Mi cilima 19
19
Loti sani ki cia Sodomi bolinma yogunu
1Bi malekiliediba den pundi Sodomi ku yenjuagu. Loti den kaa Sodomi buliñoabu kani. Loti n den laa ba yaa yogunu, o den fii ki tuogi ba, ki gbaani ki pugi ba.
2O den yedi: «N canbaanba, n mia yi yin kua yi naacemo dieli nni ki nigidi yi taana ki duani lankani ku ñiagu, li yaa fii ki faa ku tiŋaapanpangu, yin suagi yin caa naani.» Bi den guani ki yedi: «Yeni ka, ku ñiagu ti baa duani ki daaga nne.»
3Loti den tigini tigini ba hali ke bi gedi o deni, ki kua o dieli nni. O den ŋanbi bi po mi jiema, ki teni ke bi tieni bi po yaa dupen n ki pia dabinli. Bi den dini.
4Ban daa den duani yaa yogunu, u dogu nni yaaba, li bila leni li nikpela kuli den ñani i kaani kuli ki gaani ki cebini Loti diegu. 5Bi den yini Loti ki yedi o: «Yaa niba n kua a diegu nni dinla ñiagu yeni, bi ye le? Teni ban ña ti kani tin taani leni ba.»
6Loti den ñani ki gbagi ki luoni bu buliñoabu o puoli po, ki sedi bi kani. 7O den yedi: «N mia yi n kpiiba, yin da tieni mi biadima. 8Diidi, n pia bisiabilie yaaba n daa bani jaba, n baa ñani ba niinpo, yin tieni ba yin bua yaala. Ama bonyenla bebe n ye, yin da tieni bi naa niba puu kuli, kelima bi cani nni ki ye n diegu nni.»#Buj 19.22-24. 9Bi den yedi: «Fuadi lankani!» Bi go den yedi: «O ne cua o cangu, ki ji bua ki jia ti buudi! Ti baa tieni a yaala n bia ki cie tin baa tieni ba yaala.» Bi den tieni Loti u paalu, ki bua ki mudi o diebuliñoabu. 10Ama bi jaliediba yeni den tandi bi nii, ki kuani Loti bi kani o diegu nni, ki luoni bu buliñoabu. 11Bi den ŋaa yaaba n den se bu buliñoabu kani ti juandi, ki cili li bila, ki yaa caa hali li nikpela, ki teni ke bi duoliti bi yula fanma fanma ki lingi bu buliñoabu.#2Bad 6.18.
12Bi jaliediba yeni den yedi Loti: «A go pia ŋme yo nekanba? A cuadiba, a bijaba, a bisiaba leni yaaba n tie a yaa yaaba kuli u dogu nni, teni ban ña u naa kaanu. 13Ti baa bolini u naa kaanu, kelima ban mua u naa dogu biadima maama pundi o Diedo nintuali. O Diedo soani ti ke tin bolini u.»
14Loti den ñani ki maadi leni o cuadiba yaaba n den kubi o bisiaba: «Fii mani ki ña u naa kaanu, kelima o Diedo baa bolini u dogu kuli.» Ama o cuadiba yaa po, li den tie nani o jeli yene.
15Landaali, lan yendi yaa yogunu, malekinba den tigini Loti ki yedi o: «Fii ki taa a pua leni a bisaliediba yaaba n ye ne, ke ŋan da ti taani ki bodi leni u naa dogu.»
16Ama wan den waagidi yeni, laa jaliediba den cuo o nuu, wani leni o pua leni o bisaliediba, kelima o Diedo den bua ki ciadi o. Bi den dadi ki ñani ba u dogu nni.#2Pie 2.7.
17Ban den ñani ba yaa yogunu, bi siiga nni yendo den yedi: «Sani ki cia ki gaa a miali. Ŋan da diidi a puoli po, ki da sedi mi fanma nni. Sani ki gedi li juali po, ke ŋan da bodi.»
