Romanos 1
1
Carta qalaykunan
1Noqa Pablo Jesucristupa sirviqninmi kaykä. Apostolnin kanäpaq Tayta Dios churamash kaptinmi paypa ali wilakuyninta wilakur puriykä.
2Tayta Dios promitishqan ali wilakuy wilakush kananpaqqa unay profëtakunami qelqayarqan. Say qelqayashqanmi Tayta Diospa sagrädu palabran kaykan. 3Say ali wilakuyqa Tayta Diospa Surin [Señor Jesucristupami] kaykan. Paymi rey David ayllupita yurirqan.#Mat. 1.1; 12.23. 4Wanusiyaptinpis Espíritu Santumi munayninwan kawarisimush. Saynöpami Señorninsi Jesucristo Tayta Diospa Surin kashqanta musyansi.
5Jesucristo noqansi rayku wanush kaptinmi Tayta Dios kuyapämar apostolnin kanäpaq churamash. Saymi maysay nacionkunacho pïmaytapis wilapä Jesucristuman yärakur y Tayta Dios munashqanno kawar payta alabayänanpaq. 6Qamkunatapis Tayta Diosmi akrayäshushkanki Jesucristupa makincho kawayänaykipaq.
7Romacho taq yärakuq mayïkuna, Tayta Dios kuyayäshushpaykimi wamrankuna kayänaykipaq qayayäshushkanki. Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.
Romaman Pablo aywayta munashqan
8Wawqi panikuna, Jesucristuman yärakuyashqaykita maysaychöpis parlayaptinmi Jesucristupa jutincho Tayta Diosta qamkunapaq agradëcikü. 9Waran waran qamkunapaq manakushqäta Tayta Dios musyanmi. Paytami sirvï Surin Jesucristupa ali wilakuyninta lapan shonqüwan wilakur.
10Saymi manakuykä Tayta Dios kamakäsiptinqa imaykanöpapis qamkunaman watukaq shamunäpaq. 11Qamkunawan tinkuytami munaykä. Espíritu Santu tantiyasimashqannömi Jesucristuman shumaq yärakuyänaykipaq tantiyasiyäshayki. 12Saynöpis jukninsi jukninsi shakyäsinakushun Jesucristuman shumaq yärakunansipaq.
13Wawqi panikuna, aska kutimi qamkunaman watukaq shamuyta munashkä.#Hech. 19.21. Shamuyta munarpis sapa kaptinmi kamäpakamushkäsu. Juk markakunacho wilakuptï mana Israel runakuna Jesucristuta chaskikuyashqanno qamkuna kaqchöpis Jesucristuta chaskikuyänanpaqmi wilakuyta munaykä. 14Griego kayaptinpis, mana griego kayaptinpis, yachaq kayaptinpis, mana yachaq kayaptinpis lapantami Jesucristupa wilakuyninta wilapänä kaykan. 15Saymi Jesucristupa ali wilakuyninta qamkunatapis wilapänäpaq imaykanöpapis Romaman shamuyta munaykä.
16Noqa manami penqaküsu Tayta Diospa ali wilakuyninta wilakur. Say wilakuyqa Tayta Diospa poderninmi kaykan lapan chaskikuqkunata salvananpaq.#Mar. 8.38; 1Cor. 1.18. Puntataqa Israel runakunatami musyasirqan y saypitanami mana Israel runakunatapis musyasirqan. 17Ali wilakuyninchömi Tayta Dios tantiyasimansi jusalikushqansita perdonamashqansita. Sayno perdonamansi payman yärakushqami. Palabranchöpis kaynömi qelqaraykan: <<Munashqäno kawaq runaqa noqaman yärakamarmi kawanqa>>.#Hab. 2.4.
Runakuna jusasapa kayashqan
18Jana pasapita pasami Tayta Dios rabyakushpan pïmaytapis jusalikuqkunata castiganqa. Say runakuna jusalikurmi sapata churapäyan wakin runakunapis Tayta Diospa wilakuyninta mana chaskikuyänanpaq. 19Jusalikurpis runakuna musyayanmi Tayta Dios kashqanta. Pay kashqanta kikin Tayta Diosmi musyasin. 20Kamashqankunata rikarmi unaypita pasa runakuna musyayan Tayta Dios kashqanta y lapanpaq munayyuq kashqanta.#Hech. 17.24-25. Saymi Tayta Diospa nawpancho pipis sapakunqasu <<noqa manami musyalashkäsu qam kashqaykita>> nishpan.
21Tayta Dios kashqanta musyaykarpis runakuna manami payta wiyakuyansu ni agradëcikuyansu. Saypa trukanqa manakaqkunaman uman churakash kaptinmi yarpayninkunapis pasaypa upatakash kaykan.#Efe. 4.17-18. 22Kikinkuna yachaq kayashqanta yarparpis senqan maycho kashqantapis manami musyayansu. 23Saymi imayyaqpis kawaq Tayta Diosta adorayänanpa trukan ïdulukunata adorayan. Say ïdulukunata rurayan runa niraqtapis, pajaqkuna#1.23 Wakin runakunaqa vuelaqkuna niyanmi. niraqtapis, uywakuna niraqtapis y lashtaypa puriqkuna niraqtapis.
24Ïdulukunata adorayaptinmi Tayta Dios rabyashpan paykunata kachaykush shonqun munashqanno melanaypaq kaqkunata rurayänanpaq y jukwan jukwan penqaypaq kaqkunata rurayänanpaq. 25Say runakunaqa kamamaqninsi Tayta Dioslata adoranansipaq kashqanta musyaykarmi pay kamashqankunata adorayan. Saymi rasun kaqta adorayänanpa trukanqa manakaqkunata adorayan. Tayta Dios imayyaqpis adorash kaykuläsun. Amén.
26Saymi say runakunata Tayta Dios kachaykush shanaripakur penqakuypaq mana alikunata rurayänanpaq. Kachariptinmi warmikunapis runawan täyänanpa trukan olquwannöpis kikinpura kakuyan. 27Saynölami runakunapis warmiwan täyänanpa trukan olqupura warmiwannöpis penqakuypaq kakuyan. Jusalikuyashqanman tupumi paykunata Tayta Dios castigaykan.
28Tayta Dios munashqanno kawayta mana munayaptinmi mana penqakuypa jusalikur kawakuyänanpaq Tayta Dios kachariykush. 29Sayno kawarmi imayka jusalikuykunatapis jusalikur [fornicación jusata jusalikuyan,] yaqa kayan, kikilanpaq imatapis munayan, chikinakuyan, envidiösu kayan, runa mayinta wanusiyan, wajukuyan, engañanakuyan, mana alikunata rurayan y washarima kayan. 30Saynölami pitapis jamuräyan, [runa mayinta tumpayan,] Tayta Diospa contran kayan, pïmaywanpis rimanakuyan, runa tukuyan, alabakuyan, lutankunata rurayänanpaq yarpachakuyan y mamanta taytantapis cäsukuyansu. 31Imata yäsiptinpis chaskikuyansu, awnishqanta cumpliyansu, kuyapäkuyniynaq kayan y runa mayinta perdonaytapis yachayansu. 32Paykunaqa musyayanmi sayno kawaqkuna wanusish kayänanpaq Tayta Dios nishqanta. Sayta musyaykarpis mana mansakuypami jusalikuyan. Saynölami wakinkunapis lutanta rurayaptin kushikuyan.
© 2003, Wycliffe Bible Translators, Inc. All rights reserved.
