Iohane 13
13
Iesu mobahoꞌi bitiraꞌ topeguruNa
1Hangalo hangko tiꞌara mani haweꞌ alo Posusa Paska, Iesu moisá kaꞌina haweꞌna miꞌi tempóNa mopálehi duniáꞌ hai mesuleꞌ lao i UmáNa. Maꞌahiꞌ laluNa i upu-upu tauna to meuláꞌ i Hia, onoꞌ miꞌi haneꞌi kamahilena ahiꞌNa iti Napatongawaꞌáheꞌ haweꞌ-haweꞌ i kamateNa.
2Káindi iti, topeguruNa mandeꞌheꞌ hingkakani hai Iesu. I tempó iti woꞌo, Datu Tokadake roo miꞌi mampopokale laluna Iudasiꞌ ánáꞌna Simoꞌ Isikarioꞌ, bona mampobaluꞌ Iesu i ewáliNaheꞌ. 3Agáiáná naisá miꞌi Iesu kanaweꞌiNa miꞌi UmáNa upu-upu kuasaꞌ i Hia. Naisá woꞌo kahangko i Pueꞌ AlaNa, hai kaꞌina mesuleꞌNa wopiꞌi i Pueꞌ Ala. 4Onoꞌ haneꞌi meángkáꞌ miꞌi, mokábáhá kumbáNa, hai moala báná Naweweha i hopeꞌNa. 5Roo onoꞌ, Ia moala uwai Nabubuha i loia, hai Natepuꞌu mobahoꞌi bitiraꞌ topeguruNa, haneꞌi Naumpáhi hai báná to i hopeꞌNa.
6Haweꞌ miꞌi Iesu i Simoꞌ Peturuꞌ, agáiáná Peturuꞌ manguliꞌ, “Pueꞌ, moapa haneꞌi Io riꞌi to mobahoꞌi bitingkuꞌ?”
7Nauliꞌ Iesu, “Deꞌe-deꞌe, tiꞌara mani nuisá apa to Kubábehi. Agáiáná i alo to ina haweꞌ, hangko nuisá riꞌi.”
8Nauliꞌ Peturuꞌ, “Ineeꞌ, Pueꞌ! Tiꞌara hintotoꞌ ane Io to mobahoꞌi bitingkuꞌ.”
Nauliꞌ Iesu, “Ane tiꞌarakoꞌ Kubahoꞌi, tiꞌara ara pohintuwuꞌmu hai Kódóꞌ.”
9Nauliꞌ Simoꞌ Peturuꞌ, “Ane noꞌonoꞌi Pueꞌ, ineeꞌ bitingkuꞌ peá, agáiáná taengkuꞌ hai wuáꞌkuꞌ woꞌo.”
10Nauliꞌ Iesu, “Tauna to roo miꞌi medói, tiꞌara piꞌi kedái, maituꞌ miꞌi upu-upu wátána, tiꞌara piꞌi paraluu rabahoꞌi huleꞌ, bateꞌna peá bitina to hangaa-ngaa rabahoꞌi wopiꞌi.#13:10 Lempóna: ane Pueꞌ Ala moámpungi miꞌi dósántaꞌ, to taparaluu mani, membiáꞌ ámpu i dósántaꞌ alo-alona. Kómu, tebahoꞌimokou, agáiáná tiꞌarakou upu-upu.” 11Iesu molaluita noꞌonoꞌ, láwiꞌ Naisá miꞌi heáná to ina mampobaluꞌ wátáNa i ewáliNa. Onoꞌ miꞌi haneꞌi Nauliꞌ, “Tebahoꞌimokou, agáiáná tiꞌarakou upu-upu.”
12Karoona Iesu mobahoꞌi bitiraꞌ, Ia mopakeꞌ miꞌi huleꞌ kumbáNa hai mehoda, haneꞌi Nahángáꞌáheꞌ, “Ba niꞌisái lempóna apa to hangko Kubábehi i kómu? 13NibiláꞌAꞌ, mewaliꞌ nikióꞌAꞌ Guru hai Pueꞌ. Laluitami iti toꞌu ntepuꞌu. 14Ane Kódóꞌ Pueꞌmi hai Gurumi, mobágóꞌAꞌ nodo hadua hawiꞌ mobahoꞌi bitimi, apa mani kómu, hangaa-ngaa mengkaiwóiꞌkou mombekádipurá, rápáꞌna mombebahoꞌikou mpobiti. 15Kupopaitaꞌákou pándiriꞌ deꞌe ininá, bona nipeuláꞌi bábehiáNgkuꞌ.
