Luuka 8
8
Abhashɨ bha bhahamʼmɨnjɨlɨzyaga ʉYeesu
1Lwa gaashila ɨgo, ʉYeesu ahali azyʉngʉʉla mu mabooma na mu vipanga, ahalʉmbɨlɨlaga ɨNongwa ɨNyinza ɨzyɨ wumwɨnɨ ʉwa Ngʉlʉbhɨ. Ahali peeka na bhasundwe bhaakwe ishʉmi na bhabhɨɨlɨ. 2Nantele ahali peeka na bhashɨ bhashe ɨbho ahabhaponiizye ʉbhinu, nɨ‑ɨbho ahabhefwizye amapepo. Mu bhashɨ ɨbho, ahalɨɨho ʉMaliya ʉwa hu Magidaala ʉyo ʉYeesu ahamʼmwefwizye amapepo pʉnga (7). 3Wope ahalɨɨho ʉYoana ʉnʼshɨ wa Kuuza. ɄKuuza ʉyo ahali mwɨmɨɨlɨli nʼgoosi wɨ vintu vya mwɨnɨ ʉHeloode ʉAntipa. Nantele, ahalɨɨho ʉSuzaana na bhashɨ abhanjɨ abhinji. Abhashɨ ɨbho bhonti bhahafumyaga ɨvintu vyabho, ahumʼmwavwe ʉYeesu na bhasundwe bhaakwe.
Ɨshifwani ɨsha mʼvyala mbeyu
(Mataayo 13:1-9; Maalʉko 4:1-9)
4Ɨshi, ʉYeesu lwa‑ahazyʉngʉʉlaga, ɨmpʉga ɨya bhantu afume mu mabooma aminji yahamʼmʉnganilaga. Ɨpo ʉYeesu ahabhabhʉʉzya hu shifwani, ahaga, 5“Ʉmʼvyala mbeyu ʉmo ahabhalile asanse ɨmbeyu zyakwe. Lwa‑asansa, ɨmbeyu zimo zyahagwɨla mwi‑idala. Abhashila lidala bhahazikhanya, zyope ɨnyonyi zyahɨnza, zyahazikompa na huzimile. 6Zimo zyahagwɨla pi‑ilyalawe. Nalinaali zyahamela, zyahanda akule. Ɨshi hu nongwa ya‑aje, pahali pakhome, nantele pʉʉmʉsu, zyahapootwa ajendeelele akule, zyahʉʉma. 7Ɨzyamwabho zyahagwɨla mu mimvwa. Amimvwa gaala gahakula peeka nɨ mbeyu ziila, gahazipuuta. 8Zimo zyahagwɨla mu longo ʉgwɨ mboto, zyahamela na‑akule, zyaheela shinza tee, zyonti zyaheela amantongooni ɨmya yeeka yeeka.” ɄYeesu lwa waamala ayanje ɨsho, ahonjeezya izwi, ahaga, “Ʉmuntu wowonti wa‑ahwʉmvwa, azyaganyaaje na‑alembe mwɨ‑ɨgo ga nabhamanyizya!”
ɄYeesu ahwilula ɨshifwani ɨsha mʼvyala mbeyu
(Mataayo 13:10-23; Maalʉko 4:10-20)
9Abhasundwe bhaakwe bhahamʼmʉzɨɨlɨzya ʉYeesu bhahaga, “Ɨshi, ɨshifwani shaaho ɨshi hwa huje wɨlɨ?” 10Ahabhabhʉʉzya ahaga, “Amwɨ, ʉNgʉlʉbhɨ abhapiiye amanye ɨzyɨ mfiso ɨzyɨ wumwɨnɨ ʉwa Ngʉlʉbhɨ. Leelo abhanjɨ ɨhubhabhʉʉzya hu vifwani, nanshi sha zyahasimbwilwe huje,
‘Bhahenyaaje, saga bhahazilolaje.
Nantele, bhahatejelezyaje, saga bhahazyaganyaaje.’#Bhaazya Yesaaya 6:9.
