मर्कस् 11
11
1ओउः मान्ता येसुकायः गुल्ह्आकान् ओहाङःसैको येसुमा ओउःकुस् वाह्ओलम्मा आल्दा आल्दा यरुसालेम् द्याङ्तो दाह्ती जैथुन्सायः त तोओ बुम्हाङः मुओ बेथानी बेथ्फागे त तोओ गाव्नीस्ताङ् वाङ्आकाय्। ओहाङः दाह्ती वाङ्आक्तीको येसुइ नीस्चाक् लयःकुस् वाह्ओमयःकायः गोत्ती 2“लौ नीङ्जी उःनोको गाव्ताङ् आल्ज। आल्ती ओहाङः दाह्ओ कुस्ब्रक्त यात्ज्योः घोराकोः चोः पेन्ह्ती मुओ च्यवःतेःनाःजु। ओउः घोराकोः चोःहाङः सुमा लन्ह्ती च्युङःधाङ्इली। ओउःकायःपाय् फेन्ती इहाङः ताह्ती लात्ती वानःजु। 3ओहाङःसै फेन्तोक् बेलाहाङः सुलाङःइ नीङ्जीकायः च्यवःती ‘दोह् हायःतेःतेःनाःजु’ त दाय्ह्ती रेक्ती व्हत्तेःनाःज त खेःया ‘इपाय् प्रभुकायः चाहनाः। देङीलेः द्यानःती पाय्क्तेःनाः’ त दाय्ह्ती त्याङ्ज दा” त दाय्ह्ती येसुइ स्यान्ती तोती ल्होक्आथाच। 4ल्होक्आक्तीको ओउःनीस् आल्ती गाव्ताङ् दाह्ती मुल्ल्याम्हाङः यात्ज्योः पेन्ह्ओ घोराकोः चोः च्यवःती ओउःकायः फेन्ती आलःआकाचु। 5ओहाङःसै फेन्ती आल्तोक्हाङः यात्नीस् ल्याम्हाङः मुओलम्इ च्यवःती “इ घोराकोः चोःपाय् दोह् हायःतीतेः फेन्तेःनाःजु ती” त दाय्ह्ती व्हत्थाचती 6“इपाय् प्रभुकायः चाहनाः” त दाय्ह्ती ओउःनीस् येसुइ स्यान्ओलो लेखा त्याङ्आकाच। ओउःत त्याङ्आक्तीको “लौ आलःजु” त दाय्ह्ती ओउः घोराकोः चोः आलःसा ताक्आकानी। 7ओहाङःसैको लात्ती आलःती येसुकःताङ् दाक्आकाचु। दाक्आक्तीको लयःकोः क्रमःनाय् ओउः घोराकोः गीङ्हाङः न्हाप्ती गम्आकानी। नाय्लम् न्हाप्ती गम्आक्तीको येसु घोराकोः गीङ्हाङः लन्ह्ती वाह्आ। 8घोराहाङः लन्ह्ती वाह्तोक्हाङः नाःतो मान्तालम्इ येसुकायः म्रोताक्सा थेङा लःलयःकोः क्रमःनाय्लम् ओउःकोः ङ्हासै ल्याम्हाङः न्हाप्ती गम्आकानी। अरुलम्इ राङ्सै ह्राह्ती वानःओ झाङ्मा ल्याम्हाङः न्हाप्ती गम्आकानी। 9येसुकोः ङ्हासैमा लोनेसैमा वाह्ओ मान्तालम्इ येसुकायः स्यवती “होसाना भालातेः वाङ्तेःआ नाङ् प्रभु परमेस्वर्कोः मय्ङ् लात्ओ चाक्तेःआः। 10ङीकोः तोकानः दावुद् त तोओकोः राजी परमेस्वर्इ फेरीलेः स्याव्ताक्जेःपाः। परमेस्वर्पाय् ताङ्ह्तोलेः स्याव्पाः” त दाय्ह्ती गोःआकानी। 11ओउःत हायःदा हायःदा ओहाङःसैको येसु यरुसालेम् सहर्ताङ् दाह्ती घोरासै ग्ल्युङ्ह्ती ओहाङःकोः मन्दीर्हाङः पोक्वाङ्आ। मन्दीर्हाङः पोक्ती वाङ्आक्तीको येसुइ वेःताङ् ङोय्ताङ् त्यास्ती योआकान्। ओहाङःसै न्याम् याह्ती झ्यान्ते येसुमा ओउः बारजन छ्युङ्ह्ओमयःकुस् बेथानी गाव्ताङ् द्यान्ह्ती पाय्ह्आकाय्।
