Yilipai 4
4
SOPENA 4.
1Suria, Tuahau leo, ameje na reni amiu, amiu na seut ejieji, amiu na suniu taharuma, otoleoleo nau, ototuritoho hauhaua me na Moli.
2Atuha Uotia, atuha Sintuke teratuatua pala ra uluo hi Iesu.
3Atuhaho mono, tuau taharahu, oituiturituara, otoninima tevarao valuiau sura vei na Taveti Tahonai momasamasaha, Klemens mono, me ra valura tahavarao valuiau, ra hisera tetitoho me na Pepe hina mauri.
4Motahonai otoejieji me na Moli tuitui, ataaso Otoejieji.
5Motahonai ra tajua tereni amiu ra tajua-poĕ. Na Moli motararoi.
6Ototena mamahanu suri te sanu; maa tuitui me na matapisi me na tuhatuha valui na aso tahonai, otovarai Atua ra sanu otomejeira.
7Tau na lolotamautu hi Atua, tosapinisi vunevunea, mohijetoho ra lolomiu me ra remiu me Kristo Iesu.
8Me na tahuna, Tuahau, ra sanu taharahu vunuvunu, ra sanu tataholo, ra sanu voevoe vunuvunu, ra sanu tapu vunuvunu, ra sanu manomano, ra sanu poniponi vunuvunu, ra sanu tahonai, ra sanu hina hale, otoninima ra sanu naa.
9Ra sanu otopinisira meau, otolavira meau, otorohora meau, otorenira meau, otovera; tau na Atua hina lolotamautu tomotoho me amiu.
10Aejieji tahajia me na Moli, suria ototaninima inau naanoi: taiti otosavea, maa suria otosapinisia.
11Asaaso suria ra sipilau sanu mojoa; suria apinisi na toho tamautu me ra sanu ririhi.
12Apinisi na vusoi me na rani hina sipilau sanu mojoa e me na rani hi na sipilau sanu tetavere: me na rani ririhi apinisi ra rani hina masu, na rani hina marua, na rani hina sipilau sanu motavere, na rani hina marohati.
13Apinisi na vei ra sanu vunuvunu suri Kristo lsei moveau ahauhaua.
14Maa ototahonai meau me na seu mamahanu.
15Amiu ra tanoho Vilipai, otopinisi me na rani hina majihana lalaa hi na Taveti Tahonai, tau alaho ture Masitonia, saite uluo hi Iesu maa amiu hasemiu tetui-turituau me na rahuvuso.
16Ihisa atoho me Tesalonaika otovarisula meau vaha-tea, vaharua.
17Mosasuria ameje na rahuvuso maa suria ameje na vanamiu motavere.
18Alavi ra sanu tavere, momea; suria alavi me Epa-vrotitus ra sanu otosulara, tepala na sanu poniponi, na vivijahi tahonai tohova me Atua.
19Na Atua hiu morahu pa ta me amiu ra sanu vunu-vunu pala ra sipilana sanu tavere me na tailahi me Iesu Kristo.
20Naanoi na hale me Atua me Tamaja tuitui. Amen.
21Otorahu na seu ninima tahonai me ra tuahau uluo hi Iesu. Ra tuahau uluo hi Iesu tesula ra sera ninima tahonai me amiu.
22Ra uluo hi Kristo vunuvunu naano, hire mono me na peana Moli, tesula mono.
23Motahonai na aso tahonai hina Moli Iesu Kristo tomotoho me amiu. Amen.
Currently Selected:
Yilipai 4: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.