Luké 1
1
1‘E Tiofilusi, ko e me‘a ‘i he hanga ‘e he tokolahi, ‘o nau fa‘u hano fakamatala ‘o e ngaahi me‘a ‘oku mātu‘aki tui ki ai ‘e kitautolu, 2‘o fakatatau ki hono tala mai ‘e kinautolu na‘a nau sio tonu ki ai mei hono kamata, ‘o hoko ko e kau ngāue ‘o e folofola, 3kuo u fakakaukau mo au foki, Tangata‘eiki, ke tohi hokohoko ia, ma‘au, he kuo u fakatotolo mai kotoa pē ke mahu‘ingamālie: 4koe‘uhi ke ke ‘ilo kānokano ki he mo‘oni ‘o e ngaahi fakamatala, ‘a ia na‘e akonekina ai koe.
5Tokua ‘i he kuonga ‘o Hēlota, ko e Tu‘i Siutea,#1.5 Siutea; ‘Oku ‘uhinga ‘a e Siuteá ‘i heníki Palesitaine kātoa. na‘e ‘i ai ha taula‘eiki na‘e hingoa ko Sākalaia, ‘a ia na‘e kau ki he lakanga ‘o ‘Apaia: pea na‘e ai hono uaifi, ‘a ia na‘a ne ‘i he hako totonu ‘o ‘ēlone, pea na‘a ne ma‘u ‘a e hingoa ko ‘Ilisapesi.#1 Kal 24.10 6Pea ko e ongo me‘a na‘e lelei ‘ena fakafeangai ki he ‘Otua, he‘ena laka ‘i he ngaahi fekau mo e tu‘utu‘uni kotoa pē ‘a e ‘Eiki mo e haohaoa. 7Pea na‘e ‘ikai ha‘ana tama, koe‘uhi na‘e pa‘a ‘a ‘Ilisapesi; pea kuo na mātutu‘a fakatou‘osi pē.
8Pea ko e ‘aho ‘e taha na‘a ne fai ‘ene ngāue fakataula‘eiki ki he ‘Otua ‘i he hokohoko ‘o hono lakanga; 9pea ‘i he talotalo, ‘o fakatatau ki he anga ‘o e ngāue fakataula‘eiki, na‘e tō kiate ia ‘a e tutu ‘o e ‘inisēnisi ‘i he‘ene hū ki he Fale Tapu ‘o e ‘Eiki: 10pea na‘e lotu ‘i tu‘a ‘a e fakataha kotoa, ‘i he hokosia ‘a e taimi ‘o e fai ‘inisēnisi. 11Pea na‘e hā kiate ia ha ‘āngelo ‘a e ‘Eiki, ‘o tu‘u ‘i he potu to‘omata‘u ‘o e ‘ōlita tutu‘anga ‘inisēnisi. 12Pea na‘e tāfu‘ua ‘a Sākalaia ‘i he‘ene sio ki ai; pea tō kiate ia ha ilifia. 13Ka ka lea ki ai ‘a e ‘āngelo ‘o ne pehē, ‘e Sākalaia, ‘oua ‘e manavahē; he kuo tau ho‘o hū, pea ko ho uaifi ko ‘Ilisapesi, te ne fanau‘i ha tama kiate koe, pea te ke fakahingoa ia ko Sione. 14Pea te ke fiefia ai mo nēkeneka: ‘io, ‘e fiefia ha tokolahi ‘i he‘ene hoko mai. 15He te ne hoko ko e lahi ‘i he vakai ‘a e ‘Eiki; pea ‘e ‘ikai ‘aupito te ne inu ha uaine pe ha kava mālohi; pea te ne fonu ‘i he laumālie Mā‘oni‘oni, ‘o kamata mei he manava ‘o ‘ene fa‘ē.#Nōm 6.3 16Pea te ne fakatafoki ha tokolahi ‘o ha‘a ‘Isileli ki he ‘Eiki ko honau ‘Otua: 17‘a ia te ne fakamelomelo foki ki ai ‘i he tatau ‘o e anga mo e ivi ‘o ‘Ilaisiā: koe‘uhi ke ne liliu ‘a e loto ‘o e mātu‘a ke tokanga ki he‘enau fānau, pea mo e kau talangata‘a ke nau ma‘u ‘a e anga fakapotopoto ‘o e kau angatonu; ke teu‘i ma‘a e ‘Eiki ‘a e kakai ne tokonaki.#Mal 4.5-6
18Pea pehē ‘e Sākalaia ki he ‘āngelo. Te u ‘ilo ‘i he hā ‘a e me‘a ni? He ko au ko e motu‘a, pea ko hoku uaifi ko e fefine fuoloa ‘aupito.
