Awˬ hkuiˉ puiˍ ve li‸ 29
29
Yaˍkoˆ Laˍbanˍ geh lo gaˬ ve
1Oˇ ve hkʼaw‸ nawˉ, Yaˍkoˆ gʼuˇ suhˍ kʼaw‸ kʼai leh mvuhˇ nyi tawˆ hpawˇ mvuhˇmiˬ lo gaˬ la ve yoˬ. 2Yawˇ chiˇ nyi ve teˇ yanˇ, nanˬ bawˍ teˇ maˬ awˬ paˇ lo yawˬ shehˆ moˍ zuh‸ chehˇ ve hta‸ gʼa mawˬ ve yoˬ. Yawˬ oˇ ve teˇ hpaˍ lehˬ, nanˬ bawˍ chi hkʼaw ve iˉ kaˆ hta‸ dawˬ tuˬ law chehˇ ve yoˬ. Nanˬbawˍ oˇ ve awˬ hkʼoˆ lo, uiˍ jaˇ ve haˉ pui shiˍ teˇ maˬ hoˆ taˍ ve yoˬ. 3Yawˬ hawˉ paˍ teˇ hpaˍ laˬ leh, haˉ pui shiˍ oˇ ve hta‸ teˇ geh gʼa ga chiˇ jiˆ htaˇ heh‸ yawˬ ehˉ hta‸ iˉ kaˆ taw piˇ gʼa ve yoˬ. Oˇ hkʼe te peuˬ hkʼaw‸ nawˉ, haˉ pui shiˍ oˇ ve hta‸ teˇ pawˆ gʼa ga buiˆ hoˆ ve yoˬ.
4Yaˍkoˆ yawˇ hui geh gaˬ la leh, Awˬ chawˇ teˇ hpaˍ-oˬ, nawˬ hui hkʼaˬ lo chehˇ ve le, teh‸ na nyi ve yoˬ.
Ngaˬ hui Haˍranˍ venˇ hkʼaw chehˇ ve yoˬ, teh‸ yawˇ hui yawˇ hta‸ kʼaw‸ yaw hkʼaw‸ piˇ ve yoˬ.
5Nawˬ hui Naˍhkawˍ ve yaˇ Laˍbanˍ hta‸ shiˍ-aw laˇ, teh‸ na nyi ve teˇ yanˇ, yawˇ hui lehˬ,
Ngaˬ hui shiˍ ve yoˬ, teh‸ kʼoˆ piˇ ve yoˬ.
6Yawˇ chehˇ sha chehˇ-aw laˇ, teh‸ teˇ pawˆ kʼaw‸ na nyi ve teˇ yanˇ,
Yoˬ, chehˇ sha ve yoˬ. Yawˇ ve yaˇ miˇ Raˍhkeˍlaˆ ka‸ ngaˬ hui geh yawˬ hawˉ la taˍ ve yoˬ, teh‸ kʼaw‸ kʼoˆ piˇ ve yoˬ.
7Oˇ htaˇ Yaˍkoˆ kʼoˆ ve, Chi beu‸ mvuhˇ nyi ka‸ mvuh jaˇ chehˇ sheˬ. Yawˬ ehˉ teˇ hpaˍ hta‸ teˇ geh gʼa‸ hpoˆ yanˇ maˇ gaˬ sheˬ. Aˬ hto‸ ma pa taw yawˇ hui hta‸ iˉ kaˆ taw piˇ taˉ leh, maˇ ca kʼaw‸ gʼa‸ hawˉ ve le, teh‸ kʼoˆ piˇ ve yoˬ.
8Yawˇ hui kʼaw‸ kʼoˆ ve, Yawˬ hawˉ paˍ hkʼa peu-eˬ laˬ leh haˉ pui shiˍ oˇ ve hta‸ maˇ ga chiˇ jiˆ ve kʼo, ngaˬ hui yawˬ ehˉ hta‸ iˉ kaˆ taw piˇ maˇ gʼa, teh‸ kʼaw‸ kʼoˆ piˇ ve yoˬ.
