Iohane 11
11
Kamatena Lasaru
1-2Hadua tobaleilo to rahangaꞌ Lasaru toroꞌ i wánuá Betania hingkakani hai Maria hai Marita halaluna. Maria iti miꞌi to mobubuhi bitina Iesu hai mina-mina to mawongi haneꞌi naumpáhi hai weluáꞌna.#11:1-2 Básá Iohane 12:3. Hangkani tempó, Lasaru rumihi kamaduꞌana. 3Maria hai Marita mohuoꞌmoheꞌ tauna lao moánti tewái i Iesu bona Ia lao i támbiraꞌ. Rauliꞌ, “Nuhángáꞌá node: ‘Pueꞌ, tauna to Nupokaꞌahiꞌ, tangaꞌna maduꞌa ntepuꞌu.’ ”
4Kanahádina Iesu bámbári iti, Nauliꞌ, “Hakiꞌna iti tiꞌara ina moánti i kapate. Iti mewaliꞌ bona Pueꞌ Ala ina rapomahile, hai moliu apa to ina Kubábehi, Kódóꞌ ÁnáꞌNa Pueꞌ Ala woꞌo ina rapomahile.”
5Iesu mampokaꞌahiꞌ Marita, Maria, hai Lasaru. 6Agáiáná kaNahádina kamaduꞌana Lasaru, tiꞌara kásáliu lao, roo peá i katoroꞌána rongalo kamaruena. 7Liu miꞌi rongalo hangko Nahángáꞌáraheꞌ topeguruNa, “Mesuleꞌmokeꞌ lao i tampoꞌ Iudá.”
8Rahángáꞌá, “Guru, tiꞌara maniheꞌ marue tadulakoraꞌ toIahudiꞌ ionoꞌ mampoinao ina mowatuiKoꞌ duuꞌMu mate. Mewaliꞌ moapa riꞌi haneꞌi Nupoinao wopiꞌi huleꞌ lao ionoꞌ?”
9Nahángáꞌáheꞌ Iesu, “I lalu hangaloá, tiꞌara paꞌi mabaa hampuloꞌ hai rojaa? Tauna to molumao mabaa, tiꞌaraheꞌ ina tehube. Peisáheꞌ meita, láwiꞌ ara pewangkaꞌ alo to mopamabaa duniáꞌ deꞌe. 10Agáiáná tauna to molumao i kakáindiána, bateꞌna ina tehube láwiꞌ tiꞌara ara to mowangkaꞌi.”
11Noꞌonoꞌ miꞌi laluitana Iesu, hai roo onoꞌ Nauliꞌ wopiꞌi, “Rángántaꞌ Lasaru letaꞌ miꞌi, agáiáná ina lao Kuruaꞌ.”
12-13Katoꞌuána laluitana Iesu iti, lempóna Lasaru mate miꞌi agáiáná topeguruNa tiꞌara moisá lempóna laluitaNa iti, rauliꞌ ripaꞌi letaꞌ peá iti Lasaru. Onoꞌ miꞌi haneꞌi rahángáꞌá, “Pueꞌ, ane letaꞌ peá, ia ina mearónto.”
14Mewaliꞌ, Napakanótóáheꞌ lempóna laluitaNa, Nauliꞌ, “Lasaru mate miꞌi. 15GóeꞌAꞌ láwiꞌ tiꞌaraꞌAꞌ ara ionoꞌ i tempóna mate. Láwiꞌ apa to mewaliꞌ, ina mobunduꞌ i kómu, bona mepoináláikou i Kódóꞌ. Mewaliꞌ laomokeꞌ i Lasaru.”
16Tómá to rauliꞌ woꞌo Didimu, lempóna Toporopaꞌ, mohángáꞌáheꞌ, “Maikeꞌ meuláꞌ i Iesu, bona matekeꞌ hingkakani.”
