Nuk 8
8
Nɛgana atub mbɔma nsɔn
1Ɛmɛsi nden yi Jisɛs ara jɛn ka bɛjɨbɛ ka asisɔk atɔɔ anɛ nnɔbɔ ɛteb atub ɛton Ɛsɔwɔ. Anɛ wobo ka abaá ka ɛkan ɛjɛ ajɛnɛ ka nɛ, 2kpɛnɛ ka abakaa ba, ayighi abɔɔ ka ayaam ka atɨbɛ ajɛ: Meri yɔ ara atɨma abɨŋɛ si Magdanin atubsi aru Magdana yɔ ayighɛ ajɛ asimma; 3Joana ji ŋká Kusa, maŋkogho ka abɔanjo Ɛrɔd; Susana; ka abembem bantiŋi. Abakaa mba, ara tab akpugha agoó nsɔn nsɔn yi Jisɛs ka ɛkan ɛjɛ asɛbɛ.
4Ɛsika anɛ aru faŋ-faŋ ama gbaá ntakpa ɛbɔŋɔ, Jisɛs akpɨne abɔɔ ka ŋgana si: 5“Mbɔma nsɔn amu si ama bɔm amɔgha nsɔn ya áre nna ka agu ka ɛgbɛ ɛjɛ, ɛsika ajaga amɔg nya, yantiŋi agbɔ ka nkɔambaá: anɛ akpe ka atá, nsisɔk ate anɛ. 6Yantiŋi agbɔ ka nsise ya akon ka atan, ɛsika amɔg nya amɛɛ arɛ kaá kaá afɨna akpɔ atubsi arɔg arɛ bɛn anab. 7Yantiŋi agbɔɔ ka mfom ba akpe ajijɔŋɔ ya ɛjɔnga si amɛɛ ka ɛtiŋi ajam nɛ rimɛ, agigo nya ataba abɔɔ neyɔ. 8Ka yantiŋi agbɔ ka nnɔba nsise. Amɔg amɛɛ, aram ama kaab akab mkpɛnɛ atán arɔn aga ya akagha.”
Ɛsika akinɛ ka nɛgana ni, átuu abɔɔ atɔŋ si, “Nnɛ yɔ akpe na atɔŋ ayɔg.”
9Anɛ ba ɛkan abɔmɛ ji nɛgana ni ɛru. 10Atɔ abɔɔ si “War ba ɛyɔbɔm ka ɛkan ɛgbɛrɛ gbɛrɛ nɛwɛmɛ ɛtono Ɛsɔwɔ ni ábrɛ ɛyiŋ, ka ntubu ngana nkɛ anɛ baga kasɔŋ,
“ ‘ɛjɔn ga si ara yɛɛ mfom, ayɛm;
ɛjɔn ga si ayɔghɔ, agbɛrɛm.’
11“Nɛgana ni ɛru si: mmɔg ɛjom ji áre ntɔrɔ Ɛsɔwɔ. 12Ya agbɔɔ ka nkɔa mbaa are anɛ ba áyɔghɔ, ka nnɛ-ɛjiŋ ayighi ntɔrɔ nyi ka ntem abɔɔ, nná ka nsisɔk anɨghɛ amɔg nya, kasɔŋ arɨghɛ nɨŋɔ ka ɛdidɨghɛ, ji ka ɛtɔŋɔ fa abɔɔ afɔr. 13Ya ágbɔɔ ka nsise ya akon ka atán áre anɛ ba áyɔghɔ ntɔrɔ Ɛsɔwɔ, atama ka ɛyɛbɛ netem, ka yi arɛ gá kak ka netem, ma nɛgara nnatinim agbɨna gbɔ. 14Amɔg ya agbɔɔ ka ajijɔŋɔ áre anɛ ba áyɔghɔ ntɔrɔ Ɛsɔwɔ, ka ɛsika amughu na ka nekpen, agbɨghaghɨgha, ɛfegheayɔ, afaŋ, ka ajɔba nsɔn ɛyiŋ anem amɔg nya árɛ kon. 15Ka amɔg ya agbɔɔ ka nnɔbɔa nsise áre ka anɛ ba akpe ɛtiŋi netem, ba áyɔghɔ ntɔrɔ Ɛsɔwɔ, akak ka netem, anɨŋɔ ka nkater ka ɛkɨnoamar tɛtɛ ɛru ɛtiŋi ɛjom.
16“Nnɛ yɔku árem yɔ amɔnɔ ɛmɔnɔ afɨna akɔ ɛtógho abɨno ka afɨna akak ka nɛyɔ ɛsimi. Ará kɨno ka mfom ba ayɨrɛ yɨrɛ kasɔŋ ɛyigha ɛtɨŋɔ mfom ɛkɛɛ anɛ ba nɨmɛ. 17Atubsi, jiku ji ɛsa ka nɛbrɛ ɛrem. 18Ka yoŋo atɔŋ nɔbɔnɔbɔ. Nnɛ yɔku yɔ akɨgha ntɔrɔ Ɛsɔwɔ ka netem, Ɛsɔwɔ afɨna akpɛnɛkpɛnɛ nɛgbɛrɛ, ka anɛ ba árɛbɛn, Ɛsɔwɔ ataba taba ma ntitɔŋ ji abɔɔ atere si akpe.”
