LIPOH 46
46
Jakob ko Akukhi Ijip lang Wücho
1Jakob-nü alicho apüm zangcho ko au Isak Tsingrang khyang kangmübü jünung Bersheba lang wücho. 2Hütsü romang Tsingrangba-nü abi te münguchehla chota dsicho, “Jakob, Jakob!”
Abinü lalingcho, “Ih hila lile.”
3Abinü yocho, “Ih Tsingrang, nüu Tsingrang! Ijip lang wünung tüdrü; Ihnü hütsüla nü trah yucho arangcheh kangsohnung. 4Ih nüte Ijip lang wünung, ko Ihnü nü hung hiba lih lang thali noronung. Nüh süde Josef nüte linung.”
5Jakob-nü Bersheba lanü shemüsucho. Atsurütinü Ijip yangthsabanü müthehba misü akhüluba la tsü abi ko khingkurü azarü pümsohcho. 6Hütsüpü arühnü Kanan la khyübülungcho kuthsi ko kanglungrüti nüpü Ijip lang shemüsucho.#R. Ngu 7.15 7Jakob-nü abi chahnü trahchochoti, atsurüti, ashümtsurüti, atsularüti ko ashamlarüti atümung abi yola nücho.
8Jakob-rü tsutpurü abi yola Ijip lang würüti tsü atsurü aukhuba Reuben ko Reuben tsurüti; 9Hanok, Pallu, Hezron, ko Karmi. 10Simeon ko atsurüti: Jemuel, Jamin, Ohad, Jakhin, Zohar ko Kanan-larü khüdu tsurü Shaul. 11Levi ko atsurüti: Gershon, Kohat ko Merari. 12Juda ko atsurüti: Shela, Perez ko Zera. (Juda tsurü apa Er ko Onan nyüh Kanan la sücho.) Perez tsurü Hezron ko Hamul licho. 13Isakar ko atsurüti: Tola, Pua, Jashub ko Shimron. 14Zebulun ko atsurüti: Sered, Elon ko Jalel. 15Jakob khyang Lea-nü Mesopotamia la nümüsujücho khingkurü Dina chah lahkeh, adhrerüti tsü hiri licho. Lea chahnü abi khyang nümüsujücho atümungnü arüh sangrepü asang thsacho.
16Gad ko atsurüti: Zefon, Hagi, Shuni, Ezbon, Eri, Arod ko Areli. 17Asher ko atsurüti: Imna, Ishva, Ishvi, Beria ko arüh nilarü Sera. Beria tsurü Heber ko Malkiel licho. 18Hiri dhüredhüroh hi Laban-nü atsulatpü Lea khyang jüba kulilarü, Zilpa chahnü Jakob khyang nümüsujücho lile.
19Jakob nitpü Rachel chahnü adhrerü anyüh licho: Josef ko Benjamin. 20Ijip la Josef nitpü Heliopolis la bebürü khüdu Potifera tsulatpü, Asenath chahnü adhrerü anyüh Manase ko Efraim licho.#Lip 41.50-52 21Benjamin tsurüti: Bela, Beker, Ashbel, Gera, Naman, Ehi, Rosh, Mupim, Hupim ko Ard licho. 22Hiri dhüremüyü hi Jakob khyang Rachel-nü nümüsujücho lile.
23Dan atsurü khüdu Hushim licho. 24Naftali ko atsurüti: Jazel, Guni, Jezer ko Shilem. 25Hiri dhünyeh hi Laban-nü atsulatpü Rachel khyang jüba kulilarü Bilha chahnü Jakob khyang nümüsujücho lile.
26Ijip lang wüde Jakob chahnü trahchocho atsunyahlarüti mükhipü arüh atümungnü rohrepü dhüroh thsacho. 27Ijip la Josef tsurü anyüh thsacho, hütsü yohpü Ijip lang jowürü atümungnü arüh nyühre thsacho.#R. Ngu 7.14
Ijip la Jakob ko Abi Kukhi
28Jakob-nü Josef te ro Goshen la arüh shirüng pü yosohnung Juda tsehleh müthehcho. Khode arüh ro chihcho, 29Josef-nü abi nyübong akhüluba la pümpü au shirünung Goshen lang wücho. Khode arüh shirütacho, Josef-nü au hong la khyahripü anyahli tracho. 30Jakob-nü Josef te yocho, “Ade yingcheh nüh akang licho Ihnü nguko, ko müdheko, Ih sünye mülongri.”
31Hütsüde Josef-nü amungrü ko aurü kukhirüti te yocho, “Ihnü ade wü Farao te Kanan lanü I mungrü ko uwa-rü kukhi apüm I yanglang rochiko pü yonung. 32Ihnü abi te nührü tsü san nyahrüe ko kanglungrü dhingyehre ko nührü kanglungrüti apüm noroko pü yonung. 33Ko khode yangthsabanü nührü te nührü nguchi tsingdhingnang, 34nührü jümürü roh-i nührüsü akang ayung kanglungrü du xükümrepü yonung tünbüchü. Hütsütakhang abinü nührü Goshen la lisohnung.” Josef-nü hi yoba tsü Ijiprünü san-nyahrü tsü zong licho.
Currently Selected:
LIPOH 46: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.