Ma‘aké 15
15
Ko e Faka‘eke‘eke ‘o Sīsū ‘e Pailato
(Māt 27.1-2,11-14; Luk 23.1-5; Sioné 18.28-38)
1PEA pongipongi leva, ko e hou‘eiki taula‘eiki na‘a nau fai ‘enau fakakaukau, pea mo e kau mātu‘a mo e kau sikalaipe, ‘io, ‘a e Sanetalimi kātoa; ‘o nau ha‘i ‘a Sīsū, pea nau ‘ave ‘o tuku kia Pailato. 2Pea fakafehu‘i ‘e Pailato kiate ia, Ko koe ko e Tu‘i ‘o e kakai Siu, ‘ō?
3Pea ne tali ki ai, ‘o ne pehē, Ko ia pē ‘oku ke me‘a.
Pea hanga ‘a e hou‘eiki taula‘eiki, ‘o fai atu hono talatalaaki‘i, ‘o lahi ‘a e ngaahi me‘a. 4Pea toe fehu‘i ‘e Pailato kiate ia, ‘o pehē, ‘oku ‘ikai ha‘o momo‘i tali koā? Vakai ki he ngaahi me‘a ‘oku nau talatalaaki‘i ai koe, hono taha?
5Ka ka ‘ikai toe tali ‘e Sīsū ha momo‘i me‘a ‘e taha; ko ia na‘e ofo ai ‘a Pailato.
Ko e Tautea Mate ‘o Sīsū
(Māt 27.15-26; Luk 23.13-25; Sioné 18.39–19.16)
6Pea ‘oka hoko ‘a e kātoanga, na‘a ne fa‘a ‘ofa kiate kinautolu, ‘o vete ange ha pōpula ‘e taha, ‘a ia pē te nau kole ki ai. 7Pea na‘e ai ha motu‘a na‘e hingoa ko Palāpasa, ‘a ia na‘e nofo ha‘isia fakataha mo ha ni‘ihi na‘e angatu‘u, ‘a ia ko e fa‘ahinga na‘e fai ha fakapō lolotonga ‘a e angatu‘u. 8Pea ‘alu hake ‘a e kakai, ‘o nau kamata kole ke ne fai ma‘anautolu ‘o hangē ko ‘ene fa‘a fai. 9Pea tali ‘e Pailato, ‘o ne pehē kiate kinautolu, ‘oku mou loto ke u vete atu ‘a e Tu‘i Siu? 10He na‘e hā kiate ia, tā ko e meheka kuo tukuange ai ia ‘e he hou‘eiki taula‘eiki.
11Ka ko e hou‘eiki taula‘eiki na‘a nau o‘i ‘a e kakai ke ne vete mai mu‘a ‘a Palāpasa. 12Pea toe tali ‘a Pailato, ‘o ne pehē kiate kinautolu, pea ko e ha ai ‘oku mou loto ke u fai kiate ia ‘oku mou ui ko e Tu‘i Siu?
13Pea nau toe kalanga, Kalusefai ia.
14Pea pehē ‘e Pailato kiate kinautolu, He ko e hā ha me‘a kuo ne fai ‘oku kovi?
Ka ka fakautuutu pē ‘enau kalanga, Kalusefai ia.
15Pea ko Pailato, ko e me‘a ‘i he‘ene fie fai ‘a e me‘a ‘oku ‘ao mo e loto ‘o e kakai, na‘a ne vete ange ‘a Palāpasa kiate kinautolu, pea hili ‘ene kau‘imaea ‘a Sīsū, na‘a ne tuku ia ke kalusefai.
