ማቶሳ 9
9
ዬሱሲ ቦላይ ጉንዴዳ ቢታኒያ ፓዳ
(ማር 2፡1-12፤ ሉቅ 5፡17-26)
1ሃዋፔ ካላ ዬሱሲ ዎንጊሪያን ጌሊዴ፥ ኣባ ፒኒዴ፥ ባሬ ካታማ ዬዳ። 2ኣማሬዳ ኣሳይ ቦላይ ጉንዴድዳ ኢቲ ቢታኒያ ሻንቻማን ቶኪዴ፥ ዬሱሳኮ ኣሄዲኖ፤ ዬሱሲ ኡንቱንቱ ኣማኑዋ ቤዒዴ፥ ቦላይ ጉንዴድዳ ቢታኒያ፥ «ታ ናዓው፥ ያዮፓ፤ ኔ ናጋራይ ኣቶ ጌቴቴዳ» ያጌዳ።
3ሂጊያ ታማሪሲያዋንቱፔ ኢቱ ኢቱ ባሬንቱ ዎዛናን፥ «ላ ሃ ቢታኒ ፆሳ ቦላ ኢታባ ሃሳዬቴ!» ያጊ ቆፔዲኖ።
4ዬሱሲ ኡንቱንቱ ቆፋ ኤሪዴ፥ ኡንቱንታ ሃዋዳን ያጌዳ፤ «ሂንቴንቱ ሂንቴ ዎዛናን ሃዋ ማላ ኢታባ ኣዪሲ ቆፒቴ? 5‹ኔ ናጋራይ ኣቶ ጌቴቴዳ› ያጊያዌ ማቴዬ? ዎይ፥ ‹ዴንዳ ኤቃዴ ሃሜታ› ያጊያዌ ማቴ? 6ሺን ሳዓ ቦላን ናጋራ ኣቶ ጋናው ታው፥ ኣሳ ናዓው፥ ማታይ ዴዒያዋ ታኒ ሂንቴና ኤሪሳና» ያጊዴ፥ ሄዋፔ ጉዬ ኢ ሄ ቦላይ ጉንዴዳ ቢታኒያ፥ «ዴንዳ ኤቃ፤ ያታዴ ኔ ሻንቻማ ቶካዴ፥ ኔ ጎሌ ባ» ያጌዳ።
7ጉንዴዳ ቢታኒካ ዴንዲ ኤቂዴ፥ ባሬ ጎሌ ቤዳ። 8ሺን ዳሮ ኣሳይ ሄዋ ቤዒዴ ያዬዲኖ፤ ኣሳው ሃዋ ማላ ማታ ኢሜዳ ፆሳ ጋላቴዲኖ።
ዬሱሲ ሌዊያ ማቶሳ ፄሴዳ
(ማር 2፡13-17፤ ሉቅ 5፡27-32)
9ዬሱሲ ሄዋና ኣዴ፥ ማቶሳ ያጊያዌ ቃራፃ ቃንፂያ ሳን ኡቴዳዋ ዴሚዴ ኣ፥ «ታና ካላ» ያጌዳ።
ማቶሲካ ዴንዲ ኤቂዴ፥ ኣ ካሌዳ።
10ዬሱሲ ማቶሳ ጎሌን ቁማ ማናው ኡቲ ዴዒሺን፥ ቃራፃ ኣኪያ ጮራ ኣሳይኔ ናጋራንቻቱ ዪዴ፥ ኣናናኔ ኣ ካሊያዋንቱና ኢቲፔ ጋዪታን ኡቴዲኖ። 11ኢቲ ኢቲ ፓሪሳዋቱ ሄዋ ቤዒዴ፥ ዬሱሳ ካሊያዋንታ፥ «ሂንቴና ታማሪሲያዌ ቃራፃ ቃንፂያዋንቱናኔ ናጋራንቻቱዋና ቁማ ኣዪሲ ኢቲፔ ሚ?» ያጌዲኖ።
12ሺን ዬሱሲ ኡንቱንቱ ያጊያዋ ሲሲዴ፥ «ሃርጋንቻቱዋሳፔ ኣቲን፥ ፓፃቱዋሲ ኣኪሚ ኮሼና። 13ሺን ሂንቴንቱ ቢዴ፥ ፆሳ ማፃፋይ፥ ‹ታኒ ማሮቴ ኮያይፔ ኣቲን፥ ያርሹዋ ኮዪኬ› ያጊያዌ ዋጊያዌንቶ ኤሪቴ፤ ኣዪሲ ጎፔ፥ ታኒ ናጋራንቻቱዋ ፄሳናው ዬዳዋፔ ኣቲን፥ ፂላቱዋ ፄሳናው ያቤይኬ» ያጌዳ።
