Luuka 7
7
Ʉlwɨtɨho lwa nʼnongozi ʉwa bhalwi
(Mataayo 8:5-13; Yoohani 4:43-54)
1ɄYeesu lwa waamala huyibhʉʉzye ɨmpʉga ya bhantu amazwi ɨgo gonti, ahabhala mwi‑ibooma ɨlyɨ Kapelenawumu. 2Mwi‑ibooma ɨlyo, mwahali nʉ nʼnongozi ʉwa bhalwi abhɨ Shiluumi. Ʉnʼnongozi ʉyo ahali nʉ mʼmomvi wa‑ahanʼgɨɨne tee. Leelo ʉmʼmomvi ʉyo ahali mʼminu, ahapalamiiye afwe.
3Ʉnʼnongozi ʉyo lwa wʉmvwa ɨnongwa ɨzya Yeesu, ahabhasonteelezya abhagoosi bhamo abha Bhayahuudi hwa Yeesu huje, bhanʼnaabhe ayɨnze, amʼponie ʉmʼmomvi waakwe. 4Abhagoosi bhaala lwa bhaafiha hwa Yeesu, bhahanʼnamba tee, bhahamʼmʉʉzya bhahaga, “Ʉnʼgoosi ʉnʉ akhondɨɨye huje, ʉmʼmombele izwi ɨli, 5pɨpo atigɨɨne tee atɨ tiBhayahuudi, nantele ʉmwene ya yʉʉyo ya‑ahatizenjɨɨye ɨnyumba yeetu ɨya‑apuutile na‑amanyiilile.”
6Ɨpo ʉYeesu ahabhala peeka na bhagoosi bhaala hu khaaya hwa nʼnongozi ʉla. Lwa bhapalamiiye afishe, ʉnʼnongozi ʉyo ahabhasonteelezya abhamanyani bhaakwe nɨ ntumi hwa Yeesu zya ziyiga, “Wee Mwɨnɨ! Ʉgandi hwiyɨmvye tee, pɨpo saga ɨhondɨɨye huje, aawe ʉtʉʉshe mu nyumba yaanɨ. 7Nantele, anɨ saga naalola huje, ɨhondɨɨye aje, anɨ ɨnɨnze huliiwe. Leelo, ʉyanje izwi lwene, wope ʉmʼmomvi waanɨ abhala‑apone. 8Ɨnjanjile ɨsho, pɨpo anɨ nanɨ ɨndi pa nsi pa bhalongozi bhaanɨ, nantele ɨndi na bhalwi bha bhali pa nsi yaanɨ. Nkashele ɨhunʼnajizya ʉmo mwa bheene huje, ‘Bhala,’ abhala lubhilo. Nkashele ɨhunʼnajizya ʉwamwabho mwa bheene huje, ‘Ɨnza,’ ahwɨnza wope lubhilo. Wope ʉmʼmomvi waanɨ nkashele ɨhunʼnajizya aje, ‘Bhomba ɨshi,’ abhomba shɨnɨɨsho.”
9ɄYeesu lwa wʉmvwa ɨzyo, ahaswiga tee. Ɨpo ahayeenya ɨmpʉga ya bhantu bha bhahanʼnondolezyaga, ahabhabhʉʉzya ahaga, “Ɨhubhabhʉʉzya huje, saga ɨndolile ʉmuntu nka weeka mwa Bhaizilaeeli ʉwɨ lwɨtɨho ʉlugoosi nanshi ʉlwu!”
10Ɨpo abhamanyani bhaakwe bhaala ahabhasonteleziizye, bhahagaluha mu nyumba ya nʼgoosi ʉyo, bhahamʼmwaga ʉmʼmomvi aponile.
