ማቶሳ 16

ማላታ ቤዓናው ኦቼዳ ኦሻ

(ማር 8፡11-13፤ ሉቅ 12፡54-56)

1ኢቲ ኢቲ ፓሪሳዋቱኔ ሳዱቃዋናቱ ዬሱሳኮ ዪዴ፥ ኣ ፓጫናው ኮዬዲኖ፤ ያቲዴ ባሬንታ ሳሉዋፔ ማላታ ቤሳና ማላ ዎሴዲኖ። 2ሺን ዬሱሲ ዛሪዴ፥ ኡንቱንታ ሃዋዳን ያጌዳ፤ «ሳዓይ ቃሚያ ዎዴ ሂንቴንቱ፥ ‹ሳሉ ዞዔዳ ዲራው፥ ሳዓይ ሻማናዋ› ያጊታ፤ 3ዎንቱማን ቃሲ፥ ‹ሳሉ ዞዒዴ ጉባኔዳ ዲራው፥ ሃቼ ኢራይ ቡካናዋ› ያጊታ፤ ሳሉዋ ፄሊዴ፥ ሳዓይ ሃናናዋ ኤራናው ዳንዳዪታ፤ ሺን ታ ዩሳ ዎዲያ ማላታ ሻኪ ኤራናው ዳንዳይኪቴ? #16፡2-3 ኢቲ ኢቲ ጌሻ ማፃፋ ቤኒ ቢሌቱዋን ዬሱሳ ቃላቱ ሃ ፓይዳቱዋን ባዋ። 4ሃ ዎዲያ ኣሳይ ኢታይኔ ዎሹሚያዌ፥ ፆሳው ኣማኔቴናዌ፥ ማላታ ኮዬ፤ ናቢያ ዮናሳ ማላታፔ ኣቲን፥ ሃራ ማላታይ ኣው ኢሜቴና» ያጌዳ። ሄዋፔ ሲሚዴ፥ ኡንቱንታ ኣጊዴ ቤዳ።

ፓሪሳዋቱዋኔ ሳዱቃዋናቱዋ ኢርሹዋ

(ማር 8፡14-21)

5ኣ ካሊያዋንቱ ኣባ ፒኔዳ ዎዴ፥ ቁማ ኣፋናዋ ዶጌዲኖ። 6ዬሱሲ ኡንቱንታ፥ «ፓሪሳዋቱዋ ኢርሹዋፔኔ ሳዱቃዋናቱዋ ኢርሹዋፔ ሂንቴንታ ኤሪዴ ናጌቲቴ» ያጌዳ።

7ኡንቱንቱ ባሬንቱ ጊዶን፥ «ኢ ሃዋ ያጊያዌ ኑኒ ቁማ ኣሂቤና ዲራሳ» ያጊዴ ሃሳያ ዶሜዲኖ።

8ሺን ኡንቱንቱ ጊያዋ ዬሱሲ ኤሪዴ፥ «ሃ ኣማኑ ፓጬዳዋንቶ፥ ቁማይ ባይና ዲራው፥ ኣዪሲ ሂንቴንቱ ጊዶን ሃሳዪቴ? 9ሃዒካ ሂንቴንቶ ጌሊቤኔ? ታኒ ኢቼሹ ኡኪ ኢቼሹ ሻዓ ኣሳ ሚዛዴ ካሊሴዳዋ፥ ቃሲ ሂንቴንቱ ኣፑን ዛምቤሊያ ኩንዴ ኣቴዳ ሱፓ ዴንዲቴንቶ ዎዛና ኣኪቴ? 10ዎይ ታኒ ላፑ ኡኪ ኦይዱ ሻዓ ኣሳ ሚዛ ካሊሴዳዋ፥ ቃሲ ሂንቴንቱ ኣፑን ዛምቤሊያ ኩንዴ ኣቴዳ ሱፓ ዴንዲቴንቶ ዎዛና ኣኪቴ? 11ታኒ ሂንቴንታ ፓሪሳዋቱዋ ኢርሹዋፔኔ ሳዱቃዋናቱዋ ኢርሹዋፔ ናጌቲቴ ጊያዋፔ ኣቲን፥ ኡኪባ ሂንቴንቶ ሃሳያቤናዋ ሂንቴንቱ ዋኒዴ ኣኬኪኪቴ?» ያጌዳ።

12ኣ ካሊያዋንቱ ዬሱሲ ባሬንቶ ኦዴዳዋ፥ ፓሪሳዋቱዋ ቲሚርቲያፔኔ ሳዱቃዋናቱዋ ቲሚርቲያፔ ኡንቱንቱ ናጌታና ማላ ኦዴቶዋፔ ኣቲን፥ ሙናቃን ቲጊያ ኢርሹዋፔ ናጌታና ማላ ጊዴናዋ ሄ ዎዴ ኣኬኬዲኖ።

ጴፂሮሳ ኣማኑዋኔ ማርካቴ

(ማር 8፡27-30፤ ሉቅ 9፡18-21)

13ዬሱሲ ቂሳሪያ ፒሊጶሳ ጌቴቲያ ጋዲያ ጋኬዳ ዎዴ፥ ባሬና ካሊያዋንታ፥ «ኣሳይ ታና፥ ኣሳ ናዓ ኦና ጊ?» ያጊዴ ኦቼዳ።

14ኣ ካሊያዋንቱ ዛሪዴ፥ «ኔና ኢቲ ኢቲ ኣሳይ፥ ፃማቂያ ዮሃኒሳ ያጌ፤ ሃራንቱ ቃሲ ኤላሳ ያጊኖ፤ ቃሲ ሃራንቱ ኤርሚያሳ ዎይ ናባቱዋፔ ኢቱዋ ያጊኖ» ያጌዲኖ።

