2 Timote 3
3
SOPENA 3.
1Oininima, me ra tahuna rani ra sanu hauhaua temalua pa.
2Ra tajua tetapura ninima hire, tepenehorohoro, teaso pure, tejurira ra varese, teeti Atua, tesaroho me tinara tamara, terahu nahopatu, tesatapu,
3Tesameje, tetalajihajiha, tetatahi lopelope, tesatapura varese hira, teila, tevotoa ra tahatahonai.
4Teaso jihajiha, tetahamuha, tevuhera, temeje na urasi jivi temeje Atua,
5Telavi na hise tahonai hina lotu maa teiri na hauhaua hina, oitalihure turera.
6Ihire tetihetihe me ra pea sura rahutuhe ra hajae tahamuri tahaveioso vahatari, ra sanu oso ririhi terahutuhera,
7Tuitui tepipisera maa tesapinisi na taharahu.
8Pala Iannes me Iampres terahusahusahi Moses, ra tajua naa tehusahusahi na Taharahu: teninima pahilu, tetaliliu ture na rohoroho.
9Maa tesajiha tavere suria ra pilara sanu tahamuri tevavaha, pala ra sanu oso hi Iannes me Iampres.
10Maa oipinisi susuhi na pilam pisahi, na sivueu hina mauri, na sanu aimeje na vea, na seu rohoroho, na seu toho roroho, na seu meje, na seu lohoti tamautu,
11Ra sanu oso tevea meau, ra seu rojo, temalua meau me Antiok, me Aikonium, me Listra: ra veioso meau atoho roroho mera: maa na Moli moruneau me ra vunuvunu.
12Io, hire vunuvunu temeje na mauri tataholo me Kristo Iesu teveioso mera mono.
13Ra tahaoso me ra tahapaliho teharani oso tahajia, tejihajiha, valura tejihara.
14Maa oihijetoho ra sanu oipinisira, oipinisi susuhira, suria oipinisi isei mopiseho,
15Me na rani oipaule oipinisi na pepe tapu tahaveho oilolorani suri na jolo hina rohoroho me Kristo Iesu.
16Atua morahu na pepe tapu vunuvunu, tetahonai sura pisahi, sura pise tataholo, suri na aso hauhaua, sura pise na mauri tataholo,
17Sura na uluo hi Atua motahonai tohova, movavanao suri ra varao tahonai vunuvunu.
Currently Selected:
2 Timote 3: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.