ᒨᓯᓯ ᓯᕗᓪᓖᑦ 18
18
ᐂᑉᕋᕼᐋᒻ ᐃᕐᓂᕐᑖᓛᕐᓂᖓᓂᒃ ᐊᖏᕐᕕᐅᓂᖓ
1ᐊᑕᓂᕐᓗ ᓴᖅᑭᑉᐳᖅ ᐂᑉᕋᕼᐋᒻᒧᑦ ᓇᐹᕐᑐᖃᕐᑐᒥ ᐆᒃᓂᒃ ᑍᔭᐅᔪᓂ ᒪᒻᕆᒥᒃ, ᐃᒃᓯᕙᑎᓪᓗᒍ ᑐᐱᖓᑕ ᐹᖓᓂ ᐅᓪᓘᑉ ᐅᖅᑰᓂᕐᐹᖓ ᓇᓪᓕᐅᑎᓯᒪᑎᓪᓗᒍ. 2#ᐄᑉᕈᐃᓄᑦ 13:2.ᑕᑯᓴᕋᒥᓗ ᑕᑯᕗᖅ, ᐊᖑᑎᓂᒃ ᐱᖓᓱᓂᒃ ᓇᖏᕐᑐᓂᒃ ᖃᓂᒋᔭᒥᓂ; ᑖᒃᑯᐊᓗ ᑕᑯᑐᐊᕋᒥᒋᑦ, ᐅᓪᓚᒃᓯᕗᖅ ᑐᐱᕐᒥᓂᑦ ᐸᕐᕆᐊᕐᓗᒋᑦ, ᐅᑯᓪᓗᓂᓗ ᑮᓇᓂ ᓄᓇᒧᑦ ᐊᒃᑐᕐᑎᓪᓗᒍ, 3ᐅᖃᕐᐳᕐᓗ, “ᐊᑕᓂᕋ ᐃᓕᖕᓄᑦ ᖁᕕᐊᒋᔭᐅᒍᒪ ᓵᖕᓂ, ᐱᔩᑦ ᖄᖏᑐᐃᓐᓇᕐᑍᓕᒍᒃ. 4ᐃᒥᕐᒥᒃ ᒥᑭᔪᒥᒃ ᕾᑦᓯᓂᐊᕋᒪ, ᐃᑎᒐᑦᓯ ᐅᐊᓴᐅᑎᒃᓴᖓᓂᒃ, ᓇᐹᕐᑑᓪᓗ ᐊᑖᓂ ᑕᕾᕐᓯᕐᓗᓯ. 5ᐂᒃᓯᕐᓂᐊᕐᐳᖓ ᓂᐊᖂᔭᓂᒃ ᒥᑭᔪᓂᒃ, ᐃᓱᐊᕐᓯᑦᓯᐊᕐᓂᐊᕋᑦᓯ, ᑭᖑᓂᖓᒍᑦ ᖄᖏᕈᓐᓇᕐᓂᐊᕐᐳᓯ, ᐱᔨᑦᓯᓐᓄᑦ ᑎᑭᓐᓇᑦᓯ.”
ᑖᒃᑯᐊ ᐅᖃᕐᐳᑦ, “ᑍᒤᓕᐅᓕᕆᑦ ᐅᖃᐅᓯᑎᑦ ᒪᓕᒡᓗᒋᑦ.”
