मर्कस् 12
12
1ओहाङःसैको येसुइ स्यान्ओ खाल्कोः वीनःराय् ल्हाक्ती क्लोन्कोःदीङ् त नोःआथास “यात्चाक्इ धाक्सायः स्यास्ओ राङ् जाङ्ह्ती राङ्कोः चीनःचीनःसै बाङ्कोः बार् देती खोआकान्। सायःकोः तीः च्युरःसा थाव्मा सायः ल्युङ्ह्सा थारामा जाङ्ह्आकान्। ओहाङःसैको ओउः राङ् जुगाङ् जाङ्ह्ती खाय्आक्तीको ओउः राङ्कोः धनी अरु देस्ताङ् आल्सा खेःतो त झ्यान्ते अरु मान्तालम् हुम्ती वानःती ओउःमयःकायः राङ् मेनःताक्ती ल्युङ्ह्ताक्ती गम्आकान्। 2ओहाङःसैको अरु देस्ताङ् आल्ती मुतोक्हाङः धाक्सायःपाय् मीन्लेःआ। धाक्सायः मीनतोक्हाङः ओउः राङ्कोः धनीइ लयःकोः भाक् लेःसाकायः यात्चाक् नोकरी मान्ता ल्होक्आकान्। 3ओउः नोकरीपाय् आल्ती राङ्ताङ् दाह्ती वाङ्लेःतो ती ओउः राङ् मेनःओलम्इ धनीकोः भाक् पाय्क्सा ग्यामाःत झ्यान्ते ओउः नोकरीकायः चुम्ती घान्ती सोह्लेः द्यानःआथै। 4ओउःत खेःओ ओउः राङ्कोः धनीइ अरु नोकरी ल्होक्उतो ओउःकायःमा ओउः राङ् मेनःओलम्इ तालाङ्हाङः थोःती रेव्तो जाङ्ह्ती सोह्लेः द्यानःआथै। 5फेरी ओउः राङ्कोः धनी अरु नोकरी ल्होक्उतो ओउःकायः सात्आकानी अरु अरु नोकरीलम् ल्होक्उतो ती कोय्कायः राङ् मेनःओलम्इ घान्आकानी कोय्कायः सात्आकानी। 6ओउःत हायःदा हायःदा ओहाङःसैको ओउः राङ्कोः धनीकोः यातैज्योः ल्हुङ्गोरे गोय्चोः मुओ खेःतो। ‘लौ इ ङाकोः लयःकोः चोःकायः एङःतीलेः रोम्नाःथै’ त म्हर्ती लयःकोः चोः ल्होक्आकान्। 7ओहाङःसैको ओउः राङ्कोः धनीकोः चोः ल्होक्ती वाङ्ओ च्यवःती ‘लौ इपाय् धनीकोः ओकोलो चोः लेःआः रैस ओउःकायः चुम्ती सात्नी दा। ओहाङःसैको आपा सीआक्तीको इ राङ्पाय् ङीकोःलेः स्याव्नाः’ त दाय्ह्ती नोःकाय्ती 8ओउः राङ् मेनःओलम्इ चोःकायः चुम्ती सात्ती राङ् बाहीरसै ताती वाय्आकानी। 9दोङ्सीलेः लयःकोः चोःकायः ‘सात्आकानी’ त चीःआक्तीको ओउः राङ्कोः धनीइ दोह् हायःनौ दाय्ह्सा ओउःइ राङ्ताङ् पाय्ह्ती ओउः रेव्ओ मान्तालम्कायः चुम्ती सात्ती वाय्नाःथास बा। वाय्आक्तीको ओउः राङ्पाय् अरु मान्तालम्इ मेनःसाकायः बयःनौ” त दाय्ह्ती येसु तोआथास 10“परमेस्वर्इ बयःओ आखरःहाङः इलेः लेखओ माःर। ‘कीम् जाङ्ह्ओलम्इ ङ्हा ताती वाय्ओ बाङ्पाय् लोने कीम् गाराकोः मुल् बाङ् स्याव्आनाः। 11इलेः प्रभु परमेस्वर्इ जाङ्ह्आकान् बा इपाय् गुच्युक् पेजेःनाः’ त दाय्ह्ओ लेखती मुनाः” त दाय्ह्ती येसुइ स्यान्ती तोआथास। 12एत तोआक्तीको ओउः ताङ्ह्ओ मान्तालम्मा पुरोहीत्लम्खेइमा “इ वीनःराय् ताती ङीकायः पेमालो तोआतय्ही” त म्हर्ती ल्हुङ् मल्ह्ती येसुकायः चुम्सा बोङःनीतो अरु हुम्ती मुओलम्खे “येसुइपाय् पेओ कुरा स्यान्आताङी” त दाय्ह्ती नोःकाय्आकाय् ओउःत झ्यान्ते ओउः हुम्ओलम्कः रैती ओउः ताङ्ह्ओ मान्तालम्मा पुरोहीत्लम्मा येसुकायः दीन्ह्सा ग्यामाःत पाय्ह्आकाय्।
