Jenesesi 31
31
Mulugu ohomuruma Jako ira awelele ilambo ya ababaye
1Jako ohovwa ira ahima a anapongwe a moyaye Labawu kowonga iraga: <<Jako uhutukula jengo jatene jene jali ja babihu eto uhumala rayela na mwasa wa jengo ja babihu utukunle liye.>> 2Eto Jako ohoiziwa ira malambo anne Labawu kamuziveliwa nnga jeretcha liye voroma vene.
3Evale Yehova ohomuwandela Jako eraga: <<Venya uwelele ilambo ya ababawo na ilambo ya atu a nlogo nawo. Miyo nnokala na weyo.>> 4Mwa enne Jako ohaitanihaga ahiyanaye ambinlene, Rakeli na Leya ira kaze kokolani wafwanyeya liye adjihaga anavinyama. 5Aliwa kagazile, ohawandelaga eraga: <<Miyo nnaona ira malambo anna babinyu kanadiziveliwa nnga veretcha liye wanle. Mbwenye Mulugu wa babaga ulive na miyo. 6Eto nyo muhuiziwa ira miyo nnomulaba babinyu na kopolo daga datene. 7Mbwenye babinyu ohofiyeda dinyengaga, liye tchindjaga yotambilra yaga fiyeda fendo kumi dene. Mbwenye mwa jatene jejo, Mulugu waga kamuhiyile ira liye adiirele yabure ili yatene. 8Babinyu adiwandela ira: <Anahima a donga donga anabaliwege anakalege awo>, mabila matene kaarela ahima a donga donga. Eto adiwandela ira: <Hehi, ahima atene a malremba anabaliwege anakalege awo>, mabila matene kabala ahima a malrembave. 9Ayo ali makalelo Mulugu asakanya liye, atukulaga anavinyama a babinyu, divahaga miyo. 10Siku nimohi, tempu yagumana mabila ale, miyo dohorohaga. Darohilege dagavenyihile meso aga, daonnege ira mbuzi datene da alombwana dagumanne vamohi na ahiyana, datene dali da malremba na da donga donga na da kore mbinli. 11Evale mungelro wa Mulugu ohodiitanaga morohani, liye ira: <Jako!> Miyo dohowakula miyo ira: <Miyo vano!> 12Liye ohodiwandelaga ira: <Kaing'ana, anavinyama atene a alombwana anagumana na anavinyama a ahiyana atene ba a malremba na a donga donga na a kore mbinli. Unairana jatene ejo gu miyo, mwasiwa dihiona jatene Labawu jinauirela liye.#31:12 Unairana jatene ejo gu miyo, mwasiwa dihiona jatene Labawu jinauirela liye. Mazwala anonifundjiha ira mutu anixangaxangaga, hiyo podi havenda jomuweliheda kunyakunya mwasiwa unafuna iziwa jatene ejo gu Nabwiya. Fwanyeya ira sawasawa nnga babaye Izaki arayenle muwari mwa kopolo da Nabwiya (Jenesesi 26:12-13), na Jako wenne ohorayela muwari mwa kopolo da Mulugu. 13Miyo dili Mulugu wenno dautwanyuwele ilambo ya Beteli,#31:13 Beteli tapulela vande va Yehova vevo vakutulenle we makura vanibweni noimela nnga nimbozo, vevo vasakannye we yolumbela na miyo.#31:13 vevo vasakannye we yolumbela na miyo: Yolumbela ya Jako ali ira Mulugu amukoya, Mulugu akaleve Mulugu waye. (Jenesesi 28:20) Uvenye tchineneva, ukume ilambo yenna, uwelele ilambo ya atu a nlogo nawo.> >>
14Noira enne, Rakeli na Leya kohomuwakulaga mamuniwa Jako, aliwa ira: <<Hiyo nihirumela jatene jiwongile nyo. Tchoira uno hiyo kaninnawo yehu, nne pandi imohi ya jorayela ira babihu unonivaha. 15Babihu unanisakanya nnga nili atu oza. Eto liyene uhufiyeda niguliha, liye mala nonga kobiriwa yatene yafuna kala yehu. 16Tchoira jorayela jatene Mulugu jimuwakile liye babihu, jinakala jehu, vamohi na ahimihu. Hiyo peno nnorumela ira mwirena jatene nnga mwemo Mulugu muuwandenleni liye.>>