6ᐂᑉᕋᕼᐋᒻᓗ ᑐᐊᕕᕐᓗᓂ ᑐᐱᕐᒥᓄᐊᕋᒥ ᓵᕋᒧᑦ ᐅᖃᕐᐳᖅ, “ᑐᐊᕕᕐᓗᑎᑦ, ᓂᐊᖂᔭᒃᓴᑦᓯᐊᒥᒃ ᐃᖑᑦᑎᓵᕆᑦ ᐆᒃᑑᑎᓂᒃ ᐱᖓᓱᓂᒃ; ᐆᑦᓯᓗᑎᓪᓗ.” 7ᐂᑉᕋᕼᐋᒻᓗ ᐅᓪᓚᒡᓗᓂ ᐆᒪᔪᖁᑎᒥᓄᐊᕐᐳᖅ ᓂᕈᐊᕐᓗᓂᓗ ᓄᕐᕋᕐᒥᒃ, ᐊᕿᑦᑐᒥᒃ ᐱᐅᔪᒥᒃ ᐱᔨᒥᓄᓪᓗ ᑐᓂᕚ, ᑖᑦᓱᒪᓗ ᑐᐊᕕᕐᓗᓂ ᓂᕿᓕᐊᕆᕚ. 8ᓰᓯᓕᐊᕆᓯᒪᔪᒥᒡᓗ ᐱᕗᖅ, ᐃᒻᒧᖕᒥᒡᓗᑦᑕᐅᖅ, ᐃᒻᒧᒃᓯᐅᒐᐅᓪᓗ ᓄᕐᕋᖓ ᐃᒐᔭᐅᕋᑖᕐᑐᖅ, ᑖᒃᑯᐊᓗ ᒪᓂᕔᑦ ᑖᒃᑯᓄᖓ; ᓇᐹᕐᑑᓪᓗ ᐊᑖᓂ ᓇᖕᒥᓂᖅ ᐱᔨᑦᓯᕋᕐᐰᑦ, ᑖᒃᑯᐊᓗ ᓂᕆᑎᓪᓗᒋᑦ.
9ᑖᒃᑯᐊᓗ ᐅᖃᐅᑎᕚᑦ, “ᓇᐅᒡᓕ ᓄᓕᐊᑦ ᓵᕋ?”
ᑖᑦᓱᒪ ᑭᐅᕔᑦ, “ᑐᐱᕐᒦᑉᐳᖅ.”
10 #
ᕉᒪᒥᐅᓄᑦ 9:9. ᑖᒃᑯᐊᓗ ᐃᓚᖓᑦᑕ ᐅᖃᐅᑎᕚ, “ᐱᕕᒃᓴᖅ ᓇᓪᓕᐅᑎᒃᐸᑦ ᐅᑎᓛᕆᕗᖓ, ᓄᓕᐊᓪᓗ ᓵᕋ ᐃᕐᓂᕐᑖᓛᕐᐳᖅ.”
ᓵᕋᓗ ᐂᑉᕋᕼᐋᒻ ᑐᓄᐊᓂ ᑐᐱᐅᑉ ᐹᖓᑕ ᐃᓗᐊᓃᑉᐳᖅ ᑐᓵᓪᓗᓂ. 11ᐂᑉᕋᕼᐋᒻᓗ ᓵᕋᓗ ᐃᓄᑐᖃᒻᒪᕆᐅᓕᓚᐅᕐᒪᑎᒃ; ᓵᕋᐅᓪᓗ ᐊᒡᓛᑦ ᑕᕿᑕᒫᑦ ᐊᐅᓈᖃᑦᑕᕐᓂᖓ ᓄᖅᑲᖓᓕᓚᐅᕐᐳᖅ. 12#1 ᐲᑦᑐᕉᓯ 3:6.ᑍᒤᒻᒪᑦ ᓵᕋ ᐃᓗᒥᒍᑦ ᐃᔪᕈᓱᓕᕐᐳᖅ, ᐅᖃᕐᓗᓂᓗ, “ᒫᓐᓇ ᓂᖏᐅᖑᓕᕋᒪ ᐅᐃᒐᓗ ᐃᑦᑑᓕᕐᓗᓂ, ᓱᓕ ᓄᓕᐊᕐᓂᕐᒥᒃ ᐊᓕᐊᓁᒍᓱᒍᓐᓇᕐᐳᖔ?”
13ᑕᕝᕙ ᐊᑕᓂᐅᑉ ᐂᑉᕋᕼᐋᒻ ᐅᖃᐅᑎᕚ, “ᖃᓄᐃᒻᒪᑦ ᓄᓕᐊᑦ ᓵᕋ ᑕᒪᑐᒥᖓ ᐃᔪᕈᓱᒃᐸ ᐅᖃᕐᓗᓂᓗ, ‘ᕿᑐᕐᖓᕐᑖᕈᓐᓇᕋᓗᐊᕐᐳᖔ ᐃᓄᑐᖄᓘᓕᕐᓗᖓ?’ 14#ᓘᑲᓯ 1:37.ᐊᑕᓂᕐᒧᑦ ᐊᔪᕐᓇᓗᐊᕐᑐᖃᕐᐹ? ᐅᖃᖅᑲᐅᒐᒪ, ᐱᕕᒃᓴᖅ ᓈᒻᒪᒃᓯᒃᐸᑦ ᐅᑎᓛᕆᕗᖓ, ᓵᕋᓗ ᐃᕐᓂᖃᓕᓛᕐᐳᖅ.”
