मर्कुस 12
12
अंगुर खेतिको अदिंया अद्या उखान
(मत्ति २१:३३-४६; लुका २०:९-१९)
1इसुले तिनुलाइ उखानमि यसो भुन्न लाग्या, “एकजना मान्सले अंगुरखेति लाइबर तइका चारइतिर बाण हाल्यो। रे खाल्टो खणिबर अंगुर पेल्ल्या कोल लइ बनाइदियो। पइ रेखदेख अद्दाइलाइ एक पहरो दिन्या ठउँर बनाइबर अंगुरखेति तिनुले अदिंया बनाउन्या किसानलाइ जिम्मा दिबर आफुभन्या प्रदेसतिर लाग्यो। 2फसलका बेला तइ मान्सले तिनु अदिंया बनाउन्या किसानबटहइ केइ फल ल्याउनाइलाइ एक जनो नउकरलाइ पठायो। 3तर तिनुले तइलाइ समाइबर हाण्यो रे रितोइ हात लाइदियो। 4तइपाछा मालिकले तिनरा वाँ अर्खो नउकर पठायो, रे तिनुले तइका मुन्डामि हाण्यो रे तइको बेजत अर्यो। 5मालिकले अज अर्का नउकरलाइ पठायो, तर तइलाइ तिनुले मार्यो, रे अउर कतिबइलाइ लइ पठायो, रे तिनुले कसइलाइ हाण्यो रे कसइलाइ मार्यो। 6आब अन्तमि तनरो एकइ मात्तर प्यारो चेलो बाँकि रयाथ्यो। ‘मेरा चेलालाइ त तिनुले पक्का मान-सम्मान अरन्ना’ भनि उनुले आफनाइ चेलालाइ तिनरा वाँ पठायो। 7तर तिनु अधिया बनाउन्या किसानले आपसमि भुन्यो, ‘यो त हकवालो हो।’ आस्, हामु यइलाइ मारु, रे अंङगुर खेतिको हक हामरोइ हुन्या छ।” 8रे तिनुले उइलाइ समाइबर मार्यो, रे अंगुर खेतिका बाइर लइजाइबर फालिदियो। 9आब तइ अंगुर खेतिका मालिकले क्या अद्द्या छन्? तिनु आउन्या छन्, रे तिनु अधिया बनाउन्या किसानलाइ नास अद्या छन्। पइ अंगुर खेति अउरुइलाइ दिन्याछन्। 10क्या तमुले धर्म-सास्त्तरमि भया यो बचन पण्या आथिन्?
“जइ ढुङालाइ घर बनाउन्याले रद्द अर्यो
तेइ ढुङो कुनाको सिर-ढुङो भयो, 11यो परमप्रभुबटहइ भया हो,
रे यो हामरा हेराइमि कति अचम्मको काम छ!”
12तइपाछा तिनुले इसुलाइ पकड्ड खोज्यो, क्यालाइकि यो उखान उनुले तिनराइ बिरुद्दमि भुन्या हो भनि तिनुले बुज्यो। रे तिनु भिडसित डराया हुनाले उनुलाइ छाडिबर गइग्या।
रोमि महाराजालाइ कर बुजाउन्या बिसयमि प्रस्न
(मत्ति २२:१५-२२; लुका २०:२०-२६)
13तइपाछा कति जना यहुदि अगुवाले इसुलाइ कुराइकुरामि फसाउनालाइ फरिसि रे हेरोद राजाका केइ मान्सलाइ पठायो। 14तिनुले आइबर उनुलाइ भुन्यो, “गुरु जि, हामुलाइ था छ कि तम साँचो कुरा बोलन्छउ, रे मान्सले क्या भनन्ना भनिबर लइ वास्ताइ अद्दाइन्। क्यालाइकि तमु मान्सको मुख हेरिबर काम अद्दाइन, तर परमेस्वरको बाटो साँचो रितिले सिकाउन्छउ। आब भुन हामुले रोमि महाराजालाइ कर तिद्द हामरा ब्यबस्था अन्सार ठिक हो कि नाइ?”