18Loti den yedi ba: «O, n Diedo, 19a pali mani n po ke a waani a ninñima n yabi n po maama, ki ciadi n miali. Ama n kan fidi ki sani ki gedi hali li juali kani ki cia, ke mi bolinma daa nandi nni. N baa bodi. 20Min baa mia ŋa yaala n tie ne, u naa dogu wa, n bua ki mia ŋa ŋan pa nni min wuoni lankani, lani n tie min da kpe.» 21O den yedi o: «Diidi, n puni a laa sanu, n kan bolini ŋan maadi yaa dogu yaa maama yeni. 22Jaligi ki sani tontoni ki kua ki wuoni u niinni, kelima n kan fidi ki tieni puu, se a pundi likani.» Li tie lani yaa po ke bi den yini laa dogu Tisoari.#19.22 Tisoari: Bua ki yedi yaa dogu n wa.
23U yienu den pudi Loti n den kua Tisoari dogu nni yaa yogunu. 24Lanyogunu, o Diedo den teni ke li cidibili#19.24 Li cidibili tie ban taani yaala ke li tie nani ti duudi yeni ki tagi mi tondañoagima. leni u mu ñani o Diedo kani, ki mini nani ki taaga yeni, ki baa Sodomi leni Gomori po.#Mat 10.15; 11.23-24; Luk 10.12; 17.29; 2Pie 2.6; Jud 7.
25O den bolini laa dogi kuli, laa fanma leni yaa niba n den ye i dogi nni kuli, ki go bolini ki tinga tiidi leni li muadi kuli. 26Loti pua den gbegi ki diidi puoli po, ki kpandi ki tua yaabunbunli.#Luk 17.32.
27Abalahama den yagidi ki fii, ki gedi yaa kaanu ke o den se o Diedo nintuali. 28O den nua Sodomi leni Gomori leni li fanma bianu kuli, ki laa ke i muñii fii ki ña ki tinga nni, nani ki buaga yaa muñii yeni.
29U Tienu n den bolindi laa diema dogi yaa yogunu, o den tiadi Abalahama po, ki teni ke Loti sani ki ciadi mi bolinma niinni.
Loti leni o bisiaba
30Loti den fii Tisoari, ki doni ki ban ye li juali yuli po, wani leni o bisaliediba, kelima o den jie, ki naa bua ki kali Tisoari dogu nni. O den kua ki baa yaa ye ku tanlongu nni, wani leni o bisaliediba. 31O bisakpelo den yedi o waalo: «Ti baa kpeligi, joa mo kuli naa go ye ti diema nni, yua n baa cua ti kani nani mi diema kuli nibuoli n tiendi maama. 32Ŋan cua tin ñuni o mi daama ki duani leni o, lani n tie ti baa buolu n da bodi.»
33Lanwani, bi den teni ke bi baa ñuni mi daama laa ñiagu, o bisakpelo den kua ki duani leni o. Waa den bandi wan duani yaa yogunu, bi wan fii yaa yogunu. 34Yaa daali n ŋua, o bisakpelo den yedi o waalo: «Diidi wonli nni ñiagu, n den duani leni n baa. Tin go teni wan ño mi daama dinla ñiagu, ke a mo n gedi ki duani leni o, lani n tie ti baa buolu n da bodi.»
35Bi den teni ke bi baa ñuni mi daama laa ñiagu goga, ke o waalo den kua ki duani leni o. Waa den bandi wan duani yaa yogunu, bi wan fii yaa yogunu.
36Loti bisaliediba kuli den punbi bi baa po. 37O bisakpelo den mali bonjaga, ki yini o Moabi. Wani n tie Moabi yaaba yaa baa hali dinla. 38O waalo moko den mali bonjaga, ki yini o Beni-Ami. Wani n tie Anmoni yaaba yaa baa hali dinla.
Currently Selected:
Mi cilima 19: BGP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Gulmancema Protestant Bible © Bible Society of Burkina Faso, 2013.