ɄYeesu ahunʼzyʉsya ʉmwana wa mʼfwɨle
11Pamandɨ hashe, ʉYeesu ahabhala mwi‑ibooma ɨlyɨ Nayini. Ahali peeka na bhasundwe bhaakwe na bhantu abhanjɨ abhinji. 12Lwa‑apalamiiye afishe pa lyango ʉgwa pi‑ibooma, ahakhomaana na bhantu bha bhahanyʉmʉʉye ʉmʼvimba, bhafuma hwʉnzɨ yi‑ibooma. Ʉnʼsahaala ya‑ahafwiye ahali mwene mwa nyina waakwe, nantele ʉnyina waakwe ahali mʼfwɨle. Ʉnʼshɨ ʉyo ahalongozɨɨnye na bhantu abhinji abha mwi‑ibooma ɨlyo.
13ɄMwɨnɨ lwa wanʼnola ʉmʼfwɨle ʉla, ahanʼnolela ɨnkʉmbʉ, ahamʼmʉʉzya ahaga, “Pʉʉma maayɨ waanɨ, ʉgandi azonde!” 14Ahalizʉmbɨɨlɨla izegaazega liila ʉmwo ʉmʼvimba gwahali, ahalipalamansya. Abhantu bha bhahanyʉmʉʉye, bhahɨmɨɨlɨla. ɄYeesu ahaga, “Wee nʼsahaala, ɨhubhʉʉzya ɨnjiga, bhʉʉha!” 15Ʉla wa‑ahafwiye, lubhilo ahabhʉʉha na‑akhale, ahanda ayanje. Pɨnɨɨpo ʉYeesu ahamʼpeela ʉnyina waakwe ʉnʼsahaala ʉla.
16Abhantu bhonti bhahaswiga na hwogope, bhahanda humʼmwamishe ʉNgʉlʉbhɨ, bhahagaga, “Ʉnʼkuwi ʉnʼgoosi afumiiye huliitɨ!” Nantele bhahagaga, “ɄNgʉlʉbhɨ ayɨnzɨle hutaavwe atɨ tibhantu bhaakwe!” 17Ɨnongwa ɨzyo zya Yeesu zyahanyampaana tee mu mukowa gwonti ʉgwɨ Yudeeya na mu nsi ɨzya mu pɨɨpɨ.
ɄYoohani ʉMwozi asonteelezya ɨntumi hwa Yeesu
(Mataayo 11:2-6)
18Abhasundwe bha Yoohani bhahamʼmamila ʉYoohani ɨnongwa zyonti ɨzyo ʉYeesu zya‑ahabhombaga. 19Ɨpo ʉYoohani ahabhakwizya abhasundwe bhabhɨɨlɨ mwa bheene. Ahabhasonteelezya huje, bhabhale humʼmʉzɨɨlɨzye ʉMwɨnɨ ʉYeesu huje, “Timɨɨnye huje, ʉMʼfyʉli ahayɨnza. Wɨlɨ, weewe, awe tinʼgʉlɨlaje ʉwɨnjɨ?”
20Abhasundwe bhaala lwa bhaafiha hwa Yeesu, bhahamʼmʉʉzya bhahaga, “ɄYoohani ʉMwozi atisonteleziizye huliiwe aje, tibhʉzɨɨlɨzye huje, ‘Timɨɨnye huje, ʉMʼfyʉli ahayɨnza. Wɨlɨ, weewe, awe tinʼgʉlɨlaje ʉwɨnjɨ?’ ”
21Mu habhaazyo hɨnɨɨho, ʉYeesu ahabhaponiaga abhantu abhinji bha bhahalabhaga nɨ mpʉngo nyinji nyinji, na bhaala bha bhahakhɨɨtwe na mapepo. Nantele ahabhigulaga amaaso abhantonko abhinji, bhope bhahalolaga.
22Ɨpo ʉYeesu ahabhaamula ahaga, “Bhalaji mumʼmʉʉzye ʉYoohani zyonti zya muzilolile na huzyʉmvwe. Abhantonko bhalola, bha saga bhagajenda bhajenda, abhɨ makete bhapona na‑asangalushe, abhadinde bhahwʉmvwa, abhafwe bhazyʉha na bhapɨɨna bhalʉmbɨɨlɨlwa ɨNongwa ɨNyinza.#7:22 Ʉnʼkuwi ʉYesaaya ahakuwile huje, ʉMʼfyʉli ʉyo ʉNgʉlʉbhɨ ahalapile hunʼsonteelezye ahayibhomba ɨmbombo ɨzyo zyonti. Bhaazya Yesaaya 26:19; 29:18-19; 35:5-6; 61:1. 23Nantele, asayiiwe ʉmuntu wa saga ahululeha ʉlwɨtɨho hu nongwa yaanɨ!”
ɄYeesu ayanga hu nongwa ya Yoohani ʉMwozi
(Mataayo 11:7-19)
24Abhasundwe bhaala lwa bhasogola, ʉYeesu ahanda huyibhʉʉzye ɨmpʉga ya bhantu ɨnongwa ɨzya Yoohani huje, “Mwahabhalile ahwenye yeenu mu lʉʉgwa? Mwahabhalile humʼmwenye ʉmuntu wa‑ahwɨtɨha lyolyonti nanshi itete sha likhomwa nɨ nkʉngʉ hwonti hwonti? Ndaadi! 25Wɨlɨ, mwahabhalile ahwenye yeenu? Ʉmuntu wa‑akwɨte amenda aminza agɨ mpɨɨya ɨngoosi? Ndaadi! Abhantu bha bhakwata amenda aminza agɨ mpɨɨya ɨngoosi na hwibaade mu winji wɨ vintu vya bhali navyo, ɨbho bhahakhalaga mu nyumba ɨngoosi ɨzyɨ shimwɨnɨ! 26Ɨshi, mwahabhalile ahwenye yeenu? Mwahabhalile humʼmwenye ʉnʼkuwi? Ena, ʉYoohani nʼkuwi! Nantele ɨhubhabhʉʉzya huje, ʉYoohani ʉmwene, ɨmbombo zyakwe ngoosi tee ashile ziila ɨzya nʼkuwi! 27Ya yʉʉla ya‑ahasimbwilwe mu Nsimbo ɨMfinjile huje,
‘Enya, nahayihunʼsonteelezya ʉmʼmomvi waanɨ ʉyo ahayihutagaalila.
Ahayihubhabhɨɨha nzɨɨla abhantu huje, bhahwejeelele,
nanshi abhantu sha bhalɨngaanya idala hu nongwa ya mwɨnɨ.’ ”#Bhaazya Malaaki 3:1.
28ɄYeesu ahonjela ahaga, “Lyoli ɨhubhabhʉʉzya, mu bhantu bhonti bha bhapapwilwe nʉ nʼshɨ, saga alɨɨho ʉnʼgoosi ashile ʉYoohani ʉMwozi. Leelo, wa‑ali nʼdoodo ashile abhamwabho mu wumwɨnɨ ʉwa Ngʉlʉbhɨ, ʉyo yʉ nʼgoosi ashile ʉYoohani.”
29Abhantu bhonti peeka na bhasomvya sonko lwa bhʉmvwa amazwi ga Yeesu, bhahasimishizya ɨnsɨɨbho ɨnyinza ɨzya Ngʉlʉbhɨ hwa bheene. Ɨbho bha bhaala bhahoziiwe nʉ Yoohani. 30Leelo aBhafalisaayo na bhamanyizyi abhɨ ndajizyo zya Moose bhahakhaana ɨnsɨɨbho zya Ngʉlʉbhɨ hwa bheene, pɨpo abheene bhahakhɨɨne ahwozewe nʉ Yoohani.
31ɄMwɨnɨ ʉYeesu nantele ahaga, “Abhantu abhɨ habhaazyo ɨha ɨmbakholanye nɨ yeenu? Bhalɨngaana nɨ yeenu? 32Bhakholɨɨne nanshi abhaana bha bhahwanga pa lembuka, bha bhakwizanya huje,
‘Tahabhakhomɨɨye ilonji,
leelo saga mwahanjile!
