Hechos 20
20
Macedoniaman y Acayaman Pablo aywashqan
1Saypitanami discïpulukunata qayaykasir Tayta Dios munashqanno imaypis kawayänanpaq Pablo shakyäsirqan. Despidikurirnami Macedonia provinciapana aywakurqan. 2Say provinciacho markan markan purirmi Jesucristuman yärakuqkunata shumaq shakyäsirqan.
Saypitanami Greciaman#20.2 Greciapaq parlarqa Acaya provinciapaqmi parlaykan. Acaya provinciachömi Corinto marka karqan. chaykur 3kimsa killa saycho tarqan. Saypita Siriaman büquiwan kutikunanpaqna kaykarmi mayarqan Israel runakuna payta wanusiyänanpaq wilanakuyashqanta. Saymi büquiwan aywananpa trukanqa chakilapana Macedonia provinciapa päsarqan. 4Payta walkirmi aywayarqan Pirrupa surin Sópater, Aristarco, Segundo, Gayo, Timoteo, Tíquico y Trófimupis. Sópaterqa Berea markapitami karqan. Aristarcuwan Segunduqa Tesalónica markapitami kayarqan. Gayuqa Derbe markapitami karqan. Timoteo, Tíquico y Trófimunami Asia provinciapita kayarqan. 5Paykuna nawpakurmi Troas markacho shuyäyämarqan.#20.5 Kay libruta qelqaq Lucaspis Pabluwanmi purirqan. 6Levadüraynaq Tantata Mikuna fiesta päsariptinmi Filipuspita büquiwan yarquyarqä. Pisqa junaqta Troasman chaykurmi nawpaqkunata taripaykur juk semäna saycho qoyäyarqä.
Euticuta Pablo kawarisimushqan
7Domingu junaqmi Santa Cënata upuyänäpaq wawqi panikunawan shuntakäyarqä. Waraynin tutana aywakunan kaptinmi pulan paqasyaq Pablo yachasirqan. 8Yachasishqan cuartuchömi aska mechërukunata sarisiyarqan. 9Say cuartuqa kimsa kaq pïsuchömi karqan. Ventänanchömi juk maqta Eutico jutiyuq jamaraykarqan. Aska höra Pablo yachasiptinmi jamaraykashqancho punukäkushpan ventänapita jeqakurpurqan. Saymi wanushtana joqarkuyarqan. 10Pablo urarpurnami say maqtata makalakurkur wawqi panikunata nirqan: <<¡Ama mansakäyaysu! ¡Kawaykanmi!>>
11Shuntakäyashqan cuartuman kutirnami Santa Cënata upuyarqan. Pasa warashqanyaq yacharkasirmi Pablo aywakurqan. 12Say maqtatanami kawaykaqtana wayinman pushayarqan. Kawarimushqanta rikarmi lapanpis kushikuyarqan.
Troaspita Miletuman Pablo aywashqan
13Troas markapita Asón markayaq chakilapami Pablo aywarqan. Noqakunanami büquiwan nawpakuyarqä Asónchöna Pabluta shuntayänäpaq. 14Asóncho shuntakarnami lapäkuna büquiwan Mitilene markaman aywakuyarqä. 15Mitilenipita aywakurnami waraynin junaq Quío niyashqan isla nawpanpa päsayarqä. Saypita waraynin junaqnami chäyarqä Samos islaman. Saypita [Trogilio markacho jamapaskir] juk junaqtaraqmi Mileto markaman chäyarqä. 16Pentecostés fiestapaq Jerusalénman imaykanöpapis chayta munarmi Asia provinciacho qoyayta Pablo munarqansu. Saymi Éfesuman mana chaylapana aywakuyarqä.