11Ɨshifwani ɨshi hwa huje, ɨmbeyu lizwi lya Ngʉlʉbhɨ. 12Ʉlongo ʉgwa mwi‑idala, shifwani sha bhantu ɨbho bhatejeelezya izwi lya Ngʉlʉbhɨ, leelo hu habhaazyo hahaala ha bhahulyʉmvwa izwi lya Ngʉlʉbhɨ, ʉSeetano ahwɨnza, ahulyefwa izwi liila mu mooyo gaabho huje bhagandi humʼmwɨtɨshe na‑afyʉlwe. 13Ʉlongo ʉgwa pi‑ilyalawe, shifwani sha bhantu bha bhahulyʉmvwa izwi lya Ngʉlʉbhɨ na hulyambɨɨlɨle hu luseshelo lwonti, leelo bhapootwa ahwɨmɨɨlɨle hu dandamazu. Lyoli bhali nanshi imelela lya saga lisiizye amalandazi pa nsi tee. Abheene bhahwɨtɨha hu habhaazyo lwene, leelo lwa bhajelwa, bhahululeha ʉlwɨtɨho. 14Ʉlongo ʉgwa mu mimvwa, shifwani sha bhantu bha bhahulyʉmvwa izwi lya Ngʉlʉbhɨ, leelo pitagaalila mu lemvu waabho, ʉdeleganu, ʉtabhazi nɨ nsʉngwo ɨzya mu nsi vihubhakhata. Ɨvyo vya vihubhabhɨɨha huje, bhapootwe hulibhombele ɨmbombo izwi, hwa huje hupootwe ahwele amantongooni. 15Ʉlongo ʉgwɨ mboto, shifwani sha bhantu ɨbho hu golosu na hu mooyo gaabho aminza bhahulyʉmvwa izwi na hulikhate. Nantele bhahulibhombela ɨmbombo izwi na‑ajimbe mu mayɨmba gonti. Ʉhwo hu hwele amantongooni.”
Ɨshifwani ɨshɨ kolobooyi
(Maalʉko 4:21-25)
16ɄYeesu ahonjela ahaga, “Saga alɨɨho ʉmuntu wa‑akhozya ɨkolobooyi na huyikwinshile nɨ nsonta, awe abhɨɨshe hwi‑izʉngʉlʉ ɨlyɨ shitala. Lyoli, abhɨɨha pa mwanya pa mbeeje huje, abhantu lwa bhatʉʉha, bhalolaje ʉlulabho lwakwe. 17Shɨnɨɨsho, ziila zyonti zya zili hu mfiso, zyahayimanyiha na‑abhe pa pazelu. Nantele ɨvintu vyonti vya vifisiilwe, vyahayivundulwa. 18Ɨshi, muntejeelezye shinza! Ʉla wa‑ahulitejeelezya izwi lya Ngʉlʉbhɨ na hulimanye, ʉNgʉlʉbhɨ ahumʼmwavwa na humʼmwonjele hulimanye tee. Ɨpo nkashele ʉmuntu saga atejeelezya izwi lya Ngʉlʉbhɨ, ni‑idoodo lya‑alimɨɨnye lifyʉlwa.”#8:18 Ʉla wa‑ahulitejeelezya izwi lya Ngʉlʉbhɨ na hulimanye, ʉNgʉlʉbhɨ ahumʼmwavwa na humʼmwonjele hulimanye tee. Ɨpo nkashele ʉmuntu saga atejeelezya izwi lya Ngʉlʉbhɨ, ni‑idoodo lya‑alimɨɨnye lifyʉlwa Mu njango ɨyɨ Shiyunaani ɨsimbwilwe huje, Wa‑ali na hantu, bhahayihumʼmwonjeezya ɨvyɨnjɨ. Wa saga ali na hantu, hope ahadoodo ha‑asʉʉbhɨla, ahayifyʉlwa.
Abhaholo bha Yeesu abhɨ lyoli
(Mataayo 12:46-50; Maalʉko 3:31-35)
19Ɨpo ʉnyina na bhaholo bhaakwe ʉYeesu bhahabhala hwa Yeesu. Leelo bhahapootwa humʼfishile pa‑ahali hu nongwa ya‑aje, ɨmpʉga ya bhantu yahali ngoosi tee. 20Bhamo bhahamʼmʉʉzya ʉYeesu bhahaga, “Enya, ʉbhɨɨnyu na bhaholo bhaaho bhali panzɨ aje, bhaʼlole.” 21Leelo, ʉYeesu ahabhaamula ahaga, “Ʉnyina waanɨ na bhaholo bhaanɨ bha bhɨɨbho bha bhahulyʉmvwa izwi lya Ngʉlʉbhɨ na hulibhombe.”
ɄYeesu akhajila ɨhaala ɨhali na mabhilingwa
(Mataayo 8:23-27; Maalʉko 4:35-41)
22Isiku limo ʉYeesu ahabhabhʉʉzya abhasundwe bhaakwe ahaga, “Saali, tifwɨmɨɨle hwi‑isyɨla ɨlyɨ nsʉmbi.” Ɨpo bhahatʉʉha mu waato, bhahanda alobhoshe. 23Lwa bhahalobhohaga, ʉYeesu ahagonile ʉtulo. Ɨhaala ɨhali tee yahanda avugule na‑abhɨɨshe amabhilingwa amagoosi mu nsʉmbi. Amɨnzɨ gahanda ahwitishile na‑ameme mu waato, bhahapalamila adwine.
