Luqaasa Mishiraachcho 11
11
Yesusi Tamaarsida Woosa
(Mato 6:9-13; 7:7-11)
1Issi gallas Yesusi issison woossides; izi woosaa wursishin iza kaallizaytappe issoy, «Godoo! Xammaqiza Yohannisi bana kaallizayta woosa tamaarsidayssaththo nekka nuna woosa tamaarsa!» gides.
2Izikka isttas,
«Woossishe, ‹Nu Aawawu!
Ne sunththi anjjetto;
ne kawoteththi haa yo.
3Hachchis gidiza quma nuus imma.
4Nuna qohidayta nu maariza mala
nuna maara;
paacenkka nuna gelththofa›
gi woossite» gides.
5-6Qasseka, «Inttefe issaades laggey diikko leela giddoth he laggezaso biidi, ‹Taas issi imaththi ogeppe yiin mizana kaththi baynda gishshas heedzdzu solloy diikko taas tal7arkkii?› 7Laggezikka zaaridi, ‹Tana waayisoppa; kareykka gordettides; tanikka naytara ichchadis. Ha7i dendada immanaas dandaykke› gaandee? 8Tanikka inttes yootays; laggeteththaa gishshas dendidi immontta aggikokka izi oyshon saleththida gishshas dendidi koyzayssa ubbaa immides.
9«Hessa gishshas tani inttes gizay woossite inttes imettana; koyite intte demmana; kare qoxxite inttes doyettana. 10Ays giikko woossizay wuri ekkana; koyzaykka demmana; kare qoxxizaadeska doyettana.
11«Inttefe aawaa gidi uttidi izi yelida nay mole oychchiko shoosh immizay daandee? 12Woykko phuuphphulle oychchiko masimaso immizay daandee? 13Intte iitata gidishe intte naytas lo7o imota imo erikko salon diza intte Aaway bana woossizaytas Xillo Ayana wostti darssi immennee?» gides.
Yesusanne Bi7elizeebula
(Mato 12:22-30; Mar 3:20-27)
14Issi gallas Yesusi haasayssontta duude daydanth kessides. Daydanththazikka kezidaappe guye doona duude addezi haasaydes; be7ida asatikka darssi malalettida. 15Gido attiin issi issi asati, «Bi7elizeebula geetettiza daydanththata halaqan daydanththata kessees» gida.#Mato 9:34; 10:25
16Issi issi asay iza paaccanaas, «Saloppe malata bessa» giidi oychchides.#Mato 12:38; 16:1; Mar 8:11 17Gido attiin Yesusi istta qofaa eridi, «Ba giddon shaakettiza kawoteththi wuri dhayana; ba giddon sigay baynda keeththika kundana. 18Intte tana, ‹Bi7elizeebulan daydanththata kessees› giidi haasayeeta shin Xala7eykka ba giddon issoy issaafe shaakettiko iza kawoteththi waani minnanee? 19Histtiko tani daydanththata Bi7elizeebulan kessiko intte nayti oonan kessandettoo? Hessa gishshas intte nayti intte bolla pirdizayta gidana. 20Gido attiin tani daydanththata kessizay Xoossa wolqqan gakkides; Xoossa Kawoteththay intteko matidaaro erite.
21«Mino asi lo7eththi gixettidi ba keeththe naagikko keeththaan diza miishshi lo7on naagettees. 22Gido attiin izappe hara mino asi yiidi xoonikko izi ammanettida ola miishshata woththi ekkidi izas diza haarozakka wursi haras gishana.
23«Tanara gidonttay tanara eqettees; tanarakka shiishshonttaadey laallees,#Mar 9:40
Iita Ayanay Aggi Bidaso Simmi Yuus
(Mato 12:43-45)
24«Tuna ayanay asappe kezida wode shemposo koyishe haaththi baynda melason waayettees; shemposoy dhaykko, ‹Tani kase kezidaso guye simmana› gees. 25Izappe simmidi yishin kase izi aggi bida keeththay pitettidinne giigi uttidayssa demmees. 26Hessafe simmi biidi baappe iitiza hara laappun daydanththata banara ekkidi yees; isttika gelidi heen daana; hessaadeska koyroyssafe guyeyssi keehi iita gidana» gides.
Tumu Anjjo
27Yesusi hessa haasayza wode asaa giddofe issi maccas dizaara ba qaala dhoqqu ooththada, «Nena tookkida qanththinne ne dhammida dhanththati anjjettidayta» gadus.
28Gido attiin izi, «Anjjettidayti Xoossa qaala siyidi azazettizayta» gides.
