Lukasi 14
14
Iesu mopakauriꞌ hadua tauna i alo penómbáꞌá
1Hangkani tempó i alo penómbáꞌá, Iesu lao mandeꞌ i támbina hadua tadulakoraꞌ toParisi. Tangaꞌraꞌ i támbi iti, handaꞌ tauna to molelemata Iesu láwiꞌ mampeliꞌheꞌ kamanawoꞌáNa. 2I tempó iti woꞌo, haweꞌ miꞌi hadua tobaleilo to kekámbá taena hai bitina, meángkáꞌ i lindoꞌna Iesu. 3Napekuneꞌ Iesu i guru-guru agama hai toParisi to araheꞌ ionoꞌ, Nauliꞌ, “Mouláꞌ áturá ágámántaꞌ, ba peisákeꞌ mopakauriꞌ to tiꞌara nalalu i alo penómbáꞌá, ba tiꞌara?”
4Guru-guru agama hai toParisi iti, maniiꞌ-niiꞌ peheꞌ, mewaliꞌ napekamaꞌ miꞌi Iesu tauna to tiꞌara nalalu iti. Napakauriꞌ haneꞌi Nahuoꞌ mesuleꞌ. 5Roo onoꞌ, Nakuneꞌheꞌ, “Ane rápáꞌna ara ánáꞌmi ba gapiꞌmi to manawoꞌ i lalu tibubuꞌ i alo penómbáꞌá, ba ina nipatodáhi peá i lalu tibubuꞌ iti, ba ina nihore, kehapiꞌ i alo penómbáꞌá? Hangaa-ngaa nihore.” 6Agáiáná tiꞌara ara haweꞌ hadua to mohániki pekuneꞌNa iti.
Hangaa-ngaa mengkaiwóiꞌkeꞌ
7I támbina toParisi iti, Iesu moita handaꞌ torare mampileꞌi haduduáraꞌ pehodaꞌá to teádái. Onoꞌ miꞌi haneꞌi Iesu mopaturoꞌheꞌ moliu ngkóráꞌ pándiriꞌ deꞌe, 8Nauliꞌ, “Ane rakióꞌkou lao i posusaꞌá petauna, ineeꞌkou mehoda i pehodaꞌá to teádái. Mole babilaꞌ arai tauna ntániꞌna to rakióꞌ to melumbuꞌ karabiláꞌna hangko i hio. 9Ane iti to nubábehi, pueꞌ susa ina lao i hio hai mohángáꞌákoꞌ node: ‘Melimbákoꞌ hangko i pehodaꞌá deꞌe, láwiꞌ tauna deꞌe ina mehoda ieneꞌ.’ Ina mahilikoꞌ melimbá lao mehoda i taleuꞌ ntepuꞌu. 10Mewaliꞌ, ane rakióꞌkoꞌ lao i posusaꞌá, rángina miꞌi mehodakoꞌ sieruꞌ i taleuꞌ ntepuꞌu. Babilaꞌ pueꞌ susa ina lao i hio hai mohángáꞌákoꞌ node: ‘Ee, maikeꞌ mehoda i pehodaꞌá i lindoꞌ.’ Ane noꞌonoꞌi, ina rabiláꞌkoꞌ i lindoꞌraꞌ tauna to handaꞌ. 11Heáná to mampepemahile ina rapaiwóiꞌ, hai heáná to mengkaiwóiꞌ ina napomahile Pueꞌ Ala.”
12Roo onoꞌ, Iesu molaluita i toParisi to mewawaha mandeꞌ i támbina, Nauliꞌ, “Ane mokióꞌkoꞌ tauna mai i posusaꞌámu, maroꞌa kalialo ba káindi, ineeꞌkoꞌ mokióꞌ peá rángámu, halalumu, ba topebuku i lalu wánuámu, láwiꞌ hira woꞌo bateꞌraꞌ ina mokióꞌkoꞌ mosusa i támbiraꞌ, hai apa to nubábehi iti ina teháwángi peá noꞌonoꞌ. 13Agáiáná ane mopaꞌarakoꞌ susa, hangaa-ngaa nukióꞌ woꞌo tauna to meahiahiꞌ tueꞌraꞌ, to tiꞌara masilolonga wátáraꞌ, topaluꞌ hai tobilo. 14Ane noꞌonoꞌ bábehiámu, ina nawátiꞌkoꞌ Pueꞌ Ala ánti katiꞌárána rabuku tauna iti moháwángi bábehiámu iti. Pueꞌ Ala to ina moháwángi i katueꞌraꞌ huleꞌ upu-upu tauna to manótó i peitáNa.”