Iesu mopalindó Marita hai Maria
17Kahaweꞌna Iesu i wánuá Betania, Ia mohádi bámbári to manguliꞌ iba miꞌi alona Lasaru ratawu. 18Betania iti hungkuꞌ i Ierusale, rekeꞌ-rekeꞌna tálu kiló kakaraoꞌna. 19Mewaliꞌ, handaꞌheꞌ toIahudiꞌ lao mopalindó Marita hai Maria i kamatena ádiraꞌ.
20Kanahádina Marita kahaweꞌna Iesu, onoꞌ miꞌi haneꞌi lao miꞌi nadupaꞌ. Agáiáná Maria i támbi peá oaꞌ. 21Nauliꞌ Marita i Iesu, “Pueꞌ, ane keieneꞌKoꞌ i tempó kamaduꞌana ádingkuꞌ, ketiꞌara ina mate. 22Agáiáná kehapiꞌ noꞌonoꞌ, kuisá: apa to Nupembiáꞌ i Pueꞌ Ala deꞌe-deꞌe mokana i ádingkuꞌ, bateꞌna ina NaweꞌiKoꞌ.”
23Nauliꞌ Iesu, “Ádimu ina tueꞌ huleꞌ.”
24Nauliꞌ Marita, “Kuisánto kaꞌina tueꞌna huleꞌ i alo pobutusi i kahópóꞌána duniáꞌ, i karapopearóraꞌ upu-upu tauna to mate.”
25Nauliꞌ Iesu, “Kódóꞌ miꞌi deꞌe to mampopearó tomate, hai to mampoweꞌi katueꞌ to tiꞌara mokahópóꞌá. Tauna to mepoinálái i Kódóꞌ, kehapiꞌheꞌ mate, ina tueꞌheꞌ huleꞌ. 26Hai upu-upu tauna to molámbiꞌ katueꞌ hangko i pepoináláiraꞌ i Kódóꞌ, bateꞌraꞌ tiꞌara ina mate duuꞌna i rue-ruena. Ba Nupoinálái to Kuꞌuliꞌ deꞌe?”
27Nauliꞌ Marita, “Toꞌu, Pueꞌ. Kupoinálái kaꞌIona Ánáꞌna Pueꞌ Ala, Datu Topehómpóꞌ to nadándi Pueꞌ Ala hangkoia to ina mai i duniáꞌ.”
28Karoona manguliꞌ noꞌonoꞌ, lao miꞌi i támbi mokióꞌ Maria, haneꞌi nakuwi nauliꞌ, “Indolouꞌo ara Guru. Napoinao Napohidupaꞌákoꞌ!” 29Kanahádina Maria laluitana, nagagu lao mampohidupaꞌá Iesu. 30I tempó iti, Iesu tiꞌara mani mesuaꞌ i lalu wánuá, ara mani i pohidupaꞌáraꞌ hai Marita ininá. 31ToIahudiꞌ to laoheꞌ mepalindó i lalu támbi, moitaheꞌ Maria meángkáꞌ kásáliu pohuꞌ. Rauliꞌ ripaꞌi ia ina lao teriaꞌ i popatawuá, onoꞌ miꞌi haneꞌi meuláꞌheꞌ woꞌo.
32I kahaweꞌna Maria i kaꞌaraꞌána Iesu, ia moita miꞌi Iesu haneꞌi lao mopalumbá i bitiNa, nauliꞌ, “Pueꞌ, ane keieneꞌKoꞌ i tempó iti, ketiꞌaranto ina mate ádingkuꞌ.”
33Kanaitána Iesu Maria teriaꞌ, hai toIahudiꞌ to napohingkakaniá teriaꞌheꞌ woꞌo, onoꞌ haneꞌi wiora ntepuꞌu#11:33 wiora ntepuꞌu: Mouláꞌ handaꞌ tauna to mapánde ntepuꞌu motasere Ngkóráꞌna Pueꞌ, Iesu mabukoꞌ láwiꞌ 1) Datu Tokadake moánti Lasaru i kapate, ba 2) makuraꞌ mani pepoináláiraꞌ tauna. hai masusa laluNa. 34Nakuneꞌheꞌ, “Iumbá ratawu?”
