Luk 23
23
Bɔ kɔ Jisɔs ba wɔ gɔ ji Pilɛt
1Ɛblɔng anɛ kpɛk kpɛ tamɛ yimi tab Jisɔs tamawɔ gɔ ji Pilɛt. 2Bɔ jɔ kim afangɛ lagɛ Jisɔs rɛ, “Ɛbɔbɔ nlolom nɔa kpe tebe anɛ ɛbra abi abang, akpe tɔngɔ bɔ rɛ bɔ nkǝ kpee atakshi ka Sisa rɛ yɛ wɔ le Krayis, nɔ le Ntol.”
3Ɔwɔ Pilɛt kim babɛ Jisɔs rɛ, “Wɔwɔ le Ntol a Aju a?”
Jisɔs kim fangɛ rɛ, “Wɔwɔ bungɔ nɔ.”
4Pilɛt kim bungɔ tɔng atoboɛshi a bajɔmanjɔm Ɛshɔwɔ na ɛblɔng anɛ kpɛk kpɛ rɛ, “Nyenim ɛbe ɛjom ji nlolom nɔa milim ji nle kayɛ ɛbe.”
5Wɔ bɔ tirim tamɛ, bɔ yimi nkongonkongo rɛ, “Teb ɛbtebe ɛnɛ ni miba na mburu ka anɛ gɔ ɛbjabɛ Judiya kpɛk kpɛ. Abɔmɔ gɔ Galili anu aring aa.”
Pilɛt tomo Jisɔs tu Ɛrɔd
6Na Pilɛt wogo nshɔl nyaa kpɛk kpɛ, akim babɛ rɛ, “Nlolom nɔa lɔng Galili a?” 7Ɔji agbɛrɛ nɔ rɛ Jisɔs lɔng gɔ ɛjangɛ ɛbjabɛ ji Ɛrɔd le ntol, a tomɛ tu gɔ ji Ɛrɔd, nɔ tɔb jɔlɔ gɔ Jɛrushɛlɛm ngarɛ nyiɔ. 8Ɔji Ɛrɔd nyenɛ Jisɔs, ɛbtem yɛbɛ, teb mbang ɛblab nyi akimɛ shɛbɛ rɛ anyɛnɛ, teb awog lagɛ, a jɔ shɛb rɛ nu anyɛnɛ atɔb bilim ajene nshɔl yɛ nyen. 9Ɛrɔd kim jɔ bab Jisɔs ababbɛ gbalɛgbalɛ, wɔ Jisɔs mɛ kam nfangɛ anyinganyingɛ.
10Atoboɛshi a bajɔmanjɔm Ɛshɔwɔ na batetebe ajang a Mosis yimi ɔ jɔ kime afangɛ gbogbo lagɛ Jisɔs. 11Ɛrɔd na ashɔja ɛnye jɔ nyɔgɔ Jisɔs fɛrɛ rɔdɛ jɔ ta ntua. Bɔ kagɛ nɔbɔ ɛlamɛ, a fɛrɛ tomɛ tu Pilɛt. 12Ɛfong biɔ Ɛrɔd na Pilɛt bɔngɔ ɛtɛm; teb wogowogo bɔ jɔɔm kono.
Pilɛt kim ɛlam rɛ bɔ wol Jisɔs
(Matiyu 27.15-26; Mak 15.6-15; Jɔn 18.39—19.16)
13Pilɛt lɔngɔ atoboɛshi a bajɔmanjɔm Ɛshɔwɔ, na ba bungɔ nfam, na anɛ bagɔ tu ɛji ajing, 14kim tɔngɔ bɔ rɛ, “Wan mba na nlolom nɔa gɔ gamɛ ɛji rɛ akpe buru aji. Wɔ mɛ fɛdɛ gɔ ganɛ ɛshimar, agbɔm ajang nyaa nya tɔngɔ nɔ. 15Nɔwɔ Ɛrɔd tɔb nyenɛ rɛ ɛjomjom alemim, afɛrɛ tomɛ tu war. Ɛjomjom nlolom nɔa limim ji fomo rɛ akpɔ. 16Nlega, tɔng wan rɛ nduɛna yagɛ abɔ atam.”
17Anu fofomo rɛ atir yege nɛ agbakɔbɔ awɔng ka bɔ gɔ ngarɛ Ɛbkak gɛ Ɛbshiri.#23.17 Awɛr nyandige kpɛm ngbag nyaa nyi ɛko ɛbal wɔ le gɔ nwɛr a Matiyu 27:15 na Mak 15:6, Jɔn 18.39
18Ɛblɔng anɛ kpɛk kpɛ binge rɛ, “Wolɛ! Wɔ yagɛ Barabbas ka war!” 19(Bɔ tomo Barabbas ngbakɔbɔ gɔ mburu nyi jɔlɔ gɔ ɛjabɛ, na nɛ nɔ awolo nɔ.)
