MATA 8
8
MATA 8
1Yɔ Yeesu gi sizig a ga̧a̧t bɔ hage, dood saal kittɔnɔ hi fɔbzige. 2Yaala ɗobtilya za zaa zagl gi muutdu raage
a hingokya , gi ha̧a̧mɔ, mɔ ɗɛɛ an mɔ za̧a̧sibe ɗobtil be bɔ gi da̧a̧.
3Yeesu yɔd naanɔ ki̧i̧ge, wɛɛ raage
a ha̧a̧be, ɗobtil mɔ bɔ da̧a̧ge!
Ɓɔrbɔ wal bɔ ɗobtilɔ bɔ da̧a̧ gi muulɛ. 4Yeesu wɛɛ raage
a lagum bɛttɔnɔ, bɔmɔ raas doo za hinza. Wɛɛm mɔ rek a Bɛtmaakwookya bɔ ge mɔ zunsig muul mɔ; wɛɛm mɔ da mɔ gɔs Bɛt maak anyɔ Muusa dɔgɔ, an hinɔ gi wɛɛs dood hinmɛksingoya a mɔ za̧a̧za̧.
5Anyɔ Yeesu gul a waal gbɔɔl bɔ nuŋgɔ a Kapɛr-nayum gedu, laya za gbɔɔl Romaya sɔɔz Yeesu dɔŋdi, 6zɔ̧ge raage
a Waar i, walsɛr be gi gumtil gi kusig raa du gi zaŋgdyɔ, gi ya̧a̧rha̧a̧k ha̧a̧ltɔnɔ.
7Yɔ dɔg gi da̧a̧ anbɔ Yeesu raage
a be rekɔ an be za̧a̧sige.
8Hɔnɛ laaya gbɔɔl bɔ wɛɛ ta̧a̧ge
a Waar i, bé rı̄ı̄ an mɔ zaa mɔ gul be raa du gɛ; dɔgum hin gbun kpɔd, walsɛr be bɔ gi za̧a̧. 9Yɔ anbɔ, bee hi zul be, be gi a gbɔlɛ be wɛɛdisɛ, be gin laya dɛɛt a be dɔɔ di be; gɔ be raa zaa a rekumɔ! Rekɔ. Gɔ be wɛɛ be raa zaa bɔ a zaamɔ! za̧a̧n bɔ zaaza. Gɔ be raa walsɛr be bɔ a woom hin lɛ! Woo hinɔ.
10Yɔ Yeesu kɛm dɔgl wɔrɔ hin gi wɛɛsig gɛrsɛ, raa dood wɔ hi gig fɔko a be raasin hi rɔbo:
a Israhila du hɛw, be zɛmdir doo za ɗɔbs Bɛt an wal yɛrɛ gɛ zaŋ.
11Be gisin raak rɔbo a dood kittɔnɔ hí fu̧u̧z a ɔ̧tkazigi, zaa a ɔ̧tleki hi le lees lɛlgbunu hi Abraham hi Isaaku hi Yakuba a Bɛt wáát du. 12Yɛrɛ Bɛt wáátɔ ginɛ Yahuduya wɔ yaanɛ, Bɛt bilsihibils a lɛlwil du a lakdi; a hɔ, dood hi kaa hi gboo nuŋya̧.
13Yeesu wɛɛ raa
laaya gbɔɔl bɔ a rekum mɔ lɛlɛ, Bɛt gi woosum anyɔ mɔ ɗɔbsɔ.
Yɔ Yeesu gi raak anbɔ be, laaya gbɔɔl bɔ walsɛrɔ bɔ gi za̧a̧k be.
14Yɔ Yeesu rek a Piyɛr raa du, zɛm Piyɛr gɔnsiŋ zul gig laak gi kusig a leeso ha, sɔɔ gi dɔŋdi, 15ki̧i̧ naanɔ, nis bɔ muulɔ sa̧a̧k bɔ da̧a̧. Wɛɛ ɗundɔ gaa Yeesu leesɛ le. 16Yɔ ɔ̧t legɔ, hi kams Yeesu dood kittɔnɔ hi gin loorɛ-ha̧a̧l muul du. Dɔg dɔgl gbunu gi tuusil loorɛha̧a̧l wɔ hi gi a dood muul du, wɛɛ za̧a̧sil gumtil zaadɛ wɔ sɛw. 17Yeesu woo anbɔ an hinyɔ Bɛtya̧a̧kɛŋkya bɔ Esaya dɔgɔ a Yeesu zulha gi wooyyɔ
a gii hi zulɔ loo zaŋgdums wɛ yɔ wɛ gi nɛ waanuko, wɛɛ pɛrsɛ gums wɛnɛ.