ፆማባ ኦቼዳ ኦሻ
(ማር 2፡18-22፤ ሉቅ 5፡33-39)
14ሄ ዎዴ ዮሃኒሳ ካሊያዋንቱ ዬሱሳኮ ዪዴ፥ «ኑኒኔ ፓሪሳዋቱ ኡባ ዎዴ ፆሜቶ፤ ሺን ኔና ካሊያዋንቱ ኣዪሲ ፆሚኪኖ?» ያጊዴ ኣ ኦቼዲኖ።
15ዬሱሲ ኡንቱንታ፥ «ቡላቻ ዬዳ ኣሳይ ማቻቶ ኣኪያዌ ባሬንቱና ዴዒሺን፥ ካዮታናው ዳንዳዪኖ? ዳንዳዪኪኖ፤ ሺን ማቻቶ ኣኪያዋ ኡንቱንቱ ማታፔ ኣፋና ዎዲ ያና፤ ኡንቱንቱ ሄ ዎዴ ፆማናዋንታ» ያጌዳ።
16«ኤጫ ማዩዋ ቦላ ኦራ ፊያ ዎዴ ሲኪያ ኣሳይ ባዋ፤ ኣዪሲ ጎፔ፥ ኦራ ፊ ኤጫ ማዩዋ ፔሬና፤ ፔይካ ካሴዋፔ ዳራናዋ። 17ሆዖ ዎዪኒያ ኤሳ ኤጫ ኦጎሩዋን ናዒያ ኣሳይ ባዋ። ሺን ናዖፔ፥ ሄ ዎዪኒያ ኤሳይ ኦጎሩዋ ዳካና፤ ባሬዉካ ዎፌታና፤ ኦጎሩካ ባያናዋ። ሺን፥ ሆዖ ዎዪኒያ ኤሳ ኦራ ኦጎሩዋን ናዓናው ቤሴ፤ ላዑካ ባይኪኖ» ያጌዳ።
ያዒሮሳ ናቲባኔ ዬሱሳ ማዩዋ ቦቼዳ ሚሺራቲባ
(ማር 5፡21-43፤ ሉቅ 8፡40-56)
18ዬሱሲ ኡንቱንቶ ሄዋ ኦዲሺን፥ ኣዪሁዴ ዎሳ ጎሌ ካፓቱዋፔ ኢቱ ኣኮ ዪ ኣ ሲንን ጉልባቲዴ፥ «ታ ናታ ሃዒ ሃይቃዱ፤ ሺን ኔኒ ያዴ ኔ ኩሺያ ኢዚ ቦላ ዎሪኪ፤ ኢዛ ዴዑዋን ዴዓናዉኑ» ያጌዳ።
19ዬሱሲ ዴንዲዴ፥ ባሬና ካሊያዋንቱና ኢቲፔ ቢታኒያ ካሊዴ ቤዳ። 20ሄ ዎዴ ታማኔ ላዑ ላይ ኩሜን፥ ኢዚ ቦላፔ ሱይ ጎጊያ ኢቲ ሚሺራታ ጉዬና ሺቃዴ፥ ዬሱሳ ማዩዋ ማጫራ ቦቻዱ። 21ሃዋ ኢዛ ኡዶዌ፥ ኢዛ ባሬ ዎዛናን፥ «ታኒ ኣ ማዩዋ ፃላላ ቦቻንቶ ፓፃና» ያጋዴ ቆፓዱ።
22ሺን ዬሱሲ ዩዪ ኢዞ ፄሊዴ፥ «ታ ናቴ፥ ያዮፓ፤ ኔና ኔ ኣማኑ ፓዳ» ያጌዳ። ሄ ማንዒያንካ ሚሺራታ ፓፃ ኣጋዱ።
23ዬሱሲ ኣዪሁዳ ዎሳ ጎሌ ካፑዋ ሶይ ጋኬዳ ዎዴ፥ ዬኩዋን ዲንካ ፑኒያ ኣሳኔ ዬኪያ ኣሳ ቤዒዴ፥ 24«ካሬ ኬሲቴ፤ ጉ ናታ ጌሚዒሻዱፔ ኣቲን፥ ሃይቃቤይኩ» ያጌዳ። ሄዋፔ ጉዪያን ኣሳይ ኣ ቦላ ዳሪ ሚጬዳ። 25ሺን ጮራ ኣሳ ካሬ ኢ ኬሴዳዋፔ ጉዪያን፥ ጎሌ ጌሊዴ፥ ናቲ ኩሺያ ኦይቄዳ፤ ናታካ ዴንዳ ኣጋዱ። 26ሄ ዋሪ፥ ሄ ማንዒያንካ ሄ ጋዲያን ኡባን ሲሴቴዳ።