Ko e Pā‘usi‘i ‘e he Kau Sōtiá ‘a Sīsū
(Māt 27.27-30; Sioné 19.2-3)
16Pea taki ange ia ‘e he kau tau, ‘o hūfaki ki he loto‘ā, ‘a ia ko e Palasi; pea nau fakataha ‘a e vāhenga tau kātoa. 17Pea nau ‘ai kiate ia ha kofu kulokula, pea nau fī ha kalauni talatala, pea ‘ai takai ‘i hono fofonga, 18pea nau kamata fetapa kiate ia, ‘o pehē, ‘Ēī Tu‘i Siu! 19Pea nau toutou taa‘i hono fofonga ‘aki ha kaho, pea nau ‘anuhi ia, pea nau tū‘ulutui ‘o hū kiate ia. 20Pea hili ‘enau va‘inga‘aki ia, na‘a nau to‘o meiate ia ‘a e kofu kulokula, pea nau ‘ai ki ai hono kofu ‘o‘ona, pea nau taki atu ia ke kalusefai.
Ko Hono Kalusefai ‘o Sīsuú
(Māt 27.32-44; Luk 23.26-43; Sioné 19.17-27)
21Pea tā na‘e ‘alu ange, ko ‘ene ha‘u mei ‘uta, ha motu‘a ko Saimone, ko e Sailine ia, pea ko e tamai ‘a ‘Ālekisānita mo Lūfusi; pea nau kouna ia ke fua hono kolosi.#Lom 16.13 22Pea nau ‘ave ia ki he potu ko Kolokota, ‘a ia ko hono hiki, ko e potu ‘ulupoko. 23Pea nau humaki atu kiate ia ha uaine kuo hu‘i ‘aki ‘a e mula: ka ka ‘ikai te ne tali. 24Pea nau kalusefai ia, mo nau tufa hono ngaahi kofu, ‘o nau talotalo ki ai, pe ko hai fua ‘e ma‘u ‘a e ngaahi me‘a.#Saame 22.18 25Pea kuo hoko hono tolu ‘o e houa ‘i he‘enau kalusefai ia. 26Pea na‘e ai ha tohi ‘o e ‘uhinga ‘o hono tautea, ‘a ia na‘e tohi ‘o pehē.
KO E TU‘I SIU.
27Pea nau kalusefai fakataha mo ia ha ongo kaiha‘akau, ko e toko taha mei hono to‘omata‘u, mo e toko taha mei he to‘ohema. 28Pea na‘e fakamo‘oni‘i ai ‘a e Tohi, ‘o pehē, Pea na‘e fakakau ia mo e kau maumau lao.#15.28 ‘Oku ‘ikai ke ‘asi ‘a e vēsí ni ‘i he ngaahi hiki fuoloa ‘e ni‘ihi. (vakai kia Luk 22.37). #‘Ais 53.12
29Pea ko e kakai na‘e ‘alu ange na‘a nau tālalakulaku ki ai, mo nau kalokalo honau ‘ulu, ‘o nau pehē, Uē! ‘a e tama holoki Fale Tapu ‘o langa ‘i he ‘aho ‘e tolu!#Saame 22.7; 109.25; Ma‘ake 14.58; Sioné 2.19
30‘Alu hifo mei he kolosi, ‘o fakahaofi koe.
31Pehē foki mo e hou‘eiki taula‘eiki na‘a nau kau mo e kau sikalaipe ‘i he lau fetōtō‘aki ‘iate kinautolu, ‘o pehē, Na‘a ne fakahaofi ‘a e kakai kehe; ka ‘oku ‘ikai te ne lava ke fakahaofi ia. 32Ko e Mīsaia tokua ‘eni, ko e Tu‘i ‘Isileli: pea tuku ke ne ‘alu hifo ni mei he kolosi, ke mau sio ki ai pea mau tui.
Pea ko e ongo me‘a foki na‘e kalusefai mo ia na‘a na manuki‘i ia.
