Luké 2
2
Ko e ‘Alo‘i ‘o Sīsuú
(Māt 1.18-25)
1PEA ‘i he kuonga ko ia tokua, na‘e ‘alu atu ha fekau meia Sisa ‘Akosito, ke tohi kakai ‘a māmani kātoa. 2Pea na‘e fuofua fai ‘a e tohi kakai ko ia, lolotonga na‘e kōvana ‘i Sīlia ‘a Sailinio. 3Pea na‘e ‘alu ‘a e kakai kotoa pē, takitaha ki hono kolo ‘o‘ona ke tohi ai.
4Pea fononga hake mo Siosifa foki mei he kolo ko Nāsaleti ‘i Kāleli, ko ‘ene ‘alu ki Siutea, ki he kolo ‘o Tēvita, ‘a ia ‘oku hingoa ko Pētelihema; (he na‘a ne kau ki he hako mo e fa‘ahinga ‘o Tēvita): 5ke na tohi ai mo Mele, ko e fefine kuo polo‘i kiate ia, ‘a ia na‘e feitama. 6Pea lolotonga ‘ena ‘i ai, na‘e kakato hono māhina ke fā‘ele: 7pea na‘a ne ‘alo‘i ‘a e tama, ko hono ‘uluaki, ‘o ne fakakofu ‘aki ia ‘a e kofu‘i tamasi‘i valevale, ‘o ne fakatokoto‘i he ‘ai‘angakai ‘o e manu: koe‘uhi na‘e ‘ikai te na hao ‘i he fale talifononga.
Ko e Kau Tauhi Sipi
8Pea na‘e ‘i he fonua ko ia ha kau tauhi sipi na‘e mohe vao, ‘o le‘ohi ‘enau fanga sipi ‘i he po‘uli. 9Pea ‘iloange, na‘e tu‘u mai kiate kinautolu ha ‘āngelo ‘a e ‘Eiki, pea malama mai ‘a e Sikaina ‘o e ‘Eiki ‘o hulu‘ia kinautolu; pea na‘a nau manavahē–ko e manavahē ka ko ha manavahē. 10Pea pehē ‘e he ‘āngelo kiate kinautolu, ‘oua ‘e manavahē; he ko eni kuo u ha‘u mo au ha talanoa mālie, ko e me‘a fakafiefia ‘aupito, ko e me‘a ma‘a e kakai ‘Isileli kātoa. 11He na‘e ‘alo‘i kiate kimoutolu ‘anenai ‘i he Kolo ‘o Tēvita ha Fakamo‘ui, ‘a ia KO E ‘EIKI MĪSAIA. 12Pea ko hono faka‘ilonga ‘eni kiate kimoutolu: te mou ‘ilo ha tamasi‘i valevale, kuo kofu fakatamasi‘i valevale, pea ‘oku ne tokoto ‘i he ‘ai‘angakai ‘o e manu.
13Pea fakafokifā pē na‘e ‘i he ‘āngelo ha tokolahi ‘o e hōsitē ‘o Langi, ‘oku nau fakamālō ki he ‘Otua, ‘o nau pehē.
14KO E KOLōLIA KI HE ‘OTUA ‘I LANGI TAUPOTU,
PEA KO E MELINO KI MāMANI
KI HE KAKAI KUO HōIFUA KI AI.#2.14 ‘Oku tu‘u ‘i he tohi ‘e ni‘ihi: ko e hōifua ki he kakaí.
15Pea na‘e pehē, ‘i he ‘alu meiate kinautolu ‘a e kau ‘āngelo ki he langi, pea fetālaaki ‘a e kau tauhi sipi, Tau ō mu‘a ‘o hoko ki Pētelihema, ‘o vakaia ‘a e me‘a ni kuo fai, ‘a ia kuo fakahā mai ‘e he ‘Eiki.
16Pea nau ō fakavave, ‘o ‘ilo ‘a Mele mo Siosifa fakatou‘osi, pea mo e tamasi‘i valevale ‘oku tokoto ‘i he ‘ai‘angakai. 17Pea ‘i he‘enau mamata ki ai, na‘a nau fai ‘enau fakamatala ki he me‘a na‘e lea‘aki kiate kinautolu, ‘o kau ki he tama ni. 18Pea ko kinautolu na‘e fanongo ai, na‘a nau ofo kotoa pē ‘i he ngaahi me‘a na‘e lea‘aki ‘e he kau tauhi sipi kiate kinautolu. 19Ka ka kumuni kotoa pē ‘e Mele ‘a e ngaahi me‘a ni, ‘o ne fefilihaki ki ai ‘i hono loto. 20Pea foki atu ‘a e kau tauhi sipi, mo nau fakafeta‘i mo fakamālō ki he ‘Otua; koe‘uhi ko e ngaahi me‘a na‘a nau fanongo ki ai, pea mo ia na‘a nau mātā, ‘oku na tuha mo e me‘a na‘e tala mai.