ዬሱሲ ላዑ ቆቃቱዋ ፓዳ
27ዬሱሲ ሄዋና ኣዴ ቢያ ዎዴ፥ ላዑ ቆቃቱ ባሬንቱ ቃላ ቁ ኡዲዴ፥ «ዳዊቴ ናዓው፥ ኑና ማራሪኪ» ያጊዴ ኣ ካሌዲኖ።
28ዬሱሲ ጎሌ ጌሌዳ ዎዴ፥ ቆቃቱ ኣኮ ዬዲኖ፤ ዬሱሲ ኡንቱንታ፥ «ታኒ ሃዋ ኦናው ዳንዳዪያዋ ኣማኒቴ?» ያጌዳ።
ኡንቱንቱ፥ «ኤ ጎዳው» ያጊ ዛሬዲኖ።
29ሄዋፔ ጉዪያን፥ ዬሱሲ ኡንቱንቱ ኣይፊያ ባሬ ኩሺያን ቦቺዴ ኡንቱንታ፥ «ሂንቴው ሂንቴንቱ ኣማኑዋዳን ሃኖ» ያጌዳ። 30ኡንቱንቱ ኣይፊ ዶዬቲ ኣጌዳ፤ ዬሱሲ ኡንቱንቶ፥ «ሃዋ ኦሲኔ ኦዶፒቴ» ያጊዴ ሚኒሲዴ ኦዴዳ። 31ሺን ኡንቱንቱ ቢዴ፥ ሄ ጋዲያ ኡባን ዬሱሳባ ኦዴዲኖ።
ዬሱሲ ኢቲ ዱዲያ ፓዳ
32ኡንቱንቱ ኬሲዴ ቢያ ዎዴ፥ ኣማሬዳ ኣሳይ ኢታ ኣያናይ ኦይቂና ዱዴዳ ቢታኒያ ዬሱሳኮ ኣሄዲኖ። 33ዬሱሲ ኢታ ኣያና ኬሴዳዋፔ ጉዪያን፥ ዱዴ ቢታኒ ሃሳዬዳ። ኣሳይ፥ «ሃዌ ኦራባ፤ ሃዋ ማላባይ ኢስራዔሊያ ጋዲያን ኡባካ ሃኒቤና» ያጊ ማላሌቴዲኖ።
34ሺን ፓሪሳዋቱ፥ «ኢ ኢታ ኣያናቱዋ ካፑዋ ዎልቃን ፃላሃቱዋ ኬሴ» ያጌዲኖ። #10፡25፤ 12፡24፤ ማር 3፡22፤ ሉቅ 11፡15
ዬሱሲ ኣሳሲ ቃሬቴዳ
35ዬሱሲ ኡንቱንታ ኣዪሁዳ ዎሳ ጎሌቱዋን ታማሪሲዴኔ ካዉቴ ዎንጋላ ሚሺራቹዋ ኦዲዴ፥ ቃሲ ሃርጊያ ኡባፔኔ ሳኩዋ ኡባፔ ኣሳ ፓዴ፥ ዎጋ ካታማቱዋኒኔ ቄሪ ካታማቱዋ ኡባን ዩዬዳ። #ማት 4፡23፤ ማር 1፡39፤ ሉቅ 4፡44 36ጮራ ኣሳ ቤዒዴ፥ ሄሚያ ኣሳይ ባይና ዶርሳዳን ኣሳይ ሂርጌቲያ ዲራዉኔ ኣሳ ማዲያባይ ባይና ዲራው፥ ኣሳው ቃሬቴዳ። #ፓይ 27፡17፤ 1ካት 22፡17፤ 2ኦድ 18፡16፤ ሂዝ 34፡5፤ ማር 6፡34 37ያቲዴ ባሬና ካሊያዋንታ፥ «ቆይቻው ጋካ ካይ ዳራ፤ ሺን ጫኪያ ኣሳይ ጉ። 38ሲሚ ካ ጎዳይ ካ ጫካናው ኦሳንቻቱዋ ዬዳና ማላ፥ ኣ ዎሲቴ» ያጌዳ።
© 2011, Wycliffe Bible Translators, Inc. All rights reserved.
Ooratha Caaquwaa - 더 알아보기