12-13बेथानी त तोओ गाव्ताङ् पाय्ह्आकाय् ओहाङःसैको उनम्ह्कोः स्याङ्ह्लोहाङः बीहान च्योक्ती फेरीलेः यरुसालेम्ताङ् द्यान्ह्ती आल्आकाय्। आल्ती वाह्तोक्हाङः येसु योङ्क्राय्ती लोक्तोसै तुरःओ न्याम्सी च्यवःती सायः बोङःलाङ् वाङ्तो ओहाङः सायःपाय् दोह्मा नाःल मात् ह खेःतो। ओउःकोः सायःओ बेलाहाङः दाह्माःत झ्यान्ते नाःआक्ल। 14एत च्यवःआक्तीको “लौ उया द्याह्गोते नाङ् गलमा सायः वाङ्लाम् मान्ताइ जेःसा गलमा दोःलाम्” त दाय्ह्ती येसुइ तोआकान् ओउःइ तोओ कुरा येसुकुस् वाह्ओमयःइ सायःआकानी।
15ओहाङःसैको ओउःमयः आल्दा आल्दा यरुसालेम्ताङ् दाह्आकाय्। यरुसालेम्ताङ् दाह्आक्तीको येसु फेरीलेः मन्दीर्हाङः पोक्ती वाङ्आकाय्। ओहाङः पोक्ती वाङ्तोक्हाङः मन्दीर्कोः कुनाहाङः चीस् वीनःओ लेःओ मान्तालम् च्युङःती मुओ खेःइतो। ओउःमयःकायः येसुइ आन जान्ती तोती मन्दीर्सै रुनःती क्लाःआथास। पैसा सातओ मान्ताकोः तैबल्लम्मा धुकुर्वाः वीनःओ मान्ताकोः पीह्रालम्मा प्लवःती वाय्आकान्। 16ओहाङःसैको अरु वीनःसा माल्ताल् मन्दीर्कोः कुनाहाङः च्योल्ती लात्सा दोह्मा ताक्उलु 17“लौ परमेस्वर्इ बयःओ आखरःहाङः इलेः लेखआ माःर ‘सबै जात्कोः मान्तालम्इ परमेस्वर्कायः तोसा थेङा ओउःकोः मन्दीर् मुनाः’ त दाय्ह्ती ओहाङः लेखओआः नीङ्खेइ कुःरेव् मान्ताकोः कीम्लो जाङ्ह्तेःआकानी बा” त दाय्ह्ती येसुइ जान्ती ल्होक्आथास। 18ओहाङःसैको येसुइ एत हायःओ सायःआक्तीको ओउः ताङ्ह्ओ पुरोहीत्लम्मा धर्मा स्यान्ओमयःइमा ल्हुङ् मल्ह्ती येसुकायः सात्सा बोङःआकानी। बोङःसापाय् बोङःनीतो येसुइ तोओ स्यान्राय् नाःतो अरु मान्तालम्इ ग्याङ्ह्ती “इपाय् पेओ कुरा” त म्हर्ती सायःआकानी ओउःत झ्यान्ते ओउः ताङ्ह्ओ पुरोहीत्लम्मा धर्मा स्यान्ओमयःमा “लौ सबै मान्तालम्इ येसुकायः सायःनानी ङीकायः सायःतय्हीली” त म्हर्ती रैआकाय्। 19ओहाङःसैको न्याम् ब्लक्ओ बेलाहाङः येसुमा ओउःकुस् वाह्ओमयःमा यरुसालेम् सहर्सै ग्ल्युङ्ह्ती गाव्ताङ् पाय्ह्आकाय्।
20ओउः गाव्ताङ् पाय्ह्ती एनःआक्तीको स्याङ्ह्लोहाङः बीहान च्योक्ती यरुसालेम्ताङ् द्यान्ह्ती आल्आकाय्। 21ओहाङःसैको ल्याम्हाङः आल्ती वाह्तोक्हाङः योह्लो च्यवःओ न्याम्सी सीङः जुगाङ् झ्योम्ह्ती वाय्ओ च्यवःआकानी। एत च्यवःती “लौ योउ दै गुरुय नाङ्इ योह् स्राप्ती तोओ सीङःपाय् द्याह् झ्योम्ह्तो वाय्ओआः बा” त दाय्ह्ती पत्रुस्इ ओउः सीङः तय्ह्ती येसुकायः छ्यानःआकान्। 