Awˬ hkuiˉ puiˍ ve li‸ 19
19
Sawˉdonˍ venˇ yaˇ teˇ hpaˍ venˇbaˆ uiˍ jaˇ ve
1Mvuhˇ naw ma tcuh yaˇ oˇ ve nyiˇ gʼaˇ lehˬ, mvuhˇ hpeu‸ la htaˇ Sawˉdonˍ venˇ lo gaˬ la ve yoˬ. Lawˇtaˍ lehˬ, venˇ taˍ meu‸ hpe‸ lo mui chehˇ taˍ ve yoˬ. Yawˇ yawˇ huiˉ maˬ hta‸ mawˬ htaˇ, gʼuiˇ kʼai leh yawˇ huiˉ maˬ mehˆ gʼuˇ suhˍ boˆ taˍ ve yoˬ. 2Peuˬ leh yawˇ kʼoˆ ve, Ya‸ puiˉ nawˬ huiˉ maˬ ngaˬ ve yehˬ lo ca haˉ la leh, hkui sheh tsuhˇ la sheˬ. Mvuhˇ shawˉ teˇ na‸ tu leh awˬ gʼuˇ suhˍ kʼaw‸ caˉ kʼai hpeh‸ ve yoˬ, teh‸ lawˬ hkawˉ leh kʼoˆ piˇ ve yoˬ.
Yawˇ huiˉ maˬ lehˬ, Te‸ chiˉ maˇ heˆ. Ngaˬ hui choˬ kaˬ ya‸ kʼaw hpuiˇ lo teˇ haˉ ma chehˇ taˍ hpeh‸ ve yoˬ, teh‸ kʼaw‸ yaw hkʼaw‸ piˇ ve yoˬ.
3Ya‸ hkʼaˇ, Lawˇtaˍ lawˬ hkawˉ jaˇ ve pa taw, yawˇ huiˉ maˬ yawˇ ve yehˬ hkʼaw lo‸-e ve yoˬ. Yawˇ yawˇ huiˉ maˬ hta‸ hkʼa deh‸ ha‸ yuˬ piˇ ve yoˬ.
4Yawˇ hui maˇ zuh‸ sheˬ htaˇ, Sawˉdonˍ venˇ yaˇ hawˉ hkʼaˆ paˍ, chaw mawˇ yaˇ nehˬ hkʼa peu-eˬ Lawˇtaˍ ve yehˬ lo laˬ leh yehˬ hta‸ caw hoˆ taˍ ve yoˬ. 5Yawˇ hui Lawˇtaˍ hta‸ kuˬ leh, Ya‸ puiˉ nawˬ ve yehˬ hkʼaw lo‸-e ve chaw oˇ ve nyiˇ gʼaˇ hkʼaˬ lo kʼai le. Yawˇ huiˉ maˬ hta‸ haˉ chawˇ gʼa te tuˬ shiˍ tawˆ la-o, teh‸ kʼoˆ piˇ ve yoˬ.
6Lawˇtaˍ tawˆ-e leh yehˬ miˉ hoˆ taˉ peuˬ hkʼaw‸ nawˉ, yawˇ hui hta‸ kʼoˆ piˇ ve, 7Awˬ chawˇ teˇ hpaˍ-oˬ, chi hkʼe te maˇ hpeh‸. Nawˬ hui chi taw taw taˇ te laˇ sheˬ. 8Nyi loˬ, ngaˬ ve yaˇ miˇ nyiˇ gʼaˇ cawˬ ve yoˬ. Yawˇ huiˉ maˬ hta‸ ngaˬ nawˬ hui geh shiˍ veu laˇ shaˍ. Yawˇ huiˉ maˬ hta‸ nawˬ hui te gaˇ ve hkʼe te-o. Ya‸ hkʼaˇ, chaw chi nyiˇ gʼaˇ hta‸ lehˬ, a ciˉ taˇ htawˇ laˇ sheˬ. Awˬ lawn kʼo, yawˇ huiˉ maˬ lehˬ ngaˬ ve yehˬ hkʼaw lo‸ la taˍ ve hkehˉ chaw hpeh‸ ve yoˬ, teh‸ kʼoˆ piˇ ve yoˬ.
