LUK 16
16
Yuje Mücho Khehthsithsarü
1Jisu-nü amonoti te yocho, “Alirü nyüh khüdu abi khehthsithsarü khüdu licho. Khehthsithsaba tsünü alibong kuthsi müzangkhangjürepü abinü yuchicho. 2Achotsü abi dsiro yocho, ‘Nü nengdang yuchiba hi tuo? Adelü nüh I khehthsithsarü müthsanung, I kuthsi müshocho thsihüm ajeng Ih yang hirung.’ 3Khehthsithsaba tsünü abi lüm la yocho, I büdongbanü I nguchi lanü zahsohnungele! Ih alih junung tase müzeh, ko chingkichingnangnungsü shahle. 4Ihnü tu nguchinung ade lümchehko! Ih nguchi lanü zahde arüh kuh la nüyohnungthsa I shangrüti linung. 5Hütsünü abi büdongba te thsite teerü atümung te abinü yocho. Abinü akhuba te tsingdhingcho, ‘I büdongba khyang nühnü khütoi tee liro?’ 6Abinü yocho, ‘Tuji shinga thsih khüdu.’ Abinü abi te yocho, ‘Nü thsihüm hi khyüng ko zah pümpü dhünyang thrahng.’ 7Hütsüpü abinü aparü khüdu te tsingdhingcho, Khang nüh khütoi tee liro? Abinü yocho, Fürü khu thsih khüdu tee kehle. Abinü abi te yocho, Nü thsihüm khyüng ko qure thrahng.
8“Abüdongba-nü yuje müchobong tsü abi sihthsacho ngang nengse jücho; tunüo hiba limih nyitsarünü palu nengdang nguchinung tsü atsingse tsurü tenü asithsaba.”
9Ko Jisu-nü mütozah yocho, “Hütsünü Ihnü nührü te yore: Nührübürü nengdang limih kuthsinü shangrü thsachehng, khode hütsü changpehnang müchangkaba kuh la tsü nührü nüyohnung. 10Sü azikyah la longlangnang amülah la mii longlangnung; ko sü azikyah la yuje müchonang amülah lasü yuje müchonung. 11Limih kuthsi müshonung la nührü chah longmülangchehkhang, yujeba kuthsi la khüta longlangnung? 12Ko aparü kohrola nührü longmülangchehkhang, nührübürü yo sünü nührü khyang jünung?
13“Kulirü sünüsü abüdongrü nyüh anyüh müdikehcheh; tunüo abinü khüdu thrünyinung ko akhüuba tsü müinung; mahkhang abinü khüdu te yochonyinung ko akhüuba tsü müchümükehnung. Nührünü Tsingrangba ko kuthsi anyüding müdikehcheh.”#Mat 6.24
Jisu-nü Chocho Khürü
(Mat 11.12-13; 5.31-32; Mrk 10.11-12)
14Khode Farisirü-nü hi apüm yuchicho, arühnü Jisu münyodhingcho, tunüo arühnü thsi müicho. 15Jisu-nü arüh te yocho, Nyitsarü bete abürü jangjang amüsa kang ngusohba tsü nührüe, ta Tsingrangba-nü nührü lasih müdhele. Tunüo nyitsarü yola amii amülah liba kohro tsü Tsingrangba jingte amii mühle.
16“Mosa yuzeng ko azikehrünü thrahchoti tsü baptijüba Johan tizah bichi rocho; hütsütinü Tsingrangba yanglih yuse atsa tsü thsingyure ko atümungnü tsohkhuta züdure.#Mat 11.12-13 17Ta yuzeng athrehkohcho khüdu pehnung tenü ning ko alih changnung amülaba.#Mat 5.18
18 #
Mat 5.32; 1 Kor 7.10-11 “Sünü anitpü zapü khingkurü apa khyonang abinü nahtrahnaxengre; ko sünü azacho khingkurü tsü khyünang abinü nahtrahnaxengre.
Alibong ko Lazarus
19“Shikhe khüdu alirü nyüh khüdu thsidi jengki khyüpü nyümong müthe khütang müzang akang licho. 20Hütsüla mürürü nyüh khüdu anengnü Lazarus madhsanü tsütipü, alibong trahtri la noro yüpsohpücho. 21Abinü alibong tsingthsang chahnü alongchocho tsunung longdicho. Füzanü mii ronü abi madhsa la müyahcho.
22“Mürübong tsü sücho ko ninglang riwürütinü wüp hiwü ninglang thsütila Abraham müshüm pümsohcho. Alibong tsüsü sücho ko dhrürangcho, 23ko asülih la abi dee khingchi licho, ko abinü kehchü dhingde ashula Lazarus tsü Abraham te püm ngucho. 24Achotsü abinü dsi yocho, ‘Uwa Abraham! Ih müing, ko Lazarus müyungza kih la dhsangpü I müle la thükeh tbachisohnung müthehng, tunüo hiba michang la Ih dee khingchile!’
25“Ta Abraham-nü yocho, ‘Itso, nüh akang lide nühnü atsauba apüm nguko, ta Lazarus-lü amütsa apüm ngucho. Ade hila abi tbachi lire ko nüh akhingchila lire. 26Hütsü du mahko, hilanü nührü yang mürochehnung, mahkhang nührü lichahnü ihrü yang mürochehnungthsa Ihsa kahla adukah arangcheh khüdu lile.’ 27Alibong tsünü yocho, ‘Khang Ihnü nüte kihchire, Uwa Abraham, Lazarus tsü I urü kulang müthehchüng, 28tunüo ihrü jünirü münga lile. Arüh dusü hiba akhingchi lih la müronungthsa abi wünü arüh te amüzahnung yu yosohng.’
29“Abraham-nü yocho, ‘Arüh müzahsohnung Mosa ko azikehrüti lile, arühnü arüh yu nyisohng.’ 30Alibongnü lalingcho, Hütsü akükyüh mah, Uwa Abraham! Ta asücho lanü khürü kangliro arüh yang wükhang, arüh lasih thsamülanung. 31Ta Abraham-nü yocho, ‘Arühnü Mosa ko azikehrü yu mühnyikhang, asücho lanü khürü kangli ronyesü arühnü müyudsinung.’ ”
Currently Selected:
LUK 16: SANGBSI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.