Ra Vei Hira Yarisula 23
23
NA SOPENA 23.
1Paul moriopeturi ra varese, moaso, “Tajua me tuahau, Amauri valui na lolovoe me Atua me na rani naa.”
2Na vareseprist Ananaius movarai ra tajua teturi taitalia tevoja na vavana.
3Natuha Paul moaso, “Atua molosiho pa, iniha sisi-voe: suria oisiheae sura veau pala leo hauhaua, maa oivaraira telosiau mosatataholo pala leo hauhaua?”
4Ra tajua taitalia teaso, “Oiaso oso me na vareseprist hi Atua?”
5Natuha Paul moaso, “Tuahau, asapinisi inie na varese prist; suria moulia Oitena aso-oso suri na varese hira tanoho.”
6Maa hisa Paul mopinisi ra valura te-Sattiusi, valura te-Varisi, moaso pati, “Tajua me Tuahau, inau na Varisi, matuna Varisi, suri na tamaraha hina mate telaviau.”
7Hisa moaso palahi, na aso tahajia momaraha me ra Varisi me ra Sattiusi teturivua.
8Suria ra Sattiusi teaso, “Na tamaraha hina mate mojoa, na enjel, na talume mono:” maa ra Varisi terohoroho mera.
9Natuha na jumu tahajia. Ra tahauliuli-pepe hira Varisi temaraha tejumu, “Saite sanuoso me na tajua naa; va na enjel e talume moaso mea, moso tojumu me Atua.”
10Me na jumu tahajia na varese tahajumu moninima te-sanivurivuria, movarai ra tahajumu tesumai, te-lavia tuhera, telavia me, na pea tahajia.
11Na pohi motea, na Moli moturi mea, moaso, “Na lolomu mosijovi, Paul: suria pala oilalaa suriau me Jerusalem, oisipiseau me Romu mono.”
12Na rani momalua, valura Ju tetoni, teaso hauhaua “Na sanuoso momalua mera vai tehani, teoo mine telosimete Paul.”
13Jivi ra tajua havulavate teaso palahi.
14Temalua mera varese-prist me ra varie, teaso, “Tohajirija valui na sanu oso, tosahani, tosaoo mine tolosimete Paul.”
15“Varihi suria amiu me ra varie otovarai na varese tahajumu molavia mosumai me amiu inovi maa palahi otomeje na pinisi jivi suria: mine molaviaae, hije tovavanao sura veimeteia.”
16Hisa na tahisai Paul moroho tepunira, movano moruhusahamai me na pea tahajia, movarai Paul.
17Natuha Paul moore na varese tahajumu mea, moaso, “Oilava uluo movano me na moli tahajumu, surja movaraia te sanu.”
18Suria molavia, movano me na moli tahajumu, moaso, “Paul na tajua-hajiri mooreau ta mea, motuhau alavi na uluo lamane ta meho, isei momeje na varaiho te sanu.”
19Natuha na moli tahajumu moau na havena, molavi punia, motuhae, “Na sava oimeje na varaiau?”
20Moaso, “Ra Ju temeje na tuhaho oilavi Paul mosumai inovi maa me ra varie palahi temeje na pinisi jivi suria.
21Motahonai oisarohora, suria jivi ra tajua havulavate tepunira mea, isei tehajirira hina aso hauhaua, tesahani tesaoo mine teveimeteia, telohotiho oitami”
22Natuha na moli tahajumu mojuri na uluo-lamane molaho, movaraia, “Oitena varai te tajua ra sanu oipiseau.”
23Natuha moore na varesetahajumu morua mea, “Oirave vavanao ra tahajumu tari vaharua sura vano me Seseria, me ra tahajumu hina hors havulalima-raverua, ra tahajumu hina hole tari vaharua, na klok motolu me na pohi.
24Ra hors tesivavanao sura Paul ilahoae, oralavia mojolo me Viliks na moli.”
25Mouli na pepe palea;
26“Klautius Laisius me na tahonai moli Viliks, mosulae leo tahonai,
27Tajua naa ra Ju telavia, taroroi teveimeteia: natuha asumai valui ra tahajumu ra tari, alavituhea suria apinisi mo-tajua Romu.
28Ameje na pinisi sura sava tepuripuri nie, alavia me ra varie.
29Hisa apinisi ra lolora tehahara nie suria na sanu hira pilara leo hauhaua, maa teaso sanu tipa suria motahonai momate e tehajiria.
30Hisa tevaraiau paleve ra Ju tepunira suria, vahatea asulae ta meho, me avarai ra tajua teaso oso suria tesivaraiho ra sanu teaso-oso suria. Oro.”
31Natuha ra tahajumu telavi Paul, pala movaraira me na pohi me Antipatris.
32Inovi maa tejuri ra tahajumu hina hors sura vano valuia, tetaliliu me na pea tahajia:
33Isei hisa tema lua me Seseria, terahu na pepe me na moli, terahu Paul mea mono.
34Hisa na moli moevi na pepe, motuhae na pilana ureure. Hisa mopinisi motanoho hi Silisia, moaso,
35“Aroroho pa,” moaso, “me na rani ratajua isei teaso oso suriho temalua mono.” Moaso tejuria me na pea tahajia hi Herot.
Currently Selected:
Ra Vei Hira Yarisula 23: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.