18Yɔ Yeesu gbɛn dood saal kittɔnɔ hi rɔge, wɛɛ raa walɛsɛrɛ ɔ̧ɔ̧ wɔ a wɛ́ tal a mɛmbal kasiŋ zaa bɔ ge. 19Bɛtmaakdɔkya za zaa a ge raage
a hingokya , bé fɔmɔ a lɛl yɔ gɔ mɔ rek ge sɛw.
20Yeesu ta̧a̧ raage
a bɛrtɔkgɛ hi gin luko, nɔɔs wɔ bɛtha hi gin zɛko. Yɛrɛ Za̧a̧n Waa bɔ taan lɛlyɔ gɔ gi kus gi gbaa zulɔ du.
21Walsɛrɔ zaa gbun raage
a Waar i, gaabe gbɔnɔ an be rek be i̧i̧z baa be wɔrkɔ kete.
22Yeesu wɛɛ ta̧a̧ raage
a mɔnɛ fɔbzibe, ɔɔm wɔrkɛ wɔ hi i̧i̧ wɔrkɛya̧ hɔ.
23Yɔ Yeesu re gi kar a lɛmb du, walɛsɛrɛ ɔ̧ɔ̧ wɔ hi fɔg duhɔ. 24Zɛk za ha̧a̧l yɛɛl fɛk a mɛmbal bɔ geha, mɛmɗukil wɔ hi zɛks lɛmb bɔ an hi imsige. Yɔ anbɔ Yeesu gi nɛ yok be, 25hi sɔɔ hi kpooge hi raage
a Waar i, za̧a̧siwi! Wɛ wɔrkwɔrɔ!
26Yɔ Yeesu rɛmɔ warihi
a hoob gin ha̧a̧k nɔ? Nɛɛ dood Bɛt ɗɔbsig kaasiya wɛ!
Gɔma wɛɛ ɗund ya̧a̧l zɛk ha̧a̧l bɔ hi mɛmbal bɔ, lɛl kɔm gɔ seseg.
27Yɔ dood hinkɔmsihi gɛrs be hi warɔ
a nɔ nɛ za̧a̧nɔ anyɔ zɛk hɛw hi mɛmɛ hi lagsig nɛ tɔn anyɔ be?
28Yɔ Yeesu tuur a mɛmbal kasiŋ zaabɔ ge a Gadarɛnɛ hɛbt du, dood loorɛha̧a̧lya zaadɛ eerɛ hi tuuz a loorlɛlɛ hi zaa hi dagtin hi giya. Doodya̧ hi ha̧a̧hoob ha̧a̧ltɔnɔ, doo za ɗɛɛ an gi fɔb gbɔnɔ bɔ hɔ gɛ. 29Hi ɓooya̧a̧ hi
war Yeesu a dɔgl wi nɔ du hi mɔya, Bɛt waaɔ? Mɔ zaa hɛdi an mɔ ha̧a̧niw ya̧a̧r anyɔ ya̧a̧rhant bɔ ɔ̧tɔ hi dɛ̧ɛ̧ du tuur hɛw gɛ ya?
30Hɔnɛ hab kittɔnɔ hi tɔk hɛto, hɛml hi lɛlyɔ hi gi ge kaasi. 31Loorɛha̧a̧l wɔ hi zɔ̧ Yeesu hi raage
a mɔ giw niniko, yaawi a hab wɛrɛ hi muul du.
32Yeesu raahi
a tuunɛ nɛ rekɔ.
Hi tuu gɔ dood eerɛ wɔ hi muul du hi re hi gul a hab wɔ hi muul du be. Ɓɔrbɔ hab wɔ maasya̧ sɛw hi nɔɔ hi tii a kasiŋ disɛ hi da hi gi̧i̧l a mɛmbal du hi wɔrɔ. 33Hab nɛɛrɛwaat wɔ hí gbɛn anbɔ be hi nɔɔ hi rek a waal gbɔɔl du hi fɔk hinyɔ tal sɛw, hi hinyɔ daa a dood loorɛha̧a̧lya eerɛ wɔ hi muulɛ. 34Yɔ anbɔ dood wɔ a waal bɔ gedu sɛw hi tuuz hi zaa a Yeesu ge, yɔ hi zɛŋge hi zɔ̧ge an gi ɗund gi ɔɔ hɛbtya̧ bɔ.
Doyayo New Testament © Bible Society of Cameroon, 1991.