15ᓵᕋᓗ ᒥᓯᐊᕐᐳᖅ. ᐅᖃᕐᓗᓂᓗ, “ᐃᔪᕈᓱᓚᐅᖏᑦᑐᖓ.” ᑲᑉᐱᐊᓱᓚᐅᕋᒥ.
ᑖᑦᓱᒪ ᑭᐅᕚ, “ᓱᓕᖏᓐᓇᕕᑦ, ᐃᔪᕈᓱᑬᓐᓇᕐᑐᑎᑦ.”
ᐂᑉᕋᕼᐋᑉ ᓱᑑᒪᒥᒃ ᓴᐳᑦᔨᓇᓱᐊᕐᓂᖓ
16ᐊᖑᑎᓪᓗ ᑖᒃᑯᐊ ᑕᕝᕙᓐᖓᑦ ᐱᓱᓯᕗᑦ, ᓱᑑᒪᐅᓪᓗ ᓇᓛᓄᑦ ᑕᑯᓐᓈᕐᓗᑎᒃ; ᐂᑉᕋᕼᐋᒻᓗ ᐃᓚᒋᕔᑦ ᖃᓂᐅᕐᓗᒋᑦ ᐊᐅᓪᓚᕐᕕᒋᔭᖏᓐᓄᑦ. 17ᐊᑕᓂᕐᓗ ᐅᖃᕐᐳᖅ, “ᐱᓇᓱᐊᕈᒪᔭᓐᓂᒃ ᐂᑉᕋᕼᐋᒧᑦ ᐊᓐᖏᒍᑦᔨᓂᐊᓐᖏᓚᖓ. 18ᖃᐅᔨᒪᒐᒪ ᐂᑉᕋᕼᐋᒻ ᑭᖑᕚᒃᓴᖏᑦ ᐃᓄᒐᓴᒡᔪᐊᓐᖑᕈᒫᕐᒪᑕ ᐱᔪᓐᓇᕐᑐᕐᔪᐊᖑᓗᑎᒡᓗ, ᑖᑦᓱᒨᓇᓗ ᐃᓅᖃᑎᒌᒡᔪᐊᑦ ᓮᒻᒪᕐᑎᑦᓱᒫᕐᐸᒃᑲ. 19ᐊᓐᖏᒍᑎᓂᐊᓐᖏᓚᕋ, ᓂᕈᐊᕐᓯᒪᒐᒃᑯ, ᐱᖁᔨᔪᒫᕐᒪᑦ ᕿᑐᕐᖓᒥᓂᒃ ᐃᓚᒥᓂᒡᓗ ᐊᑕᓂᐅᑉ ᐊᖅᑯᑎᖓᓃᖁᓪᓗᒋᑦ ᐃᓱᐊᕐᑐᓕᓂᒃᑯᑦ ᐊᑦᔨᒌᒃᑎᑦᓯᓂᒃᑯᓪᓗ; ᐊᑕᓂᖅ ᑐᓂᓯᖁᓪᓗᒍ ᐂᑉᕋᕼᐋᒧᑦ ᐊᖏᕈᑎᒋᓯᒪᔭᒥᓂᒃ ᑖᑦᓱᒧᖓ.”
20ᑕᕝᕙ ᐊᑕᓂᖅ ᐅᖃᕐᐳᖅ, “ᓂᐱᖃᕈᑕᐅᒻᒪᕆᓕᕐᒪᑎᒃ ᓱᑑᒪ ᒍᒨᕋᓗ, ᐊᔪᕐᑐᓕᓂᕋᕐᑕᐅᓪᓗᑎᒃ ᐱᐅᖏᑦᑐᕐᔪᐊᓂᒃ. 21ᑖᒃᑯᖕᓄᖓ ᐊᖅᑲᕆᐊᖃᕐᐳᖓ ᓂᐱᖃᕈᑕᐅᓂᖏᒃ ᑐᓴᕐᓯᒪᔭᒃᑲᒃ ᓱᓕᖕᒪᖔᑕ; ᑍᒤᖏᑉᐸᑕᓘᓐᓃᑦ ᖃᐅᔨᓂᐊᕋᒪ.”