Ngkóráꞌ pándiriꞌ kana i posusa mahile
(Mat. 22:1-10)
15Tangaꞌraꞌ mani mandeꞌ, hadua torare to mohádi laluitana Iesu ininá manguliꞌ i Iesu, “Morasiꞌ ntepuꞌuheꞌ tauna to ina mandeꞌ hingkakani hai Pueꞌ Ala i lalu popárentáNa.”#14:15 Handaꞌ toIahudiꞌ mepoinálái, ane haweꞌ miꞌi Datu Topehómpóꞌ, ina Napaꞌara posusa mahile. Upu-upu tauna to tetidaꞌ i Pueꞌ Ala ina Nakióꞌheꞌ mandeꞌ hingkakani hai Ia.
16Agáiáná nauliꞌ Iesu i tauna iti, “Hangkani tempó, ara hadua tauna to mopaꞌara susa mahile, hai handaꞌ tauna to nakióꞌ. 17Posusa iti ina ratepuꞌu láwiꞌ upu-upuna timama miꞌi, haneꞌi pueꞌ susa iti mohuoꞌ miꞌi hawiꞌna lao mohángáꞌáheꞌ tauna to rakióꞌ, ‘Laomokeꞌ mandeꞌ, láwiꞌ upu-upuna timama miꞌi.’ {Lao mpuꞌu miꞌi hawiꞌna iti.} 18Agáiáná upu-upuheꞌ to rakióꞌ, ara álásáraꞌ haneꞌi tiꞌaraheꞌ peisá lao i posusa iti. Hadua manguliꞌ, ‘Hangko mohólóaꞌ tampoꞌ, hai hangaa-ngaa lao sieruꞌ kupeita. Membiáꞌaꞌ ámpu i pueꞌ susa, láwiꞌ tiꞌaraꞌaꞌ peisá meuláꞌ.’ 19Ara woꞌo to manguliꞌ, ‘Hangko mohólóaꞌ lima párina gapiꞌ, hai hangaa-ngaa laoheꞌ sieruꞌ kupopopajeko. Membiáꞌaꞌ ámpu i pueꞌ susa, láwiꞌ tiꞌaraꞌaꞌ peisá meuláꞌ!’ 20Ara wopiꞌi to manguliꞌ, ‘Hangko rataunaꞌaꞌ! Mewaliꞌ, tiꞌaraꞌaꞌ peisá lao.’
21I kamesuleꞌna hawiꞌ iti, ia mopahaweꞌ i pueꞌna pehániꞌraꞌ tauna to rakióꞌ. Rumihi ntepuꞌu kamabukoꞌna pueꞌ susa iti, onoꞌ miꞌi haneꞌi ia mohángáꞌá hawiꞌna, ‘Hawiáꞌmokoꞌ lao i rárá to mahile hai i pengá-pengána rárá to ara i kótá deꞌe. Nukióꞌmoheꞌ mai upu-upu tauna to meahiahiꞌ tueꞌraꞌ, to tiꞌara masilolonga wátáraꞌ, tobilo, hai topaluꞌ.’ {Mewaliꞌ, lao mpuꞌu miꞌi hawiꞌna iti mampeuláꞌi hawaꞌna pueꞌna.}
22I kamesuleꞌna, nauliꞌ i pueꞌna, ‘Tuá, hawaꞌmu kupopolumao miꞌi, agáiáná tiꞌara mani bukeꞌ támbimu. Ara mani pehodaꞌá.’