19Pea tali ‘e he ‘āngelo ‘o ne pehē ki ai, Ko Kepaleli au, ‘a ia ‘oku ou fakafe‘ao ki he ‘Otua; pea kuo fekau au ke lea kiate koe, pea ke ‘atu ‘a e ongoongo lelei ni.#Tān 8.16; 9.21 20Pea ko eni, te ke noa, ‘o ‘ikai te ke fa‘a lea, ‘o a‘u ki he ‘aho ‘e hoko ai ‘a e me‘a ni: koe‘uhi na‘e ‘ikai te ke tui ki he‘eku ngaahi tala, ka ko e ngaahi lea ia ‘oku fai pau ‘oka hoko hono taimi.
21Pea mo‘u talia pē ‘a e kakai kia Sākalaia, ‘o nau ofo ‘i he‘ene fuoloa ‘i he Fale Tapu. 22Pea ‘i he‘ene hū mai, na‘e ‘ikai te ne lava ke lea kiate kinautolu: pea nau toki ‘ilo, tā kuo ne mamata ki ha vīsone ‘i he Fale Tapu; pea kakamo pē ia kiate kinautolu, ‘o ne nofo tuli mo ta‘elea.
23Pea ‘i he faifai pea ‘osi ‘a e ngaahi ‘aho ‘o ‘ene fai ‘a e ngāue tapu, na‘a ne foki ki ‘api. 24Pea hili ‘a e ngaahi ‘aho ko ia, na‘e tu‘itu‘ia ‘a ‘Ilisapesi ko hono uaifi, pea na‘a ne nofo ‘i he lilo ‘o nima māhina, he‘ene pehē, 25Koe‘uhiā kuo pehē fau ‘a e ngāue ‘a e ‘Eiki ma‘aku, ‘i he ‘iloange na‘a ne āfeitaulalo mai, ‘o hiki hoku mā‘anga ki he kakai.
Ko e Fakahaa‘i Mai e ‘Alo‘i ‘o Sīsuú
26Pea ‘i hono ono māhina, na‘e fekau mei he ‘Otua ‘a e ‘āngelo ko Kepaleli ki ha kolo ‘o Kāleli na‘e hingoa ko Nāsaleti, 27ke ne ‘alu ki ha tāupo‘ou na‘e polo‘i ki ha tangata ‘i he hako ‘o Tēvita, na‘e hingoa ko Siosifa; pea ko e hingoa ‘o e ta‘ahine ko Mele.#Māt 1.18 28Pea ‘i he‘ene a‘u atu kiate ia na‘a ne pehē, Si‘oto‘ofa, ‘a koe kuo ‘ofeina: ‘oku ‘iate koe ‘a e ‘Eiki.
29Pea mo‘utāfu‘ua ia ‘i he lea ni, ‘o ne fifili pe ‘e fou fakafēfē ‘a e fetapa ni. 30Pea pehē ange ‘e he ‘āngelo, ‘e Mele, ‘oua te ke manavahē; he kuo ke ta‘imālie mei he ‘Otua. 31Pea ko ‘eni, te ke tu‘itu‘ia, pea te ke ‘alo‘i ha tama, pea te ke fakahingoa ia ko Sīsū.#Māt 1.21 32Pea ‘e hoko ko e lahi ‘a e toko taha ko ia; pea ‘e lau ia ko e ‘Alo ‘o e ‘Eiki Taupotu; pea ‘e foaki kiate ia ‘e he ‘Eiki ko e ‘Otua ‘a e taloni ‘o ‘ene kui ko Tēvita:#2 Sām 7.12,13,16; ‘Ais 9.7 33pea te ne tu‘i ki he hako ‘o Sēkope ‘o lauikuonga; pea ko ‘ene pule ‘e ‘ikai ngata.
34Pea pehē ‘e Mele ki he ‘āngelo, ‘e hoko fēfē ia? he ‘oku te‘eki te u ‘iloa ha tangata.