13ओउःमयः पाय्ह्आक्तीको येसुकःताङ् फरीसीलम्मा हेरोद् राजाकोः मान्तालम्मा यात्नीस्चाक् ल्होक्आकानी। 14ओउः मान्तालम् येसुकःताङ् वाङ्ती ओउःकायः ल्हुङ्तुक् योसाकायः आन व्हत्ती तोआथै “लौ गुरुय नाङ्इ दोङ् कुरातेः स्यान्ती तोतेःनाः बा। सुकायःमातेः नोःतेःनाः ताङ्ह्ओ मान्ताकायःया मीओकायःया नाङ्इ यातैज्योः कुरा ह तोतेःनौ। सुकःमातेः रैमाःत परमेस्वर्कोः दोङ् कुरातेः स्यान्तेःनौ बा। इतलेः चीःनाङःसु। ओउःत खेःया ङीकायः यात्ज्योः कुरा द्याह् तोताङी दा। ङीकोः देस्कोः सीजर् माहाराजाकायः कर्कोः पैसा बयःसा स्याव्ओया स्याव्मालोया दोह्तेः दाय्ह्तेःनाः” त दाय्ह्ती व्हत्थातो 15येसुइ ओउःमयःकोः पेमालो ल्हुङ् चीःती “दोह् हायःतीतेः ङाकायः ल्हुङ्तुक् योलाङ् वाङ्तेःनै। लौ यात्ज्योः कर् पाय्क्सा पैसा ङाकायः छ्यानःवानःनाङ्स दा” त दाय्ह्ती येसुइ तोआकान्। 16ओउःत तोती झ्यान्ते यात्ज्योः पैसा वानःआकानी। वानःआक्तीको “लौ इ पैसाहाङः सुकोः रुप्मा मय्ङ्मा मुनाः” त दाय्ह्ती येसुइ व्हत्आथास “इपाय् सीजर् माहाराजाकोः लेःआः” त त्याङ्इतो 17“ओउःत झ्यान्ते ओउः पैसापाय् सीजर् राजाकोः लेःआः माःर। दोह् खेःयामा सीजर्कोः मुलेःनाः ओउःखेलेः सीजर्कायः पाय्क्पाः। दोह् खेःयामा परमेस्वर्कोः खेःनाः ओउःखेलेः परमेस्वर्कायः पाय्क्पाः” त दाय्ह्ती येसु त्याङ्आ। येसु एत व्हाय्तोलेः त्याङ्आ सायःती ओउःमयः आन ग्याङ्ह्आकाय्।
18ओहाङःसैको अरु सादुकी त तोओलम् येसुकःताङ् वाङ्आकाय्। ओउःमयः “मान्ता सीआक्तीको रौ जीङःपाय् नाःल सुमा उह्ती च्योक्इली” त दाय्ह्ती स्यान्ओ खेःइतो। 19फेरी येसुकःताङ् वाङ्ती “अ गुरुय ‘बुधापाय् चोः दोःमाःत सीनाः त खेःया ओउः सीओ मान्ताकोः बुधीकायः ओउःकोः हौखेइ वानःसा खेःतो पुःकायः चोः ब्याव्सा थेङालेः’ त दाय्ह्ती उय्ह्ले मोसाइ लेखती गम्ओ माःर। 20ओउःत खेःओ इ कुरा सायःउ दा। सात् पुःचोङ् खेःइतो। सात् पुःचोङ् खेःतो जेथा पुःइ बुधीलेः वानःउतो लयःकोः चोः दोःमाःत ओउः जेथा सीआ। 21जेथा पुः सीआ त खेःओ ओउःकोः बुधीकायः माय्ह्ला हौखेइ वानःआकान् वानःआक्तीको ओउः माय्ह्ला हौमा चोः दोःमाःत सीआ। माय्ह्ला सीआक्तीको ओउः मोमःचोःकायः साय्ह्लाखेइ वानःथातो ओउःमा चोः दोःमाःत सीलेःओ। 22ओउःत हायःदा हायःदा ओउः मोमःचोःकायः ओउः सात् पुःचोङ्इ स्योताङ् स्योताङ् वानःनीतो सबै चोः दोःमाःत सीआकाय्। ओहाङःसैको सबैसै दप्ती ओउः मोमःचोःमा सीआ। 23लौ उया तोताङी दा। ओउः मोमःचोःमा सात् पुःचोङ्मा सीआक्तीको उह्ती च्योक्ती रौ जीङः दोःनै त खेःया ओउः मोमःचोःपाय् सुकोः बुधी स्याव्सा खेःतो ओउःपाय् सात् पुःचोङ्कः पाय्ह्आ” त दाय्ह्ती येसुकायः व्हत्आकानी। 