16Toꞌu ntepuꞌu laluitaNgkuꞌ deꞌe: topobágóꞌ tiꞌara melumbuꞌ karabiláꞌna hangko i tuána, hai huoꞌá tiꞌara melumbuꞌ karabiláꞌna hangko i tauna to mehuoꞌ. 17Ánti kaniꞌisána paturoꞌ deꞌe, ina morasiꞌkou ane nipeuláꞌi.
18Apa to Kuꞌuliꞌ ininá, tiꞌara mokana i kómu upu-upu. Kuisá ami pambiárána tauna to Kupileꞌi. Agáiáná hangaa-ngaa tebukeki apa to teukiꞌ i lalu Sura Magasaꞌ to manguliꞌ: ‘Hadua tauna to paka mandeꞌ hingkakani hai Kódóꞌ,#13:18 Hadua tauna to paka mandeꞌ hingkakani hai Kódóꞌ: Mouláꞌ ádáraꞌ toIahudiꞌ, ane tauna mandeꞌ hingkakani, lempóna mobale ntepuꞌuheꞌ, mohintuwuꞌheꞌ, hai hangaa-ngaa mombekádipuráheꞌ. ia miꞌi to mewaliꞌ ewálingkuꞌ.’#13:18 Básá Sura Petóiá 41:10. 19Iti Kupahaweꞌámokou ami hangko tiꞌara mani mewaliꞌ, bona ane mewaliꞌ miꞌi, ina nipoinálái kaKódóꞌna miꞌi to hangko i Pueꞌ Ala. 20Toꞌu ntepuꞌu laluitaNgkuꞌ deꞌe: heáná to motarima huoꞌáNgkuꞌ, hibali miꞌi Kódóꞌ to natarima. Noꞌonoꞌ woꞌo, heáná to motarimaꞌAꞌ, hibali miꞌi Pueꞌ Ala to natarima láwiꞌ Ia miꞌi to mohuoꞌAꞌ mai.”
Kapohuꞌna Iudasiꞌ
(Mat. 26:21-25; Mrk. 14:18-21; Luk. 22:21-23)
21Karoona Iesu molaluita noꞌonoꞌ, masusa ntepuꞌu laluNa, haneꞌi Nauliꞌ, “Bona niꞌisá: hadua hangko i oloꞌmi ina mohuhuꞌAꞌ i ewálingkuꞌ.”
22Ánti kawuliraꞌ topeguruNa, mombetótóimoheꞌ hadua hai hadua láwiꞌ tiꞌara raisá heáná to Natunggái. 23Tempó onoꞌ, ara hadua topeguruna Iesu to Napokaꞌahiꞌ#13:23 hadua topeguruna Iesu to napokaꞌahiꞌ: Mouláꞌ tauna to mapánde ntepuꞌu motasere Ngkóráꞌna Pueꞌ, topeguruna Iesu to mehoda i hintáiꞌNa ia miꞌi Iohane. Iohane biásá mopakeꞌ laluita “hadua topeguruNa to Napokaꞌahiꞌ” ane mokábelái wátána haduduána. mehoda i hintáiꞌNa. 24Simoꞌ Peturuꞌ mokawe tauna iti, nahángáꞌá, “Nupekuneꞌ i Guru, ba heánái to Natunggái.”
25Onoꞌ miꞌi haneꞌi topeguruna Iesu to mehoda i hintáiꞌNa mampehaileꞌ Iesu haneꞌi mekuneꞌ, “Heáná, Pueꞌ?”
26Nahániki Iesu, “Heáná to Kuweꞌi rótiꞌ to Kutubuká i lalu rutuꞌ deꞌe,#13:26 rutuꞌ deꞌe: Pandeꞌ Paska ia miꞌi bauꞌ ánáꞌ dimbá, rótiꞌ to tiꞌara raragiꞌi, rampaꞌ-rampaꞌ to mapaiꞌ, rutuꞌ, hai mainuheꞌ anggoroꞌ. Rutuꞌ iti rabábehi hangko i wuaꞌngkau nodo kurma, ara, kismis, hai anggoroꞌ. Básá Pesuwuꞌá 12:3-11. ia miꞌi taunána.” Hangko ionoꞌ, moala miꞌi hantepóꞌ rótiꞌ, Natubuká i lalu rutuꞌ, haneꞌi Naweꞌi Iudasiꞌ ánáꞌna Simoꞌ Isikarioꞌ. 27Kanaꞌalana Iudasiꞌ rótiꞌ iti, ia nakuasaꞌi Datu Tokadake. Roo onoꞌ, Iesu mohángáꞌá, “Apa to ina nubábehi, kawiáꞌ miꞌi nubábehi.”
