Jenesesi 32
32
Jako ohovisakanyeda ira agumane na mbalaye Ezawu
1Mulombwana Jako ohomaruwaga adowaga muulrendoni mwaye. Evale adowaga mundila, angelro a Mulugu kohozaga aliwa gumana na liye. 2Jako agaaonne angelro ale, ohowongaga eraga: <<Ale anaza ale ba anyakondo a Mulugu.>> Na mwasa wenne, ohovaha nimburo nne nzina na Mahanayimi.#32:2 Mahanayimi ku wonga makuru menli.
3-4Noira enne, Jako oharuma aliba milanyo eraga: <<Mudowe tatamo ya Seyire muwari mwa ilambo ya Edomu, mwagumane na mbwiyaga Ezawu. Mwanfwanya, mmuwandele ira: <Namalaba wawo Jako unawonga ira: <<Yaka datene divirile di, dakala na Labawu. 5Miyo dihikana ng'ombe, aburu, mabila na anamalaba a alombwana vamohi na a ahiyana. Miyo nnavepa ira nione akala munowanda difwewela murima.>> > >> 6Mwa enne atu aarumile liye ale kagadowile, kagawongile na Ezawu, kagawenlewo, aliwa kohomuwandelaga keraga: <<Hiyo nohodowa muwandela mbalinyu Ezawu. Eni liye uhumaruwa vamohi na alombwana 400, unaza ira agumane na nyo.>>
7Evale Jako agavwile enne, ohokukumuwaga valukulu aovaga. Ohoroma agawa atwaye vamohi na mabila na mbuzi na ng'ombe na akamelo anna liye, makuru menli. 8Airaga enne aumbuwela ira: <<Ezawu aza ira agondjihe nikuru nimohi, nikuru nimohi niwa nnovuluwa.>> 9Evale Jako oholobela eraga: <<Nyo Yehova, Mulugu wa babaga Abarahamu, Mulugu wa babaga Izaki, nyo muhudiwandela ira diwelele ilambo yaga dibaliwe miyo, mudiwandelaga ira jatene jinodiwendela pama. 10Miyo namalaba wenyu kadafwanenle ira nyo mudiirele upama no diziveliwa no roromeleya watene mudiirele nyo. Miyo dilambuwaga muhindje Jordawu, kadanna yengo, so mbwenye datukunle ikumbuzo yaga bahi. Mbwenye peno dihikana makuru menli a atu vamohi na anavinyama. 11Nnouvepani ira mudivunele mmandani mwa mbalaga Ezawu. Nnamuova ira unaze adipe miyo vamohi na ahiyanaga na ahimaga atene. 12Eto nyo mohodiroromeliha ira jatene jinerege diwendela pama eto ahimaga anoza kaindjive nnga miseva da mutcherelani mwa bara, fiyeda ahakalevo mutu unawande akontari.>>
13Jako mahiyu anne ohogonaga nimburo nenne. Unde wagatchile, ohasakulrelra anavinyama amohiwa anna liye ira anvahe mbalaye Ezawu. 14Ohosakulrelra mbuzi da ahiyana 200 na da alombwana 20, mabila a ahiyana 200 na a alombwana 20, 15akamelo 30 ovaha mukaka vamohi na ahimiwene, ng'ombe da ahiyana 40 na da alombwana 10, aburu a ahiyana 20, vamohi na aburu a alombwana 10. 16Nomala ohatukulaga anavinyama atene aasakunlre liye ale, liye avaheda anamalabaye kwi: <<Mutukule anavinyama ala mudowegena sogolro. Mwadowagana, kada nikuru na anavinyama nilapelanege na nikuru nimohi niwa.>> 17Eto ohomuwandela namalaba oroma, liye ira: <<Wagumana na mbalaga Ezawu, aufuka ira: <Mbwiyawo bani? Unadowa waani? Anavinyama waasogonlrena we ala bani?>, 18umuwandele ira: <Anavinyama ala ba a namalaba wenyu Jako.#32:18 Anavinyama ala ba a namalaba wenyu: Jako awonga eno muwari mofuna mukurumutcha mbalaye murima. Jeji umurumihede mbwiyaye Ezawu, unafuna anvahe. Mwinnya unaza uli mundulri mu.> >> 19Ohomuwandela eto namalaba wanembinli, waneraru na atene aavahedile liye anavinyama ale eraga: <<Na nyenne mwanfwanya Ezawu, muwonge mmohive nnga mwemo muwongele miyo. 20Eto mmuwandele ira: <Namalaba wenyu Jako liye unaza mundulri mu.> >> Jako airagana enne aumbuwenle ira: <<Dasogolriha jengo nnafuna miyo nvaha ji, afwase murimaye unokurumuwa. Era eno nagumana kove na kove, afwase liye afuna, unoditambilra pama.>> 21Mwa enne anamalabaye ale kohasogolrana anavinyama afuna liye nvaha mbalaye ale. Mbwenye mwinnyiwa Jako mahiyu anne agonnege vevo vakungile atu misasa diwa.