20Pilɛt jɔ shɛbɛ rɛ a yagɛ Jisɔs, ɔwɔ ajɔ bung na bɔ gɔ nkpɛlakpɛlɛ. 21Wɔ na bɔ jɔ bibinge rɛ “Komɛ gɔ Ɛte ji bɔ shege na ntɛm! Komɛ gɔ Ɛte ji bɔ shege na ntɛm!”
22Pilɛt kpɛ bung tɔng bɔ gɔ nkpɛlɛ ɛra rɛ, “Jɛn ji? Ɛbe ɛjom aji aleme lim? Mɛ nyenim ɛbe ɛjom ajingajingɛ ji amilim ji fomo rɛ akpɔ! Nlega tɔng wan rɛ duɛ na yagɛ abɔ atam.”
23Ɔwɔ bɔ tongo jɔ bibinge gbogbo rɛ bɔ tir kokom Jisɔs gɔ ɛte ji bɔ shege na ntɛm, gɔ ɛbkrɔ ɛnɛ abinge bɔ lɔng ɛshi ka bɔ. 24Ɔwɔ Pilɛt kim ɛlam rɛ bɔ wol Jisɔs na bɔ jɔ shɛb. 25Pilɛt yege Barabbas gɔ ngbakɔbɔ teb mfam aburu na nɛ nɔ awolo nɔ na bɔ shɛbɛ nɔ, fagɛ Jisɔs ka bɔ rɛ bɔ lim na kɔrɔ bɔ.
Bɔ komo Jisɔs gɔ ɛte ji bɔ shege na ntɛm
(Matiyu 27.31-44; Mak 15.21-32; Jɔn 19.17-27)
26Na ashɔja jɔ tam na Jisɔs, bɔ kpere nlolom awɔng nɔ bɔ jɔ lɔngɛ rɛ Sayimɔn nɔ lɔng Syrene. A jɔ ba nyi ɛjabɛ. Bɔ bɔbɛ, shiyɛ ɛjangɛ ɛte ji bɔ shege na ntɛm, a jɔ tɔnɔ Jisɔs.
27Ɛblɔng anɛ gbalɛgbalɛ tɔnɛ, kpɛlɛ na abǝkal ba jɔ ling jɔ magɛ kayɛ. 28Jisɔs kɛbɛ bɔngɔ bɔ tɔng bɔ rɛ, “Abǝkal lɛ Jɛrushɛlɛm, kim kpɛ ling wan; ling wan ɛnanɛ na abɔn ɛbanɛ. 29Teb ɛfong kpe bagɛ bi nle bung rɛ, ‘Ɛyɛbɛbtem na agom, ka abǝkal ba ki jɛl, na abɛl nya ki lɛɛ abɔn!’ 30Ngarɛ nyiɔ anɛ le tɔng nwarɛ ɛwɔng rɛ, ‘Gbɔ bolo war!’ Fɛrɛ tɔng rɛdɛ wɔng rɛ, ‘Brɛ war!’ 31Rɛjɔlarɛ anɛ kpemalɛ lim nshɔl nyaa ɔji ɛte kpagɛ le mberber, rɛjɔl rɛnan ɔji mɔwomo?”
32Abolom abal bagɔ, ba gbɔajang, bɔ tɔb yege bɔ kpɛlɛ na Jisɔs shɔng wol. 33Ɔji bɔ ringe gɔ ɛji ji bɔ lɔngɔ rɛ “Nkpagɛ ɛhi”, ɔwɔ bɔ komo jisɔs gɔ ɛte ji bɔ shege na ntɛm, kpɛlɛ na anɛ abal ba gbɔajang, awɔng gɔ ɛjang ɛbɔblom ɛbɛ, nɔgɔ gɔ ɛjangɛ ɛbɔbkal ɛbɛ. 34Jisɔs kim bungɔ rɛ, “Tam ka bɔ, Nshɔ! Bɔ nyim ji bɔ kpe lime.”#23.34 Agbɔgɔ mbang awɛr ɛfonfo nyandige kpem alom nya.
Bɔ bangɛ abɔmɔ ɛnye jɔ ta ntua. 35Anɛ yimi ɔ jɔ nyen. Ba bungɔ nfam Aju kimɛ nyɔgɔ Jisɔs rɛ: “Atarɛ anɛ bagɔ; nɔngɔ atɔb tarɛ ɛnɛ rɛjɔlarɛ yɛ Krayis wɔ nɔ Ɛshɔwɔ jagɛ nɔ!”
36Ashɔja fufɔ jɔ tɔb nyɔgɛ: bɔ ba bǝkperɛ kayɛ ɛkang amam, 37bɔ rɛ, “Tarɛ ɛnawɔfɔnɔ rɛjɔlarɛ wɔ Ntol a Aju wɔ!”