9Yaˍkoˆ yawˇ hui geh tawˇ yaw da‸ chehˇ ve teˇ yanˇ, Raˍhkeˍlaˆ lehˬ yawˇ ve yawˬ ehˉ teˇ hpaˍ hta‸ gʼa‸ leh oˇ kaˬ lo gaˬ la ve yoˬ. 10Yaˍkoˆ lehˬ, yawˇ ve aˉ shuˍ paˍ Laˍbanˍ ve yaˇ miˇ Raˍhkeˍlaˆ hta‸ gʼa mawˬ ve teˇ yanˇ, yawˇ teˇ cawˬ haˉ nanˬ bawˍ hkʼoˆ cawˬ ve haˉ pui shiˍ hta‸ chiˇ jiˆ leh, yawˬ ehˉ teˇ hpaˍ hta‸ iˉ kaˆ taw piˇ ve yoˬ. 11Yawˇ Raˍhkeˍlaˆ hta‸ boˆ nu piˇ leh, mehˆ gʼuiˬ htawˇ ya‸ la ve yoˬ. 12Oˇ htaˇ yawˇ kʼoˆ ve, Ngaˬ lehˬ nawˬ pa ve awˬ viˉ ma Reˍbehˆka‸ ve yaˇ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.
Yaˇ miˇ chi gʼuiˇ kʼo‸-e leh awˬ pa hta‸ ca kʼaw‸ hto piˇ ve yoˬ. 13Laˍbanˍ lehˬ, yawˇ ve awˬ shaˍ paˍ Yaˍkoˆ awˬ lawn gʼa kaˇ ve teˇ yanˇ, yawˇ geh gʼuiˇ kʼai leh yawˇ hta‸ behˇ kʼuˉ taˍ leh boˆ nu piˇ ve yoˬ. Peuˬ leh yawˇ hta‸ yawˇ ve yehˬ lo shiˍ kʼaw‸ la ve yoˬ. Yaˍkoˆ htawˇ, Laˍbanˍ hta‸ awˬ lawn hkʼa peu-eˬ hto maˍ piˇ ve yoˬ. 14Oˇ htaˇ Laˍbanˍ kʼoˆ ve, Nawˬ lehˬ ngaˬ ve awˬ suhˍ awˬ shaˍ hpeh‸ ve yoˬ, teh‸ kʼoˆ piˇ leh Yaˍkoˆ yawˇ geh lo ha pa teˇ maˬ hkʼa biˇ chehˇ taˍ ve yoˬ.
Yaˍkoˆ Laˍbanˍ geh maˉ muiˬ ve
15Oˇ ve hkʼaw‸ nawˉ, Laˍbanˍ Yaˍkoˆ hta‸ kʼoˆ piˇ ve, Nawˬ lehˬ ngaˬ ve awˬ viˉ awˬ nyi hpeh‸ ve pa taw, ngaˬ ve kanˉ hta‸ hkʼe leˇ ga laˇ maˇ cawˇ. Nawˬ gʼaˇ hpfuhˇ hkʼaˬ ma lawˬ gaˇ le, teh‸ kʼoˆ piˇ ve yoˬ. 16Laˍbanˍ geh yaˇ miˇ haˉ nyiˇ gʼaˇ cawˬ ve yoˬ. Awˬ viˉ ma teˇ gʼaˇ lehˬ, Leˉaˍ hpeh‸ leh awˬ nyi ma teˇ gʼaˇ lehˬ Raˍhkeˍlaˆ hpeh‸ ve yoˬ. 17Leˉaˍ lehˬ mehˆ shiˍ hkʼa deh‸ maˇ da‸. Raˍhkeˍlaˆ lehˬ awˬ hkiˇ awˬ naˬ da‸ leh nyi sha jaˇ ve yoˬ.
18Yaˍkoˆ lehˬ Raˍhkeˍlaˆ hta‸ ha‸ jaˇ ve pa taw, Nawˬ yaˇ miˇ Raˍhkeˍlaˆ ngaˬ hta‸ piˇ laˇ ve kʼo, ngaˬ maˉ suhˍ hkʼaw‸ muiˬ laˇ-a, teh‸ kʼoˆ piˇ ve yoˬ.