Yoonaasi Malata Gideth
(Mato 12:38-42; Mar 8:12)
29Daro derey Yesusaakko shiiqida wode Yesusi, «Hayssi yeletay iita yeleta; gita malata beyanaas koyees; gido attiin Yoonaasa malaatappe hara dumma malatay imettenna. 30Gaasoykka Yoonaasi Nannawe asaas malata gidida mala asa nay tani ha yeletas malaata gidana.#Yoha 3:4 31Dugeha dere macca kawoya Solomoone erateth beyanaas biitta gaxappe dendada yida gishshas pirda wode iza ha yeletara dendada pirdana; hekko Solomooneppe aadhdhizaadey haan dees.#1Kawo 10:1-10; 2Taari 9:1-12 32Yoonaasi sabbakishin siyidi Nannawe asay ba nagarappe maarettida gishshas ha yeletara issife dendidi pirdana; gido attiin Yoonaasappe aadhdhizay haan dees.
33«Xomppe oyththidi kareppe geliza asas poo7ana mala qoncceson woththeettes attiin geemason woththiza asi deenna. 34Ne asateththas poo7oy ne ayfe; ne ayfey paxa gidikko ne kumeththa asateththayka poo7o gidana; ne ayfey sakettiko ne kumeththa asateththay dhuma gidana. 35Hessa gishshas nenan diza poo7oy dhumontta mala naagetta. 36Histtiko ne asateththay poo7o gidikko dhumida asateththi deenna aggiko ne kumeththa asateththay xomppey lo7eththi poo7iza mala lo7i beettana» gides.
Yesusi Walassida Farsaawetanne Wogaa Tamaarsizayta
(Mato 23:1-36; Mar 12:38-40)
37Yesusi haasaya wursida mala issi Farsaawey banara quma maanaas Yesusa xeygides. 38Yesusi quma maana kushe meecettontta aggidayssa be7idi malalettida.
39Goday izas, «Ha7i intte Farsaaweti xuu7assinne keres bolla bagga meecci geeshsheeta; inttes giddo baggazi uuzeteththaninne iitateththan kumides. 40Intteno eeyatoo! Kare bagga medhdhiday giddo bagga medhdhibeennee? 41Yo7on gidikko giddon dizayssa muxuwaata immite; he wode wurikka inttes geesh gidana.
42«Intteno Farsaawetoo! Inttes aayye ana! Aanugappenne xalotappe qasseka dumma dumma kaththafe tammaafe issino kesseeta; gido attiin tumu pirdanne Xoos dosanayssa aggi aadhdheeta; gidikkoka intte aggi aadhdhanaas bessenna; hankkoyssa aggontta intte ooththana bessizaytikka hayta.
43«Intteno Farsaawetoo! Inttes aayye ana! Ayhuda Woosa Keeththan uttanaas bonchcho oyde koyeeta; giya giddonkka asay intte sinththan hokkana mala doseeta. 44Asi erontta iza bollara biza qotetti diza duufo intte misatiza gishshas inttes aayye ana!» gides.
45Muse wogaa erizaytappe issoy zaaridi, «Astamaaree! Ne hessaththo haasayza wode nunakka cayaasa» gides.
46Yesusikka zaaridi, «Intteno Muse wogaa erizaytoo intteska aayye ana! Asi tookkanaas dandayontta deexo tooho as toosseeta; intte gidikko biradhdhe xeerankka bochcheketa.
47«Intte Aawati wodhida nabeta duufo intte lo7eththiza gishshas inttes aayye ana. 48Histtiko intte intte aawata ooso minththiza markkatta; istti nabeta wodhida; intteka istta duufo lo7eththeeta.
49«Hessa gishshas Xoossa erateththi, ‹Nabetanne Hawaareta ta isttas yeddana; isttika isttafe issaa issaa wodhana; haratakka gooddana. 50Hessa gishshas ha yeletay biittay medhettoosofe ha7i gakkanaas gukkida nabeta ubbaa suuththaa gishshas oyshettana. 51Aabeele suuththafe doommidi yarshizasoppenne Xoossa Keeththa giddon gukkida Zakaraasa suuththa gakkanaas koyeettes› gadus. Ee ta inttes gizay ha yeletay hayssas oyshettana.
52«Intteno woga erizaytoo! Inttes aayye ana! Erateththa penge qulpe wolqqara woththi ekkidi intteska gelibeekketa; gelanaytakka diggeeta» gides.
53Yesusi heeppe kezidaappe guye Xaafetinne Farsaaweti eqettishe oyshan shempo diggida. 54Iza doonappe keziza qaalan iza qaxxanaas naagettida.
The Word for the World International