35Pea tali ‘e he ‘āngelo kiate ia, ‘o pehē, ‘e hoko mai ‘a e Laumālie Mā‘oni‘oni kiate koe, pea ‘e fakamalumalu koe ‘e he māfimafi ‘o e ‘Eiki Taupotu: pea ko ia ‘e ui ai ‘a e hako tapu te ke fā‘ele‘i, 36KO E ‘ALO ‘O E ‘OTUA, pea vakai, ko ‘Ilisapesi ko ho kāinga, kuo tu‘itu‘ia mo ia ‘i ha tama, ka kuo motu‘a; pea ko hono ono māhina ‘eni ‘o ia na‘e lau ko e pa‘a: 37he ‘oku ‘ikai ha fo‘i folofola ‘a e ‘Otua ‘e ta‘emalava.#Sēn 18.14
38Pea pehē ‘e Mele, Ko au ‘eni, ko e kaunanga ‘a e ‘eiki: ke hoko mai kiate au ‘o hangē ko ho‘o me‘a. Pea ‘alu ‘a e ‘āngelo meiate ia.
Ko e ‘A‘ahi ‘a Mele Kia ‘Ilisapesi
39Pea faifai pea tu‘u ‘a Mele, ‘o ‘alu fakavave ki he fonua mo‘unga, ki ha kolo ‘o Siutea; 40‘o ne hū ki he fale ‘o Sākalaia, ‘o fetapa kia ‘Ilisapesi. 41Pea ‘iloange, ‘i he fanongo ‘e ‘Ilisapesi ki he fetapa ‘a Mele, ne hākahaka ‘a e tama ‘i hono fatu: pea fonu ‘a ‘Ilisapesi ‘i he Laumālie Mā‘oni‘oni, 42‘o ne kalanga le‘o lahi,
Ha ‘ofeina ā ka ko koe ‘i he kau fefine kotoa pē!
‘Ofeina ā ka ko e fua ‘o ho manava!
43Pea ‘anefē ia ke me‘a mai kiate au ‘a e fa‘ē ‘a hoku ‘Eiki!
44He vakai, ‘i he ongo mai ho‘o fetapa ki hoku telinga,
Pea hākailangitau ‘a e tama ‘i hoku manava.
45Pea monū‘ia ā ka ko ia na‘e tuitala!
Koe‘uhi ‘e fakamo‘oni ‘a e ngaahi me‘a
Na‘e fakahā mei he ‘Eiki kiate ia.
Ko e Hiva Fakafeta‘i ‘a Mele
46Pea lea ‘a Mele ‘o pehē,#1 Sām 2.1-10
‘Oku fakahīkihiki‘i ‘e hoku loto ‘a e ‘Eiki.
47Pea neka hoku laumālie ‘i he ‘Otua ko hoku Fakamo‘ui.
48He kuo ne āfeitaulalo mai kia kita me‘avale ko ‘ene kaunanga:#1 Sām 1.11
He faka‘uta mai, ko e ‘aho ni ‘e kamata
Ke lau au ko e monū‘ia ‘e he ngaahi to‘utangata.
49He kuo fai ma‘aku ‘e he Māfimafi ha ngaahi me‘a lalahi:
Pea ‘oku mā‘oni‘oni hono huafa.
50Pea ko ‘ene meesi ‘oku laui to‘utangata
Kiate kinautolu ‘oku manavahē kiate ia.
51Kuo fai kaukaua hono nima:
Ko e ha‘a ‘afungi kuo ne fakavilingia ‘i he ngao‘i ‘o honau loto.
52Kuo ne hifo ‘a e kau pule mei honau taloni,#Siope 5.11; 12.19
Pea ko lāuvale kuo ne hākeaki‘i.
53Kuo ne ‘ange me‘a lelei ki he fiekaia ‘o nau mākona,
Pea ko e ma‘u me‘a kuo ne tuku ke ‘alu mola.
54Kuo ne taukapo‘i ‘a ‘Isileli, ko ‘ene sevāniti,
Ke fakamanatu ma‘u ‘ene ngaahi meesi;
Hangē ko ‘ene folofola ki he‘etau ngaahi kui:
55“‘E fai kia ‘Epalahame mo hono hako, ‘o ta‘engata.”#Sēn 17.7
56Pea na‘e nofo mo ia ‘a Mele, ‘o fe‘unga nai mo e māhina ‘e tolu, pea na toki foki ki hono ‘api.
Ko e Fanau‘i ‘o Sione Papitaisó
57Pea ‘i he kakato ‘a e ngaahi māhina ‘o ‘Ilisapesi, na‘a ne fā‘ele‘i ha tama. 58Pea fanongo ‘a e kakai ‘o e feitu‘u ko ia, mo hono kāinga, kuo fakae‘a ‘e he ‘Eiki ‘ene meesi ‘i he fefine ni; pea nau fiefia fakataha mo ia.