Jako na mungelro kohohindana kukutu kukutu
22Mahiyu anne Jako ohovenyaga, liye atukula ahiyanaye ambinlene na anamalabaye ambinli a ahiyana ale, vamohi na ahimaye kumi na mmohi ira kalambuwe muhindje wa Jaboke, vevo valambuwiwetcha. 23Jako ohatukulaga atene, liye alambutcha, vamohi na jengo jatene jafwanyeyana liye. 24Mbwenye liye ahanlege mundulri ekave.
Evale liye agahanle, ohozaga mulombwana mmohi roma hindana kukutu kukutu na Jako fiyeda unde tcha.#32:24 ohozaga mulombwana mmohi roma hindana kukutu kukutu na Jako : Malambo a mundulrimu atu kokana pikisano yaira atu mohindana ira kamuone mutu guvi awanda mugwiha nfwaye. Muwari mohindanda mule, kwaali bubudana, nne porotchana, nne kumiha sangiri, so yali hindana, kada mutu esaesaga mugwiha nfwaye. 25Mulombwanole agaonne ira: <<Ii, wenna kannawanda mugondjiha!>>, kawanagave enne, ohomuhinda Jako mogumana tambala, liye mugurugunyula. 26Eto mulombwanole ohowonga na Jako eraga: <<Kadihiye didowege mwasiwa unde uhutcha.>> Mbwenye Jako ohomuwakula, liye ira: <<Miyo kannauhiya. So ira duhiye, ubabihe direliha.>>
27Mulombwanole ohonfuka, liye ira: <<Kodi nzina nawo uli ani?>> Liye ohomuwakulaga ira: <<Miyo nnaitaniwa Jako.>> 28Evale mulombwanole ohomuwandelaga eraga: <<Kuma peno dowa sogolro, nzina nawo kunakala Jako, mbwenye unakala Izarayeli.#32:28 Izarayeli ku wonga wanawana na Mulugu. Tchoira weyo uhuwana na Mulugu vamohi na atu eto uhufiyeda agondjiha atene anno.>>
29Eto Jako ohonfukaga, liye ira: <<Na nyenne dera mudiwandele nzina nenyu.>> Mulombwanole ohomurumelaga, liye ira: <<Unadifukela nni miyo nzina?>> Evale ohomurelihaga mulombwana Jako. 30Noira enne, Jako ohowonga eraga: <<Miyo dihimuona Mulugu kove na kove mbwenye dilive ngumi.>> Evale ohovaha nimburo nenne nzina na Penuweli, [ku wonga kove ya Mulugu]. 31Avenyagavo nimburo na Penuweli nne, tchi tempu yakumaga nzuwa. Evale liye otchikamaga adowaga na mwasa ogurugunyuwa mogumana tambala. 32Na mwasa wenno pakana peno Ana Izarayeli kapa mwanainyama, kinadja musepa unagumaniha tambala na mmwinini, mwasiwa gwenno Jako agurugunyuliwe liye.
Currently Selected:
Jenesesi 32: iLolo
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 Visão Integral