Ma‘aké 16
16
Ko e Toetu‘u ‘a Sīsuú
(Māt 28.1-8; Luk 24.1-12; Sioné 20.1-10)
1PEA kuo ‘osi ‘a e Sāpate, na‘e hanga ‘a Mele mei Makitala, mo e Mele ko e fa‘ē ‘a Sēmisi, mo Sālome, ‘o nau fakatau ‘a e ngaahi fa‘ahinga ahi, koe‘uhi ke nau ‘alu ‘o tākai ‘aki ia. 2Pea nau ‘alu ki he fonualoto hengihengi ‘aupito ‘i he ‘uluaki ‘aho ‘o e uike, kuo hopo ‘a e la‘ā. 3Pea nau fepehē‘aki, Ko hai te ne fai ma‘atautolu ‘a e fakateka ‘o e maka mei he matapā ‘o e fonualoto? 4Pea ‘i he‘enau hanga hake, na‘a nau vakai, tā kuo teka‘i mai ‘a e maka; he na‘e fu‘u lahi. 5Pea ‘i he‘enau hū ki he fonualoto, na‘a nau sio ki ha talavou ‘oku nofo fakato‘omata‘u, ‘oku ne ‘ai ha kofu hinehina tōtōlofa; pea nau fu‘u ‘oho.
6Pea ne pehē kiate kinautolu, ‘oua te mou ‘oho: ko ho‘omou kumi ‘a Sīsū mei Nāsaleti na‘e kalusefai: kuo toetu‘u ia; ‘oku ‘ikai te ne ‘i heni: vakai ko e potu ē na‘a nau telio ai ia. 7Ka mou mole mu‘a, ‘o tala ki he‘ene kau ako, kae‘uma‘ā ‘a Pita, ‘o pehē, ‘oku ne mu‘omu‘a kiate kimoutolu ki Kāleli: ko e potu ko ia te mou mamata ai kiate ia, ‘o hangē ko ‘ene me‘a kiate kimoutolu.#Māt 26.32; Ma‘ake 14.28
8Pea nau hū kitu‘a, ‘o hola mei he fonualoto, he na‘a nau mo‘u tetetete mo tāfu‘ua, pea na‘e ‘ikai te nau momo‘i tala ha me‘a ki ha taha; he na‘a nau manavahē.
Ko e Hā ‘a Sīsū kia Mele Makitaline
(Māt 28.9-10; Sioné 20.11-18)
9Pea ‘i he‘ene toetu‘u ‘i he fua ‘aho ‘o e uike, hengihengi, na‘a ne motu‘a hā kia Mele mei Makitala, ‘a ia kuo ne kapusi mei ai ha tēvolo ‘e toko fitu.#16.9-20 ‘Oku ‘ikai ke kau ‘a e veesi 9-20 ‘i he ngaahi hiki fuoloa ‘o e Kōsipeli ‘a Ma‘aké. 10Pea ‘alu ‘a e fefine ko ia, ‘o tala kiate kinautolu kuo kau mo Sīsū, ‘oku nau lolotonga nofo mamahi mo tangi. 11Ka ko kinautolu, neongo ‘enau fanongo kuo mo‘ui ia, pea kuo mātā ‘e he fefine, na‘e ‘ikai te nau tui ki ai.
Ko e Hā ‘a Sīsū ki he Toko Ua He‘ene Kau Akó
(Luk 24.13-25)
12Pea hili ia na‘a ne hā ‘i ha anga ‘e taha ki honau toko ua na‘e ‘a‘eva, ko ‘ena ō ki he tuku‘uta. 13Pea ko kinaua ‘i he‘ena liu mai, na‘a na fakahā ‘a e me‘a ki hono toe: ka na‘a mo ha‘anaua na‘e ‘ikai te nau tui ki ai.
Ko e Hā ‘a Sīsū ki he Toko Hongofulu-Mā-Tahá
(Māt 28.16-20; Luk 24.36-49; Sioné 20.19-23; Ngā 1.6-8)
14Hili ia na‘a ne hā ki he kau Hongofulu mā taha ‘a kinautolu, lolotonga ‘enau keinanga, ‘o ne valoki‘i kinautolu ‘i he‘enau ta‘etui mo ongongata‘a, koe‘uhi ko e ‘ikai te nau tui kiate kinautolu na‘e mamata kiate ia kuo ne toetu‘u. 15Pea ne pehē kiate kinautolu, Mou ō ki māmani kātoa, ‘o malanga‘aki ‘a e Kōsipeli ki he me‘a mo‘ui kotoa pē.#Ngā 1.8 16‘Ilonga ‘a ia te ne tui mo papitaiso te ne mo‘ui; ka ‘ilonga ‘a ia ‘e ‘ikai te ne tui ‘e mo‘ua. 17Pea ‘e ō mo kinautolu ‘oku tui ‘a e ngaahi faka‘ilonga ko eni: te nau kapusi tēvolo ‘i he hingoa ‘o‘oku; te nau lea ‘i ha ngaahi lea fo‘ou; 18te nau puke hake ‘a e fanga ngata; pea ka ‘iloange te nau inu ha me‘a ‘oku kona, ‘e ‘ikai ‘aupito te nau konā ai; te nau hilifaki nima ki he mahaki, pea te nau mo‘ui.
19Pea ko eni, hili ‘a e folofola ‘e he ‘Eiki kiate kinautolu, na‘e ‘ohake ia ki he langi, ‘o ne ‘afio mei he to‘omata‘u ‘o e ‘Otua. 20Pea ko kinautolu na‘a nau ‘alu atu ‘o malanga holo; pea ngāue fakataha mo kinautolu ‘e he ‘Eiki, ‘o ne poupou ‘a e folofola ‘aki ‘a e ngaahi faka‘ilonga na‘e hoko ai.#16.20 ‘I he ngaahi hiki fuoloa mo e ngaahi liliu ‘e ni‘ihi ‘oku ‘ai ai ‘a e veesi 9-20, ‘oku ‘asi ai pē mo eni (‘o veesi 9 mo e 10): ‘alu ‘a e kau fefiné kia Pita mo hono ngaahi kaungāme‘á ‘o nau fakamatala ange ‘a e ngaahi me‘a na‘e fakahā kiate kinautolú. Pe hili iá na‘e fakamafola ‘e Sīsū tonu ‘ene ongoongolelei ‘o e fakamo‘ui ta‘engatá ki he hahaké mo e hihifó ‘o vaka atu ‘i he‘ene kau akó.
Currently Selected:
Ma‘aké 16: TMB
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Tongan Moulton Bible © Bible Society of the South Pacific, 2011.