9Ya‸ hkʼaˇ, yawˇ hui kʼaw‸ kʼoˆ ve, Nawˬ ta‸ iˉ chehˆ. Nawˬ lehˬ ngaˬ hui ve mvuhˇmiˬ hkʼaw ca chehˇ la taˍ ve hkehˉ chaw hpeh‸ ve htawˇ, chi beu‸ ngaˬ hui hta‸ suhˉ jehˬ shehˍ hpaˇ hkʼe te leh tawˇ yaw laˇ ve laˇ. Yawˇ huiˉ maˬ hta‸ te piˇ ve a‸ kehˉ nawˬ hta‸ te laˇ tuˬ yoˬ, teh‸ kʼoˆ ve yoˬ. Yawˇ hui lehˬ Lawˇtaˍ hta‸ yuˬ tiˍ taˍ leh, yehˬ miˉ hta‸ dawˆ paˆ tuˬ buiˆ lo‸ la ve yoˬ. 10Oˇ htaˇ, yehˬ hkʼaw chehˇ taˍ ve hkehˉ chaw oˇ ve nyiˇ gʼaˇ lehˬ, yehˬ miˉ hpaw leh Lawˇtaˍ hta‸ yehˬ hkʼaw gʼawˬ keu peuˬ hkʼaw‸ nawˉ yehˬ miˉ kʼaw‸ hoˆ taˍ ve yoˬ. 11Oˇ ve hkʼaw‸ nawˉ, yawˇ huiˉ maˬ lehˬ yehˬ baˬ lo chehˇ taˍ ve chaw hkʼa peu-eˬ hta‸ mehˆ cuˉ piˇ lawˬ ve yoˬ. Hkʼe te leh, yawˇ hui yehˬ miˉ hta‸ ca maˇ mawˬ ve yoˬ.
Lawˇtaˍ Sawˉdonˍ venˇ hkʼaw tawˆ kʼai ve
12Mvuhˇ naw tcuh yaˇ oˇ ve nyiˇ gʼaˇ Lawˇtaˍ hta‸ kʼoˆ piˇ ve, Venˇ chi hkʼaw nawˬ hta‸ caˉ da‸ ve yaˇ paˍ yaˇ miˇ leh awˬ maˉ paˍ hkʼe ve teˇ gʼaˇ gʼaˇ cawˬ sheˬ laˇ. Yawˇ hui hta‸ shiˍ leh venˇ chi hkʼaw tawˆ kʼai loˬ. Venˇ chi hta‸ ngaˬ hui te luˬ piˇ tuˬ yoˬ. 13Awˬ lawn kʼo, venˇ yaˇ chi teˇ hpaˍ hta‸ venˇbaˆ taˍ kuiˬ hkʼa biˇ cawˬ ve awˬ hkawˇ hta‸ Gʼuiˬsha gʼa kaˇ peuˬ leh, venˇ chi hta‸ te luˬ piˇ tuˬ yawˇ ngaˬ huiˉ maˬ hta‸ peu laˇ ve yoˬ, teh‸ kʼoˆ piˇ ve yoˬ.
14Oˇ htaˇ, Lawˇtaˍ lehˬ yawˇ maˉ paˍ te tuˬ ve chaw teˇ hpaˍ geh kʼai leh, Venˇ chi hkʼaw haˆ haˆ tawˆ kʼai loˬ. Gʼuiˬsha lehˬ venˇ chi hta‸ te luˬ piˇ tuˬ yoˬ, teh‸ kʼoˆ piˇ ve yoˬ. Ya‸ hkʼaˇ, yawˇ hui teˇ hpaˍ yawˇ kʼoˆ ve tawˇ hta‸ maˇ na yuˬ.