19Laˍbanˍ kʼaw‸ kʼoˆ ve, Yawˇ hta‸ awˬ nu ve chaw hta‸ piˇ ve a‸ kehˉ, ngaˬ nawˬ hta‸ piˇ laˇ tuˬ yoˬ. Chi hta‸ pa taw ngaˬ geh chehˇ taˍ-o‸, teh‸ kʼoˆ piˇ ve yoˬ. 20Hkʼe te leh, Yaˍkoˆ lehˬ Raˍhkeˍlaˆ hta‸ gʼa tuˬ, maˉ suhˍ hkʼaw‸ muiˬ piˇ ve yoˬ. Yawˇ yaˇ miˇ oˇ ve hta‸ ha‸ jaˇ ve pa taw, maˉ suhˍ hkʼaw‸ gʼa muiˬ ve htawˇ, yawˇ awˬ pon maˇ maw sheˬ ve hkʼe hpeh‸ ve yoˬ.
21Oˇ ve hkʼaw‸ nawˉ Yaˍkoˆ Laˍbanˍ hta‸ kʼoˆ piˇ ve, Kʼoˆ da‸ taˍ ve hkʼe awˬ yanˇ gaˬ la peuˬ. Nawˬ yaˇ miˇ ngaˬ hta‸ pe‸ laˇ-oˆ, teh‸ kʼoˆ piˇ ve yoˬ. 22Hkʼe te leh, Laˍbanˍ lehˬ oˇ kaˬ lo hkʼa chehˇ ve chaw hkʼa peu-eˬ hta‸ kuˬ hpawnˬ leh hkehˉ caˍ piˇ ve yoˬ. 23Mvuhˇ hpeu‸ htaˇ, Laˍbanˍ lehˬ yawˇ yaˇ miˇ Leˉ-aˍ hta‸ Yaˍkoˆ geh shiˍ laˬ piˇ leh, Yaˍkoˆ yawˇ geh zuh‸ ve yoˬ. 24(Laˍbanˍ lehˬ, yawˇ yaˇ miˇ Leˉ-aˍ hta‸ ga piˇ tuˬ, Ziˆlaˍpaˆ teh‸ kʼoˆ ve awˬ ceˬ ma teˇ gʼaˇ piˇ ve yoˬ.) 25Mvuhˇ htiˇ la leh yaˇ miˇ oˇ ve Leˉ-aˍ hpeh‸ ve hta‸ Yaˍkoˆ gʼa mawˬ ve teˇ yanˇ, yawˇ Laˍbanˍ geh laˬ leh kʼoˆ ve, Nawˬ ngaˬ hta‸ hkʼaˬ hkʼe te laˇ ve le. Raˍhkeˍlaˆ hta‸ gʼa tuˬ ngaˬ kanˉ te taˍ ve maˇ heˆ laˇ. Aˬ hto‸ ma pa taw, nawˬ ngaˬ hta‸ heˍ laˇ ve le, teh‸ kʼoˆ piˇ ve yoˬ.
26Laˍbanˍ kʼaw‸ kʼoˆ ve, Ngaˬ hui ve mvuhˇmiˬ hkʼaw, awˬ viˉ ma awˬ hpawˇ maˇ heuˆ sheˬ ve kʼo, awˬ nyi ma awˬ hpawˇ heuˆ ve awˬ liˇ maˇ cawˬ. 27Hkehˉ caˇ ve pawehˇ chi suhˍ nyi peuˬ htaˇ hkʼa gaˬ law taˍ-o‸. Nawˬ lehˬ, awˬ hkʼaw‸ nawˉ suhˍ hkʼaw‸ kanˉ kʼaw‸ te laˇ ve kʼo, Raˍhkeˍlaˆ hta‸ htawˇ ngaˬ nawˬ hta‸ pe‸ laˇ tuˬ yoˬ, teh‸ kʼoˆ piˇ ve yoˬ.