Nnyɛɛ Jisɛs ka akɨno ayɛ
19Nnyɛɛ Jisɛs ka akɨno ayɛ aba si ama yiɛ, ka árɛ ma akperɛ, atubsi ntakpa ɛbɔŋɔ agbaa asibɛ. 20Nnɛ ka ɛbɔŋɔ ji, ayɛ abɔɔ atɔ Jisɛs, “Nnaja ka akɨno aya ayim ga ka nina asɛbɛ si ayɛa.”
21Jisɛs ara kpɛɛ abɔɔ si “Nnájɨŋa ka akɨno ayɨŋa áre anɛ ba ara yɔghɔ ntɔrɔ Ɛsɔwɔ afɨna anem ka ntɔrɔ arɨgha.”
Jisɛs anyaá ɛbuk ɛgɔɔ
22Ɛfo bi, Jisɛs atɔ ɛkan ɛjɛ si “Ɛyaŋa ɛmu ka njam aya yiga” Ama nam ka ɛgbaa afi amughu. 23Ɛsika afɨna amughu, amar asiŋɛ ka nɛnɔ. Ntakpa mfɛb abá ya akɛ ntakpa ɛbuk, anab anam ka ɛgbaa na wusi ɛgbaa ɛkpi sɛmɛ, ɛnem mfom akub abɔɔ.
24Asɔgba ayɛ anyimɛ ka abeŋe “Ntaa, Ntaa, ɛkpi tan ka ayao!”
Jisɛs atam, anyaa mfɛb nyi, ɛbuk ɛgɔɔ, mfom anaa. 25Ka Jisɛs abɔmɔ abɔɔ si, “Ɛkɨnoamar ɛjɨrɛ ɛre ka faŋ?”
Ka ɛkubumfom, afɨna abɔmɔ atɛm si, “Bɨgha nɛgana nnɛ yɔ nna? Árɨgha ka mfɛb ka anab, ánem ka yɛ asɛbɛ.”
Jisɛs akama ajɛ
26Afi ɛgbaa akɨbɛ aya Ganini ama si ka ɛjá Gadarins 27Ɛsika Jisɛs ayirɛ ka ɛgbok, akɔŋɔ manom ya aru ka ɛjɨbɛ ji yɔ ajɛ amiɛ buru netem. Mbaá ami rab yi nnɛ nyɔ akpɛ yɔbɔ nsɔn ka bɛji, ka afɨna akaa ka njo. Ara kaa ka anam. 28Manom nyɔ ayibɛ ɛren nɛyɛ ni ayɛ Jisɛs, ama gbɔɛ ka atá ka abeŋe gbogbo, “Ɔsɛbɛ si ɔnem jɛɛ ka anɨŋa, Jisɛs, Mɔa Ɛsɔwɔ ji Agaga Nton? Mmɛa bɔɔ, krɛ mmɛ kɛ nɛyiri!” 29Atubsi, Jisɛs ami kama abibia ajɛ ya ajɔnɛ ka bɛji. Ajɛ nya amiɛ bom ayi nya ka ɛbembem nden ara kɛbɛ anighi ya abɔbɛ, abɛ ama sɛb mfom bi anɛ árɛ jɔn ajɔn.
30Jisɛs abɔmɛ si “Ɔnɛɛ si jɛɛ?”
Yɛ akpɛɛ si “Ɛtuutu”, atubsi ajɛ ka ngana ngana ayɔbɛ ka bɛji. 31Ajɛ nya agɔrɛ gɔrɔ gɔrɔ si árɛ kama abɔɔ akak ka ngɔŋɔa nébe.
32Abembem akuk ajɔnɔ ka nkɔ ɛgon anɛghɛ nsɔn. Ajɛ nya agɔrɔ Jisɛs si anɔŋɔ abɔɔ abɛ anam ka bɛji akuk nya. Yɛ́ atama. 33Ajɛ nya áru ka bɛji manom nyɔ ama nam akuk nyá, anem abɔɔ kprɔb abɛ frifri asɨnɛ nyirɛ ɛgon ama nam ka ayá, awɔ anab akpɔ.
34Ɛsika anɛ ba ára kɛɛ akuk ɛjonɛnɨghɛ ayɛɛ ji ɛru na, abɛ ama atɔ anɛ ka ɛjɨbɛ, ka ba áre ka bɛjɨbɛ bi ɛkpere fa. 35Ka anɛ agan ka bɛjɨbɛ bi ama yɛɛ ji ɛmi ru; ayɛɛ nnɛ yɔ Jisɛs ayighɛ ajɛ ka yɛ ára jig ka áta Jisɛs, amiɛ nebe ka atiŋa nsɔn ka netem ɛne jaa: ɛnem mfom akub abɔɔ. 36Anɛ ba áyɛyɛ ka nden yi Jisɛs akama ajɛ aruɛ ama nam ka ɛbɔŋɔ akuk atɔ abɔɔ ɛsika ɛrufa mfom asarɛ. 37Ka mfom akub anɛ kpakpa ka ɛjɨbɛ ka ɛjá Gadarin yi ara gɔrɛ-gɔrɔ si aru ka ɛjá abɔɔ; ɛniɛ́ anam ka ɛgbaa akru.
