Awˬ hkuiˉ puiˍ ve li‸ 11
11
Miˬguiˬ hkʼoˆ tawˇ hkawˇ laiˉ ceuˬ cawˬ la ve
1Awˬ hkuiˉ puiˍ htaˇ, chaw yaˇ teˇ hpaˍ lehˬ tawˇ hkawˇ teˇ ceuˬ ceh tiˉ yehˇ chehˇ ve yoˬ. 2Chaw yaˇ teˇ hpaˍ hpaˍ, mvuhˇ nyi tawˆ hpawˇ Baˍbuˍlonˍ mvuhˇmiˬ lo kʼai leh, oˇ kaˬ lo cawˬ ve miˬ tawˬ kuiˬ lonˉ teˇ maˬ hkʼaw ca chehˇ taˍ ve yoˬ. 3Yawˇ hui teˇ hpaˍ lehˬ, Laˬ-o‸. Ngaˬ hui heh ve li kiˉ shiˍ teˇ hpaˍ chiˆ hpoˆ shaˍ, teh‸ teˇ gʼaˇ leh teˇ gʼaˇ kʼoˆ da‸ ve yoˬ. Hkʼe te leh, yawˇ hui li kiˉ shiˍ teˇ hpaˍ te hpoˆ leh yehˬ kawˍ htaˇ suhˆ tcuhˇ teˇ ceuˬ hta‸ yehˇ ve yoˬ. 4Oˇ htaˇ yawˇ hui kʼoˆ ve, Laˬ-o‸, ngaˬ hui miˬguiˬ chi hkʼoˆ lo maˇ gʼa hpaˆ da‸ kʼai tuˬ, leh ngaˬ hui da‸ ve awˬ meh gʼa tuˬ, venˇ lonˉ leh mvuhˇ naw ma hta‸ daw‸ taˍ ve ta‸ yehˬ lonˉ teˇ maˬ te shaˍ, teh‸ kʼoˆ ve yoˬ.
5Chaw yaˇ teˇ hpaˍ oˇ hkʼe te chehˇ ve hta‸ ca nyi la tuˬ, Gʼuiˬsha lehˬ mvuhˇ naw ma hkʼoˆ lo ya‸ la ve yoˬ. 6Oˇ htaˇ Gʼuiˬsha lehˬ, Chaw yaˇ chi teˇ hpaˍ, chaw teˇ ceuˬ tiˉ hpeh‸ leh tawˇ teˇ hkawˇ tiˉ yehˇ ve pa taw, yawˇ hui kanˉ chi hta‸ tanˬ te gʼa chehˇ ve yoˬ. Maˇ maw maw yawˇ hui lehˬ, yawˇ hui te gaˇ ve hkʼe te gʼa la tuˬ yoˬ. 7Ngaˬ hui miˬguiˬ hkʼoˆ lo ya‸-e leh, yawˇ hui tawˇ yaw da‸ ve teˇ gʼaˇ leh teˇ gʼaˇ na maˇ gʼa da‸ tuˬ ca te piˇ-a veuˬ, teh‸ kʼoˆ ve yoˬ. 8Hkʼe te leh, Gʼuiˬsha lehˬ chaw yaˇ oˇ ve teˇ hpaˍ hta‸ chehˇ kuiˬ oˇ ve hkʼaw hpaˆ da‸ kʼai piˇ lawˬ leh, yawˇ hui te chehˇ ve venˇ lonˉ oˇ ve hta‸ htawˇ, baˬ taˉ piˇ lawˬ ve yoˬ. 9Gʼuiˬsha lehˬ, chaw yaˇ teˇ gʼaˇ leh teˇ gʼaˇ tawˇ yaw ve maˇ pawnˍ da‸ tuˬ te piˇ ve pa taw, chehˇ kuiˬ oˇ ve hta‸ Baˍbuˍlonˍ teh‸ meh piˇ ve yoˬ. Oˇ ve hkʼaw‸ nawˉ, chaw yaˇ teˇ hpaˍ hkʼaˬ hpawˇ chi hpawˇ lo ca chehˇ kʼai ve yoˬ.
Sheˍmaˆ ve awˬ ceuˬ awˬ hkʼaˇ teˇ hpaˍ
10Chi ve lehˬ, Sheˍmaˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. Miˬguiˬ hta‸ iˉ kaˆ htonˍ peuˬ hkʼaw‸ nawˉ nyiˇ hkʼaw‸ gaˬ leh, Sheˍmaˆ yawˇ a sha‸ 100 hkʼaw‸ gaˬ htaˇ, yawˇ ve yaˇ paˍ Aˍhpaˍyaˆ cawˬ la ve yoˬ. 11Oˇ ve hkʼaw‸ nawˉ, Sheˍmaˆ lehˬ 500 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ cawˬ la ve yoˬ.