38Bɔ yɛlɛ alom nyaa, gɔ mɔ ɛkpagɛte lagɛ gɔ ɛte ji bɔ shege na ntɛm ji bɔ komo Jisɔs, nya lɔngɔ rɛ: “AWƆ LE NTOL A AJU.”
39Ngbɔgajang awɔng nɔ bɔ komɛ ɔ fufɔ jɔ sho Jisɔs rɛ: “Wɔ shang le Krayis a? Tarɛ ɛna wɔ tɔb tarɛ war mɛɛ!”
40Wɔ nɔgɔ, kimawɛ nyam rɛ, “Wɔ nim jɔ fal Ɛshɔwɔ a? Teb ɛkpe kpɔgɔ ɛbku ating. 41War ɛfofomo rɛ ɛkpɔ, gɔ abi nshɔl ɛnyarɛ nya ɛmelim. Wɔ nlolom nɔa ɛbe ɛjom ajingajingɛ alemim.” 42Ɔwɔ a rɛ, “Jisɔs, bomom a rɛ fɛrɛ gɔ Ɛtolo ɛba.”
43Jisɔs kimawɛ fangɛ rɛ, “Gɔ ɛlɔgɔlɔgɔ ntɔnga rɛ, lɛl akpe jɔlɔ na namɛ gɔ Paradise.”
Ɛbku Jisɔs
44Na mǝkim ring gɔ ɛfen ɛjangɛ gbɔ gɔ aji kpɛk kpɛ tɛtɛ nkaranka ɛra nyi ɛgon, 45njol ragɛ ɛbyagɛ. Ɛkpege ji bɔ kanɛ gɔ ɛtak gɛ Ɛshɔwɔ yamɛ gɔ nji ɛbal. 46Jisɔs binge gbogbo rɛ, “Nshɔ! Nfagɛ ɛtɔgɔ ɛjamɛ kaga gɔ ɛbɔ!” Jiya ji agrɛ bung akim kpɔgɔ.
47Ɔji njijɔg a nɛ a nshɔja Roman nyenɛ ajingajingɛ ji milim, ajige Ɛshɔwɔ rɛ, “Gɔ ɛlɔgɔlɔgɔ nlolom nɔa jɔlɔ ɛtinge nɛ.”
48Ɔji anɛ kpɛk kpɛ ba gba ɛkan nyenɛ ji lime nɔ, bɔ fɛrɛ krɛ na abɔ gɔ ngang jɔ kagɛ. 49Wɔ anɛ kpɛk kpɛ ba mangɛ Jisɔs, kpɛlɛ na abǝkal ba tɔnɛ nɔ gɔ Galili, yimi dagɛdagɛ, jɔ nyen ajingajingɛ.
Na bɔ ramɛ ɛku Jisɔs
(Matiyu 27.57-61; Mak 15.42-47; Jɔn 19.38-42)
50Bɛlɛ nlolom awɔng nɔ bɔ jɔ lɔngɛ rɛ Josɛf, nɔ wɔbɔ gɔ ɛblɔngɔ atabɛ ɛshi Aju, a jɔlɔ ɛtinge nɛ gɔ ɛshimar Ɛshɔwɔ.
51Bɛlɛ nlolom awɔng nɔ bɔ jɔ lɔngɛ rɛ Josɛf nɔ lɔng Arimatiya ɛjabɛ Judiya, a jɔlɔ ɛtinge nɛ, nɔ ji kpe shek rɛ Ɛtol Ɛshɔwɔ ba. Tu ji ajɔlɔ gɔ ɛblɔngɔ ba file nfam, ajɔm tir tamɛ tu nshɔl nyi bɔ jɔ lim. 52Akim tamɛ gɔ ji Pilɛt shɔng bab rɛ bɔ kayɛ ɛku Jisɔs. 53Ɔwɔ a jɛ shɔng fɔnɛ gɔ ɛte ji bɔ shege na ntɛm, fɛdɛ gɔ nlaba mbɔmɔ shɔng konɛ gɔ ɛlam bi bɔ ramɛ gɔ ɛbtal, ni bɔ kana kokono nɛ. 54Jɔlɔ gɔ ɛfong ɛragɛ ɛku Aju bi bɔ kpejɔ tongo aji, ji ɛragɛ ɛku mǝkim bɔm.
55Abǝkal ba tɔnɔ Jisɔs gɔ Galili tɔb tɔnɔ Josɛf shɔng nyen ɛlam na na bɔ ramɛ nɔ. 56Ɔwɔ bɔ fɛrɛ nyi ɛtak shɔng lim aking nfam nya bɔ le tamɛ Jisɔs gɔ ngɔbjing wɔ na bɔ malɛ nɔ, Ɛfong Ɛragɛ Ɛku Aju ɛbɔm, bɔ bɛl ragɛ ɛku na njang a Mosis bungɔ nɔ.
Currently Selected:
Luk 23: NBP
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
©️2024 Luke Initiative for Scripture Translation