17Evale Jako ohagweliha ahiyanaye na ahimaye vaakameloni 18eto liye atukula anavinyamaye atene na jorayela jaye jatene japile liye agali ilambo ya Padani-Arani, liye gundeya ira adowege wa babaye Izaki, ilambo ya Kana. 19Fwanyeya ira tempu yavenyihanaga atu, Labawu aligi pandi imohiwa, asataga mabila. Evale Rakeli ohoba vikwamutu josema ja babaye, liye dowagana.#31:19 Evale Rakeli ohoba vikwamutu josema ja babaye, liye dowagana. Mulombwana Labawu ohokana vikwamutu josema ja amilugu aye. Rakeli mbwenye ohojiba vikwamutu josema jile ahamuwandenle mutu mmohiwa jaira liye. Sogolro uwa nnovwa ira Jako oharuma atwaye ira katatile vikwamutu josema janna atu. (Jenesesi 35:2)
Labawu ohomuhara Jako ira amuirele yabure
20Mwa enne Jako ohowanda muxangaxanga moyaye Labawu, nkuda Aramu, liye tawa vande vaye Labawu ahaiziwaga. 21Atawaga, atawile na atwaye na jatene janna liye, aliwa lambuwa muhindje Eufarati, dowa mwango da Jileyadi. 22Vagavirile malambo mararu, Labawu ohowandeliwa ira: <<Jako uhutawa.>> 23Evale Labawu agavwile enne, ohatukulaga abalaye, aliwa maruwa, roma mutamangelaga Jako. Kagamanle malambo matanu na menli kawendaga, kohonfwanya mwango wa Jileyadi. 24Mbwenye Mulugu ohomutwanyuwela Labawu nkuda Aramu ora ya mahiyu morohani, liye muwandela eraga: <<Polre polre, unamuirele Jako yabure ili yatene!>>#31:24 Polre polre, unamuirele Jako yabure ili yatene: Owu hehi Polre polre, unamuwongele Jako mazu abure nari mazu apama.
25Labawu ohonfwanyaga Jako agagaratile, agakungile misasa daye mwangoni ule. Evale Labawu na abalaye ale kagafiyile, na aliwene kohokunga misasa diwa mwangoni wewule muwari mwa ilambo ya Jileyadi. 26Mwa enne Labawu ohonfuka Jako eraga: <<Kodi mwasiwa gwa nni udizembaga, waatukulaga ahimaga nnga atu ohindiwa kondoni? 27Mwasiwa gwa nni utawaga, udinyengaga wahadiwandela ira: <Nnafuna didowege.>? Ahakale udiwandela, miyo dogosakanya pwando yopanganyana yohagalala, na nyumbo na makotcho na arpa. 28Mbwenye weyo kudihiyile miyo daalanya anaga na azulaga. Weyo mbwenye usakanyile ja uzimora jawo! 29Miyo dogouirela yotakala, mbwenye Mulugu wa ababawo gudiwandenle mahiyu ira: <Polre polre inafuna we wonga na Jako. Mwagumana, kuwonge yengo yabure nne yengo yapama!> 30Akala weyo wohokana yofunafuna yodowa vande va ababawo, kavali makani. Nnga mwasiwa gwa nni utukulaga amilugu aga?>> 31Evale Jako ohomuwakula Labawu, liye kwi: <<Miyo diza duzembagani, dera uovani ira munadiwake na kopolo ahiminyu daatenle miyo ala. 32Mbwenye zela vikwamutu josema munawonga nyo jo, mwanfwanyana veva mutu utukunle, nyo podi mpa. Musayele yatene ili yenyu, vamentoni va abalihu atene, muvitule yenno itukunle miyo, mutukule.>> Jako awongaga enne kaiziwile ira muhiyanaye Rakeli gwabile.
33Evale Labawu ohovolowaga mmusasani mwa Jako, liye sayelamo, kafwannyemo. Liye dowa mmusasani mwa Leya, kafwannyemo. Liye dowa mmusasani mwa anamalaba ambinli a ahiyana ale, funa sayelamo kafwannyemo. Noira eno, ohodowaga volowa mmusasani mwa Rakeli. 34Fwanyeya ira mwa tempu yenne Rakeli vikwamutu josema jile ahenlege muwari mwa yengo inagarateliwa vakameloni eto ohotukulaga liye garatela. Evale Labawu agavolowile, funa venda mwatene emule kafwanyilege. 35Noira enne, Rakeli ohomuwandelaga babaye ule, liye ira: <<Babani munadiumbuwelegena jotakala. Miyo mwadiona dahavenyaga, kahi ira dire tukula nari. Miyo hawandaga venya tchoira peno kadili pama.>>#31:35 tchoira kadili pama.Owu hehi tchoira dire hamba.>> Evale Labawu ohokalelagave ntindi avendaga vikwamutu josema jaye, mbwenye kaonnege.
