Mateo 4
4
1Ja cꞌa Jesús arjaꞌ cꞌamarel rmal ja rEspíritu Santo, be chipan ja lugar ja kas talani chi ntakchiꞌix rmal ja diablo. 2Caꞌwinak kꞌij caꞌwinak akꞌaꞌ ma xwaꞌ ta. Ja cꞌa tok tzꞌakati ja caꞌwinak kꞌij caꞌwinak akꞌaꞌ majtaj rmal rkꞌakꞌanil rupan. 3Ja cꞌa diablo ja takchinel arjaꞌ xekaj ruqꞌuin ja Jesús in quewaꞌ xbij tre riꞌ:
—Ja wi katzij chi atat ja rat Ralcꞌwal Dios tabij cꞌa trewaꞌ ja juleꞌ abaj riꞌ chi noc way, neꞌ tre. 4Ja cꞌa Jesús xbij tre:
—Tzꞌibtal can chipan ja rtzobal Dios chi ja winak ma ruyon ta way ncꞌatzin chique tre ja quicꞌaslemal pro nojel ja rtzobal Dios jariꞌ ncꞌatzin chique chakajaꞌ, neꞌe.
5Cꞌacꞌariꞌ ja diablo xucꞌamel chic ja Jesús, xebe chipan ja santilaj tinamit Jerusalén. Ja cꞌa tok xeꞌekaji xjotbaꞌ parwiꞌ ja nimlaj templo xin Dios 6in xbij tre:
—Ja wi katzij chi atat ja rat Ralcꞌwal Dios taqꞌuiakaꞌel cꞌa awiꞌ waweꞌ como ja chipan ja rtzobal Dios quewaꞌ tzꞌibtal can chawe riꞌ: —Ja Dios nerutakto ángel chi naturquichajij, ejeꞌeꞌ netzꞌamo awxin utzcꞌa chi matasoc awakan chwach abaj. Queriꞌ tzꞌibtal can, neꞌe ja diablo. 7Ja cꞌa Jesús xbij tre:
—Pro tzꞌibtal can chakajaꞌ chi ma tacꞌambajaj ta ja Dios ja rawajaw, queriꞌ nbij, neꞌ tre.
8Ja cꞌa xuban chic ja diablo, xucꞌamel chic ja Jesús, xebe parwiꞌ jun nimlaj jayuꞌ. Ja cꞌa tok xeꞌekaji xumaj rcꞌutic chwach ja gobierno rxin nojel ja tinamit ja cꞌo chwachꞌulew in nojel ja mebaꞌil rxin 9in xbij chic tre:
—Wi xcatxuqueꞌ chinwach wi nayaꞌ nukꞌij, anin njach pan akꞌaꞌ ja gobierno rxin nojel ja tinamit ja nmajon rcꞌutic chawach leꞌ, neꞌ chic tre. 10Ja cꞌa Jesús quewaꞌ xbij tre riꞌ:
—Jat, catel chinwach Satanás como tzꞌibtal can chipan ja rtzobal Dios chi xa ruyon ja Dios ja rawajaw catxuqueꞌ chwach, xa ruyon arjaꞌ tayaꞌaꞌ rukꞌij, queriꞌ nbij, neꞌ tre.
11Cꞌacꞌariꞌ be ja diablo, xuyaꞌ can ja Jesús in ja Jesús chaka jalal tok xepi juleꞌ ángel xurquitoꞌoꞌ.
* * * * * * * * * *
12Ja cꞌa Jesús tok xekaj rbixic ruqꞌuin chi coji ja Juan Bautista pa cheꞌ cꞌacꞌariꞌ xuyaꞌ can ja lugar ja bar cꞌo wiꞌ, be pa Galilea. 13Ja cꞌa tok xekaji ja pa Nazaret ma xqꞌue ta triꞌ, be pa Capernaum in triꞌ qꞌuejeꞌ wiꞌ. Ja Capernaum chiyaꞌ cꞌo wiꞌ, triꞌ cꞌo wiꞌ ja bar cꞌo wiꞌ caꞌiꞌ lugar, jun rbinaꞌan Zabulón in jun chic Neftalí rubiꞌ. 14Queriꞌ bantaji utzcꞌa chi triꞌ bantaj wiꞌ cumplir ja bitajnak can ojer rmal ja profeta Isaías tre ja caꞌiꞌ lugar quewariꞌ: 15—Cꞌoli xtibantaj na chipan ja caꞌiꞌ lugar Zabulón in Neftalí, jariꞌ lugar triꞌ cꞌo wiꞌ ja bar cꞌo wiꞌ ja yaꞌ, chajuparaj binelyaꞌ Jordán cꞌo wiꞌ, pa rcuenta Galilea cꞌo wiꞌ ja bar ecꞌo wiꞌ ja winak ja ma e aj Israel ta. 16Ja winak ja recꞌo chipan ariꞌ lugar, nabey xa pa kꞌekumal ecꞌo wiꞌ pro nquetzꞌat na jun nimlaj luz, ja nabey ecꞌo chipan jun bey ja xa camíc rcꞌamonto pro nsakirsax na quebey chiquewach rmal ja luz. Queriꞌ ja bitajnak can.
