Luke 4
4
1စီးမှါခ့်ခါ ကိုယ်တော်ယေရှုကား ဉာဏ်အလင်းတော်ယောက် အတူတူငှါနင်းဘန်းနာ ဂျော်ဒန်မြစ်ဟက် ဒီဟာန်းဘန်း ညဏ်အလင်းတော် ဦးဆောင်သဘင်းနာယောက် သမီဆာထုတ်လားပင်းအရပ်ပါ လာန်ဘဲမှာ။ 2အန်ဘင်းနေရာဘေ မာရ်နတ်လှည့်စားသဘင်းတေ မာန်းရာတ်ဆီနူထုတ်ကွန်း ခံယူတော်မူသမှာ။ အန်ဘင်းမာန်းရာတ်အတွာန်းဘေ ဟိန်ကား ဟမာန်ကစဲ အယုတ်ညယ်နင်းဘင်းအတွာတ် အန်ဘင်းမာန်းရာတ်ဆွုန်မှါခ့်ခါ ယုတ်ခေါ့ပ်နီမှာ။ 3မာရ်နတ်ကား ကိုယ်တော်တေ "နာန်ကား ဘုရားရှာန်ဆာထှာဘန်းကား အဘင်းလုံးကရှီတေ ပေါင်မုန့်ထှာကွန်းငှေါရာန်" ညယ်ငှေါရာန်မှာ။ 4အန်၌မှါခ့်ခါ ကိုယ်တော်ရီးဒါး "သမီဆာကား ယုတ်တင်စားနူဆယောက် အဆာတ်စာနင်းလားအချီရားညယ် ကျမ်းကျိန်းနောင်းဘေ ရေးသကာပဲမှာ" ညယ်မိန့်တော်မူသမှာ။ 5စီးမှါခ့်ခါ မာရ်နတ်ကား ကိုယ်တော်တေ အကြီးကျယ်မြန့်သဘင်း ကယာစေါက်ပါကော်လာန်ဘဲဘန်း ကမ္ဘာစောက်ပေငှါဘင်းနိုင်ငံတေဒေ ခဏဆရောက် ကာရာန်မှာ။ 6မာရ်နတ်ကား ကိုယ်တော်တေ "ငါနင်းအီပဲဘင်း တန်ခိုးအာဏာတေယောက် ဘုန်းစည်းစိမ်တေဒေ ငါအီကာတ်ပင်းဆိတ်တေ အီရန်ဘင်းအတွာတ် နာန်တေငါအီကူ။ 7ငါတေဟလာန်းငုပ်ပန်း ဝိုင်သဘန်းကား အဘင်းတေဒေ နာန်နင်းအီကူ" ညယ်ငှေါမှာ။ 8အန်နိမ်စါန်းငှေါဒီ ကိုယ်တော်ကား "နာန်ဘင်းအရှာန်ထှာဘင်း ဘုရားတစ်ပါးတည်းတေ၌ဆာ ကိုးကွယ်သထှာကူ၊ ဟိန်အမှုတေဒေ၌ဆာ အွန်ထှာကူ ညယ် ကျမ်းကျိမ်းနောင်းဘေ ရေးသကာပဲမှာ" ညယ် မာရ်နတ်တေ ပြန်သဘန်းငှေါရာန်မှာ။ 9ပန်းနူ မာရ်နတ်ကား ကိုယ်တော်တေ ဂျေရုဆလင်မြို့ဘေငှါဘင်း ဗိမာန်တော်ပိုင်းဘေ ကော်လာန်ဘဲဘန်း "နာန်ကား ဘုရားဆာထှာဘန်းကား အဘင်းဟက် ဝါးအက်နာန်။ 10ဘုရားရှာန်ကား နာန်တေ စောင့်ရှောက်သဒင် မဲဘင်းဟမန်းတေဒေ မိန့်သပဲမှာညယ် ကျမ်းကျိန်းနောင်းဘေ ကာပဲဘင်းအတွာတ် နာန်ကား ကနာလူကလားအချီရား။ 11နာန်တာတေဒေ လုံးကရှီတေယောက် ထိသဘန်းအကနာကွန်း အန်တာတ်သဟူးယောက် ဖင်ပဲကြီးကလား" ညယ်ငှေါမှာ။ 12အန်၌မှါခ့်ခါ ကိုယ်တော်ယေရှုကား "နာန်ဘုရားရှာန်တေ အစမ်းသပ်သလူဝါး" ညယ် ကျမ်းကျိန်းနောင်းဘေ ကာပဲမှာ" ညယ်ပြန်သဘန်း မိန့်တာန်သမှာ။ 13မာရ်နတ်ရီးဒါး ကိုယ်တော်တေ နည်းမျိုးစုံယောက် ဖျားယောင်းသွေးဆောင်သဘန်း