Éfesucho mayor wawqikunata Pablo yäsishqan
17Mileto markaman chaykurnami Éfesucho taq mayor wawqikunata Pablo qayasirqan. 18Chäyaptinmi nirqan: <<Qamkuna musyayankimi kay Asia provinciaman chämushqä junaqpita pasa imano kawashqätapis. 19Israel runakuna conträ sharkuyaptin nakarpis waqarpis Señor Jesucristuta lapan shonqüwanmi sirvishkä. 20Tayta Dios munashqanno kawayänaykipaq kaqtaqa runakunapa nawpanchöpis y wayikikunachöpis lapantami yachasishkä. 21Israel runakunata y mana Israel runakunatapis tantiyasishkä jusankunata wanakur Señorninsi Jesucristuman yärakuyänanpaqmi.
22<<Kananqa Espíritu Santu pushamaptinmi Jerusalénman aywaykä. Isanqa sayman chaptï ima päsamänanpaq kaqtapis manami musyäsu. 23May markaman aywaptïpis Espíritu Santu musyasiman carcilman wichqayämänanpaq y nakasiyämänanpaq kashqantami. 24Sayta musyarpis manami lakiküsu. Noqaqa wanushqäyaqmi Señor Jesucristo nimashqanno [kushish] wilakushaq Tayta Dios kuyapäkuq kashqanta.
25<<Qamkuna kaqcho purir Tayta Dios mandaykashqanpita wilakushqäta wiyamaqkuna, kananpitaqa manami mayqaykipis rikayämankinasu. 26-27Tayta Diospa wilakuyninta lapantami qamkunata wilapashkä. Saymi mayqaykitapis Tayta Dios juzgar condenashuptiki jusayuqsu kashaq. 28Sayno kaykaptinqa cuidä jusalikuyankiman. Mayor wawqikuna kayänaykipaq Espíritu Santu churaykäyäshuptikiqa misikuq runa uyshankunata ali rikashqanno Tayta Diospa iglesianta#1Tim. 3.15. shumaq rikayanki. Paymi iglesianta rantinanpaq kikinpa yawarninta jicharqan.
29<<Noqa musyämi aywakuptï lutan yachasikuqkuna malaqash löbunöpis shayämunanpaq kashqanta. Paykuna lutankunata yachasirmi Tayta Diosman yärakuqkunata pantakäsiyanqa. 30Saynölami qamkunapitapis lutan yachasikuqkuna yurir discïpulukunata#20.30 Discïpulukunapaq parlarqa Jesucristuta chaskikuqkunapaqmi parlaykan. criyisiyta munayanqa. 31Sayno kananpaq kaptinqa shumaq cuidakuyay. Yarpäyay kimsa watantin sakaypapis junaqpapis jukniki juknikita waqapaypapis yachasishqäta. 32[Wawqikuna,] kananqa kuyapäkuq Tayta Diospa makinmanmi qamkunata kachaykü. Paypa wilakuynin munayyuqmi kaykan shumaq tantiyasiyäshunaykipaq. Saynöpami lapan salvash kaqkunawan juntu herenciata#Col. 1.12; 3.24; Tito 3.7; Heb. 10.34; 1Ped. 1.4. chaskiyanki.
33<<Noqa manami pipa qellaynintapis, qorintapis ni mödanantapis munapashkäsu. 34Musyayashqaykinöpis nistashqäkunapaq y noqawan puriqkuna nistäyashqankunapaqpis kikïmi arushkä. 35Saynöpami qamkunata yachasishkä noqano arur pishïpakuqkunata yanapäyänaykipaq. Señor Jesucristupis nirqan: <Imatapis chaskir kushikushqansipitapis mas kushikuypaqmi kaykan pitapis yanapashqansi> >>.
36Pablo sayno yacharkasirmi paykunawan qonqurpakuykur Tayta Diosta manakurqan. 37Manakuyta ushaskiptinmi lapanpis waqayashpan payta makalakur musayarqan. 38Payta manana rikayänanpaqna niptinmi seqaypa lakikuyarqan. Saypitanami aywakunanpaqna büqui kaykashqanyaq pushayarqan.
© 2003, Wycliffe Bible Translators, Inc. All rights reserved.
