Luké 3
3
Ko e Akonaki ‘a Sione Papitaiso
(Māt 3.1-12; Ma‘ake 1.1-8; Sioné 1.19-28)
1TOKUA ‘i hono hongofulu mā nima ta‘u ‘o e pule ‘a Taipiliō ko e Sisa, pea lolotonga ‘a e kōvana ‘a Ponitō Pailato ‘i Siutea, pea tu‘i ‘a Hēlota ‘i Kāleli, mo hono tehina ko Filipe ‘i ‘Aitulia mo e feitu‘u ko Telakonaitisi, pea tu‘i ‘a Lisaniasi ‘i ‘Apiline, 2pea Taula‘eiki Lahi ‘a ‘ānasi mo Kaiafasi–ko e kuonga ia na‘e hoko ai ‘a e folofola ‘a e ‘Otua kia Sione ko e foha ‘o Sākalaia ‘i he toafa. 3Pea ‘alu ia ki he feitu‘u kotoa ‘o Soatani, ‘o ne malanga ‘aki ‘a e papitaiso fakatomala ki he fakamolemole angahala: 4‘o hangē ko ia kuo tohi ‘i he puka ‘o e ngaahi lea ‘a ‘Aisea ko e palōfita,#‘Ais 40.3-5 (LXX)
Ko e le‘o ‘o ha toko taha ‘oku kalanga he toafa,
Mou teuteu ‘a e hā‘ele‘anga ‘o Sihova;
Fakatonutonu hono ngaahi hala.
5‘Ilonga ha tele‘a pea ‘e tanu,
Pea ‘ilonga ha mo‘unga pe tafungofunga ‘e holoki;
Pea ‘e ngaohi ‘a e pikopiko ke totonu,
Mo e tokatāmaki ke tokamālie.
6Pea ‘e mamata ‘e he kakano kotoa ki he fakamo‘ui‘anga ‘a e ‘Otua.
7Pea toki lea ia ki he ngaahi fu‘u kakai na‘e fononga mai ke papitaiso ‘iate ia, ‘o ne pehē, ‘A e hako‘i ngata fekai, ko hai ne fale‘i kimoutolu ke hola mei he houhau ‘oku tu‘unuku mai?#Māt 12.34; 23.33 8Kapau ko ia, pea mou fua ‘o taau mo ha kau fakatomala; pea ‘oua te mou kamata fuataki ‘i homou loto, ‘o pehē, Ko ‘Epalahame ‘a ‘emau tamai; he ‘oku ou tala atu, ‘oku mafai ‘e he ‘Otua ke fokotu‘u mei he ngaahi maka ni ha fānau kia ‘Epalahame.#Sioné 8.33 9Kae‘uma‘ā ‘oku lolotonga tu‘u ni ‘a e toki ‘i he tefito ‘o e ngaahi ‘akau: ko ia, ‘ilonga ha ‘akau ‘oku ‘ikai fua lelei ‘oku tā ‘o laku ki he afi.#Māt 7.19
10Pea fa‘a fehu‘i kiate ia ‘e he ngaahi kakai, ‘o nau pehē, pea ko e hā te mau fai?
11Pea tali ‘e ia kiate kinautolu, ‘o ne pehē, ‘Ilonga ha toko taha ‘oku ua hono sote, ke ne vaeua mo ha taha ‘oku ‘ikai: pea ‘ilonga ha ma‘u me‘akai, ke ne fai pehē foki.
12Pea ha‘u foki ha kau tānaki tukuhau ke papitaiso, ‘o nau pehē kiate ia, Tangata‘eiki, ko e hā te mau fai?#Luk 7.29
13Pea ne pehē kiate kinautolu, ‘oua na‘a mou ‘eke ‘o fakamahili ‘i he me‘a kuo tu‘utu‘uni kiate kimoutolu.
14Pea fehu‘i kiate ia mo ha kau tau, ‘o nau pehē, Ko e hā te mau fai ‘e kimautolu foki?
Pea ne pehē ki ai, ‘Oua te mou fakamālohi ha taha; pea ‘oua na‘a fasitu‘u‘i; pea mou fiemālie ‘i he tokonaki ‘oku ‘atu.
15Pea ‘i he fakanganga ‘a e kakai, mo nau fifili kotoa pē ‘i honau loto kia Sione, na‘a ko e Mīsaia ia: 16pea toe lea ‘a Sione kiate kinautolu kotoa, ‘o pehē, Ko au ‘oku ou papitaiso kimoutolu ‘aki ‘a e vai: ka ‘oku ha‘u ha toko taha ‘oku mālohi ‘iate au, ko e toko taha ‘oku ‘ikai te u taau ke vete ‘a e nono‘o ‘o hono topuva‘e: te ne papitaiso kimoutolu ‘e ia ‘i he Laumālie Mā‘oni‘oni mo e afi. 17Ko e toko taha ia ‘oku ‘i hono nima ‘a e ī, pea te ne tapili ke ‘osi ‘ene ‘au‘au‘anga; pea te ne tānaki ‘a e ngaahi fo‘i uite ki hono feleoko; ka te ne tutu ‘a e kafukafu ‘aki ‘a e afi ‘oku ‘ikai matāmate‘i.
18Na‘e lahi mo e ngaahi tala mālie, ‘o taha kehe mo eni, na‘a ne fai‘aki ‘i he‘ene tokoni ki he kakai. 19Ka na‘a ne valokia ‘a Hēlota, pea na‘e touia ‘a e loto ‘o e Tu‘i, koe‘uhi ko Helotiasi ko e uaifi ‘o hono tehina, pea koe‘uhi ko e ngaahi kovi kehekehe ne fai ‘e Hēlota:#Māt 14.3-4; Ma‘ake 6.17-18 20pea na‘a ne kanoni ‘aki ia kotoa ‘a e me‘a ni foki, ‘ene lī ‘a Sione ki he pilīsone.