စီးမှါခ့်ခါ ကိုယ်တော်ဟက် ပူလာန်ပဲဘန်း အခွါမ်းရေးပန်းနူတေ စောင့်သနင်းဟာန်းမှာ။<br> 14စီးမှါခ့်ခါ ကိုယ်တော်ယေရှုကား ဉာဏ်အလင်းတော် တန်ခိုးယောက်ဖိန်းဘန်း ဂါလိလဲပြေပါ ပြန်သဘန်းကြွသဟာန်းမှာ။ ဟိန်ဘင်း ဆတာန်းတေရီးဒါး နေရာအနှံ့ ပြန့်သနင်းမှာ။ 15ကိုယ်တော်ယေရှုကား ဓမ္မာရုံတေဘေ ငှေါကာဆွောန်သကာအီမှါခ့်ခါ သမီဆာတာတ်ကား ဟိန်တေ အကြီးကျယ်ချီးမွမ်းသကြီးမှာ။ 16စီးမှါခ့်ခါ ကိုယ်တော်ယေရှုကား ဟိန်တုံန်းရီဘင်း နာဇရက်မြို့ပါ ဒီဟာန်းမှာ။ ဥပုသ်မာန်းရာတ်ပေ ကိုယ်တော်ကား ဓမ္မာရုံပါ ဟိန်လာန်နေကြအတိုင်း လာန်ဘန်း အန်ဘင်းဘေ ဟိန်ကား ကျမ်းကျိန်းဒေ ကျယ်ကူညယ် စပ်နာန်မှာ။ 17ကိုယ်တော်တေ ပရောဖက်ဟေရှာယ ကျမ်းစာအုပ်တေ အီရာန်မှါခ့်ခါ ဖွာမ်းသဘန်း ကျယ်ရာန်မှာ။ 18"ဆာန်းရဲဆားတာတ်တေ ကယ်တာန်သကူဘင်း ဆတာန်းတေ ငှေါကာဒင် ငါတေဘုရားရှာန်ကား မယ်မှာ။ ထောင်အက်နင်းဘင်းဆိတ်တာတ်တေ လွောပ်သစိန်းဒင်၊ မိတ်တူရှီအကတုံန်ဘင်းဆိတ်တာတ် ပြန်သဘန်းကတုံန်စိန်းဒင်ယောက် ဒုက္ခထုတ်ပန်းနင်းဘင်းဆိတ်တာတ် လွောပ်သကြီးဘန်းငှေါဘင်းတေ ကြေငြာသဒင် ဘုရားရှာန်ကား ငါတေတာတ်နီမှာ။ 19အဘင်းအချိန်ကား ဘုရားရှာန်ကားဟိန်ဘင်း အကြီးကျယ်မြင့်မြတ်သဘင်း ကရုဏာတော်တေ ကာကူဘင်းအချိန်ထှာမှာ" ညယ်ထှာမှာ။ 20စီးမှါခ့်ခါ ကိုယ်တော်ယေရှုကား အန်ဘင်းကျမ်းကျိန်တေ လိပ်သဘန်း ဓမ္မာရုံတာဝန်ခံနင်း အီစီးဘန်း ထုံးရာန်မှါခ့်ခါ ဓမ္မာရုံနောင်းဘင်း သမီဆာတေကား ကိုယ်တော်ယေရှုတေ ယူစိန်စာတ်ပန်း နင်းကြီးရာန်မှာ။ 21စီးမှါခ့်ခါ ဟိန်ကား အန်တာတ်တေ "ဟနိမ်သက်ပူရာန်ဘင်း ကျမ်းကျိန်းတေကား အရာတ်မှာတ် အဟုတ်မလပ်ထှာရီဘန်း" ညယ်မိန့်သမှာ။ 22ကိုယ်တော်ယေရှု ငှေါဘင်းတူးတေဒေ သက်ပူဘင်းဆိတ်တာတ်ရီးဒါး မာန်တာတ်မိသနင်းကြီးရီဘန်း "အဘင်းဆိတ်ကား ယောသပ်ဆာအချီနော်" ညယ်အချန်းချန်း ငှေါကြီးမှာ။ 23ကိုယ်တော်ရီဒါး "အုပ်ဆရာကြီးကား ဟိန်ကိုယ်တိုင်အရာန် ကုသထှာကူ ငှေါဘင်းတူးနိမ် ကပေရနောင်မြို့ဘေ ငှါအွန်နီဘင်းနာတေဒေ ကိုယ်နင်းဘင်းမြို့ဘေရီး အွန်ညယ် ဟနိမ်ကား ငါတေ အဟုတ်မလပ်ငှေါကြီးကူ။ 24အန်နိမ်စါန်းငှေါဒီ ငါချည်လားတေငှေါထှာဘန်းကား၊ ဟာဘင်းပရောဖက်တာတ်တေဆဲ ကိုယ့်မြို့ဘင်း သမီဆာတာတ်ကား အလက်ခံသကြီးရား။ 25ငါပြန်သဘန်း ချည်လားတေ ငှေါထှာဘန်းကား ပရောဖက်ဧလိယလာတ်ထာတ်မှါခ့်ခါ ဆွန်းပီးပိုင်း ဟလာန်းခေါင်သဘင်းအတွာတ် ယုတ်တင်အဘိုဘင်းဒုက္ခတေ ခံသကြီးရီထှာမှါခ့်ခါ အစ္စရေးပြေဘေ မုဆိုးမတေ ကလောင်းတုံန်းငှါရီမှာ။ 26ဘုရားရှာန်ကား ဧလိယတေ အစ္စရေးပြေဘေငှါဘင်း မုဆိုးမတေပါ ကူညီသဒင် အတာတ်ညယ် ဇိဒုန်မြို့ပိုက်ပင်း၊ ဇရတ္တမြို့ဘေငှါဘင်း မုဆိုးမဟော်ဝါပါ ကူညီသဒင် တာတ်နာန်မှာ။ 27ပရောဖက် ဧလိယခေတ်မှါခ့်ခါရီးဒါး အစ္စရေးသမီဆာနောင်းဘေ ကမာတုံန်းရောဂါဆယ်တေ ကလောင်းတုံန်းငှါရီမှာ။ အန်နိမ်စါန်းငှေါဒီ အန်တာတ်နောင်းဟက် ဆီးရီးယားပြေဆားထှာဘင်း နေမန်ဟော်ဝါဟက် လွဲသဘန်း ဟာဟမဲတေစဲ အကုသကြီးလူဝါးညယ်" မိန့်သမှာ။ 28ကိုယ်တော်ယေရှု ငှေါဘင်းတူးတေဒေ သက်ပူကြီးမှါခ့်ခါ ဓမ္မာရုံနောင်းဘင်း သမီဆာတေကား အကြီးကျယ်တင်းဟော့ကြီးဘန်း 29ရဲဘန်း ကိုယ်တော်တေ မြို့ပြာန်ပါ ငါတ်ပူကြီးဘန်း ခြောက်ကမ်းပါးစောက်ခက် နူအက်တင် မြို့တည်သပဲဘင်း ကယာပိုင်းပါ ကော်လာန်ဘဲကြီးမှာ။ 30ကိုယ်တော်ယေရှုကား သမီဆာအုပ်နောင်းဟက် ပူလာန်ဘဲဘန်း ကြွသလာန်ဘဲမှာ။
အမဲဘင်းနနူတေငါတ်ပူဘင်း 31စီးမှါခ့်ခါ ကိုယ်တော်ကား ဂါလိလဲပြေဘေငှါဘင်း ကပေရနောင်မြို့ပါ လာန်ဘန်းနာ ဥပုသ်မာန်းရာတ်မှါ့ခ်ခါ ဓမ္မာရုံဘေ ဆွောန်သကာ ဟောသကာဘန်းနင်းမှာ။ 32ကိုယ်တော်ကား အခွာမ်းအာဏာတေယောက် ဟောသကာ ဆွောန်သကာဘင်းအတွာတ် သမီဆတာတ်ကား ဟိန်ဆွာန်သကာ အီဘင်းနာတေဒေ အံ့ဩသဘန်း ချီးမွမ်းသကြီးမှာ။ 33အန်ဘင်းဓမ္မာရုံနောင်းဘေ အမဲဘင်းနနူကပ်ပန်းနင်းဘင်း သမီဆာဟော်ဝါကား ဆကလားဝါတ်ဆလာတ်တုံန်းယောက် ကိုယ်တော်တေ 34"နာဇရက်မြို့ဆားယေရှု၊ နာန် အလေတေ ဟာနိမ်အွန်ကူတေ။ အလေတေ ဖြတ်ဆီးသကူညယ်ဒီလားရယ်။ နာန် ဟာဟမဲငှေါဘင်းနာဒေ အလေမိန်းရှာတ်ခါမှာ။ နာန်ကား ဘုရားရှာန်ဟက် ကြွဒီဘင်း မြင့်မြတ်သဘင်းဆိတ်ထှာမှာ" ညယ်ဟာတ်ပန်းငှေါရာန်မှာ။ 35အန်၌မှါခ့်ခါ ကိုယ်တော်ကား အမဲဘင်းနနူဒေ "ယူရှီရှီဆာ ဟိန်ဟက်ပူလာန်ဘဲ" ညယ်အမိန့်အီရာန်မယောက် ချတ်ချန်း အမဲဘင်းနနူကား