59Pea ‘i he faifai pea hoko hono ‘aho valu, na‘a nau omi ke kamu ‘a e tamasi‘i; pea nau pehē ke fakahingoa ia ki he‘ene tamai ko Sākalaia.#Lev 12.3 60Ka ka tali ‘e he‘ene fa‘ē, ‘o ne pehē, ‘Oua, Ka ‘e hingoa ko Sione.
61Pea nau pehē kiate ia, Ka koe‘uhi ‘oku ‘ikai ha taha ‘i ho kāinga ‘oku hingoa pehē. 62Pea nau kamata kamo ange ki he‘ene motu‘a, pe ‘oku ne loto ke fakahingoa ‘a e tama ko hai.
63Pea me‘a ia ke ‘omi ha makatohi, ‘o ne tohi ai ‘o pehē, Ko hono hingoa ko Sione. Pea nau ofo ai kotoa pē. 64Pea na‘e faka‘atā leva hono ngutu mo hono ‘elelo; ‘o ne kamata lea mo fakamālō ki he ‘Otua. 65Pea, na‘e tō ha ilifia ki he kakai kotoa pē ‘o honau feitu‘u; pea ‘i he fonua mo‘unga kotoa ‘o Siutea na‘e lahi hono talanoa‘i ‘o e ngaahi me‘a ni. 66Pea ko kinautolu kotoa pē na‘e fanongo ki ai, na‘a nau fakama‘u ‘i honau loto, he‘enau pehē, Tokaange ha me‘a ‘e hoko ki ai ‘a e tamasi‘i ni! Pea ne‘ine‘i ā, he na‘e kau mo ia ‘a e māfimafi ‘o e ‘Eiki.
Ko e Hiva ‘a Sākalaia
67Pea fonu ai ‘ene tamai ko Sākalaia ‘i he Laumālie Mā‘oni‘oni, pea ne palofisai ‘o pehē.
68Ha taha ā ke fakamāloo‘i,
Pea ko e ‘Eiki ko e ‘Otua ‘o ‘Isileli!
He kuo ne ‘a‘ahi mai, mo fai ha huhu‘i ma‘a hono kakai.
69Mo ne fokotu‘u he hako ‘o Tēvita, ko ‘ene tamaio‘eiki,
Ha nifo mo‘otau fakahaofi.
70‘O hangē ā ‘ene folofola ‘i he ngutu ‘o ‘ene kau palōfita tapu talu mei mu‘a:
71Ko e fakahaofi mei hotau ngaahi fili,
Mo e mālohi ‘o e kakai ‘oku fehi‘a mai:
72Ke fakaai ‘ene ngaahi palōmesi na‘e ma‘u ‘e he‘etau ngaahi kui
Mo tauhi ‘ene fuakava mā‘oni‘oni.
73Mo e lea mamafa na‘a ne tutuku ‘aki kia ‘Epalahame ko ‘etau kui.
74Ke ne me‘a‘ofa ‘aki mai ‘a e me‘a ko eni,
Ke tau fai ta‘eteteki ‘etau ngāue ki he ‘Eiki,
He kuo hamusi kitautolu mei hotau ngaahi fili.
75‘O tau fakafeangai kiate ia ‘aki ‘a e mā‘oni‘oni mo e failelei
‘I he ngaahi ‘aho kotoa pē ‘o ‘etau mo‘ui.
76Pea ko koe, tamasi‘i, ‘e lau ko e Palōfita ‘o e ‘Eiki Taupotu,#Mal 3.1
He te ke fakamelomelo kiate ia ke teuteu hono ngaahi hala:
77Ke ‘atu ‘a e tala ‘o e fakamo‘ui ki he kakai ‘a‘ana,
Ko e fakamolemole ‘enau ngaahi angahala:
78Ko e me‘a ‘i he ‘alo‘ofa ‘a hotau ‘Otua,
‘A ia ne ‘a‘ahi mei ai ‘a e pongipongi mei ‘olunga.
79Ke hulu ‘aki he nofo he po‘uli mo e malu ‘o Mate,#‘Ais 9.2
Mo tataki ki he hala ‘o e fiemālie hotau va‘e.
80Pea na‘e tupu ‘a e tama, ‘o ne faka‘a‘au ke mālohi fakalaumālie; pea na‘a ne ‘i he ngaahi toafa ‘o a‘u ki he ‘aho na‘e fakahā ai ia ki ‘Isileli.
Currently Selected:
Luké 1: TMB
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Tongan Moulton Bible © Bible Society of the South Pacific, 2011.