15इसुले तिनुको कपटिपन था पाइबर तिनुलाइ भुन्यो, “तमु क्यालाइ मेरो जाँच अरन्छउ? मुइलाइ एक चाँदिको सिक्का लेइबर दिय।”
16तिनुले एक चाँदिको सिक्का लेइबर दियो। उनुले त्यो सिक्का धेकाइबर तिनुलाइ भुन्यो, “यो छाप रे नाउँ कइको हो?”
तिनुले उनुलाइ भुन्यो, “यो त #१२:१६ कइसर भुण्या रोमि सरकार हो।रोमि महाराजाको हो।”
17तबइ इसुले तिनुलाइ भुन्यो, “रोमि महाराजाको जति रोमि महाराजालाइ दिय, रे परमेस्वरको जति परमेस्वरलाइ दिय।”
इसुको यसो जबाफ सुनिबर तिनु अचम्म पण्या।
मर्याबटहइ जिउना हुन्या बिसयमि प्रस्न
(मत्ति २२:२३-३३; लुका २०:२७-४०)
18मान्स मर्यापाछा अज जिउना हुनाछन् भन्या कुरामि बिस्वास नअद्द्या कोइ कोइ सदुकि दलका मान्स इसुका वाँ आया रे सोद्यो, 19“हे गुरु, मोसाले हामरि निउति लेख्दिया नियम अन्सार कसइको दाइ सन्तान नभएइ मर्यो भन्या दाइकि निउति सन्तान हउ भनिबर भाइले बउजुसित ब्या अद्दुपणन्छ। 20आब एक समयमि सात जना दाइभाइ थ्या। जेठा दाइले ब्या अर्यो, रे उ चेला-चेलि नभएइ मर्यो। 21तसो भया हुनतक माइला भाइले बउजुलाइ ब्या अर्यो, रे उ लइ चेला-चेलि नभएइ मर्यो। साइलो भाइ लइ तसेरि मर्यो। 22तसेरि सातइ भाइले पालोइ पालो बउजुसित ब्या अर्यो रे बिनासन्तानइ मर्या। अखिरमि त्यो स्वाइनि लइ मरि। 23तलाइ त सातइ भाइले ब्या अर्या थ्यो। आब सप्पइ जना मर्याबटहइ जिउना हुन्याबेला त्यो कइकि स्वाइनि हुनेइ हो।”
24इसुले तिनुलाइ भुन्यो, “तमु ठुला भुलमि छउ क्यालाइकि तमुले न धर्म-सास्त्तरका बिसयमि न त परमेस्वरका सक्तिका बिसयमि बुज्या रइछउ। 25मर्या मान्सन जिउना भयापाछा त तिनुमि ब्या अद्द्या रे अराउन्या कुराइ हुनइन्। तिनु त स्वर्गमि रन्या स्वर्गदुत जसा हुनाछन्। 26मर्याबटहइ जिउना भइ उठ्ठया कुराका बिसयमि भन्न्या हो भन्या परमेस्वरले मोसालाइ बल्लारया पोथाबटहइ भुन्या कुरा क्या तमुले पण्या आथिन्? उइबेला परमेस्वरले मोसालाइ यसो भुन्याथ्यो, ‘मु अब्राहाम, इसहाक रे याकुबका परमेस्वर हुँ।’ 27उनु त मर्या हुन्याका परमेस्वर हइन, तर जिउना हुन्याका परमेस्वर हुन्! तमु ठुला भुलचुकमि पण्याछउ।”
सप्पइ भन्ना ठुलो आग्या
(मत्ति २२:३४-४०; लुका १०:२५-२८)
28एक जना धर्म-गुरुले ताँ भया सप्पइ कुरा सुनिरइथ्यो। इसुले मान्सलाइ ठिक जबाफ दिया धेकिबर तिनुले उनुलाइ सोध्यो, “सप्पइ आग्या भन्ना ठुलो आग्या क्या हो?”