Nantele tahabhatelɨɨye ɨnteelo ɨzyɨ zugumizu,
leelo saga mwahalilile!’
33Ɨsho sha shɨɨsho sha mulɨɨho namwɨ! Ahabhaazyo haala ʉYoohani ʉMwozi lwa‑ahɨnzɨle, saga ahalyanga ɨntogito awe amwele ɨdivaayi. Amwɨ mwahaga, ‘Ali ni‑ipepo!’ 34Anɨ nɨMwana wa Muntu ɨnɨnzɨle, ɨlya na‑amwele ɨdivaayi.#7:34 ɨlya na‑amwele ɨdivaayi Gahali miiho ga Bhayahuudi amwele ɨdivaayi peeka nɨ shalye, leelo ɨdivaayi ya bhahamwelaga, bhahasanganyaaga na mɨnzɨ huje, abhantu bhagandi akholwe. Amwɨ muyiga, ‘Enya! Mʼpafu ʉnʉ, nantele mʼmwezi wɨ divaayi! Mʼmanyani wa bhasomvya sonko na bhabhomba mbiibhi abhanjɨ!’ 35Leelo, ʉtengamazu wa Ngʉlʉbhɨ wusimishiziwa ashilile hu njendo zya bhantu bhaakwe bhonti.”
ɄYeesu ahunʼkhobhoshela ʉnʼshɨ ʉwɨ njendo ɨmbiibhi
36Hwahali nʉ Mʼfalisaayo ʉmo ʉyo itaawa lyakwe bhahagaga Siimoni. ɄMʼfalisaayo ʉyo ahamʼmwanile ʉYeesu huje, abhale alye ɨshalye hwa mwene. Ɨpo ʉYeesu ahabhala hu khaaya yaakwe, ahakhala pa meeza na hwande alye ɨshalye. 37Mwi‑ibooma ɨlyo mwahali nʉ nʼshɨ ʉmo wa‑ahamanyiishe hu njendo zyakwe ɨmbiibhi.
Ʉnʼshɨ ʉyo lwa wʉmvwa huje, ʉYeesu ali hwa Mʼfalisaayo ʉla alye ɨshalye, ahɨnza ʉmwo na hasupa ahinza ahɨ nyemba zya zinunshila shinza. 38Ahɨmɨɨlɨla hwisinda pa pɨɨpɨ pa manama ga Yeesu. Ɨpo ahasugamila, ahanda alile, amansozi gaakwe gahazʉlʉshɨlaga mu manama ga Yeesu. Ahasyʉmʉlaga ni‑isisi lyakwe, ahanʼnunilaga mu manama gaakwe na humʼpotozye ɨnyemba zya zinunshila shinza.
39ɄMʼfalisaayo ʉla lwa waalola ɨgo, ahasɨɨbha mu mwoyo gwakwe ahaga, “Ʉmuntu ʉnʉ, nkashele lyoli nʼkuwi, handɨ amɨɨnye halɨ huje, ʉnʼshɨ ʉnʉ wa‑ahumʼpalamansya‑palamansya, ali muntu wa bhʉlɨ bhʉlɨ. Wɨnzaga‑amanye huje mʼmomba mbiibhi!”
40ɄYeesu ahamʼmʉʉzya ahaga, “Siimoni, ɨndi ni‑izwi ɨlya hubhʉʉzye.” Wope ahamʼmwamula ahaga, “Mʼmanyizyi, mbʉʉzye.”
