LIPOH 45
45
Josef-nü Amungrü te Mishacho
1 #
R. Ngu 7.13-14
Hütsütade Josef-nü akulirüti bete alümlong müranglicheh hütsülanü tsinung yuzengjücho. Hütsüla abi yola süsü mülide Josef-nü amungrü te abi sünang yocho. 2Abinü khütang zi tracho ko hütsü Ijiprünü yuchi Farao yanglang yusi tsü hiwü yocho. 3Josef-nü amungrü te yocho, “Ih Josef e. Uwa akang mülio?” Ta arühnü hi yuchide, dira drümüyangchonü tusü mülalingchehcho. 4Hütsünü Josef-nü arüh te yocho, “Yanglilüm I shündhün rung.” Ih nührünü Ijip lang iba nührü ani Josef-e. 5Ade nührünü Ih hila icho shulüm tüwah, mahkhang nührübürü tümütangta. Hiba hi Tsingrangba-nü nyitsarü khümchonung shulüm Ih tsehleh müthehchoba lile. 6Alih la yangkong hi kang anyüu due; Adesü kang münga ma müshunung mahkhang ma müxanung. 7Nührü ko nührü trah müchangsohnung ko hita thsayahiyanü nührü khümchosohnung Tsingrangba-nü Ih tsehleh müthehchoba lile. 8Hütsüeko Ih hila müthehba tsü nührünü mah, ta Tsingrangba-nü lile. Abinü Ih yangthsaba chitung kangsohcho. Ih abi yanglih apüm xükümrü lile; Ih Ijip lih apüm la yangthsarü lile.
9 #
R. Ngu 7.14
“Ade zah uwa yanglang thali wüng ko abi te atsudhre Josef-nü hita yoreding: Tsingrangba-nü Ijip apüm la Ih yangthsarü kangsohko; tümünupü I yanglang rung. 10Nührü I shündhün linungthsa nührü, nührü tsurü, nührü shümtsurü, nührü san, nührü miza, nührü misü ko nührü licho lüpcho nüpü Goshen la ro lieng. 11Nührü Goshen la likhang, Ihnü nührü xükümchehnung. Adesü kang münga yangkong linung; hütsünü Ihnü nührü, nührü kukhiti ko nührü kanglungrü mükongsohnyüre.”
12Josef-nü mütozah yocho, “Ade nührü atümungnü ko Benjamin-nü mii Ih yuje Josef-epü ngule. 13Ijip lih la Ih khüta tase liro ko nührünü ngucho lüpcho shulüm uwa te young. Hütsüeko dhsüdhsa wüng ko abi norung.”
14Hütsüpü abinü ani Benjamin chah khyahripü tranung dikehcho ko abinü khyahride Benjamin-sü tracho. 15Hütsüpü abinü traanü amungrü müipi chah khyahri müthsüpcho. Hütsüpü khanglang amungrünü abi te chotamüsucho.
16Khode amungrü rocho yusi tsü Farao kuh chihcho, yangthsaba ko abi chitungrünü künyangcho. 17Abinü Josef te yocho, “Nü mungrü te arüh bhathsapü Kanan lih lang thalinung young. 18Arühnü arüh au ko arüh kukhiti nüpü hila rosohng. Ihnü arüh khyang Ijip la alih atsauba jünung ko arüh turümükoh linung. 19Ko arüh tsurü nitpürü ko arüh au nünung Ijip lanü misü akhüluba nüngpü arüh te young. 20Arüh kuthsi pehjü ronung tülümxüding; tunüo Ijip lih apüm yola atsauba tsü arüh yo thsanung.”
21Jakob tsurütinü arüh te yocho kyo nguchicho. Yangthsabanü mülacho roh-i Josef-nü arüh khyang misü akhüluba ko lang nengdang tsangtüm jücho. 22Abinü arüh khyang amülihnung shüsü jücho, ta Benjamin khyanglü taripi shekel thsih asang ko shü müngapi mülihnung jücho. 23Abinü au khyang Ijiprü kohro atsaubati, fürü, hüm ko langla tsangtüm gadu dhüre zang mühehcho. 24Abinü amungrü müyangyohchücho ko abinü arüh zade yocho, “Langla tüyübüta.”
25Arühnü Ijip pehjüpü Kanan lang arüh au Jakob yang thali rocho. 26Arühnü abi te yocho, “Josef ade yingcheh akang lile. Abi Ijip lih apüm la yangthsarü kangko!” Hütsü yuchi Jakob sütücho ko abinü arüh chah müyudsicho.
27Ta khode arühnü abi te Josef-nü yochücho apüm yocho ko abi Ijip lang nowünung misü akhüluba müthehcho tsü ngucho, abi sütücho lanü chichehcho. 28Abinü yocho, “I tsudhre Josef ade yingcheh akang lile! Ihnü khyünyücho apümnü hidu. Ih müsüdenü wü abi shirünung.”
Currently Selected:
LIPOH 45: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.