24Ɨpo abhasundwe bhahabhala hwa Yeesu, bhahanʼdaamuzya, bhahaga, “Wee Mwɨnɨ! Wee Mwɨnɨ! Taafwa!” ɄYeesu ahadaamuha, ahakhajila ɨhaala na mabhilingwa, vyope vyahapʉʉma, hwahabha myɨ!#8:24 Enya Maalʉko 4:37, ɨshifwani ɨsha Yeesu lwa‑akhajila ɨhaala nʉ vwalanganu. 25Ɨpo ʉYeesu ahabhabhʉʉzya abhasundwe bhaakwe ahaga, “Ʉlwɨtɨho lwenyu luli hwoshi?” Abhasundwe bhahaswiga na hwogope. Bhahanda abhʉzɨlɨzanye huje, “Ɨshi, ʉnʉ yʉ naanu wa‑akhajila ɨhaala ɨhali na mabhilingwa, vyope vihumʼmwʉmvwa lwene?”
ɄYeesu ahumʼponia ʉmuntu wa‑ali na mapepo
(Mataayo 8:28-34; Maalʉko 5:1-20)
26ɄYeesu na bhasundwe bhaakwe lwa bhahafwɨmɨɨla ɨnsʉmbi ɨyɨ Galilaaya, bhahafiha mu nsi ɨya Bhagelaasi ya yahali hwi‑isyɨla ɨlyɨnjɨ ambali yɨ mukowa ʉgwɨ Galilaaya. 27ɄYeesu lwa wiiha mu waato, ʉmuntu ʉmo ʉwa mu nsi ɨla ahɨnza hwa mwene. Ʉmuntu ʉyo ahali na mapepo. Ɨnsiku nyinji ahajendaga shibwida, nantele saga ahakhalaga mu nyumba, lyoli ahakhalaga hu nkʉngwa.#8:27 ahakhalaga hu nkʉngwa Gahali miiho ga Bhayahuudi asyɨle abhantu mu magwenya ga gahali mu magamba, gamo bhahabanaga bhɨɨbho. 28-29Amapepo ɨgo gahanʼtamyaga tee. Hu habhaazyo hamo abhantu bhahamʼpinyaga nɨ mpɨngo mu makhono, na mu manama bhahamʼpinyaga na manyololo, nka bhanʼnɨndɨlɨlaje. Leelo ʉmwene ahadadulanyaaga na‑atwalwe na mapepo ɨgo mwi‑igona.
Ʉmuntu ʉla ʉwɨ mapepo lwa wanʼnola ʉYeesu na humʼmanye, ahakhoola ɨhoolo tee na‑asugamile pitagaalila lyakwe. ɄYeesu ahagakhajila amapepo gaala huje, gafume. Ɨpo ʉmuntu ʉla ahayanga hwi‑izwi igoosi ahaga, “Wee Yeesu, Mwana wa Ngʉlʉbhɨ wa‑ali Nʼgoosi hu vintu vyonti, ɨndi nɨ yeenu naawe? Nalamba, ʉgandi hundavye.”
30ɄYeesu ahabhʉzɨɨlɨzya ahaga, “Itaawa lyaho we naanu?” Ahamʼmwamula ahaga, “Itaawa lyanɨ nɨ Mpʉga,”#8:30 Mpʉga Mu njango ɨyɨ Shiyunaani itaawa lisimbwilwe huje, Legiyooni. Izwi ɨlyo hwa huje mpʉga ya bhalwi abhɨ Shiluumi. Ɨmpʉga ɨyo yahabhanga na bhantu ɨelufu zitaatu awe apalamile ɨelufu nʼtanda. hu nongwa ya‑aje, amapepo gahali minji mwa mwene. 31Amapepo gaala gahanʼnambaga ʉYeesu huje, “Ʉgandi hutitwale hwi‑iliina ɨlya huzimu.”#8:31 hwi‑iliina ɨlya huzimu Ʉhwo hoobhe yɨ mapepo hwa galabha wiila na wiila. Bhaazya izwi Huzimu hu Ngalulanyo ɨyɨ Mazwi aMajenu hu malishilo wɨ shitaabu ɨshi.