15Mvuhˇ htiˇ la ve teˇ yanˇ, mvuhˇ naw ma tcuh yaˇ oˇ ve nyiˇ gʼaˇ Lawˇtaˍ hta‸ kʼoˆ piˇ ve, Nawˬ miˇ ma leh nawˬ ve yaˇ miˇ teˇ hpaˍ hta‸ shiˍ leh haˆ tawˆ kʼai loˬ. Oˇ hkʼe maˇ te kʼo, venˇ chi hta‸ te luˬ piˇ ve teˇ yanˇ, nawˬ hui htawˇ gʼa luˬ gʼa sheˆ tuˬ yoˬ, teh‸ kʼoˆ piˇ ve yoˬ. 16Yawˇ haˆ haˆ maˇ te ve teˇ yanˇ, mvuhˇ naw ma tcuh yaˇ oˇ ve nyiˇ gʼaˇ lehˬ, Lawˇtaˍ leh yawˇ ve awˬ miˇ awˬ yaˇ hui ve la‸ sheh hta‸ gʼawˬ leh venˇ baˬ lo hkʼa gaˬ shiˍ tawˆ piˇ ve yoˬ. Awˬ lawn kʼo, Gʼuiˬsha yawˇ hta‸ ha kʼaˉ ve pa taw yoˬ. 17Oˇ ve hkʼaw‸ nawˉ, mvuhˇ naw ma tcuh yaˇ yawˇ hui hta‸ kʼoˆ piˇ ve, Nawˬ hui gʼa ponˬ tuˬ gʼaˇ hte‸ gʼuiˇ hpaw-e loˬ. Awˬ hkʼaw‸ nawˉ hpawˇ lo taˇ kʼaw‸ hpfuhˆ nyi. Ya‸ kʼaw kʼaˉ lo htawˇ taˇ jehˇ chehˇ. Hkʼaw hkʼoˆ lo hpaw taˆ-e loˬ. Oˇ hkʼe maˇ te kʼo, nawˬ hui htawˇ luˬ kuiˬ sheˆ kuiˬ lo gʼa gaˬ tuˬ yoˬ, teh‸ kʼoˆ piˇ ve yoˬ.
18Ya‸ hkʼaˇ Lawˇtaˍ kʼoˆ piˇ ve, Jawˇmawˇ-oˬ, ngaˬ hui hta‸ oˇ hkʼe a ciˉ taˇ te tcuh laˇ. 19Nawˬ lehˬ ngaˬ hta‸ ha kʼaˉ laˇ leh ngaˬ ve a sha‸ hta‸ ponˬ laˇ ve yoˬ. Ya‸ hkʼaˇ, hkʼaw oˇ ve vuiˇ jaˇ sheˬ ve yoˬ. Ngaˬ oˇ kaˬ lo maˇ gaˬ sheˬ htaˇ ka‸ luˬ ve sheˆ ve ngaˬ awˬ hkʼoˆ lo gaˬ la tuˬ yoˬ. 20Nyi sheˬ. Oˇ kaˬ lo venˇ ehˉ teˇ maˬ cawˬ ve yoˬ. Ngaˬ haˆ haˆ kʼai ve kʼo, teˇ hkui ceh tiˉ gaˬ hpeh‸ ve yoˬ. Ngaˬ hui a sha‸ gʼa te‸ chehˇ tuˬ venˇ ehˉ oˇ ve lo ngaˬ hui hta‸ hpaw-e tcuh laˇ-oˆ, teh‸ kʼoˆ piˇ ve yoˬ.
21Mvuhˇ naw tcuh yaˇ yawˇ hta‸ kʼaw‸ kʼoˆ piˇ ve, Nawˬ lawˬ ve hkʼe ngaˬ kʼai tcuh laˇ tuˬ yoˬ. Nawˬ kʼoˆ ve venˇ chi hta‸ ngaˬ maˇ te luˬ piˇ. 22Ya‸ hkʼaˇ, oˇ kaˬ lo gaˬ tuˬ nawˬ haˆ haˆ kʼai loˬ. Awˬ lawn kʼo, nawˬ oˇ kaˬ lo maˇ gaˬ sheˬ ve ceh ceh ngaˬ te‸ chiˉ te maˇ hpeh‸, teh‸ kʼaw‸ kʼoˆ piˇ ve yoˬ.