Ko e Pekia ‘a Sīsuú
(Māt 27.45-56; Luk 23.44-49; Sioné 19.28-30)
33Pea ‘i he a‘u ki hono ono ‘o e houa, na‘e hoko ha po‘uli ki he fonua kotoa, ‘o a‘u ki hono hiva ‘o e houa. 34Pea ‘i hono hiva ‘o e houa na‘e kalanga le‘o lahi ‘a Sīsū, ‘Iloi, ‘Iloi, lama sapakatani? ‘a ia ko hono hiki, Ko hoku ‘Otua, ko hoku ‘Otua, na‘a ke li‘aki au kae hā?#Saame 22.1
35Pea ko e ni‘ihi ‘iate kinautolu na‘e tutu‘u ofi mai, ‘i he‘enau fanongo ki ai na‘a nau pehē, Vakai, ‘oku ne ui ‘a ‘Ilaisiā. 36Pea lele ha toko taha, ‘o lōmaki ha oma ‘i ha vinika, ‘o ne humaki ‘i ha kaho, ‘o ‘ange ke ne inu, he‘ene pehē, ‘Ē, tau vakai pe ‘e ha‘u ‘a ‘Ilaisiā ke ‘ohifo ia.#Saame 69.21
37Pea he‘aki ‘e Sīsū ‘ene fu‘u kaila, ‘o ne hokotaki.
38Pea na‘e mahaeua ‘a e tatau ‘o e Fale Tapu mei ‘olunga ki lalo,#‘Eki 26.31-33 39pea ko e senituliō na‘e tu‘u ofi mai, ‘o fehangahangai mo ia, ‘i he‘ene vakai ki he pehē ‘ene hokotaki,#15.39 ki he… hokotaki; ‘Oku pehē ‘i hono ngaahi hiki fuoloa ‘e ni‘ihi: ki he‘ene kaila pea maté. na‘a ne pehē, Tā na‘e mo‘oni pē ‘a e tangata ni: ko e ‘Alo ia ‘o e ‘Otua.
40Pea na‘e nofo ai mo ha kau fefine ‘o nau mamata mai mei he mama‘o; ko honau ni‘ihi ‘a Mele mei Makitala, mo Mele ko e fa‘ē ‘a Sēmisi Si‘i mo Siose, pea mo Sālome,#Luk 8.2-3 41‘a ia na‘a nau muimui kiate ia ‘i he‘ene ‘i Kāleli, ‘o nau tauhi ki ai; pea mo ha tu‘unga fafine kehe, ‘a ia na‘a nau ō hake mo ia ki Selusalema.
Ko e Telio ‘o Sīsū
(Māt 27.57-61; Luk 23.50-56; Sioné 19.38-42)
42Pea ‘i he‘ene efiafi hifo leva, pea koe‘uhi ko e Tokonaki ia, ‘a ia ko e ‘aho ‘oku mu‘omu‘a ‘i he Sāpate, 43ko ia ‘i he ‘alu ange ‘a Siosifa ko e ‘Alematea, (‘a ia ko e ‘eiki na‘e kau ‘i he falealea, pea ko e toko taha foki na‘e nofo ‘amanaki ki he Pule‘anga ‘o e ‘Otua) na‘a ne fakato‘oto‘a ‘o hū ki Loto‘ā kia Pailato, ‘o ne kole ‘a e sino ‘o Sīsū. 44Pea pehē ‘e Pailato ‘i hono loto, ko e me‘a fakaofo ‘o kapau kuo ne pekia leva; ‘o ne ui ange ‘a e senituliō, ‘o ne fakafehu‘i kiate ia pe kuo fuofuoloa ange ‘ene pekia. 45Pea ‘i he‘ene ‘ilo ki ai mei he senituliō, na‘a ne foaki ‘a e ‘anga‘anga kia Siosifa. 46Pea hanga ia ‘o fakatau ha tupenu mahu‘inga; ‘o ne ‘ohifo ‘a Sīsū, ‘o ne fakakoloa ‘aki ia ‘a e tupenu, ‘o ne telio ia ‘i ha fonua loto, ‘a ia kuo ‘osi foa ‘i he maka, ‘o ne fakateka ha maka ke songo ‘aki ‘a e fonualoto. 47Pea ko Mele mei Makitala, pea mo e Mele ko e fa‘ē ‘a Siose, na‘a na mo‘usioa ‘a e potu kuo telio ai ia.
Currently Selected:
Ma‘aké 15: TMB
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Tongan Moulton Bible © Bible Society of the South Pacific, 2011.