28Agáiáná to mandeꞌ hingkakani hai Iesu, tiꞌaraheꞌ moisá tunggáiána Iesu molaluita noꞌonoꞌ i Iudasiꞌ. 29Rauliꞌ ripaꞌi Iesu mohuoꞌ Iudasiꞌ lao mohóló apa to raparaluu i posusáraꞌ, ba mampoweꞌi dóiꞌ i tauna to meahiahiꞌ, láwiꞌ Iudasiꞌ topokádipurá dóiꞌ. 30Kanaꞌalana Iudasiꞌ rótiꞌ iti, ia pohuꞌ miꞌi lao i rawa. I tempó iti, káindi miꞌi.#13:30 Iudasiꞌ mopálehi Iesu to mewaliꞌ pewangkaꞌ i duniáꞌ (básá Iohane 1:5; 8:12), hai lao i rawa to makáindi, lempóna, to nakuasaꞌi Datu Tokadake. Iti miꞌi tempóna kamakáindi ina menangi. (Básá Lukasi 22:53; Iohane 12:35-36.)
Hawaꞌ to woꞌu
31Kapohuꞌna Iudasiꞌ, nauliꞌ miꞌi Iesu, “Deꞌe-deꞌe Ánáꞌ Mánusiá ina rapomahile. Hai apa to ina mewaliꞌ i Kódóꞌ, ina mampomahile woꞌo Pueꞌ Ala. 32Ánti bábehiáNgkuꞌ, kamahilena hangaꞌna Pueꞌ Ala ina tongawaꞌ i tauna, hai Kódóꞌ woꞌo ina napomahile Pueꞌ Ala. To Kuꞌuliꞌ deꞌe hangaa-ngaa hawiáꞌ mewaliꞌ. 33ÁnáꞌKuꞌ, tiꞌaraPoꞌ ina marue hingkakani hai kómu. Roo onoꞌ, ina nipeliꞌAꞌ, agáiáná nodo to Kuhángáꞌá tadulakoraꞌ toIahudiꞌ hangkoia, noꞌonoꞌ woꞌo to Kuhángáꞌáꞌákou: i kalaoáNgkuꞌ iti, tiꞌara manikou peisá lao.
34Kuweꞌikou hawaꞌ to woꞌu: Hangaa-ngaa mombepokaꞌahiꞌkou nodo Kódóꞌ mampokaꞌahiꞌkou. 35Ane mombepokaꞌahiꞌkou, upu-upu tauna ina moisá kakómuna miꞌi topeguruNgkuꞌ.”
Iesu mampolaluita kaꞌina nasápuákana Peturuꞌ
(Mat. 26:31-35; Mrk. 14:27-31; Luk. 22:31-34)
36Simoꞌ Peturuꞌ mekuneꞌ i Iesu, “Pueꞌ, iumbáKoꞌ ina lao?”
Nauliꞌ Iesu, “I kalaoáNgkuꞌ iti, tiꞌarakoꞌ peisá ina lao. I alo to ina haweꞌ, hangko peisárakoꞌ meuláꞌ i Kódóꞌ.”#13:36 Iesu rapakuꞌ i kau mombehape, hai bahangapa parena hangko ionoꞌ, Peturuꞌ woꞌo rapakuꞌ i kau mombehape.
37Nauliꞌ wopiꞌi Peturuꞌ, “Pueꞌ, moapa riꞌi deꞌe-deꞌe haneꞌi tiꞌaraꞌaꞌ peisá meuláꞌ i Hio? Timamaꞌaꞌ mate ánti peuláꞌkuꞌ i Hio!”
38Nauliꞌ Iesu, “Ba báiꞌ mpuꞌukoꞌ mate ánti kaKódóꞌna? Toꞌu ntepuꞌu to Kuhángáꞌáꞌákoꞌ: hangko tiꞌara mani motuturuꞌuá manuꞌ, tálu miꞌi kánina nusápuákaꞌAꞌ.”
Currently Selected:
Iohane 13: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.