ ɛshimar ɛbɔ.
44Ɔwɔ akim tɔngɔ bɔ rɛ, “Nshɔl nyaa nyi tɔngɔ wan lagɛ ngarɛ nyi nkpagɛ le na nanɛ: ajingajingɛ ji bɔ yɛlɛ nɔ lagim gɔ nwɛr ajang a Mosis, na nyi Atinge ateb Ɛshɔwɔ na nyi sam kpejɔlɔ nɔ.”
45Ɔwɔ alingɛ nteme bɔ nɔngɔ bɔ bɛl ɛblingɛ lagɛ Nwɛr Ɛshɔwɔ, 46akim tɔngɔ bɔ rɛ, “Jiya ji bɔ yɛlɛ nɔ rɛ: Krayis kpe tir nyenɛ ɛrɛm gɔ nfong ɛra akim fɛrɛ nyamɛ gɔ ɛbku. 47Nwɛr Ɛshɔwɔ tɔb bungɔ rɛ gɔ mbing ɛnye bɔ kpe tɔngɔ anɛ rɛ bɔ tamɛ tu Ɛshɔwɔ, nɔngɔ bɔ yangɛ gɔ abi afɛm aleme nɔngɔ ji Ɛshɔwɔ le tam ka bɔ. Bɔ kpe tinge anɛ ɛteb biya gɔ ɛbjabɛ kpɛk kpɛ, bɔmɔ gɔ Jɛrushɛlɛm. 48Wan ba le atiyanshɛ gɔ nshɔl nyaa. 49Nkpe tomo tu wan ji Nshɔjamɛ tɔngɔ nɔ. Wɔ ji wan gɔ Jɛrushɛlɛm wan babɛ tɛtɛ mbɛl ɛkɔ gɔ ji Ɛshɔwɔ gɔ rɔ.”
Jisɔs fɛrɛ tam GƆ RƆ
(Mak 16.19,20; Acts 1.9-11)
50Ɔwɔ atabɛ bɔ lɔng naba gɔ Jɛrushɛlɛm tam nyi Bɛtani, a taba abɔ ɛnye gɔ rɔ folo bɔ.
51Na ajɔ folo bɔ, a tam bɔ sha Ɛshɔwɔ tabɛ tam gɔ rɔ.
52Bɔ jige fɛrɛ krɛ nyi Jɛrushɛlɛm, na njijɔgɔ ɛyɛbɛbtem. 53Bɔ tɔgɔ jɛ shɔng sha gɔ ɛtak gɛ Ɛshɔwɔ tɛtɛ jɔ jigɛ.
Currently Selected:
Luk 24: NBP
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
©️2024 Luke Initiative for Scripture Translation