Mi cilima 18
18
U Tienu waani ke Sala baa maa bonjaga
1O Diedo den doagidi Abalahama kani ke o ye Manmire seni tiidi kani. Wan den kaa o gbandieli buliñoabu nni u yensiicocolu, 2Abalahama den yaadi ki diidi, ki laa nibitaa ke bi se o nintuali. Wan den laa ba yaa yogunu, o den fii ki sani ki tuogi ba, ki gbaani ki pugi ba.#Heb 13.2. 3O den yedi bi siiga nni yendo: «N Diedo, li yaa tie ke a pali mani n po, n mia ŋa ŋan da pendi ki foagidi leni a naacemo. 4Cedi min yini ban cuani yi po mi ñima waamu, yin nigidi yi taana, ki fuodi bu naa tibu tinga. 5N baa gedi ki baa mi jiema waamu ki pugini yi fidu. Li yaa pendi, yi baa fidi ki suagi liiga, lani n tie yin da ña yi naacemo kani fanma.» Bi den guani ki yedi o: «Tieni nani ŋan yedi maama.»
6Abalahama den gedi tontoni ki kua o gbandieli nni Sala kani, ki yedi o: «Tontoni, ŋan taa mi yonŋanma yiemutaa ki buuni ki ŋanbi mi jiema.» 7Abalahama go den sani ki gedi o yankulu po, ki taa ki naabiga yaaga n ŋaani ki pia mi kpama, ki teni o naacemo ke o ŋanbi o tontoni. 8O go den taa mi naaŋankpama leni mi naaŋanma, ki taa ban den ŋanbi yaa naabiga yaa nandi, ki sieni likuli bi nintuali. O den ye leni ba bu tibu tinga ban den di yaa yogunu. 9Lanwani, bi den yedi o: «A pua Sala ye le?» O den guani ki yedi ba: «O ye li gbandieli nni.» 10Bi siiga yendo den yedi: «N go baa cua a kani binli po u naa yogunu. Diidi a pua Sala baa maa bonjaga.» Sala den ye o puoli po li gbandieli buliñoabu kani, ki cengi.#Lom 9.9. 11Abalahama leni Sala den kpeligi ki podi. Sala naa go den daani ke o baa baa biga. O den laa o pali nni ki yedi: 12«Moala ke n podi boncianla, naani n go pia joa ŋantaadi? N daano mo podi.»#1Pie 3.6. 13O Diedo den yedi Abalahama: «Be yaa po ke Sala laa ki yedi: ‹Naani li tie moamoane ke min podi boncianla maama ne, n go baa fidi ki maa?› » 14Naani li pia o Diedo n kan fidi ki tieni yaala? Binli po lan bili yaa yogunu yaa cua, n baa cua a kani, li baa sua ke Sala mali bonjaga.#Luk 1.37.
15Sala n den jie yeni, o den nia ki yedi: «Mii laa ba.» O Diedo den guani ki yedi o: «Moamoani a laa.»
16Laa niba den fii ki baa suagi liiga, bi den pegidi ki noanli Sodomi po. Abalahama den yegi leni o ki piadi ba. 17Lanwani, o Diedo den yedi: «Naani n baa wuoni Abalahama min baa tieni yaala? 18Li tie i moamoani cain ke Abalahama baa tua yaa nibuolu n yabi, ki pia u paalu. Ki tinga nibuoli kuli baa baa li seli kelima o po. 19N den gandi wani ke wan bili li ñoamabonli o bijaba leni o diegu yaaba po, yaaba n baa ŋoadi o puoli, ki baa yaa kubi o Diedo sanu, ki go tiendi yaala n tiegi, ki kubi mi teginma. Li tie lani yaa po ke o Diedo baa tieni Abalahama po wan den niani o yaala kuli.»
20O Diedo den yedi: «Bi niba mua Sodomi leni Gomori yaaba biadima, bi tuonbiadi yabi hali ke li pendi. 21Lani n teni ke n baa jiidi ki le ban tiendi yaala yaa naani nani min gba maama. Li yàá tie yeni mo, n baa bandi.»
22Bi jaliediba den fii ki suagi Sodomi po. Ama o Diedo wani den sedi leni Abalahama. 23Abalahama den nagini ki yedi: «Naani a baa teni bi niteginkaaba n taani ki bodi leni bi nibiadiba? 24Daalinba niteginkaaba piimuu n ye u dogu nni, naani a baa bolini laa dogu, ki kan tieni sugili u po, kelima niteginkaaba piimuu yeni po? 25A kan tuo o niteginka n taani ki kpe leni o nibiado. A kan tuo o niteginka n tua yenma leni o nibiado. Laa tuonli buolu foagi leni a. Li foagi leni a cain. Naani yua n ja ti buudi leni ki tinga yaaba kuli, o kan tieni mi teginma?»
26O Diedo den yedi: «N yaa laa niteginkaaba piimuu Sodomi dogu nni, n baa tieni u dogu kuli po sugili, kelima bi yaa po.»
27Abalahama go den guani ki maadi ki yedi: «Diidi, n ñigini ki maadi leni n Diedo mini yua n tie mi wagima leni mi fantanpienma bebe. 28Daalinba niteginkaaba piimuu yeni siiga, nibimuu bebe n baa poadi. Naani a baa bolini u dogu kuli kelima bi nimuudiba yaaba n poadi yeni po?» O Diedo den guani ki yedi o: «N yaa laa niteginkaaba piinaa n nibimuu u niinni, n kan bolini laa dogu.»
29Abalahama go den maadi leni o ki yedi: «Daalinba bi yaa ye niteginkaaba piinaa bebe te?» O Diedo den yedi: «N kan tieni puu kelima laa nipiinaadi po.»
30Abalahama den yedi: «N Diedo n da bieni o pali ke n go baa maadi. Daalinba bi yaa ye niteginkaaba piitaa bebe mo te?» O Diedo den yedi: «N kan tieni puu n yaa laa niteginkaaba piitaa.»
31Abalahama go den yedi: «Diidi n paagi n pali ki maadi leni n Diedo. Daalinba bi yaa ye niteginkaaba piilie bebe te?» O Diedo den yedi: «N kan bolini u kelima laa nipiiliedi po.»
32Abalahama go den yedi: «N Diedo n da bieni o pali, n go baa maadi yenma bebe. Daalinba bi yaa ye niteginkaaba piiga bebe mo te?» O Diedo den yedi: «N kan bolini u kelima laa nipiiga po.»
33O Diedo n den maadi leni Abalahama ki gbeni yaa yogunu, o den gedi. Abalahama den guani o denpo.
Currently Selected:
Mi cilima 18: BGP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Gulmancema Protestant Bible © Bible Society of Burkina Faso, 2013.