Ko Hono Fakahingoa ‘o Sīsū
21Pea ‘i he hokosia hono ‘aho valu ke kamu ia, pea na‘e fakahingoa ia ko Sīsū; ‘a ia ko hono fakahingoa ‘e he ‘āngelo ‘i he te‘eki ke tu‘itu‘ia ia ‘i he manava.#Lev 12.3; Luk 1.31
Ko e Hiva ‘a Simione
22Pea ‘i he hokosia ‘a e ‘aho ke fakama‘a kinaua, ‘o fakatatau ki he lao ‘a Mōsese, na‘a na ‘ave ia ki Selusalema ke ‘atu ki he ‘Eiki-#Lev 12.6-8 23‘o hangē ko ia kuo tohi ‘i he Lao ‘a e ‘Eiki, Ke ‘ilonga ‘a e tama tangata ko ha ‘olopo‘ou, ‘e lau ia ko e tapu ki he ‘Eiki-#‘Eki 13.2,12 24pea koe‘uhi foki ke na fai ‘a e feilaulau, ‘o hangē ko ia ‘oku tu‘u ‘i he Lao ‘a e ‘Eiki, Ko e ongo kulukulu, pe ko ha lupe mui ‘e toko ua.
25Pea tā na‘e nofo ‘i Selusalema ha tangata na‘e hingoa ko Simione; pea ko e tangata tauhi tu‘utu‘uni ia mo lotu mo‘oni, he‘ene nofo ‘amanaki ki he taukapo‘i ‘o ‘Isileli; pea na‘e fa‘a hā‘elea ia ‘e he Laumālie Mā‘oni‘oni. 26Pea kuo valokia ia ‘e he Laumālie Mā‘oni‘oni, ‘e ‘ikai te ne mamata ki he mate kae‘oua ke ne mamata ki he Mīsaia ‘a e ‘Eiki. 27Pea kuo ‘alu ia ki he Temipale kuo Laumālie‘ia, mo e ‘oange ‘a e tamasi‘i ko Sīsū ‘e he‘ene mātu‘a ke fai kiate ia ‘o fakatatau ki he anga ‘o e Lao. 28Pea ma‘u ‘a e tama ‘e ia ‘o hapai, mo ne fakamālō‘ia ‘a e ‘Otua, ‘o ne pehē.
29‘ēī, tā ko ho‘o tukuange ‘eni ho‘o pōpula
Ke ‘alu kuo fiemālie, ‘o hangē ko ho‘o folofola:
30He kuo mamata ‘a hoku mata ki ‘ao fakamo‘ui‘anga.
31‘A ia na‘a ke teuteu ke hā ki ho kakai kotoa pē;
32Ko e Maama ke tatala ‘aki ‘a e fakapo‘uli ‘o e Senitaile,#‘Ais 42.6; 49.6; 52.10
Pea ko e Lāngilangi‘anga ‘o ho kakai ‘Isileli,
33Pea tutu‘u ‘a ‘ene tamai mo ‘ene fa‘ē, ‘oku na ofo ‘i he ngaahi me‘a na‘e lea‘aki ‘i he tama. 34Pea na‘e tāpuaki‘i kinaua ‘e Simione, ‘o ne pehē kia Mele ko ‘ene fa‘ē, ‘ē, ko e nafa ‘o e toko taha ni ko e holo-mo-toetu‘u‘anga ‘o ha tokolahi ‘i ‘Isileli, pea ko e faka‘ilonga ka leakovia: 35(‘io, na‘a mo koe ‘e ulu ha heletā ‘i ho loto) koe‘uhi kae toki fukefuke ai ‘a e fakakaukau ‘a e loto ‘o e tokolahi.