28Yaˍkoˆ htawˇ yawˇ kʼoˆ ve hta‸ nyi hkʼaˇ suh ve yoˬ. Hkehˉ caˇ ve pawehˇ oˇ ve suhˍ nyi ponˬ peuˬ hkʼaw‸ nawˉ, Laˍbanˍ lehˬ Yaˍkoˆ hta‸ yawˇ ve yaˇ miˇ Raˍhkeˍ laˆ kʼaw‸ piˇ ve yoˬ. 29(Laˍbanˍ lehˬ, yawˇ ve yaˇ miˇ Raˍhkeˍlaˆ hta‸ ga piˇ tuˬ Biˇlaˍhaˍ teh‸ kʼoˆ ve awˬ ceˬ ma teˇ gʼaˇ piˇ ve yoˬ.) 30Yaˍkoˆ lehˬ, Raˍhkeˍlaˆ geh htawˇ zuh‸ ve yoˬ. Yawˇ lehˬ, Leˉ-aˍ a‸ kehˉ Raˍhkeˍlaˆ hta‸ ha‸ ve yoˬ. Hkʼe te leh, yawˇ Laˍbanˍ hta‸ maˉ suhˍ hkʼaw‸ kʼaw‸ caˉ muiˬ piˇ ve yoˬ.
Yaˍkoˆ ve yaˇ teˇ hpaˍ
31Leˉ-aˍ hta‸ Yaˍkoˆ maˇ ha‸ ve hta‸ Gʼuiˬsha gʼa mawˬ ve teˇ yanˇ, Gʼuiˬsha lehˬ Leˉ-aˍ hta‸ yaˇ teˇ gʼaˇ cawˬ la piˇ leh, Raˍhkeˍlaˆ hta‸ chaw meh ma hpeh‸ la piˇ ve yoˬ. 32Leˉ-aˍ yaˇ hu la leh yaˇ paˍ teˇ gʼaˇ paw la ve yoˬ. Hkʼe te leh, yawˇ yaˇ paˍ chi hta‸ Ruˇbenˍ teh‸ meh piˇ leh kʼoˆ ve, Ngaˬ tu‸ chehˇ hkanˍ chehˇ ve hta‸ Gʼuiˬsha gʼa mawˬ peuˬ. Chi teˇ pawˆ ngaˬ ve awˬ hpawˇ ngaˬ hta‸ ha‸ la tuˬ yoˬ, teh‸ kʼoˆ ve yoˬ. 33Awˬ hkʼaw‸ nawˉ maˇ maw maw yawˇ yaˇ paˍ teˇ gʼaˇ kʼaw‸ paw la leh kʼoˆ ve, Ngaˬ hta‸ maˇ ha‸ ve awˬ lawn Gʼuiˬsha shiˍ leh, yaˇ paˍ chi yawˇ ngaˬ hta‸ kʼaw‸ piˇ laˇ ve yoˬ, teh‸ kʼoˆ ve yoˬ. Hkʼe te leh, yaˇ paˍ chi ve hta‸ Suˉmonˍ teh‸ meh piˇ ve yoˬ. 34Yawˇ yaˇ teˇ pawˆ kʼaw‸ hu la leh, yaˇ paˍ teˇ gʼaˇ kʼaw‸ paw la ve yoˬ. Oˇ htaˇ yawˇ kʼoˆ ve, Chi beu‸ ngaˬ lehˬ ngaˬ hpawˇ awˬ pon yaˇ paˍ shehˆ gʼaˇ paw la piˇ taˍ peuˬ ve pa taw, yawˇ ngaˬ hta‸ ha‸ maˇ la tuˬ yoˬ, teh‸ kʼoˆ ve yoˬ. Hkʼe te leh, yaˇ paˍ oˇ ve hta‸ Leˍviˆ teh‸ meh piˇ ve yoˬ. 35Oˇ ve hkʼaw‸ nawˉ, yawˇ yaˇ teˇ pawˆ kʼaw‸ hu la leh, yaˇ paˍ teˇ gʼaˇ kʼaw‸ paw la ve yoˬ. Oˇ htaˇ yawˇ lehˬ, Chi beu‸ ngaˬ Gʼuiˬsha hta‸ chiˇ mvuh ve yoˬ, teh‸ kʼoˆ leh, yawˇ hta‸ Yuˇda‸ teh‸ meh piˇ ve yoˬ. Oˇ ve hkʼaw‸ nawˉ yawˇ yaˇ maˇ kʼaw‸ cawˬ ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