24“नीङ्इपाय् परमेस्वर्कोः ग्वम्मा ओउःकोः आखरःमा चीःबाय्तेःनीली ओउःत झ्यान्ते नीङ्इ ब्रःती व्हत्तेःआनाङ्स। 25सीआक्तीको उह्ती च्योक्ओलम्पाय् मोमःचोः वानःनीली गोय्चोःकुस् पाय्ह्इली ओउःमयः परमेस्वर्कोः लाङ्काकोः ल्होक्ओमयःलो लेखा मुनै। 26फेरी सीआक्तीको उह्ती च्योक्ओ कुरापाय् परमेस्वर्कोः आखरःहाङः मुलेःनाः बा। मोसा त तोओ लेखओ कुरा नीङ्इ पह्रती चीःतेःनानी माःर। मोसापाय् झ्युर्राङ्हाङः ल्युङ्ह्ती मुतोक् बेलाहाङः परमेस्वर्इ ओउःकायः गोत्ती ‘लौ आब्राहाम् इसाक् याकुब्त तोओलम्कोः परमेस्वर्पाय् ङालेः मुनाङः’ त दाय्ह्ती तोआकान्। ओउःइ तोकानःलम्कोः परमेस्वर्लेः ‘खेःङोतो’ त तोउलु ओउःमयःकोः परमेस्वर् ‘मुलेःनाङः’ त तोआकान्। 27परमेस्वर्पाय् सीओ म्हाङ्कोः परमेस्वर्लेः खेःल बा ओउःत झ्यान्ते ओउः सुम्चाक् उय्ह्लेकोः मान्तालम् सीआक्तीको द्याह् परमेस्वर्कःहाङः उह्ती च्योक्ती मुधाङ्नै। ओउः सुम्चाक् रौ जीङः दोःनै त खेःया अरुलम्कायःमा दोःनै। नीङ्खे ‘मान्तालम् सीआक्तीको गलमा च्योक्इली’ त दाय्ह्ती जुगाङ् चीःमाःत ब्रःतेःनै रैस” त दाय्ह्ती येसुइ तोआथास।
28ओउःत तोआथास ओहाङःसैको ओःनम् दीन्हाङः यात्चाक् धर्मा स्यान्ओमयः वाङ्ती येसु अरुलम्कुस् नोःकाय्ओ सायःती “ओउःपाय् आन पेतो त्याङ्ओआः बा” त म्हर्ती “लौ परमेस्वर्इ गानाक्ती बयःओ कुराकोः गाव्खे अरुसै ताङ्ह्लेःनाः” त दाय्ह्ती येसुकायः व्हत्थातो 29“लौ सबैसै ताङ्ह्ओपाय् इलेःआः ‘इस्राएल्कोः मान्तालम्इ सायःती मुन दा। ङीकोः प्रभु परमेस्वर्पाय् झुङ्आले मुनाः। 30ओउःकायः ल्हुङ्हाङः वाय्क्तीलेः ल्हुङ्तुक् म्ह्याङ्ती सायःती आन पेतो ल्हुङ् क्रोङ्तोलेः राप्नु दा’ 31ओहाङःसैको यात्ज्योः अरु ताङ्ह्ओ कुरापाय् इलेःआः ‘नाङ्कुस् ब्रेङःकाय्ती याक्ओ मान्तालम् लयःकायःलेः राप्ती स्यास्उ’ इ नीस् कुरासै अरु दोह्मा ताङ्ह्तो मुइली” त दाय्ह्ती येसु त्याङ्आ। 32“माः रैस गुरुय नाङ्इ तोओ कुरा दोङ्सी लेःआः बा। परमेस्वर् झुङ्खेआले अरु इस्वर्पाय् सुमा नाःबाय्ल। 33फेरी परमेस्वर्कायः वाः मेत्छ्याः ल्हाओसै ओउःकायः ल्हुङ्हाङः राप्तीमा ल्हुङ्तुक्हाङः सायःतीमा पेतो वाय्क्सालेः पेनाः बा। फेरी वाः मेत्छ्याः ल्हाओसै नाङ्कुस् ब्रेङःकाय्ती याक्ओ मान्ताकायः लयःकायःलेः राप्ती स्यास्सामा पेआनाः” त दाय्ह्ती ओउः धर्मा स्यान्ओमयः दाय्ह्आ। 34ओहाङःसैको ओउः मान्ता इत व्हाय्तोलेः दाय्ह्ओ सायःती “लौ नाङ्पाय् परमेस्वर्कोः राजीताङ् दाह्खेःतेःनाः बा” त दाय्ह्ती येसुइ तोआथै। ओउःत तोओ सायःआक्तीको अरु सुइमा येसुकायः व्हत्ती नोःसा ग्याइली।