22ᑕᕝᕙ ᐊᖑᑎᑦ ᑕᕝᕙᓐᖓᑦ ᕿᒪᕉᑎᕘᑦ, ᐱᓱᓯᓪᓗᑎᒡᓗ ᓱᑑᒪᐅᑉ ᓇᓛᓄᑦ, ᐂᑉᕋᕼᐋᒻᓕ ᓱᓕ ᓇᖏᓚᐅᕐᐳᖅ ᐊᑕᓂᐅᑉ ᓵᖓᓂ. 23ᐂᑉᕋᕼᐋᒻᓗ ᐊᑕᓂᖅ ᐅᐸᒃᑲᓐᓂᕐᓗᒍ ᐅᖃᐅᑎᕚ, “ᐸᓯᔭᒃᓴᐅᖏᑦᑐᓂᒃ ᐱᖃᓯᐅᑦᔨᓗᑎᑦ ᐱᐅᖏᑦᑐᓕᔪᓂᒃ ᓱᒋᐊᕐᓯᓂᐊᕐᐲᑦ? 24ᑕᕝᕙᓂ ᐃᒡᓗᒐᓴᖕᓂ 50ᓂᒃ ᐸᓯᔭᒃᓴᐅᖏᑦᑐᓂᒃ ᐃᓄᖃᕋᓗᐊᕐᐸᑦ, ᑖᒃᑯᐊ ᐃᒡᓗᒐᓮᑦ ᐊᑕᖏᕐᓗᒋᑦ ᓄᖑᑎᒃᑲᔭᕐᐱᒌᑦ? ᑖᒃᑯᐊᓘᓐᓃᑦ 50 ᓴᐳᑎᒐᔭᓐᖏᓚᑏᑦ? 25ᑍᒤᓕᐅᕈᒪᓂᕐᒥᒃ ᐃᓱᒪᓂᐊᕐᓇᒃ, ᐸᓯᔭᒃᓴᐅᖏᑦᑐᓂᒃ ᑐᖁᑦᓯᖃᓯᐅᑦᔨᓗᑎᑦ ᐊᔪᕐᑐᓕᔪᓄᑦ, ᐃᓱᐊᕐᑐᑦ ᐊᑦᔨᐅᓕᕐᓗᑎᒃ ᐃᓱᐃᑦᑐᓕᔪᓄᑦ! ᑕᒪᓐᓇ ᐃᓱᒪᒋᑦᑍᓕᒍᒃ! ᓄᓇᕐᔪᐊᕐᒥᐅᓄᑦ ᑕᒤᓐᓄᑦ ᐃᖅᑲᕐᑐᐃᔨ ᑍᒤᒍᓂ ᐃᓱᐊᕐᑐᒥᒃ ᐱᓂᐊᓐᖏᓚᖅ.”
26ᐊᑕᓂᖅ ᐅᖃᕐᐳᖅ, “ᓱᑑᒪᒥ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ 50ᓂᒃ ᓇᓂᓯᒐᔭᕈᒪ, ᑕᕝᕙ ᐃᒡᓗᒐᓮᑦ ᓱᒋᐊᕋᔭᓐᖏᓚᒃᑲ ᑖᒃᑯᐊ ᐱᓪᓗᒋᑦ.”
27ᐂᑉᕋᕼᐋᒻ ᐅᖃᒃᑲᓐᓂᕆᕗᖅ: “ᐸᓯᔭᒃᓴᐅᓚᖓ ᐅᕙᓐᓂᒃ ᐅᖃᕈᒪᒐᒪ ᐊᑕᓂᕐᒧᑦ, ᓴᓂᑐᐃᓐᓇᐅᔪᖓ ᐊᕐᔭᓕᓂᐅᓪᓗᖓᓗ. 28ᐃᒻᒪᖄᓕ ᐃᓄᖃᕋᔭᕐᐸᑦ ᐸᓯᔭᒃᓴᐅᒋᑦᑐᓂᒃ ᑕᓪᓕᒪᓂᒃ ᐅᓄᖏᓐᓂᕐᓴᐅᓗᑎᒃ 50ᓂᑦ. ᑖᒃᑯᐊ ᐃᒡᓗᒐᓮᑦ ᐊᑕᖏᕐᓗᒋᑦ ᓄᖑᒃᑲᔭᕐᐱᒌᑦ? ᑕᓪᓕᒪᓂᒃ ᖃᑦᓰᓐᓇᐅᓗᐊᕐᓂᖏᓐᓄᑦ?”