36Mwa enne Jako ohotakaleliwaga, liye roma musumulula Labawu eraga: <<Kodi yotakala tchivi isakanyile miyo? Ditegile nni, ante nyo fiyedaga dihara na makalelo anna? 37Kodi mwa jengo jaga jatene jimanle nyo bwanyula ji, muhufwanyavo yengo imohi nibile hiyo vande venyu? Akala muhufwanya yengo ili yenyu, kavitulani vamentoni va atwaga na atwinyu atene anafwanyeya eva ala ira kanitonge mwa hiyo atu ambinli mutu guvi umutegenle nfwaye. 38Miyo dali waninyu yaka 20 dulabagani. Mabila na mbuzi denyu kajitatinle ahimiwa. Miyo eto kaditakunne nne mwana nibila nenyu nimohi. 39Miyo didjihaga, kadibabihile zana vande nibila nenyu nimohi nagahindiwe mwanainyama wa mukokolani nnga jinaireyetcha. Mwana nibila nenyu nimohi nahindiwa, vamalroni va mwana nibila nihindiwile nne, miyo dotukula mwana nibila naga nimohi, miyo welihedavo nnga mwadirumile nyo. Mabila matene kabiwa, akala ntana nari mahiyu, nyo modipagalriha. 40Yaka dedo, miyo ora ya ntana doja nzuwa, ora ya mahiyu kadagona, dakana ona goyi no didila. 41Miyo dihilaba yaka 20 vande venyu. Yaka kumi na nnayi daalabela ahiminyu ambinli ira daatele. Yaka tanu na imohi dalabela ira divahiwe anavinyama. Mbwenye nyo modinyenga mutchindjaga yotambilra yaga fendo kumi dene. 42Ahakalaga Mulugu wa makolo aga, Mulugu wa Abarahamu na Mulugu owopiha wa babaga Izaki adikamiheda, nyo peno mwadihiya didowege eno manda ve. Mbwenye Mulugu uhuona goyi daga na mabasa dalaba miyo, mwa eno, nzilo ora ya mahiyu, liye usumululani.>>
Labawu ohosakanya yopangana na Jako
43Evale Labawu ohomuwakulaga Jako eraga: <<Jatene jinna we jikumile mwa miyo. Ahiyanawo ala ba ahimaga eto ahimiwa anno kaabanle atu ba anaga. Eto anavinyama atene anna vamohi na jatene jeji jinaona we ji, jaga. Nnga miyo nnafuna daairele avi ahimaga ala vamohi na ahimiwa anno kaabanle atu? 44So yapamiwa, miyo na weyo nisakanye yopangana yowandana, ikale umboni zela weyo vamohi na miyo.>>
45Evale Jako ohotukulaga nibwe, liye imeliha nnga nimbozo. 46Nomala ohawandela atwaye eraga: <<Kagudelani mabwe madjindji vamohive.>> Evale aliwa kohogudelaga mabwe madjindji vamohive kala kamba indimuwa ya mabwe. Kagagudenle mabwale, aliwa kohodja wandamelana vamabweni vale. 47Evale Labawu ohovaha nimburo nenne nzina na Jegari-Saduta [ku wonga kamba ya umboni na iwongelo yaye], mbwenye Jako nimburo nne avahile nzina na Galedi [ku wonga kamba ya umboni na iwongelo yaye].
48Nomala Labawu ohowonga eraga: <<Kamba ya mabwe ila inalaba ira ikale umboni ozela miyo na weyo peno.>> Nona kamba ya mabwe ile iitaniwaga na nzina na Galedi. 49Eto ilambo yenne, Labawu ohovahaga nzina nimohi niwa na Mizipa [ku wonga nimburo noing'anelavo], liye ira: <<Yehova gunaniing'anela, masiki nagali olapela wene kada mutu na nfwaye. 50Weyo waaonihaga goyi ahimaga, nari waahiya ahimaga, udowa waatela ahiyana amohiwa, masiki vahali mutu unaniing'anela, inafwanela uiziwe ira Mulugu unokala mboni ozela miyo na weyo.>>
51Evale Labawu ohomuwandela Jako eraga: <<Mabwala kagudeliwe va ala eto nibwe niimetchile miyo nnga nimbozo vari va weyo na miyo, ba madilre. 52Nibwe nimohi niimetchihiwe nnga nimbozo ni na mabwe kagudeliwe vamohive ala anakala umboni ira miyo kadikwaranye mabwe ala diza duirela weyo yengo yabure. Eto na wenne ikale yengo imohive, kukwaranye mabwe ala vamohi na nibwe noimela nnga nimbozo ni uza udiirela miyo yengo yabure. 53Mulugu wa Abarahamu, Mulugu wa Nahori na Mulugu wa babiwa akale unafuna nitonga muwari mwa miyo na weyo.>> Mwa enne Jako oholumbela na nzina na Mulugu Owopiha wa babaye Izaki.
54Jako ohovelela mukuto mwangoni wewule, liye awandela atwale ira atene kadowe kadje pawu. Evale aliwa kohodjaga, aliwa gona evale. 55Mmetcheloni muwa na mabebehene, Labawu ohovenya dowa akumbarela ahimaye ambinli ale vamohi na azuliye, liye areliha. Noira eno, ohovenyaga, awelelaga mundulri, liye dowaga waniwa.
Currently Selected:
Jenesesi 31: iLolo
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 Visão Integral