အန်ဘင်းသမီဆာတေ သမီဆာတာတ်မန်းဘင်း ကာစောက်ပေပေါ်ဘန်း ဟမာန်ကစဲအအွန်ညယ် ဟိန်ဟက် ပူလာန်ဘဲမှာ။ 36ဓမ္မာရုံနောင်းဘင်း သမီဆာတာတ်ရီးဒါး အံ့ဩသကြီးဘန်း "အဘင်းကား ဟာနိမ်တူးတေဒမား။ ဟိန်ငါတ်ပူရာန်မရောက် အမဲဘင်းနနူကား ပူလာန်ဘဲထှာဘင်း အခွာမ်းအာဏာ တန်ခိုးတေကား ဟိန်ဘေငှါဘန်းနင်းမှာ" ညယ်အချန်းချန်း ငှေါနင်းကြီးမှာ။ 37စီးမှါခ့်ခါ ကိုယ်တော်ဘင်း ဆတာန်းတေရီးဒါး နေရာအနှံ့ ပျံ့သလာန်ဘဲမှာ။<br> 38ကိုယ်တော်ကား ဓမ္မာရုံဟက်ပူဘန်း ရှိမုန်ကျေမ်းပါ လာန်မှါခ့်ခါ ရှိမုန်မယ်စောင်ကား အကြီးကျယ်ကနာဟာဘန်းနင်းဘင်းအတွာတ် သမီဆာတာတ်ကား ဟိန်တေ ကုသအီဒင် ကိုယ်တော်တေ လျှောက်တာန်သကြီးမှာ။ 39အမှာတွာတ် ကိုယ်တော်ကား အီးရှီပိုက်ပါလာန်ဘန်း ကနာဟာနင်းဘင်းနာတေ ကယာစိန်းဒင် အမိန့်အီရာန်မယောက် ဟိန်ကား မဲဟာန်းရီဘန်း ချတ်ချန်းရဲဘန်းနာ အန်တာတ်တေ ဧည့်ခံသမှာ။ 40စမိတ်ဆာန်မှါခ့်ခါ ရောဂါအမျိုးမျိုးထှာနင်းဘင်း သမီဆာတေဒေ ကိုယ်တော်ယေရှုပါဘေ ကော်ကြီးရီမှါခ့်ခါ ဟိန်ကား ကနာနင်းဘင်း သမီဆာဟော်ဝါလာန်စောက်ပေ သဟူးယောက် တာန်သဘန်းနာ ရောဂါတေဒေ ကယာစိန်းမှာ။ 41အမဲဘင်းနနူတာတ်ရီးဒါး အနင်းမဲဘင်း သမီဆတာတ်ဟက် ပူကြီးရီဘန်း "နာန်ကားဘုရားဆားတော်ထှာမှာ" ညယ်ဟာတ်ကြီးမှာ။ ကိုယ်တော်ယေရှုကား ကယ်တာန်ရှာန်မေရှိယ ထှာဘင်းနာတေ အန်တာတ် မိန်းရှာတ်ခါနင်းဘင်းအတွာတ် ကိုယ်တော်ယေရှုကား အန်တာတ်တေ အန်နိမ်အငှေါကွန်း အမိန့်အီရာန်မှာ။<br> 42နောက်မာန်းရာတ် ဟလာန်းယားမှါခ့်ခါ ကိုယ်တော်ကား သမီဆာထုတ်လား စစ်ပင်းအရပ်ပါဘေ ပူလာန်ဘဲမှာ။ အန်နိမ်စါန်းငှေါဒီ သမီဆာတာတ်ကား သာန်ကြီးဘန်း ကတုံန်ရာန်ဘင်းအတွာတ် အန်တာတ်ဟက် အပူလာန်ဘဲဒင် လျှောက်တာန်သကြီးမှာ။ 43အန်နိမ်စါန်းငှေါဒီ ကိုယ်တော်ကား "ငါကား တစ်ခြားဘင်းမြို့တေဒေရီးဒါး မန်းဂလာဆတာန်းမလဲထှာဘင်း ဘုရားရှာန်ဘင်း သာသနာတော်အကြောင်းတေဒေ ဟောသကာအီထှာယုတ်ကူ။ အနိမ်ဟောသကာဒင် ဘုရားရှာန်ကား ငါတေ တာတ်နီမှာ" ညယ်မိန့်တော်မူသမှာ။ 44စီမှါခ့်ခါ ကိုယ်တော်ကား ယုဒပြေဘင်းဓမ္မာရုံဘေတေ ဆာတ်သဘန်း တရားဟောသကာမှာ။
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