17Ja cꞌa Jesús jariꞌ kꞌij xumajel rbixic ja rtzobal Dios chique ja winak in quewaꞌ nbij chique riꞌ: —Ja gobierno xin chilaꞌ chicaj xa nnakajinto rmalcꞌariꞌ tok nbij chewe, teqꞌuexaꞌ ja renaꞌoj, teyaꞌaꞌ can ja ritzelal, neꞌ chique.
* * * * * * * * * *
18Ja cꞌa Jesús arjaꞌ kas rmajon binem chuchiꞌ ja yaꞌ rbinaꞌan Galilea ja tok ecꞌo caꞌiꞌ achiꞌiꞌ xeruwil e alaxic, jun rbinaꞌan Simón ja cꞌo chic jun rubiꞌ Pedro neꞌxi, in jun chic Andrés rubiꞌ. Ejeꞌeꞌ como e chapol chꞌuꞌ kas quimajon rqꞌuiakic ja cꞌam pa yaꞌ ja tok xeꞌiltaji rmal ja Jesús 19in quewaꞌ bix chique rmal riꞌ: —Joꞌ quixtreꞌ chwij, anin nyaꞌ na jun samaj chewe pro ma chapoj chꞌuꞌ chi ta ja neban, winak chic neꞌecanoj, xecheꞌxi. 20Ja cꞌa rejeꞌeꞌ quichꞌakilaꞌ can ja quecꞌam in xetreꞌel trij ja Jesús.
21Kas quimajon binem ja Jesús ja tok ecꞌo chic e caꞌiꞌ achiꞌiꞌ xeruwil, chakajaꞌ e alaxic, jun rbinaꞌan Jacobo in jun chic Juan rubiꞌ, e rcꞌajol Zebedeo, ecꞌo pa jun lancha cachbil ja quitataꞌ, quimajon rcꞌojoxic ja quecꞌam. Xesiqꞌuix pon rmal ja Jesús. 22Ja cꞌa rejeꞌeꞌ alnak xeꞌelto chipan ja lancha, qꞌuejeꞌ can ja quitataꞌ chipan in xetreꞌel trij ja Jesús.
* * * * * * * * * *
23Ja cꞌa Jesús arjaꞌ be nat nakaj chipan ja departamento Galilea, nertijoj ja winak pa tak jay xin molbal riꞌil ja bar nquemol wiꞌ quiꞌ chi rcꞌaxaxic ja rtzobal Dios, nuyaꞌ rbixic chique ja utzlaj tzij tre ja gobierno xin chilaꞌ chicaj in chakajaꞌ ecꞌoli ja yawaꞌiꞌ nertzursaj xa nak ta ntiꞌon chique. 24In be rbixic chipan nojel ja lugar jeꞌe ja cꞌo pa rcuenta Siria. Xecꞌamarel ruqꞌuin ja yawaꞌiꞌ pro canojelal. Xa nak ta chi yobilal cucꞌan, xa nak ta ntiꞌon chique, wi ecꞌo itzel tak espíritu eꞌocnak chique, wi cꞌol ataque chique, wi e sicaꞌ, xecꞌamarel canojelal ruqꞌuin in xertzursaj. 25In congana e qꞌuiy ja winak xetreꞌel trij caniꞌ chique ja recꞌo chipan ja departamento Galilea in chique ja recꞌo chipan ja lugar rbinaꞌan Decápolis in chique ja raj Jerusalén in ja recꞌo chipan juleꞌ chic tinamit ja cꞌo pa rcuenta Judea in chique chakajaꞌ ja recꞌo chajuparaj ja binelyaꞌ Jordán.
© 2010, Wycliffe Bible Translators, Inc. All rights reserved.