41Ɨpo ʉYeesu ahamʼmʉʉzya ɨshifwani ahaga, “Hwahali na bhantu bhabhɨɨlɨ bha bhahakhopile ɨmpɨɨya hwa muntu ʉmo. Ʉwa hwande ahakhopile ɨdinaali#7:41 Ɨdinaali yahali mpɨɨya ya Bhaluumi. Ɨdinaali yeeka yahalɨngaanaga nʉ mʼposheelo ʉgwa humʼposheezye ʉmuntu hwi‑isiku lyeka. ɨmya zisaanu. Ʉwamwabho ahakhopile ɨdinaali amashʉmi gasaanu. 42Bhonti bhabhɨɨlɨ bhahapotiilwe asombe ɨmpɨɨya zya bhahakhopile. Hu nongwa ɨyo ahabhakhobhoshela huje, bhagandi asombe. Wɨlɨ, hwa bhantu bhabhɨɨlɨ ɨbho, weenu wa‑anza hunʼgane tee ashile ʉwamwabho?”
43ɄSiimoni ahamʼmwamula ahaga, “Ɨlola huje, ya yʉʉla wa‑akhobhosheliilwe ɨmpɨɨya ɨnyinji.” ɄYeesu ahamʼmʉʉzya ahaga, “Waamula shinza.”
44Ɨpo ʉYeesu ahanʼgalushila ʉnʼshɨ ʉla, ahamʼmwenya, ahamʼmʉʉzya ʉSiimoni ahaga, “Ʉhunʼnola ʉnʼshɨ ʉnʉ? Ɨntʉʉshɨle mu nyumba yaaho, leelo aawe saga ʉnambɨlɨɨye hwi‑idala ɨlya humpeele amɨnzɨ aga‑asamvye mu manama gaanɨ.#7:44 Hwa Bhayahuudi gahali miiho ahumʼpeele ʉnʼjenu amɨnzɨ aga‑asamvye mu manama gaakwe alɨngaane na‑aje, amadala gahali ni‑inkondi ahabhaazyo ahi‑isanya na matoto hu habhaazyo ahɨ mvula. Leelo ʉnʼshɨ ʉnʉ, ʉmwene ansamviizye amanama gaanɨ na mansozi gaakwe na hugasyʉmʉle ni‑isisi lyakwe. 45Lwa wandamuhaga, saga ʉnuniiye anɨ.#7:45 ʉnuniiye anɨ Hunʼnunile ʉmuntu gahali miiho ga Bhayahuudi humʼmwambɨɨlɨle ʉnʼjenu. Leelo ʉmwene, afume hu habhaazyo hɨ‑ɨntʉʉshɨle ʉmu, saga alitile hununile anɨ mu manama gaanɨ. 46Aawe saga ʉmpotoziizye ɨnyemba itwe lyanɨ.#7:46 ʉmpotoziizye ɨnyemba itwe lyanɨ Humʼpotozye ɨnyemba ʉnʼjenu itwe gahali miiho ga Bhayahuudi alolesye ɨnshɨnshɨ hwa bhajenu bhaabho. Leelo ʉmwene ampotoziizye amanama gaanɨ ɨnyemba zya zinunshila shinza! 47Ɨshi ɨhubhʉʉzya, ʉlugano lwa nʼshɨ ʉnʉ lugoosi, pɨpo akhobhosheliilwe ɨmbiibhi zyakwe zya zili nyinji. Leelo wa‑akhobhoshelwa hadoodo, agana hadoodo.”
48Ɨpo ʉYeesu ahamʼmʉʉzya ʉnʼshɨ ʉla ahaga, “Ɨmbiibhi zyaho zikhobhosheliilwe.”
49Bhaala bha bhahali palishimo pa meeza, bhahanda abhʉzɨlɨzanye huje, “Ɨshi, ʉnʉ yʉ naanu wa‑akhobhoshela abhantu ɨmbiibhi?”
50Ɨpo ʉYeesu ahamʼmʉʉzya ʉnʼshɨ ʉla ahaga, “Ʉfyʉlɨɨlwe, pɨpo ʉli nʉ lwɨtɨho. Bhalaga hu tengaanu.”
Currently Selected:
Luuka 7: SBK
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022, Wycliffe Bible Translators, Inc. All rights reserved.