12Aˍhpaˍyaˆ lehˬ, 35 hkʼaw‸ gaˬ htaˇ, Seˍlaˆ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 13Oˇ ve hkʼaw‸ nawˉ, 403 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
14Seˍlaˆ lehˬ a sha‸ 30 hkʼaw‸ gaˬ htaˇ, Heˍbaˍ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 15Oˇ ve hkʼaw‸ nawˉ, 403 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
16Heˍbaˍ lehˬ a sha‸ 34 hkʼaw‸ gaˬ htaˇ Hpaˍlehˆ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 17Oˇ ve hkʼaw‸ nawˉ, 430 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
18Hpaˍlehˆ lehˬ a sha‸ 30 hkʼaw‸ gaˬ htaˇ Yeˍgawˇ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 19Oˇ ve hkʼaw‸ nawˉ 209 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
20Yaˍgawˇ lehˬ a sha‸ 32 hkʼaw‸ gaˬ htaˇ Seˍruˆ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 21Oˇ ve hkʼaw‸ nawˉ, 207 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
22Seˍruˆ lehˬ a sha‸ 30 hkʼaw‸ gaˬ htaˇ Naˍhkawˍ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 23Oˇ ve hkʼaw‸ nawˉ, 200 hkʼaw‸ hkʼa gaˬ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
24Naˍhkawˍ lehˬ a sha‸ 29 hkʼaw‸ gaˬ htaˇ, Teˍraˆ teh‸ kʼoˆ ve yaˇ paˍ teˇ gʼaˇ cawˬ la ve yoˬ. 25Oˇ ve hkʼaw‸ nawˉ yawˇ a sha‸ 119 hkʼaw‸ kʼaw‸ te‸ chehˇ leh awˬ nu ve yaˇ paˍ yaˇ miˇ teˇ hpaˍ kʼaw‸ cawˬ la ve yoˬ.
26Teˍraˆ lehˬ a sha‸ 70 hkʼaw‸ gaˬ htaˇ Aˍbranˍ, Naˍhkawˍ leh Haˍranˍ hui cawˬ la ve yoˬ.
Teˍraˆ ve awˬ ceuˬ awˬ hkʼaˇ teˇ hpaˍ
27Chi ve lehˬ, Teˍraˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. Teˍraˆ ve yaˇ lehˬ Aˍbranˍ, Naˍhkawˍ leh Haˍranˍ hui hpeh‸ ve yoˬ. Haˍranˍ ve yaˇ lehˬ Lawˇ taˍ hpeh‸ ve yoˬ. 28Haˍranˍ lehˬ, Baˍbuˍlonˍ mvuhˇmiˬ yawˇ paw la ve chehˇ kuiˬ Uˉraˆ venˇ hkʼaw lo, yawˇ awˬ pa Teˍraˆ maˇ suh sheˬ gʼuˇ suhˍ htaˇ ka‸ suh-e ve yoˬ. 29Aˍbranˍ leh Naˍhkawˍ htawˇ, awˬ miˇ ma heuˆ ve yoˬ. Aˍbranˍ ve awˬmiˇ ma lehˬ Saˍrehˇ yoˬ. Naˍhkawˍ ve awˬ miˇ ma lehˬ Haˍranˍ ve awˬ yaˇ miˇ Miˆlaˍ hkaˍ yoˬ. Haˍranˍ ve yaˇ teˇ hpaˍ lehˬ, Miˆlaˍhkaˍ leh Iˉsaˍhkaˍ hui hpeh‸ ve yoˬ. 30Saˍrehˇ lehˬ chaw meh ma hpeh‸ leh, yaˇ teˇ gʼaˇ ka‸ maˇ cawˬ.
31Teˍraˆ lehˬ, yawˇ ve yaˇ paˍ Aˍbranˍ, yawˇ ve awˬ shaˍ paˍ Haˍranˍ ve yaˇ paˍ Lawˇtaˍ, yawˇ ve awˬ hkuiˇ ma, Aˍbranˍ ve awˬ miˇ ma Saˍrehˇ hta‸ shiˍ veu leh, Hkaˍnanˍ mvuhˇmiˬ lo ca chehˇ tuˬ Baˍbuˍlonˍ mvuhˇmiˬ Uˉraˆ venˇ hkʼaw tawˆ kʼai ve yoˬ. Ya‸ hkʼaˇ, yawˇ hui Haˍranˍ venˇ lo gaˬ htaˇ oˇ kaˬ lo chehˇ taˍ ve yoˬ. 32Yawˇ hui oˇ kaˬ lo chehˇ peuˬ hkʼaw‸ nawˉ, Teˍraˆ a sha‸ 205 hkʼaw‸ gaˬ leh suh-e ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