32Ɨshi, papaala hwahali ni‑idiimo igoosi ɨlyɨ ngʉlʉbhɨ. Idiimo ɨlyo lyahalyanga mu lubhambala ʉlwɨ hagamba. Amapepo gaala gahanʼnamba ʉYeesu huje, “Ʉtɨtɨshɨle titʉʉshe mu ngʉlʉbhɨ ziila.” ɄYeesu ahagɨtɨshɨla. 33Gope gahafuma mwa muntu ʉla, gahazitʉʉha ɨngʉlʉbhɨ. Ɨpo idiimo lyonti ɨlyɨ ngʉlʉbhɨ lyahashɨmbɨla lubhilo, lyahiiha ʉlwiha ʉlwɨ hagamba haala, lyahagwɨla mu nsʉmbi na‑afwe.
34Abhadiimi bhɨ ngʉlʉbhɨ ziila lwa bhaalola zya zibhombɨɨshe, bhahashɨmbɨla, bhahabhala mwi‑ibooma ipalamani na paala, na mu vipanga ɨvya mu pɨɨpɨ, bhahabhabhʉʉzya abhantu ɨnongwa ɨzyo. 35Abhantu bha bhahʉmvwɨzye, bhahabhala huje, bhahwilolele bhɨɨbho zya zyabhombeha. Lwa bhaafiha pa‑ahali ʉYeesu, bhahanʼnola ʉmuntu ʉla ʉyo gahamʼmwepile amapepo, akhɨɨye pa manama ga Yeesu, akwɨte amenda, nantele ali nɨ njeele zyonti. Ɨpo bhahoogopa tee. 36Bhaala bha bhahalolile zya zibhombɨɨshe, bhahabhabhʉʉzya abhantu abhanjɨ shiila ʉYeesu sha wamʼponia ʉla wa‑ahali na mapepo. 37Ɨpo abhantu bhonti abha mu nsi ɨya Bhagelaasi bhahakhatwa nʉ wooga ʉgoosi. Bhahanʼkʉndɨɨlɨzya tee ʉYeesu huje asogole mu nsi yaabho. Ɨpo ʉYeesu ahatʉʉha mu waato, ahanda asogole.
38Ʉmuntu ʉla gahamʼmwepile amapepo lwa wanʼnola ʉYeesu asogola, ahanʼkʉndɨlɨzyaga huje, bhabhalaje bhonti. Leelo ʉYeesu saga ahamʼmwɨtɨshɨla, ahaga, 39“Weelaga humwenyu, ʉbhale, ʉbhamamile abhantu ɨzyo ʉNgʉlʉbhɨ zya‑aʼbhombɨɨye.” Ɨpo ʉmuntu ʉla ahasogola paala, ahabhala, ahatʉʉha mwi‑ibooma. Ʉhwo ahanyampanyaaga ɨnongwa zyonti ɨzyo ʉYeesu zya‑ahamʼmombɨɨye.
ɄYeesu ahumʼponia ʉnʼshɨ ʉmo na hunʼzyʉsye ʉnʼnɨndu
(Mataayo 9:18-26; Maalʉko 5:21-43)
40ɄYeesu lwa waweela hwi‑isyɨla ɨlyɨnjɨ, ɨmpʉga ɨya bhantu yahamʼmwambɨɨlɨla hu luseshelo hu nongwa ya‑aje, bhahanʼgʉlɨlaga. 41Ɨpo ahɨnza ʉmuntu ʉmo wa bhahagaga Yaayilo. Ʉmuntu ʉyo ahali palishimo mu bhalongozi abhɨ nyumba ɨya‑apuutile na‑amanyiilile. Ahamʼmalila ʉYeesu, ahasugamila pa manama gaakwe, ahanʼkʉndɨɨlɨzya huje, ʉYeesu abhale hwa mwene. 42Ahayanjile ɨsho hu nongwa ya‑aje, ʉmwalɨ waakwe ʉwɨ maaha ishʉmi na gabhɨɨlɨ wa‑ahali mwene hwa yise waakwe, ahali mʼminu ʉwa‑afwe.