15ዬሱሲ ኡንቱንታ፥ «ያቲና ሂንቴንቱ ታና ኦና ጊቴ?» ያጌዳ።

16ሲሞኒ ጴፂሮሲ ዛሪዴ፥ «ኔኒ ዴዑዋ ፆሳ ናዓ ኪሪስቶሳ» ያጌዳ።

17ዬሱሲ ዛሪዴ፥ ሃዋዳን ያጌዳ፤ «ዮና ናዓ ሲሞና፥ ሃዋ ኔው ሳሉዋን ዴዒያ ታ ኣቡ ኤሪሴዳዋፔ ኣቲን፥ ኣሳይ ኦኒኔ ኔና ኤሪሲቤና ዲራው፥ ኔኒ ኣንጄቴዳዋ። 18ጴፂሮሳ፥ ታኒ ኔው ኦዳይ፤ ኔኒ ሹቻ፤ ታኒ ሃ ዛላ ቦላ ታ ዎሳ ጎሊያ ኬፃና፤ ታ ዎሳ ጎሊያ ሃራይ ኣቶ፥ ሲዖሊያ ዎልቃይካ ፆናናው ዳንዳዬና። 19ታኒ ኔው ሳሉዋ ካዉቴ ቁልፒያ ኢማና፤ ኔኒ ሳዓን ሃኖ ጎዌ ኡባይ ሳሉዋን ፆሳ ሲንን ሃናና፤ ሺን ኔኒ ሳዓን ሃኖፖ ጌዳዌ ሳሉዋንካ ሃኔና» ያጌዳ።

20ሄዋፔ ጉዪያን፥ ኢ ኪሪስቶሳ ጊዴዳዋ ኣ ካሊያዋንቱ ኦሲኔ ኦዴና ማላ፥ ኡንቱንታ ኣዛዜዳ።

ዬሱሲ ባሬና ጋካና ሜቱዋባኔ ሃይቁዋባ ኮይሮ ኦዱዋ ኦዴዳ

(ማር 8፡31-33፤ ሉቅ 9፡22-27)

21ሄ ዎዲያፔ ዶሚዴ ዬሱሲ፥ «ታኒ ዬሩሳላሜ ቢና፥ ታና ጪማቱ፥ ቄሳቱዋ ካፓቱኔ ሂጊያ ታማሪሲያዋንቱ ዳሪ ዋዪሳናው ቤሴ፤ ኡንቱንቱ ታና ዎናዉኔ ታኒ ሄዜን ጋላሲ ሃይቁዋፔ ዴንዳናው ቤሴ» ያጊዴ፥ ባሬና ካሊያዋንቱሲ ጌሺዴ ኦዱዋ ዶሜዳ።

22ጴፂሮሲ ኣ ኢቲ ባጋ ዛሪዴ፥ «ታ ጎዳው፥ ፆሳይ ኔና ሄዋፔ ኣሾ፤ ሃዌ ኔ ቦላ ኡባካ ዬና» ያጊዴ ኣ ዞራናው ዶሜዳ።

23ሺን ዬሱሲ ጉዬ ሲሚዴ ጴፂሮሳ፥ «ሃ ሴፃናው፥ ኔኒ ታ ማታፔ ኪቻ፤ ኔኒ ኣሳይ ዶሲያዋ ቆፒያዋፔ ኣቲን፥ ፆሳይ ዶሲያዋ ቆፔና ዲራው፥ ታው ቦ ጊዳዳ» ያጌዳ።

ዬሱሳ ካላናው ቤሲያ ኦጊያ

(ማር 8፡34-9፡1፤ ሉቅ 9፡23-27)

24ሄዋፔ ጉዪያን፥ ዬሱሲ ባሬና ካሊያዋንታ ሃዋዳን ያጌዳ፤ «ታና ካላናው ኮዪያ ኡራይ ዴዖፔ፥ ባሬና ካዶ፤ ያቲዴ ባሬ ማስቃሊያ ቶኪዴ፥ ታና ካሎ። 25ኣዪሲ ጎፔ፥ ባሬ ሼምፑዋ ኣሻናው ኮዪያ ኡራይ ባዪዛናዋ፤ ሺን ባሬ ሼምፑዋ ታ ዲራው ባዪዚያ ኡራይ ኣሻናዋ። 26ኢቲ ኡራይ ሳዓን ዴዒያ ኡባባ ባሬው ሺሺዴ፥ ባሬ ሼምፑዋ ባዪዞፔ፥ ኣ ኣያ ማዳኔ? ዎይ ኢቲ ኡራይ ባሬ ሼምፑዋ ዎዛናው ኣያ ኢማና ዳንዳዪ? 27ኣዪሲ ጎፔ፥ ታኒ፥ ኣሳ ናዓይ፥ ታ ኣቡ ቦንቹዋን ታ ኪታንቻቱዋና ያና ሃናይ፤ ኣሳ ኡባው ሄ ዎዴ ኣ ኦሱዋ ጋቲያ ኢማና። #25፡31፤ ማዝ 62፡12፤ ሮም 2፡6 28ታኒ ሂንቴንቶ ቱሙዋ ጋይ፤ ኣማሬዳ ኣሳቱ፥ ታኒ፥ ኣሳ ናዓይ፥ ካቲያ ጊዳዴ ዪያዋ ቤዓና ጋካናው፥ ሃይቄናዋንቱ ሃዋን ዴዒኖ» ያጌዳ።

선택된 구절:

ማቶሳ 16: dwrENT

하이라이트

복사