35अरु नोःसा ग्याइली ओहाङःसैको येसुइ मन्दीर्ताङ् आल्ती ओहाङः स्यान्ती मुओ खेःतो। ओहाङः स्यान्ती मुओ बेलाहाङः “लौ परमेस्वर्इ ल्होक्ओ ख्रीस् त तोओकायः दोह् हायःतीलेः ‘ओउः वाङ्सा खेःओ ख्रीस्पाय् दावुद् राजाकोः प्लोमःदानेलेः’ त दाय्ह्ती धर्मा स्यान्ओलम्इ तोनानी। 36दावुद् राजाइपाय् परमेस्वर्कोः ग्वालामः दोःती इतलेः तोआकान् ‘ “लौ नाङ्कोः दुस्मान्कायः क्लीमःधाङ्माःच्युक्हाङः ङाकोः गुल्ह्दाङ् स्याव्ती ङाकोः ङोय्दोसै च्युङःती मुअ” त दाय्ह्ती परमेस्वर्इ ङाकोः प्रभुकायः तोआकान्’ त दाय्ह्ती दाय्ह्ओ दावुद्इ लेखआकान्। 37इत लेखती दावुद् राजाइ ख्रीस्कायः ‘ङाकोः प्रभु’ त तोओत झ्यान्ते ओउः ख्रीस्लेः दावुद् राजाकोः दोङ् प्लोमःदाने खेःबाय्ल” त दाय्ह्ती येसुइ स्यान्तीलेः तोआथास। ओहाङःसैको ओउः मन्दीर्हाङः नाःतो हुम्ती मुओ मान्तालम्इ येसुइ तोओ स्यान्राय् आन झाक्तीलेः सायःआकानी। 38ओहाङःसैको येसुइ फेरीलेः स्यान्ती तोती “लौ धर्मा स्यान्ओमयःकायः धय्ती मुन दोह् हायःती दाय्ह्सा ओउःमयः लयःकोः नेह्रो ओर्ताक्ती गुरुलो लेखालेः झ्युह्र्ओ नाय्लम् लावती बजार्हाङः मान्तालम्कोः नमस्कार् त्याक्लाङ् वाह्सा आन झाक्नै। 39ओउःमयः थनःओ कीम्हाङःमा भोस् जाङ्ह्ओहाङःमा फोल्यावःती बयःसा थाव्लम्हाङः च्युङःती मुसामा छ्युप्नै। 40ओउःत हायःसा आन झाक्लेःनै ओउःमयःइमा बुधा सीती वाय्ओ मोमःचोःलम्कोः कीम्लम् माल्ताल्लम् आलःती जेःनानी अरुकायः ‘लौ ङापाय् पेओ मान्ता लेःआः ङ’ त छ्यानःसा थेङा परमेस्वर्कायः आन ज्याङःतो तोओ माःजाङ्ह्नानी। दोङ्सीलेः इलो खेःओ माःओ जाङ्ह्झ्याङ्कायः ओउःमयः लोनेःसै आन जोक्तोलेः न्युम्ह्तोलेः स्याव्नै बा” त दाय्ह्ती येसुइ तोआकान्।
41ओहाङःसैको इत स्यान्ती तोआक्तीको येसु मन्दीर्कोः पैसा काती गम्सा बकीस् द्याङ्तोलेः च्युङःती मुओ। ओउः पैसापाय् परमेस्वर्कायः ल्हाती बयःसाकायः काती गम्ओ खेःतो। ओहाङः च्युङःती मुतोक्हाङः नाःतो मान्तालम्इ बकीस्हाङः पैसा काओ येसुइ च्यवःआकान्। ओउःमयःकुस् वाङ्ओ साहुलम्खेइ नाःतो पैसा काआकानी। 42ओहाङःसैको यात्चाक् दोह्मा नाःमालो बुधा सीती वाय्ओ मोमःचोःखे वाङ्ती नीस्ज्याङ् पैसा ह काआकान्। 43इत च्यवःती येसुइ लयःकुस् वाह्ओमयः गोत्ती “दोङ्सीलेः अरु पैसा काती गम्ओ मान्तालम्सै इ ह्र्यात् मोमःचोःइपाय् न्हाङ्तोलेः नाःतो काआकान् रैस 44दोह् हायःती दाय्ह्सा ओउः साहुलम्खेइ लयःकोः वेःओ पैसा ह कानीतो ती ओउः ह्र्यात् मोमःचोःखेइ लयःकोः पैसा सोय्ह्तीलेः काओआः बा। ओउःकोः जेःगा तुङ्गा लेःसा पैसा जुदालेः बयःआकान्” त दाय्ह्ती येसुइ तोआथास।
Currently Selected:
मर्कस् 12: CDM93
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 1993 Wycliffe Bible Translators Inc., All Rights Reserved.