38Nnɛ yɔ ayighɛ ajɛ agɔrɛ si akpiɛ tɔɔŋɔ: ka Jisɛs árɛ tama, ara tɔɛ si. 39Sɔŋ kru ka njo ɛya, kasɔŋ wɔ ɔtɔŋɔ anɛ ajɛna nsɔn yi Ɛsɔwɔ ami nem akɛa. Nnɛ nnyɔ afɛnɛ, ka ɛjɨbɛ ama kpaŋ atɔ anɛ ajɛna nsɔn ya Jisɛs ané akɛɛ.
40Nden yi Jisɛs afɛnɛ asi ka nkɔ aya yiga, abembem anɛ akperɛ ka ɛyɛbɛ netem atubsi ara brɨɛbri si aba..
Mɔa Jerus
41Manom ɛwi yɔ anɛ si Jerus, yɔ ajɔnɔ ka ɛsi ka ɛkɔnɔ Jus ama kɔŋɔ Jisɛs: agbɔɛ ka atá ka agɔrɛ si amu ka njo ɛyɛ́ 42si mɔaŋka ɛwɛ ɛwiwi ya ami si nnya wobo ka ɛbaa akpi kpɔ.
Ɛsika Jisɛs atɨmɛ amughu ka nɛ, ɛbɔŋɔ ji ɛgbá akɨghɛ ka ɛkpiɛ tɛmɛ ɛtub. 43Ka maŋka yɔ agbɔɔ anɔŋ ka nnya wobo ka ɛbaa, yɔ ami jɛn bɛjo nkam asibi sibi bɛji yɛ ɛrɛ koro, 44asiŋɛ ka njam ama fɨnɛ ka ɛsi ɛnɨmɛ; fifa fifa anɔŋ nya akɨbɛ.
45Ka Jisɛs abɔmɔ si, “Yɛnnɛ akɔmɔm?”
Ka nden yi anɛ kpakpa ami gɛbɛ, Pita ka anɛ baga ba ajɔnɔ fa akpɛ si Ntaa, ka ntakpa ɛbɨŋɔ nji ji nɛnnɛ yɔku anɔghɔ si atɛmɛ mbaa aru kasɔŋ akpera, yɔ wɔ ɔbɔmɔ si yɛnnɛ ákɔma?
46Jisɛs arag si, “Nɛkɔmɔ ni fa saŋ: atubsi ɛmɛ tɨŋɔ si nɛyɔ ɛmimɛ ru.”
47Ɛsika maŋka nyɔ arɛ kpɛma abar ji ane, aru ka ɛbɔŋɔ ka akɨmɛ ka bɛji, ama gbɔ ka ɛsinɛbri Jisɛs ka atɔɛ ji ɛsɛrɛ ka yɛ akɔmɛ ka ɛnimɛ, ka anɔŋ ya agbɨna kɨbɛ. 48Jisɛs abiŋɛ, Mɔɔ́, yɛbɛ netem si ɛkɨnoamar ɛjá ɛmia nagha, sɔŋ ka nɛná.
49Ɛsika arɨgha na ka maŋka nyɔ, nnɛ aba ka eteb ama kɛɛ nton ɛkɔnɔ Jus nyɔ si mmɔ ɛwɛ yɔ nka ami kpɔ, árɛ kpɛ feghe Ntaa ayɔ.
50Jisɛs ayɔghɔ nna, akpeghe atɔɛ si “Mfom ariakub: tama si akpekpen kasɔŋ nɛnagha ɛjɔn ɛkɛɛ.”
51Ka nden yi yɛ atɔɔŋɔ abɔɔ asi ka njoa Jɛrus, yɛ ayighi Pita, Jems, Jɔn, nsɛ ka nnyɛ mmɔ kantiŋ anam ka nɛ ka njo. 52Ákɔŋɔ anɛ ka ákagha ka abere: ka Jisɛs atɔɔ abɔɔ, “Ba gɔ ɛren; árɛ kpɔ, ára nánan.”
53Ára yɔnɛ yɔn, atubsi abɔɔ anyinyi si mɔaŋka nyɔ ami kpɔ. 54Jisɛs atɔɔ abɔɔ aru, afɨne mɔaŋka nyɔ ka ɛbɔ, ka abeŋe, “Mɔaŋka, táam.” 55Nɛfɛb ɛnimɛ na, agbɨna nyimi. Jisɛs akɛɛ nɛyɔ si akɛɛ ɛjonɛnɛghɛ anɛ. 56Bɛji ɛkpɔ nsɛ ka nnyɛɛ: ka yɛ atuu abɔɔ atɔŋ si árɛ tɔɔ anɛ ɛjom ji yɛ áne.
©️2024 Luke Initiative for Scripture Translation
