LIPOH 50
50
1Josef-nü au chah tbhakeh tranü aromih chah müthsüpcho. 2Hütsüpü abinü au füla müsühnung moi jünung yuzengjücho. 3Lede roh-i nyümong yüre müsühnung moi tsü jücho. Hütsüpü Ijiprünü nyümong nyühre abi meshücho.
4Khode meshükacho, Josef-nü yangthsaba chitung thsazirü te yocho, “Yanglilüm yusi hi Farao yanglang hiwüng: 5#Lip 47.29-31Uwa-nü abi sünungthsade, Kanan la abinü rungnüm yohpüba kong la tsü dhrürangsohnung I khyang yuchümsohko. Hütsüeko wünü uwa me rangpü thali ronung mülajüng.”
6Yangthsabanü yocho, “Wüng ko nühnü nyengchocho kyo nüu me rang.”
7Achotsü Josef-nü au me rangnung wücho. Josef yola yangthsaba chitung thsazirü apüm, abi yangdila azirü apüm ko Ijip lih la langnürü apüm wücho. 8Abi kukhi, amungrü ko aurü kukhi anyingcho apüm abi yola wücho. Azarü nümnüm, miza, san ko misü du Goshen la nying pehjücho. 9Adhrerüti nyübong akhüluba la ko kuri chahnü abi yola wücho; ko arüh mülung arangcheh wücho.
10Khode arüh Jordan nyüchüro lahpi Atad la pungkhyang chii rocho, arühnü yuva chüro anyahli tracho ko Josef-nü nyümong dhünyeh meshü-yahthsa mungcho. 11Khode Kanan-rünü Atad la meshücho tsü ngucho, arühnü yocho, “Ijiprünü khüta athsalangnü meshü mungro!” Hütsünü hiba müdüm te Abel Mizraim pü dsicho.
12Hütsüta Jakob tsurütinü arüh te yuzengjücho kyo nguchicho; 13#R. Ngu 7.16arühnü abi me tsü Kanan lang hiwü, Abraham-nü Hit-rü Efron te merangji thsanung lihba Mamre nyüchürolang Makpela lungkhi la tsü dhrürangcho. 14Josef-nü au me rangpü khanglang, abinü amungrü ko meranglang rorüh apüm yola Ijip lang thalicho.
Josef-nü Amungrü te Tsechilicho
15Arüh au süpü khanglang, Josef amungrünü yocho, “Josef-nü ade yingcheh Ihsa thrünyikhang ko Ihsanü abi chah amütsa nguchichongang rühyangnung lümkhang khütanung?” 16Achotsü arühnü Josef yang yusi khüdu müthehcho: “Ihsa au müsüde, 17abinü ihrü te, ihrünü nüte amütsa nguchichongang mülang chingna pü yocho. Hütsüeko, yanglilüm ihrü nüu Tsingrang dikehrünü thsamehcho mülang pehjüng.” Hiba yusi yuchide Josef-nü tracho.
18Hütsüpü amungrünü arühbürü ro ajingte mükhukehcho. Arühnü yocho, “Ihrü hila nü jingte nü yuhrü roh-i lile.”
19Ta Josef-nü arüh te yocho, “Tüdrü; Ihnü Tsingrangba mülih müthsanung. 20Nührünü Ih nyüm amütsa nguchicho, ta hütsü khu chünye nyitsarü adrong akang khümchonungthsa Tsingrangba-nü atsa kangsohko. 21Nührü tu drünung mühle. Ihnü nührü ko nührü tsuzarüti xükümnung.” Hütsüta abinü amüi yunü arüh tsechilijüba tsünü arüh lasih la thahpücho.
Josef Sücho
22Mütozah Josef tsü aurü tsutpurü te Ijip la licho; ko abi süde abi kang thsih khüdu pü dhüre thsacho. 23Abinü Efraim tsurü ko shümtsurü mii ngunungthsa licho. Abinü Manase tsurü Machir tsurü mii ngu akang licho. 24Abinü amungrü te yocho, “Ih sünungthsale, ta Tsingrangba-nü nührü tronung ko hiba lih lanü Abraham, Isak ko Jakob-rü te nyengchoba lih lang tsü abinü nührü nüchehnung.” 25#Nüch 13.19; Jos 24.32; Ibr 11.22Hütsüpü Josef-nü hi yuchümsohcho. Abinü yocho, “Khode Tsingrangba-nü nührü hütsüba lih lang nüwünang, nührünü Ime mii hiwünungepü Ite nyengchoung.” 26Hütsüta Josef kang thsih khüdu pü dhüre thsade Ijip la sücho. Arühnü abi füla müsühnung moi yohcho ko kong la yohpücho.
Currently Selected:
LIPOH 50: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.