22“लौ परमेस्वर्कायः पेतो ङ्हाम्नु दा। 23दोङ्सीलेः दाय्ह्भनाङ् सुसुइ इ दुलुङःकायः ‘लौ च्योङ्ती द्युम्मालो तीःहाङः तोस्तेःपाः’ त दाय्ह्ती ल्हुङ्हाङः ‘इ कुरा स्याव्जेःनाः’ त पेतो ङ्हाम्ती म्हर्नै त खेःया दोङ्सी ओउःकोः तेती तोओ कुरा स्याव्आनाः बा। 24ओउःत झ्यान्ते दोह् दोह्तेः नीङ्इ परमेस्वर्कायः पेतो ङ्हाम्ती तेती तोतेःनानी ओउःलेः दोःतेःनै। 25-26फेरी परमेस्वर्कायः तोतोक्हाङः सुकःमातेः ल्हुङ् जीक्तेःनै ओउःकः ल्हुङ् स्याक्तेःपै ओहाङःसैको नीङ्कोः परमेस्वर् आपामा नीङ्कः ल्हुङ् स्याक्ती नीङ्कोः रेव्ओ काम् क्युम्ह्तीलेः वाय्नौ” त दाय्ह्ती येसुइ लयःकुस् वाह्ओमयःकायः स्यान्ती तोआथास।
27एतलेः येसुइ तोआथास ओहाङःसैको यरुसालेम्ताङ् वाङ्ती फेरीलेः येसु मन्दीर्हाङः पोक्ती वाह्आ। मन्दीर्हाङः वाह्तोक् बेलाहाङः ताङ्ह्ओ पुरोहीत्लम्मा धर्मा स्यान्ओमयःमा अरु यहुदीलम्कोः ताङ्ह्ओ मान्तालम्कुस् येसुकःताङ् वाङ्ती 28“लौ नाङ्इ अनम्ह् मन्दीर्हाङः जाङ्ह्ओ काम् जाङ्ह्साकायःपाय् सुइ ताक्तेःआ सुइतेः ल्होक्तेःआ तोताङी दा” त दाय्ह्ती व्हत्थातो 29“लौ यात्ज्योः ङाइ व्हत्ओ कुरापाय् ङ्हालेः त्याङ्ती तोनाङ्स दा ओहाङःसैको ङा नीङ्कः त्याङ्नाङः” त दाय्ह्ती येसु दाय्ह्आ। 30“युहनाकायः सुखेइलो बाप्तीस्मा जाङ्ह्लाङ् ल्होक्आथै परमेस्वर्खेइ ल्होक्आथैया मान्तालम्खेइया” त दाय्ह्ती येसु द्यानःती व्हत्आथास। 31इत व्हत्ओ सायःआक्तीको ओउः पुरोहीत्लम्मा धर्मा स्यान्ओमयःमा अरु ताङ्ह्ओ मान्तालम्मा लयःमयःकुस् नोःकाय्आकाय् “गत त्याङ्इ दा। ङी ‘परमेस्वर्इ ल्होक्आथै’ त त्याङ्चाङी त खेःया ओउःपाय् ‘ओउःत झ्यान्ते दोह् हायःतीतेः युहनाकोः नोःराय् ङ्हाम्ती सायःतेःआक्नीली’ त ओउःइ तोनाःतय्ही। 32खेःल ङी ‘मान्तालम्इ ल्होक्आथै’ त त्याङ्चाङी त खेःया सबै मान्तालम् ङीकः ल्हुङ् मल्ह्तो स्याव्नै। ‘युहनापाय् दोङ् परमेस्वर्इ ल्होक्ओ ओउःकोः कुरा छ्यानःओ मान्तालेः खेःतो’ त ओउःमयः म्हर्नै” त दाय्ह्ती नोःकाय्आक्तीको 33“लौ ङीइ त्याङ्सा चीःङुसुलु” त दाय्ह्ती ओउः ताङ्ह्ओ मान्तालम् दाय्ह्आकाय् “लौ उया सुइ ङाकायः काम् जाङ्ह्लाङ् ल्होक्आताङः त दाय्ह्सा ङाइमा छ्यानःसा ग्याङल” त दाय्ह्ती येसुइ तोआथास।
Currently Selected:
मर्कस् 11: CDM93
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 1993 Wycliffe Bible Translators Inc., All Rights Reserved.