Rauliꞌ, “Pueꞌ, maimoKoꞌ, lao tapeita.”
35Hangko ionoꞌ, teriaꞌ miꞌi Iesu. 36Rauliꞌ toIahudiꞌ, “Peita! Maꞌahiꞌ ntepuꞌu laluNa i Lasaru!”
37Agáiáná araheꞌ woꞌo to manguliꞌ, “Tauna to bilo Napakauriꞌ. Moapa riꞌi haneꞌi Ia tiꞌara mopakauriꞌ Lasaru bona tiꞌara mate?”
Iesu mopatueꞌ huleꞌ Lasaru
38Hangko ionoꞌ, masusa wopiꞌi laluna Iesu, hai Ia lao i popatawuá. Popatawuá iti, ia miꞌi balamba to rakae i pingkena buluꞌ to ratuko hai watu to mahile. 39Nauliꞌ Iesu, “Nigesuꞌ watu petukona iti!”
Marita wutuꞌna tomate iti manguliꞌ, “Pueꞌ, ineeꞌ miꞌi rabungkáhi. Humau miꞌi, láwiꞌ iba miꞌi wengina ratawu.”
40Nauliꞌ Iesu i Marita, “Tiꞌara paꞌi Kuhángáꞌáꞌámokoꞌ ininá, ane nupoináláiAꞌ, ina nuita mpuꞌu kamaróhóna kuasaꞌna Pueꞌ Ala?” 41Mewaliꞌ araheꞌ to lao mobungkáhi watu petuko popatawuána Lasaru iti. Iesu mengoaꞌ i langiꞌ haneꞌi Nauliꞌ, “UmáNgkuꞌ, Kuꞌuliꞌ handaꞌ kamaroꞌana i Hio, láwiꞌ Nuhádi miꞌi pembiáꞌKuꞌ deꞌe. 42Kuisá, bateꞌna Nuhádi laluitaNgkuꞌ. Agáiáná laluitaNgkuꞌ deꞌe Kuꞌuliꞌ Kupasimbuku, bona rahádi tauna to handaꞌ ieneꞌ, bona rapoinálái kaꞌIona mpuꞌu miꞌi to mohuoꞌAꞌ mai.”
43Roo onoꞌ, nauliꞌ Iesu Napasimbuku, “Lasaru! Mesuwuꞌmokoꞌ mai!” 44Mesuwuꞌ mpuꞌu miꞌi tauna to mate iti hangko i lalu popatawuána. Taena hai bitina tebungkuhi mani hai báná popebungkuhina, hai wuáꞌna rawewehi mani mouláꞌ ádáraꞌ toIahudiꞌ. Nahángáꞌáheꞌ Iesu, “Niwehángi miꞌi iti popebungkuhina bona ia peisá molumao.”
Tadulako toIahudiꞌ moliwo ina mopapate Iesu
(Mat. 26:1-5; Mrk. 14:1-2; Luk. 22:1-2)
45Handaꞌheꞌ toIahudiꞌ to lao moweoꞌ Maria i tempó onoꞌ, to moita apa to nabábehi Iesu, mewaliꞌ handaꞌheꞌ to mampoinálái kahangko i Pueꞌ AlaNa. 46Agáiáná araheꞌ woꞌo hantángáꞌ to lao i toParisi mopahaweꞌáheꞌ apa to nabábehi Iesu. 47Onoꞌ miꞌi haneꞌi toParisi hai kapalaꞌ-kapalaꞌ tadulako menómbá mopaꞌaraheꞌ pogómbó mahile hingkakani hai tadulako agama to ntániꞌna. Rauliꞌ, “Apa to hangaa-ngaa tabábehi, láwiꞌ handaꞌ ntepuꞌu tandaꞌ kuasaꞌ to nabábehi Iesu. 48Ane tapatodáhi oaꞌ, upu-upu tauna ina mepoinálái i Hia. Kahópóꞌána, surudadoꞌ toRoma ina mai mogero Támbina Pueꞌ Ala hai upu-upu wánuántaꞌ.”