Lawˇtaˍ lehˬ venˇ oˇ ve hta‸ venˇ ehˉ teh‸ kʼoˆ ve pa taw, venˇ oˇ ve hta‸ Zawˇraˆ teh‸ meh piˇ ve yoˬ.
Sawˉdonˍ leh Gawˇmawˇra‸ luˬ kʼai ve
23Lawˇtaˍ yawˇ Zawˇraˆ venˇ hkʼaw gaˬ ve teˇ yanˇ, mvuhˇ nyi htawˇ tawˆ la peuˬ ve yoˬ. 24Oˇ htaˇ Gʼuiˬsha lehˬ, Sawˉdonˍ leh Gawˇmawˇra‸ venˇ awˬ hkʼoˆ lo aˬ miˍ leh ma‸ shiˉ ce la piˇ lawˬ ve yoˬ. 25Venˇ oˇ ve nyiˇ maˬ hkʼaw chehˇ ve chaw yaˇ hkʼa peu-eˬ hta‸ maˇ kʼoˆ, venˇ oˇ ve awˬ paˇ awˬ kui lo cawˬ ve miˬ tawˬ kuiˬ leh oˇ ve hkʼaw cawˬ taˍ ve suhˆ cehˬ hkʼa peu-eˬ hta‸ maˇ kʼoˆ Gʼuiˬsha te luˬ piˇ ve yoˬ. 26Ya‸ hkʼaˇ, Lawˇtaˍ miˇ ma lehˬ hkʼaw‸ nawˉ hpfuhˆ nyi ve pa taw, aˉ leh‸ hkuiˉ daw hpeh‸ sheˬ ve yoˬ.
27Shawˉ pawˍ hkʼe teˇ nyi, Aˍbraˍhanˍ teˇ na‸ tu leh Gʼuiˬsha yawˇ hta‸ tawˇ yaw piˇ ve chehˇ kuiˬ lo kʼai ve yoˬ. 28Sawˉdonˍ leh Gawˇmawˇra‸ venˇ hpawˇ lo yawˇ nyi peu ve teˇ yanˇ, oˇ kaˬ lo aˬ miˍ buiˬ hpfuh lonˉ hta‸ shuˍ ve mvuhˇ hkʼawˇ naˆ dawˇ lonˉ tawˆ la chehˇ ve hta‸ gʼa mawˬ ve yoˬ. 29Gʼuiˬsha lehˬ venˇ lonˉ chi ve nyiˇ venˇ hta‸ te luˬ piˇ ve teˇ yanˇ, yawˇ Aˍbraˍhanˍ hta‸ dawˇ nawˇ ve pa taw, Lawˇtaˍ hta‸ luˬ kuiˬ sheˆ kuiˬ hkʼaw pon piˇ ve yoˬ.
