LIPOH 48
48
Jakob-nü Efraim ko Manase Nyüh Müwajücho
1Khü lipü Josef te au füdhsalepü yu jücho. Achotsü abinü atsunyü Manase ko Efraim nyüh nüpü abi shirünung wücho. 2Khode Jakob te atsudhre Josef abi shirünung roko pü yocho, abinü haririnü shemüsu achongnong chah pümcho. 3#Lip 28.13-14Jakob-nü Josef te yocho, “Akohba Tsingrang-nü Kanan lih la Luz la Ite chüro ngu Ih müwajücho. 4Abinü Ite yocho, ‘Nü chahnü trahchochonü yucho adrong kangsohnung Ihnü nüh müwajünung; ko Ihnü arüh khyang lede nengdang hiba lih hi jünung.’”
5Jakob-nü mütozah yocho, “Josef, Ih hila müroede nü tsurü anyüh Ijip lih la suroba tsü Iyo lile; Efraim e Manase nyüh tsü I tsurü Reuben ko Simon nyüh tsatsae. 6Hiko azarü apa likhang, arüh tsü Iyo roh-i mükhichinung; arüh ngunung thsiking tsü Manase ko Efraim nyüh khu ngunung. 7#Lip 35.16-19Ihnü hi nütpa Rachel nenglanü nguchire. Ih Mesopotamia langnü rode, Kanan lih la Efrath chinyo rode abükyü süchonü I lasih dee dhsare. Ihnü hütsüla Efrath wüba langjüp abükyü dhrürangcho.” (Efrath tsü ade Bethlehem dsire.)
8Khode Jakob-nü Josef tsurüti ngucho, abinü tsingdhingcho, “Azarü hiri sürüo?”
9Josef-nü lalingcho, “Hiri Tsingrangba-nü Ijip la I khyang jücho I tsurüti lile.”
Jakob-nü yocho, “Ihnü arüh müwajünung I yanglang norung.” 10Adelü Jakob shichonü tsidsa müngucho. Josef-nü azarüti tsü abi yang norojücho ko abinü arüh wüp bemüthsüpcho. 11Jakob-nü Josef te yocho, “Ihnü nüh thali ngunung mülongdicho, ta ade Tsingrangba-nü nü tsurü mii ngusohre.” 12Hütsüpü Josef-nü arüh tsü Jakob phüm chahnü nüchocho ko abinü ajingte alih la mükhukehcho.
13Josef-nü Efraim tsü Jakob fülilang ko Manase atsalang pümsohcho. 14Ta Jakob-nü akheh khyümüla azabanye akheh tsalangnü Efraim thah chah ko akheh fülilangnü aziba Manase thah chah nyümkehcho. 15Hütsüpü abinü Josef müwajücho:
“Iu Abraham ko Isak-nü dikehba Tsingrang-nü hiri azarü müwajüng.
Chünye nyümong chii Ih noroba Tsingrang-nü arüh müwajüng.
16Dhsürü apüm lanü Ih khümcho noroba ninglang riwürünü arüh müwajüng.
Hiri azarü khu I neng ko Iu Abraham ko Isak neng mütozah lisohng!
Arüh chahnü tsuzarü khütang susohng!”
17Josef-nü au tsalang kheh Efraim thah chah nyümkehcho ngu mükünyangcho; achotsü abinü au kheh tsü Efraim thah lanü khyükhu Manase thah chah nyümkehsohcho. 18Abinü au te yocho, “Uwa, hütsüta mah. Aziba tsü hie, nü kheh tsalang abi thah chah nyümkehng.”
19Aunü münyengcho yocho, “Ihnü müdhele, I tsudhre, Ihnü müdhele. Manase chahnü trahchocho lanüsü amülah chüronung, ta ani tsü abi tenü adiu kangnung, ko abi chahnü trahchochonü yucho amülah kangnung.”
20 #
Ibr 11.21
Hütsüta abinü hütsü nyümong arüh müwajü yocho, “Israelrünü amüwa choyohde nührü neng bichinung. Arühnü ‘Tsingrangba-nü Efraim ko Manase roh-i kangsohng’” pü chonung. Hütsüta Jakob-nü Efraim tsü Manase tenü akhu kangsohcho.
21Hütsüpü Jakob-nü Josef te yocho, “Ih sünung thsacho nührünü ngule, ta Tsingrangba nührü te linung ko abinü nührü jümürü lih lang thali noronung. 22Ihnü nü mungrü tenü alaa lihsu mükyah khüdu, I nohsheng ko I thsalunü Amor-rü khehlanü rohchocho nü khyang Shekem jüre.”
Currently Selected:
LIPOH 48: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.