LUK 15
15
Achahpehba San
(Mat 18.12-14)
1Nyümong khüdu alihmüthsü dhrirü ko münyirü adrong Jisu yu nyinung rocho.#Luk 5.29-30 2Ko Farisirü ko yuzeng dorünü nyingkongmüsucho, “Hivinü münyirü khyüchore ko arüh yola tsuyongre!” 3Hütsünü arüh te Jisu-nü yukita hi yocho:
4“Adüzünü nührü yola nyüh khüdu San thsih khüdu lichola khüdu chahkhang, abinü tu nguchiro? Abinü apa kurepü düku tsü rangmü la pehjüpü achahba khüdu tsü müngude yangchire. 5Abinü hütsü ngude, akünyangchonü hütsü apünurü chah pümsohpü kulang thali dhilungre. 6Hütsüpü abinü ashangrüti ko kurümrüti müjang dsibülung arüh te yorü, ‘I san achahpehba ngulichonü Ih dee künyangre. Ite künyangtaang!’ 7Ihnü nührü te yore, hütsü kyo lasih thsamülanung müdhsütahba amüsarü kurepü düku tenülü, münyirü khüdu lasih thsamülade ninglang akünyang tsü alaa thsanung.
Achahpehba Thsi
8“Mahkhang adüzünü khingkurü khüdu taripi thsi dhüre licho la khüdu chahkhang, abükyünü tu nguchiro? Abükyünü dsi tahkehpü kuh wohnü hütsü müngude longi dhingre. 9Abükyünü hütsü ngude, ashangrüti ko kurümrüti müjang dsibülung arüh te yorü, ‘I thsi achahpehcho ngulichonü Ih dee künyangre. Ite künyangtaang!’ 10Ihnü nührü te yore, hütsü kyo münyirü khüdu lasih thsamülade Tsingrangba riwürüti künyangre.”
Achahpehba Tsurü
11Jisu-nü mütozah yocho, “Shikhe khüdu atsurü anyüh licho nyüh khüdu licho. 12Azaba tsünü abi te yocho, ‘Uwa, I nohlüm kuthsi ade I khyang khülo.’ Achotsü abinü akuthsi atsunyü khyang changnah jücho. 13Tunyah mülipü atsudhre achangba tsünü abi nohlüm kuthsi tsü ii bipü kuh pehjüpü tsicho. Abinü limih ashu khüdu lang wücho, hütsüla abinü mabomashinü thsi tsü müzangkhangcho. 14Ko khode abi licho apüm pehkhangcho, hütsüba lih la yangkong amülah tikehcho, ko abi dhsangthsimüsucho. 15Achotsü abinü hütsüba lih la shutsakhung nyüh khüdu te tsikeh licho, sünü abi tbü la shüka nyahnung müthehcho. 16Abinü shüka khyang tüpcho nohtrüpsih küp mii tsunyücho, ta abi khyang sünüsü tu mütüpcho. 17Achangkala abinü lümcheh rocho, ‘Iu kuh la shehsherüti mütsumüyongkhang lile, ta Ih hila ayangchonü asürüe. 18Ihnü shemüsu Iu yanglang wünung ko abi te yonung, Uwa, Ihnü Tsingrangba ko nüh nyüm amünyi shitpahko. 19Ih adelü nü tsurü dsinung müdekhengpehko; nü kuh la shehsherü khüdu roh-i Ih khiching.’ 20Achotsü abinü shemüsu au yang thalicho.
“Abi ashula tsehdenü aunü abi ngucho; ko abinü müi lümcho ko shangwü abi thsixüp rangpü abi chah müthsüpcho. 21Hütsüde atsudhre tsünü yocho, ‘Uwa, Ihnü Tsingrangba ko nüh nyüm amünyi shitpahko. Ih adelü nü tsurü dsinung müdekhengpehko.’ 22Ta aunü akulirüti dsi yocho, ‘Zahding! Fükhüm atsauba tsü hiro khümsohng. Amüyungza la imüshi yohjüng ko ajing la jingkhüm khümjüng. 23Hütsüpü wü misüza anyünyehba tsü hiro müpsehng, ko Ihsanü thsüti khyonung. 24Tunüo I tsudhre hi sopehcho, ta ade abi akang lile; abi chahpehcho, ta ade abi nguko.’ Hütsüta thsüti khyo dikehcho.
25“Hütsütade atsudhre aziba tsü luhlang wüpü licho. Abi kuh amünyethsa lungde khi thsacho ko nyichicho abinü yuchicho. 26Achotsü abinü akulirü khüdu dsinü hütsü ‘Tukülüpro pü tsingdhingcho. 27Kulibong tsünü abi te yocho, ‘Nü nithre thali roko, ko nüunü misüza anyünyehba tsü müpsehko, tunüo abinü abi thali nguko.’ 28Amung aziba tsü khütang alongmüsah kuh la müzüducho; achotsü aunü chüro abi te kuh la zürung pü kihchicho. 29Ta abinü au te lalingnü yocho, ‘Dhing, kang hitoi Ihnü nüh dikeh rore, ko khodesü yuzeng mühnyipü mühle, ta I shangrüti te künyangtanung nengdang I khyang nühnü khodesü miza khüdu mii müjüdhing. 30Ta nü tsurü hinü nü kuthsi apüm mabomashila pehkhangjüpü kulang thali rodelü, abi nengdang nühnü misüza anyünyehba tsü müpsehjüre!’ 31Ta aunü abi te yocho, Ale, nüh hila Ite lede lile, ko I licho apüm nü yoe. 32Ta Ihsanü thsüti khyo künyangtanung tsü athsalang, tunüo nüni sopehpü licho, ta ade akang lile; abi chahpehcho, ta ade abi nguko.”
Currently Selected:
LUK 15: SANGBSI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.