Jenesesi 33
33
Gumana wa Jako na mbalaye Ezawu
1Jagaireyile enne, Jako againg'anne sogolro, ohomuonaga mbalaye Ezawu azaga vamohi na alombwana 400. Evale Jako ohagawaga ahimaye, amohiwa nvaheda muhiyanaye Rakeli, ahima amohiwa nvaheda muhiyanaye Leya, ahima amohiwa liye avaheda anamalabaye a ahiyana ambinli ale.#33:1 anamalabaye a ahiyana ambinli ale: Ku wonga Bila na Zilpa, anno Jako aabanlena liye ahima. 2Ohasogolrihaga anamalabaye ale na ahimiwa amohiwa, omuharela kala Leya na ahimaye, Rakeli na mwanaye Joze kala ogomiheda. 3Evale Jako ohosogolraga ira adowe agumane na mbalaye Ezawu. Mbwenye ahanafiye vali mbalaye vale, Jako ohoroma mukokorela mbalaye Ezawu fendo tanu na mbinli fiyeda liye nfwanya.
4Ezawu ohotamangaga, liye za gumana na Jako, liye mukumbarela eto ohombejari. Mwa enne ambinlene kohoromaga nlelana. 5Evale Ezawu ohaonaga eto ahiyana vamohi na ahimiwene. Agaonne enne ohofukaga eraga: <<Kodi anna anafwanyeya vamohi na weyo bani?>> Jako ohomuwakulaga eraga: <<Ala ba ahima anno Mulugu na sayi daye udivahile liye miyo namalaba wenyu.>> 6Evale anamalabaye a ahiyana ale, vamohi na ahimiwa kaabanle atu na Jako, kohoza, aliwa mukokorela. 7Eto voharela ohozaga Leya vamohi na ahimaye, na aliwene aliwa za mukokorela. Vogomiheda, Joze na mmaye Rakeli, kohozaga, aliwa mukokorela.
8Evale Ezawu ohofukaga, liye ira: <<Nnga makuru a anavinyama digumannena miyo mundila, anno mwaasogolrihile nyo ale banni?>> Jako ohomuwakulaga eraga: <<Miyo mbwiyeni dafuna duvaheni ira nyo muwande difwewela murima.>> 9Ezawu mbwenye ohomuwakulaga, liye ira: <<Mbalaga miyo dihikana jengo jidjindji. Jatene jinna we jikale jawo.>> 10Mbwenye Jako ohomuwakulaga, liye ira: <<Nari. Akala munodifwewela murima, so miyo nnafuna muwatchele jovaha ji jikumile mmandani mwaga. Mwasiwa miyo daing'anaga kove yenyu inakala nnga nnaona kove ya Mulugu. Nyo eto muhudiwatchela pama. 11Miyo nnouvepani ira muwatchele yovaha yenno izilena miyo uvahani mwasiwa Mulugu unodiirela upama mwa sayi daye eto jihanlena miyo jihidikwakwana.>> Evale Jako ohomukanyihedagave mbalaye ule, fiyeda liye rumela watchela.
12Evale Ezawu ohoiraga: <<Ndowegeni, niharanege, dikale vasogolro.>> 13Jako mbwenye ohomuwakula, liye ira: <<Mbwiyeni nyo muhuiziwa ira ahima kawendaga kinabaranya eto miyo nnoakumbanya mabila na ana ng'ombe ang'onong'ono owamwa. Nera nibaranye siku nimohi ira nibaranyihe ulrendo wehu, anavinyama atene anna anomala kwa. 14Nnouvepani mbwiyeni ira musogolre. Miyo namalaba wenyu nnerege za vang'ono vang'ono malringana makalelo anawenda anavinyama ala vamohi na ahima, ante nufwanyeni Seyire wewo munakala nyo mbwiyeni.>>
15Evale Ezawu ohomuwakula eraga: <<Tabo. So miyo nnafuna daahiye anamalabaga angasi angasi kahale na weyo kaukamihede jengo jinna we.>> Jako ohomuwakula, liye ira: <<Mbwiyeni mwasiwa gwa nni? Voira muhudifwewela murima, ihikwakwana eni mbwiyeni.>> 16Evale Ezawu ohosogolraga awelelaga waniwa Seyire. 17Mbwenye Jako kamuharile Ezawu waniwa. Liye ohodowa Sukoti, dowa manga nyumbaye wewule eto ohosakanyaga makolra oindjivene ira ng'ombe daye dikalegemo. Mwasiwa gwenno nimburo nne kaitanaga Sukoti, [ku wonga makolra].
Fiya wa Jako ilambo ya Sikemu
18Yengo imohi iireyile muulrendoni mwa Jako akumaga ilambo ya Padani-Arani, awelelaga waniwa Kana, tchi ila. Mulombwana Jako agafiyile mwa murendele wandamelana sidadi ya Sikemu mwilamboni mwa Kana, liye ohokunga misasa daye wandamelana sidadi ya Sikemu ile. 19Evale Jako ohogula tereno yenno yamangilevo liye misasa daye. Agunlevo na Sikemu abalaye anno kafwanyeya kagali ahima a Amori. Jako agunle tereno ile na kobiri da parata dokwakwana 100. 20Noira enne, ohomangavo ibuwa ya mukuto, liye vaha ibuwele nzina na Mulugu gu Mulugu wa Izarayeli.
Currently Selected:
Jenesesi 33: iLolo
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 Visão Integral