49Roo onoꞌ, molaluita miꞌi hadua hangko i oloꞌraꞌ to rahangaꞌ Kaiapa, Tadulako Menómbá Mahile i pare iti, nauliꞌ, “Tiꞌara niꞌisá apa-apa! 50Tiꞌara niꞌisá apa to mobunduꞌ i kómu. Rángina miꞌi hadua tauna mate mosulewátái upu-upu tauna, haneꞌikeꞌ mate upu-upu.” 51-52Laluita iti tiꞌara hangko i hia haduduána. Tunggáiána laluitana Kaiapa ia miꞌi Iesu hangaa-ngaa rahuku mate. Agáiáná ara woꞌo lempóna to karompákáꞌna to tiꞌara naisá, ia miꞌi kamatena Iesu ina mosulewátái toIahudiꞌ. Hai tiꞌara peá toIahudiꞌ. Ánti kamatena Iesu iti, upu-upu ánáꞌna Pueꞌ Ala to mahawuꞌ i humalele duniáꞌ ina rarámpuheꞌ huleꞌ hai rapahantobu.#11:51-52 Básá woꞌo 1:29; 3:16; 4:42; 12:16; 12:32. Kaiapa iti ia miꞌi Tadulako Menómbá Mahile i tempó onoꞌ.#11:51-52 Kaiapa iti ia miꞌi Tadulako Menómbá Mahile i tempó onoꞌ: Kaiapa mewaliꞌ Tadulako Menómbá Mahile pare hampuloꞌ hai uwalu haweꞌ pare tálu puloꞌna hai ini roo karapoánákana Iesu (18-36M). Ia mániána Hanasa to mewaliꞌ Tadulako Menómbá Mahile pare ini haweꞌ kahampuloꞌ hai lima (6-15M). Básá Iohane 8:13.
53Mantepuꞌu alo iti, tadulakoraꞌ toIahudiꞌ himpudumoheꞌ bona Iesu rahuku mate. 54Onoꞌ miꞌi haneꞌi Iesu tiꞌara piꞌi mopatongawaꞌ wátáNa i oloꞌraꞌ toIahudiꞌ, bona tiꞌara piꞌi raita tauna to handaꞌ. Ia pohuꞌ miꞌi hangko ionoꞌ lao i wánuá to rahangaꞌ Eparai i wiwi pádá loriꞌ, haneꞌi toroꞌ ionoꞌ hingkakani hai topeguruNa.
55I tempó iti, ina haweꞌ alo mahile agama Iahudiꞌ to rauliꞌ Alo Posusa Paska. Handaꞌ tauna hangko i wánuá-wánuá lao i Ierusale, bona mopamagasaꞌheꞌ mouláꞌ ádá ágámáraꞌ hangko tiꞌara mani alo mahile iti. 56Tauna to hirámpu i Ierusale iti mampeliꞌheꞌ Iesu. Tangaꞌraꞌ hirámpu i tangabaa Támbina Pueꞌ Ala, mombekuneꞌ-kuneꞌheꞌ, rauliꞌ, “Noumbá polámbiꞌmi? Ba ina haweꞌ Iesu i posusaꞌá deꞌe?”
57Noꞌonoꞌ miꞌi polaluitaraꞌ tauna to handaꞌ. Ane kapalaꞌ-kapalaꞌ tadulako menómbá hai toParisi, ara miꞌi ami párentáraꞌ i tauna to handaꞌ to manguliꞌ, “Ane heánái to moisá kaꞌiumbáꞌána Iesu, hangaa-ngaa nihángáꞌáꞌangkaiꞌ, bona lao rahakaꞌ.”
Currently Selected:
Iohane 11: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.