ᐊᑕᓂᐅᑉ ᑭᐅᕚ, “ᐃᒡᓗᒐᓮᑦ ᓄᖑᓐᓂᐊᓐᖏᓚᒃᑲ ᓇᓂᓯᒐᔭᕈᒪ 45ᓂᒃ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ.”
29ᐂᑉᕋᕼᐋᒻ ᐅᖃᒃᑲᓐᓂᕆᕗᖅ: “ᐃᒻᒪᖄᓕ 40ᑐᐃᓐᓇᐅᒃᐸᑕ?”
ᑖᑦᓱᒪ ᑭᐅᕚ, “40ᐅᒃᐸᑕ ᓄᖑᓐᓂᐊᓐᖏᓚᒃᑲ.”
30ᐂᑉᕋᕼᐋᒻ ᐅᖃᕐᐳᖅ, “ᐊᑕᓃᖅ, ᓂᓐᖓᐅᑎᑦᑍᓕᓐᖓ, ᓱᓕ ᐅᖃᒃᑲᓐᓂᕈᒪᒐᒪ. ᖃᓄᐃᒃᑲᔭᕐᐱᒋᓪᓕ 30ᑐᐃᓐᓇᐅᒃᐸᑕ?”
ᑖᑦᓱᒪ ᐅᖃᐅᑎᕚ, “30ᐅᒃᐸᑕ ᓄᖑᓐᓂᐊᓐᖏᓚᒃᑲ.”
31ᐂᑉᕋᕼᐋᒻ ᐅᖃᕐᐳᖅ, “ᐸᓯᔭᒃᓴᐅᓚᖓ ᐅᖃᕈᒪᖓᒪ ᐊᑕᓂᕐᒧᑦ, ᑕᕝᕙᓕᑭᐊᖅ 20ᑐᐃᓐᓇᐅᒐᔭᕐᐸᑕ?”
ᑖᑦᓱᒪ ᐅᖃᐅᑎᕚ, “ᓇᓂᓯᒐᔭᕈᒪ 20ᓂᒃ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ ᑖᒃᑯᐊ ᐱᓪᓗᒋᑦ ᐃᒡᓗᒐᓮᑦ ᓄᖑᓐᓂᐊᓐᖏᓚᒃᑲ.”
32ᐂᑉᕋᕼᐋᒻ ᐅᖃᕐᐳᖅ, “ᐊᑕᓃᖅ, ᓂᓐᖓᒃᑍᓕᒋᑦ, ᓱᓕ ᐊᑕᐅᓯᐊᕐᓗᖓ ᐅᖃᒃᑲᓐᓂᕈᒪᒐᒪ. ᖁᓕᑐᐃᓐᓇᐅᒃᐸᑕᓕ?”
ᑖᑦᓱᒪ ᐅᖃᐅᑎᕚ, “ᓇᓂᓯᒐᔭᕈᒪ ᖁᓕᓂᒃ ᑖᒃᑯᐊ ᐱᓪᓗᒋᑦ ᓄᖑᓐᓂᐊᓐᖏᓚᒃᑲ.” 33ᐂᑉᕋᕼᐋᒻᒧᑦ ᐅᖃᓪᓚᒌᕋᒥ, ᐊᑕᓂᖅ ᑕᕝᕙᓐᖓᑦ ᕿᒪᕉᑎᓯᕗᖅ, ᐂᑉᕋᕼᐋᒻᓗ ᐊᖏᕐᕋᒥᓄᑦ ᐅᑎᕐᓗᓂ.
Eastern Arctic Inuktitut Bible © Canadian Bible Society, 2012, 2021-2023.