23Onoꞌ miꞌi haneꞌi nauliꞌ wopiꞌi pueꞌ susa iti i hawiꞌna, ‘Lao wopakoꞌ i rawa wánuá bona nubámbáriáheꞌ iumbá-umbá peá posusa deꞌe, maroꞌa i rárá to mahile maroꞌa i rárá to kókóiꞌ. Hangaa-ngaa nupasimbukuheꞌ tauna mai, bona támbingkuꞌ bukeꞌ. 24Hai kuhángáꞌákou: tauna to kukióꞌ rungu-runguna, tiꞌara ara haweꞌ hadua to ina mandeꞌ pandeꞌ to kupatimama miꞌi!’ ”#14:15-24 Tauna to rungu-runguna rakióꞌ iamoheꞌ toIahudiꞌ. Agáiáná mosápuákaheꞌ Pueꞌ Iesu, onoꞌ miꞌi haneꞌi ara tauna to tiꞌara toIahudiꞌ to ina molámbiꞌ gáláꞌraꞌ i lalu popárentána Pueꞌ Ala.
Maꞌángkárá meuláꞌ i Iesu
25Handaꞌ tauna to meuláꞌ i Iesu. Tangaꞌraꞌ molumao, napehaileꞌheꞌ Iesu haneꞌiheꞌ Nahángáꞌá: 26“Nipehádingi kómu to mampoinao meuláꞌ i Kódóꞌ: heáná to melumbuꞌ pampokaꞌahiꞌna inána, umána, toinána, ánáꞌna, halaluna, ba wátána haduduána hangko i Kódóꞌ, ia tiꞌara peisá mewaliꞌ topeuláꞌKuꞌ. 27Nipehádingi kómu to mampoinao meuláꞌ i Kódóꞌ: heáná to tiꞌara timama mantódihá kapári ba mate#14:27 I lalu básá Iunani: mopáháꞌá kau mombehape ánti peuláꞌna i Kódóꞌ, tiꞌara woꞌo peisá mewaliꞌ topeuláꞌKuꞌ.
28Ane ara hadua hangko i oloꞌmi to mampoinao moaró hambuaꞌ támbi to mahile, hangaa-ngaa napepekiri sieruꞌ dóiꞌna, ba ina gáná ba tiꞌara. 29Láwiꞌ ane mopondasi miꞌi, agáiáná upu dóiꞌna hai tiꞌara mani wali, ina rapatawai upu-upu tauna to moita. 30Ina rauliꞌ, ‘Huhidoꞌ! Tauna deꞌe mampoinao káꞌá woꞌo moaró támbi to mahile, agáiáná tiꞌara gáná dóiꞌna!’
31Noꞌonoꞌ woꞌo, ane ara hadua datu to moánti surudadoꞌna to hampuloꞌ sábuna bona mampombealaꞌá hadua datu to ara rompuloꞌ sábuna surudadoꞌna, rángina miꞌi datu iti mampepekiri sieruꞌ, ba nabuku moewaꞌ ewálina ba tiꞌara? 32Láwiꞌ ane naisá katiꞌárána nabuku moewaꞌheꞌ, i tempóna karaoꞌ mani, ia peisá mani mohuoꞌ bahangapa surona lao modame hai ewálina.
33Mewaliꞌ, noꞌonoꞌ woꞌo kómu. Ane niundeꞌ mewaliꞌ topeuláꞌKuꞌ, rángina miꞌi nipepekiri sieruꞌ apa to hangaa-ngaa nibábehi. Láwiꞌ ane tiꞌarakou timama mokábáhá upu-upu to ara i kómu, tiꞌarakou peisá mewaliꞌ topeuláꞌKuꞌ.”
Bure to matáweá
34Iesu mopahaweꞌ wopiꞌi ngkóráꞌ pándiriꞌ deꞌe, Nauliꞌ, “Kómu topeuláꞌKuꞌ peisá rapándiriꞌ nodo bure. Bure mobunduꞌ ntepuꞌu. Agáiáná ane matáweá miꞌi, peisá paꞌi rapamabure huleꞌ? 35Kehapiꞌ miꞌi rapopakaruduꞌ tudaꞌ-tudaꞌ, tiꞌara piꞌi mobunduꞌ. Rángina miꞌi ratibe.#14:35 Básá woꞌo Marakusi 9:50. Maroꞌa ntepuꞌu ane ara tauna to mopailalu apa to nahádi!”
Currently Selected:
Lukasi 14: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.