36Pea na‘e ‘i ai ha fefine palōfita ko ‘Ana, ko e ‘ōfefine ‘o Fanueli, ‘a ia ko e toko taha ‘i he ha‘a ‘āseli. Pea ko e fefine ‘eni na‘e fuoloa ‘aupito: na‘a ne ma‘u husepāniti ‘i he‘ene finemui, ‘o na nonofo ‘o fitu ta‘u;#2.36-37 na‘á ne ma‘u.fitu ta‘u: ‘Oku ngali tonu hono hiki ‘o: Na‘e ta‘u pē ‘e fitu ‘ene nofo malí, pea kuo ta‘u ‘e valungofulu mā fā eni ‘a hono ta‘u motu‘á, pe kuo ta‘u ‘e valungofulu mā fā ‘ene uitoú. 37pea kuo nofo uitou ia ‘o valungofulu mā fā ta‘u: pea na‘e ‘ikai mahu‘i ia mei he Temipale, ka ne tauhi ki he ‘Otua ‘aki ‘a e ‘aukai mo e lotu ‘i he pō mo e ‘aho. 38Pea na‘e tu‘u mai mo ia ‘i he taimi pē ko ia, ‘o ne tali fakafeta‘i ki he ‘Otua; pea ne lea ‘i he tama kiate kinautolu kotoa pē ‘i Selusalema na‘e nofo ‘amanaki ki he huhu‘i.
Ko e Foki ‘a Sīsuú mo ‘Ene Ongo Mātu‘á ki Nāsaleti
39Pea kuo ‘osi ‘ena fai kotoa pē, ‘o fakatatau ki he Lao ‘a e ‘Eiki, na‘a nau foki ki Kāleli ki honau kolo ko Nāsaleti.#Māt 2.23 40Pea na‘e tupu ‘a e tamasi‘i, ‘o ne faka‘a‘au ke mālohi, he fakafonu ia ‘i he poto; pea na‘e toka kiate ia ‘a e ‘ofa ‘a e ‘Otua.
Ko e Tamasi‘i ko Sīsū ‘i he Temipalé
41Pea na‘e ‘alu ‘ene mātu‘a ‘i he ta‘u kotoa pē ki Selusalema, ki he kātoanga ‘o e Pāsova.#‘Eki 12.1-27; Teu 16.1-8 42Pea ‘i he hoko hono hongofulu mā ua ta‘u, na‘a nau fononga hake, ‘o hangē ko ‘enau fa‘a fai ‘i he Kātoanga. 43Pea kuo faka‘osi hono ngaahi ‘aho, ‘o nau kamata foki atu, na‘e nofo pē ‘a e tamasi‘i ko Sīsū ‘i Selusalema; pea ‘ikai ‘ilo ki ai ‘e he‘ene mātu‘a. 44Pea ‘i he‘ena mahalo ‘oku ne ‘i he kau fononga, na‘a na hanga ō pē, kae‘oua ke ‘osi mai ‘a e vā‘ihala ‘o e ‘aho ko ia: pea na toki kumi ia ki honau kāinga mo honau kau fe‘iloaki. 45Pea ‘i he ‘ikai te na ‘ilo ia, na‘a na foki ki Selusalema ko e kumi kiate ia. 46Pea na‘e pehē, ‘i he hili ‘a e ‘aho ‘e tolu, na‘a na ‘ilo ia ki he Temipale, ‘oku ne lotolotoi ‘i he kau akonaki, ‘o ne fakafanongo kiate kinautolu mo fakafehu‘i kiate kinautolu. 47Pea ko kinautolu kotoa pē na‘e fanongo kiate ia, na‘a nau fakatumutumu ‘i he anga ‘o ‘ene fakakaukau mo ‘ene ngaahi tali. 48Pea ‘i he‘ena mamata ki ai, na‘e to‘oa hona loto; pea na‘e lea kiate ia ‘e he‘ene fa‘ē, Tama, ko e hā kuo ke fai pehē ai kiate kimaua? He ko eni, ko ho‘o tamai mo au kuo ma kumi koe mo e loto lavea.
49Pea pehē ‘e ia kiate kinaua, Ko e hā kuo mo kumi ai au? ‘Ikai na‘a mo ‘ilo kuo pau ke u ‘i he ngāue ‘a ‘eku Tamai?#2.49 ‘Oku hiki ‘e he ni‘ihi: ko e fale ‘o ‘eku Tamaí. 50Pea na‘e ‘ikai te na lavea hono ‘uhinga ‘o ‘ene lea ko ia kiate kinaua.
51Pea ‘alu hifo ia mo kinaua, ‘o hoko ki Nāsaleti; pea na‘a ne ‘i ai ‘o anganofo kiate kinaua pea kumuni ‘e he‘ene fa‘ē ‘a e ngaahi me‘a ni kotoa pē ‘i hono loto. 52Pea na‘e lalaka atu ‘a Sīsū ‘i he poto, mo e lahi ‘o hono sino, pea mo hono ‘ofeina ‘e he ‘Otua mo e tangata.#1 Sām 2.26; Pal 3.4
Currently Selected:
Luké 2: TMB
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Tongan Moulton Bible © Bible Society of the South Pacific, 2011.