Ɨpo ʉYeesu ahɨɨtɨha, ahanda abhale hwa Yaayilo. Lwa‑ali mwi‑idala, abhantu abhinji bha bhahali peeka nawo bhahamʼbijilizyaga tee. 43Mu mpʉga ɨla mwahali nʉ nʼshɨ ʉmo wa‑ahali nɨ mpʉngo ɨya‑azwe idanda hu shishɨ, hu maaha ishʉmi na gabhɨɨlɨ. Nantele ahamalile ɨshʉʉma shaakwe shonti abheete mwa bhaganga, leelo saga ahamʼmwaga nkʉ‑ʉmo ʉwa humʼponie.#8:43 Nantele ahamalile ɨshʉʉma shaakwe shonti abheete mwa bhaganga, leelo saga ahamʼmwaga nkʉ‑ʉmo ʉwa humʼponie Amazwi ɨgo saga galɨɨho mu nsimbo zimo ɨzyɨ mandɨ ɨzyɨ Shiyunaani. 44Ɨpo ʉnʼshɨ ʉla ahabhala hwisinda hwa Yeesu, ahapalamansya ʉlupinto lwɨ mwenda gwakwe. Pɨnɨɨpo lwene ahapona ʉbhinu waakwe.
45ɄYeesu ahabhʉzɨɨlɨzya ahaga, “Weenu wa‑ampalamansiizye?” Abhantu bhonti bhahakhaana. Ɨpo ʉPeeteli ahamʼmʉʉzya ahaga, “Wee Mwɨnɨ, abhantu bhinji tee bhaʼzyʉngʉʉlɨle, bhahwibijiilizya!” 46Leelo ʉYeesu ahaga, “Alɨɨho ʉmuntu wa‑ampalamansiizye, pɨpo ɨhwiyʉmvwa huje, ikhone lyanɨ ɨlya‑aponie lineepile.” 47Ʉnʼshɨ ʉla lwa waalola huje, ʉYeesu waamanya zya zibhombɨɨshe, ahamʼmalila sha‑ayinga.#8:47 Ayinga hu nongwa yɨ miiho ga Bhayahuudi. Amiiho ɨga gayiga, ʉmuntu wa‑ahali nɨ mpʉngo ɨya‑azwe idanda ahali mwavu, saga ahakhondɨɨye apalamansye awe asangaane na bhamwabho. Bhaazya ɨMbombo ɨzya Bhalaawi 15:25-33. Ahasugamila pitagaalila lyakwe, ahamʼmʉʉzya pitagaalila lya bhantu bhonti zya zyahamʼmɨɨshɨle huje, amʼpalamansye, nantele sha waapona lubhilo. 48ɄYeesu ahamʼmʉʉzya ahaga, “Nʼnɨndu, ʉponile pɨpo ʉli nʉ lwɨtɨho. Bhalaga hu tengaanu!”
49ɄYeesu lwa‑ali sha‑ayanga nʉ nʼshɨ ʉyo, ahɨnza ʉmuntu afume hu khaaya ya Yaayilo, ʉnʼnongozi wɨ nyumba ɨya‑apuutile na‑amanyiilile, ahamʼmʉʉzya ahaga, “Wee Yaayilo, leha hunʼnyanzye ʉMʼmanyizyi, ʉmwalɨ waaho afwiye.” 50Leelo ʉYeesu lwa wʉmvwa ɨgo, ahamʼmʉʉzya ʉYaayilo ahaga, “Ʉgandi ahwogope lwonti, ʉbhe nʉ lwɨtɨho lwene, ʉmwalɨ waaho abhala‑apone.”
51ɄYeesu lwa waafiha pa khaaya ya Yaayilo, ahabhakhaana abhantu abhanjɨ atʉʉshe peeka nawo, lyoli yʉ Peeteli, ʉYaakobo, ʉYoohani, ʉyise nʉ nyina wa nʼnɨndu bheene. 52Abhantu bhonti bha bhahali paala, bhahalilaga na‑azonde. ɄYeesu ahabhabhʉʉzya ahaga, “Leshi azonde! Ʉnʼnɨndu ʉnʉ saga afwiye, agonile tulo lwene.” 53Abhantu bhaala bhahakhasamala na hunʼseshe hu nongwa ya‑aje, bhahamɨɨnye huje, ʉnʼnɨndu ʉla afwiye. 54ɄYeesu ahagukhata ʉmʼvimba guula ʉnʼkhono, ahakwizya hwi‑izwi igoosi ahaga, “Wee nʼnɨndu, daamuha!” 55Pɨnɨɨpo, ʉnʼnɨndu ʉla, ʉwʉʉmi waakwe wahaweela, ahɨmɨɨlɨla lubhilo. ɄYeesu ahalajizya aje, bhamʼpeele ɨshalye. 56Abhapaafi bhaakwe bhahaswiga tee. Ɨpo ʉYeesu ahabhakhajiilizya tee huje, bhagandi humʼmʉʉzye ʉmuntu wowonti hwɨ‑ɨgo ga gabhombɨɨshe.
Currently Selected:
Luuka 8: SBK
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022, Wycliffe Bible Translators, Inc. All rights reserved.