29इसुले भुन्यो, “सप्पइभन्ना ठुलो आग्या यो हो, ‘हे इस्राएल सुन, परमप्रभु हामरा परमेस्वर एक मात्र परमप्रभु छन्। 30तुइले परमप्रभु आफना परमेस्वरलाइ तेरा पुराइ ह्रिदयले, पुराइ परानले, पुराइ समजले, रे तेरा पुराइ सक्तिले पिरिम अर।’ 31दोसरो आग्या लइ यसोइ छ, ‘तुइले आफना छिमेकिलाइ आफुइलाइ पिरिम अर्या जसेरि पिरिम अर।’ यइहइ ठुलो आग्या अउर आथिन्।”
32यो सुनिबर धर्म-गुरुले इसुलाइ भुन्यो, “साँच्चि तमले ठिक भन्या, तमले भन्या जसेरि परमेस्वर त एकइ मात्तरइ छन्, उनुबाहेक अउर कोइ लइ परमेस्वर अथिन्। 33उनुलाइ पुराइ ह्रिदयले, पुराइ समजले, पुराइ सक्तिले पिरिम अद्दु, रे छिमेकिलाइ आफुलाइ जसेरि पिरिम अद्दु सप्पइ होमबलि रे बलिदान भन्ना उत्तम हो।”
34तिनुले बुद्दिमानिसित जबाफ दिया धेकिबर इसुले भुन्यो, “तमु परमेस्वरका राज्यबटहइ टाणा आथिन्।” तइ बेलाबटहइ उनुलाइ प्रस्न सोद्दया कसइको हिम्मत भएइन्।
मुक्ति दिन्या ख्रिस्टका बारेमि सोद्यो
(मत्ति २२:४१-४६; लुका २०:४१-४४)
35मन्धिरमि सिछ्या दिन्याबेला इसुले भुन्यो, “धर्म-गुरुले मुक्ति दिन्या राजा ख्रिस्टलाइ कसेरि दाउदका सन्तान भुन्न सक्दाहान्? 36क्यालाइकि दाउद आफुइले पबित्तर आत्माबटहइ भुन्याछन्,
“‘परमप्रभुले मेरा प्रभुलाइ भुन्यो,
मु तेरा सत्तुरलाइ तेरा खुट्टामणि नराखन्ज्यासम्म
तु मेरा दाइना हाततिर बस।’
37जबइ दाउद आफुइ लइ उनुलाइ ‘प्रभु’ भन्नाहान् भन्या कसेरि उनु दाउदका सन्तान भया?”
इसुले ब्यबस्थाका सिछ्या बिरुदमि दिया चेतावनि
पइ ताँ भया ठुला भिडले इसुको बचन खुसिसित सुनिरइथ्या। 38तबइ सिछ्या दिन्याबेला इसुले भुन्यो, “धर्म-गुरुबटहइ होसियार बस। तिनु लामा लामा रे निका लत्ता लाइबर यइतिर उइतिर घुम्द रे बजारमि मान्सले आफुलाइ आदर-सम्मान रे अभिबादन अरुन भन्न्या चाहानान्, 39या सभाघरमि मुख्या ठउँर रे भोजमि आदर-सम्मानको ठउँर खोज्जाहान्। 40तिनुले बिधुवाका घर लुट्टाहान, रे देखावटि अद्दलाइ लामा लामा प्रार्थना अद्दाछन््। इसा मान्सले अज बर्ता डन्न-सजाइ पाउन्याछन्।”
बिधुवाले चडाया भेटि
(लुका २१:१-४)
41पइ इसु मन्धिरका भेटि चढाउन्या ठउँरलाइ बसिरइथ्या, रे भिडले भेटि चणाउन्या बगसइना भेटि चडाउन्नारया तकिरइथ्या। धनि मान्सले भउतइ रकम चणायो। 42तर एक गरिब बिधुवाले आइबर तामाका दुइ सिक्का#१२:४२ तइबेला तामाका दुइ सिक्का भन्या सबभन्ना नानो एक पइसा मात्तरइ हो। मात्तरइ चणायो। 43रे इसुले आफना सिस्यालाइ बोलाइबर भुन्यो, “साँच्चि एइ गरिब बिधुवाले अउर सप्पइ मान्सकाहइ बर्ता भेटि चणाएइ छ। 44क्यालाइकि सप्पइले त आ-आफना बर्ता धन-सम्पतिबटहइ चणाया छन्, तर एइ गरिब बिधुवाले त गरिब होइबरलइ आफनो जिबन चलाउन्या भया जति सप्पइ पइसा चणाएइ छ।”
© 2024 (Active), Mother Tongue Translators Society and Wycliffe Bible Translators, Inc. All rights reserved.