Ko e Papitaiso ‘a Sīsuú.
(Māt 3.13-17; Ma‘ake 1.9-13)
21Pea ‘i he ‘osi papitaiso ‘a e kakai, pea kuo papitaiso mo Sīsū foki, pea ‘oku ne fai ‘ene hū, ‘iloange na‘e matangaki ‘a e langi, 22pea ‘alu hifo kiate ia ‘a e Laumālie Mā‘oni‘oni, ‘i ha sino na‘e tatau mo ha lupe; pea na‘e ai ha le‘o mei he langi na‘e pehē mai, Ko hoku ‘alo Pele koe, ko koe kuo u hōifua ai.#Sēn 22.2; Saame 2.7; ‘Ais 42.1; Māt 3.17; Ma‘ake 1.11; Luk 9.35
Ko e Tupu‘anga ‘o Sīsuú
(Māt 1.1-17)
23Pea ko Sīsū na‘e fe‘unga nai ia mo e tolungofulu ta‘u ‘i he‘ene kamata ngāue; pea na‘e lau ko e foha ia ‘o Siosifa, ‘a ia ko e foha ‘o Hēlai.
24‘A ia ko e foha ‘o Mātati,
‘A ia ko e foha ‘o Līvai,
‘A ia ko e foha ‘o Melikai,
‘A ia ko e foha ‘o Sianai,
‘A ia ko e foha ‘o Siosifa.
25‘A ia ko e foha ‘o Matataiasi,
‘A ia ko e foha ‘o ‘ēmosi,
‘A ia ko e foha ‘o Nēhumi,
‘A ia ko e foha ‘o ‘Esilai,
‘A ia ko e foha ‘o Nākai.
26‘A ia ko e foha ‘o Mā‘ati,
‘A ia ko e foha ‘o Matataiasi,
‘A ia ko e foha ‘o Semaini,
‘A ia ko e foha ‘o Sioseki,
‘A ia ko e foha ‘o Siota.
27‘A ia ko e foha ‘o Sioanani,
‘A ia ko e foha ‘o Lesa,
‘A ia ko e foha ‘o Seluipepeli,
‘A ia ko e foha ‘o Saletili,
‘A ia ko e foha ‘o Nēlai.
28‘A ia ko e foha ‘o Melikai,
‘A ia ko e foha ‘o ‘ātai,
‘A ia ko e foha ‘o Kōsame,
‘A ia ko e foha ‘o ‘ēlimatami,
‘A ia ko e foha ‘o ‘Ea.
29‘A ia ko e foha ‘o Sīsū,
‘A ia ko e foha ‘o ‘Eliesa,
‘A ia ko e foha ‘o Siolimi,
‘A ia ko e foha ‘o Mātati,
‘A ia ko e foha ‘o Līvai.
30‘A ia ko e foha ‘o Simione,
‘A ia ko e foha ‘o Siuta,
‘A ia ko e foha ‘o Siosifa,
‘A ia ko e foha ‘o Sionami,
‘A ia ko e foha ‘o ‘Īlaiakimi.
31‘A ia ko e foha ‘o Melea,
‘A ia ko e foha ‘o Mena,
‘A ia ko e foha ‘o Mātata,
‘A ia ko e foha ‘o Nētani,
‘A ia ko e foha ‘o Tēvita.
32‘A ia ko e foha ‘o Sese,
‘A ia ko e foha ‘o ‘ōpeti,
‘A ia ko e foha ‘o Poasi,
‘A ia ko e foha ‘o Solomone,
‘A ia ko e foha ‘o Na‘asoni.
33‘A ia ko e foha ‘o ‘Aminatape,
‘A ia ko e foha ‘o ‘Atamaini,
‘A ia ko e foha ‘o ‘Alanai,
‘A ia ko e foha ‘o ‘Esilome,
‘A ia ko e foha ‘o Felesi,
‘A ia ko e foha ‘o Siuta.
34‘A ia ko e foha ‘o Sēkope,
‘A ia ko e foha ‘o ‘Aisake,
‘A ia ko e foha ‘o ‘Epalahame,
‘A ia ko e foha ‘o Tela,
‘A ia ko e foha ‘o Nēhoa.
35‘A ia ko e foha ‘o Sēluki,
‘A ia ko e foha ‘o Le‘u,
‘A ia ko e foha ‘o Pēleki,
‘A ia ko e foha ‘o Hepelū,
‘A ia ko e foha ‘o Sela.
36‘A ia ko e foha ‘o Kēnani,
‘A ia ko e foha ‘o ‘Aafakisate,
‘A ia ko e foha ‘o Semi,
‘A ia ko e foha ‘o Noa,
‘A ia ko e foha ‘o Lēmeki.
37‘A ia ko e foha ‘o Mētuisela,
‘A ia ko e foha ‘o ‘Īnoke,
‘A ia ko e foha ‘o Sēleti,
‘A ia ko e foha ‘o Melilieli,
‘A ia ko e foha ‘o Kēnani.
38‘A ia ko e foha ‘o ‘Īnosi,
‘A ia ko e foha ‘o Seti,
‘A ia ko e foha ‘o ‘ātama,
‘A ia ko e foha ‘o e ‘OTUA.
Currently Selected:
Luké 3: TMB
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Tongan Moulton Bible © Bible Society of the South Pacific, 2011.