Mawˇbaˆ leh Aˍmawˇniˆ chaw cawˬ la ve awˬ lawn
30Lawˇ taˍ lehˬ Zawˇraˆ venˇ hkʼaw kʼaw‸ caˉ chehˇ tuˬ kawˆ jaˇ ve pa taw, yawˇ ve yaˇ miˇ nyiˇ gʼaˇ hta‸ shiˍ veu leh, Zawˇraˆ venˇ hkʼaw tawˆ kʼai ve yoˬ. Yawˇ hkʼaw hkʼoˆ lo hpaw-e leh, haˉ kʼoˍ teˇ maˬ hkʼaw ca va‸ taˍ ve yoˬ. 31Yawˇ ve yaˇ miˇ uiˍ teˇ gʼaˇ lehˬ yawˇ ve awˬ nyi ma geh laˬ leh, Ngaˬ hui ve awˬ pa chi lehˬ mawˇ la peuˬ. Miˬguiˬ hkʼoˆ lo hawˉ hkʼaˆ paˍ teˇ gʼaˇ ka‸ maˇ cawˬ ve pa taw, ngaˬ hui hta‸ ca heuˆ laˇ paˍ cawˬ tuˬ ve maˇ heˆ. 32Laˬ-o‸, ngaˬ huiˉ maˬ a pa hta‸ a pehˉ meuˇ gʼuiˬ hkʼa bvuhˆ taw piˇ leh yawˇ geh ca lo‸ zuh‸-a veuˬ. A pa hta‸ cuˇ leh chi hkʼe te ve hkʼaw ngaˬ hui ve awˬ yaˇ awˬ duˬ cawˬ la piˇ-a veuˬ, teh‸ kʼoˆ piˇ ve yoˬ. 33Hkʼe te leh oˇ ve teˇ haˉ yawˇ huiˉ maˬ lehˬ awˬ pa hta‸ a pehˉ meuˇ gʼuiˬ hkʼa bvuhˆ taw piˇ leh, awˬ viˉ ma teˇ gʼaˇ awˬ pa geh ca lo‸ zuh‸-e ve yoˬ. Ya‸ hkʼaˇ, awˬ pa lehˬ a pehˉ meuˇ gʼuiˬ dawˬ bvuhˆ jaˇ ve pa taw te‸ chiˉ maˇ shiˍ.
34Shawˉ pawˍ teˇ nyi awˬ viˉ ma lehˬ awˬ nyi ma geh teˇ pawˆ kʼaw‸ laˬ leh, Aˉ nyi haˉ ngaˬ a pa geh ca lo‸ zuh‸ ve yoˬ. Ya‸ puiˉ ka‸ yawˇ hta‸ a pehˉ meuˇ gʼuiˬ kʼaw‸ taw piˇ shaˍ. Peuˬ kʼo, nawˬ yawˇ geh ca lo‸ zuh‸ mehˍ. A pa hta‸ cuˇ leh oˇ hkʼe te ve kʼo, ngaˬ hui ve awˬ yaˇ awˬ duˬ cawˬ la tuˬ yoˬ, teh‸ kʼoˆ ve yoˬ. 35Hkʼe te leh, oˇ ve teˇ haˉ ka‸ yawˇ huiˉ maˬ awˬ pa hta‸ a pehˉ meuˇ gʼuiˬ hkʼa bvuhˆ kʼaw‸ taw piˇ ve yoˬ. Peuˬ leh awˬ nyi ma teˇ gʼaˇ awˬ pa geh ca lo‸ zuh‸ ve yoˬ. Ya‸ hkʼaˇ, awˬ pa lehˬ a pehˉ meuˇ gʼuiˬ dawˬ bvuhˆ jaˇ ve pa taw te‸ chiˉ maˇ shiˍ. 36Hkʼe te leh, Lawˇtaˍ ve yaˇ miˇ chi ve nyiˇ gʼaˇ lehˬ yawˇ hui ve awˬ pa hta‸ pa taw yaˇ hu la ve yoˬ. 37Awˬ viˉ ma teˇ gʼaˇ yaˇ paˍ paw la leh, yawˇ hta‸ Mawˇbaˆ teh‸ meh piˇ ve yoˬ. Yawˇ lehˬ, Mawˇbaˆ chaw hui ve awˬ pa lonˉ hpeh‸ la ve yoˬ. 38Awˬ nyi ma teˇ gʼaˇ htawˇ yaˇ paˍ teˇ gʼaˇ paw la leh, yawˇ hta‸ Beˍnaˍmiˆ teh‸ meh piˇ ve yoˬ. Yawˇ lehˬ Aˍmawˇriˆ chaw hui ve awˬ pa lonˉ hpeh‸ la ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
