Matthaisioi Phrinzangpo 4
4
1Dekana, Nganpaola thikshadshukpa Semszangspo Yeshu thangstongeangnuk tede khyes. 2Yang nyima jibchu nang thsan jibchu khastonga dukse jukna kho ltoqs, 3Yang thikshadbakhanpos khoe shitia yongse zes : Taqdir khyerang Ashipi rshras in na di rdoaun ṯakiun gyur zere molang! 4Amma khos tamlaniang molen zes: Dyu zbrise duk : "Miyu taki tseka sonmamed dobasang Ashipi Khaos molskhan Speraun rere nang rere eka soned. 5Ni dekana Nganpaos rtsangma rgyalsiang Kho khyes yang rtsangma malsi challenika ltsangs. 6Yang khoa zered : Taqdir khyerang Ashipi rshras in na, dikana yoqa hyanga chhong-wa! chiazerbana dyu zbrise duk : Khyeri kangmao rdoekchigika miphoqsukpa khyeri phya rangi skopaunla khontes khonti laqpeang khyerang lene khuruk zere skals. 7Yeshus khoa mols : Yangang dyu zbrise duk : Khyeres rangi Ashipa, Ashipa khorang, thikshad mabos! 8Ni, Nganpaos rang na nyambomana thonmo richikchigika Kho yangang khyes yang miyuli rgyastridun jung yang douni chheszbrelpokhoa staned. 9Yang khoa zersed : Taqdir khyeres s eka zguse nga-a rchornarek ngas diun tsoq khyeranga tangnuk. 10Dekana Yeshus khoa mols : Thaqringa song wa nganpa! Chiazerbana dyu zbrise duk : "Khyeres khyeri Ashipa Ashipa Khorang rchor, yang khorang tsa-a jabshi phul." 11Dekana Nganpaos kho phangs. Yang ltosang, skopaun yongs, yang khuri jabshia duks.
12Amma, Yoannes zune laqa borcha songsedpin zerchao Yeshua goana kho Galilyeangnuk loqse skyods. 13Yang Nazaretiangna bingse skyodena kho Nephtali nang Zabuloni thayuluniang rgyamthsoe zurika yodkhan Kaphernaumiang skyodena malduks bas. 14Esayas khyenkhani lches molcha songkhanpo gangrgya chha (der malduks bas); 15Yordani pharka, rgyamthsoe rolla yodkhan Zabuloni sakyad nang Nephtali sakyad janmi thsiruni zerkhan Galilaye yul. 16Ṯẖuba dukse yodkhan mithsounla chhopo odchik thong, yang shichi grimphaqsi sakyadiang dukse yodkhanunla opdo shar zere mols. 17Dya thoekana Yeshus hagochukpa yang molba ryaḵẖs. Gyodshik! Chiazerbana rshnamuni rgyastridpo nyemoa hlebsed!
18Yang Yeshu Galilaye thsoe zurika khoren yodtsana, phono nyis Petros zerkhan Siman nang khoe phono Andreas, khong nyapa inmana chhopo nyadolchik tangen yodpao khoa thong. 19Yang khos khonga mols : Ngi lza-a yongshik yang ngas khyentang miuni nyapa (nyazunkhan na tsoḵẖs) ldanchuktuk.
20Ni, rtsomse nyadolun phangse khong khoe lza-a yongs. 21Yang dekana Kho rdzashik etsa-a songsena yang phono nyis Zebedayasi buthsa Yakobos nang khoe phono Yoannes rangi ata Zebedayas nadrese nayoeang rangi nyadolun rchuen yodpao thong, yang khonga yongshik zere mols. 22Ni, khong rtsomse nayo nang khonti atao phangse khoe lza-a yongs.
23Yang Yeshu Galilaye jungeang khoren, khonti rshmaqdus-sauniang ltsaben, yang rgyastridpoe phrinzang hagochugen yang mibongsiang yodkhan ga nadun nang zermoun noro chhachugedpin. 24Yang khoe mingchanilukspo Surye jungeang khyed. Yang khongunis phrosna mangmoe mardea yodkhanun nang naḵẖs thongkhanun jung nang drebyarun nang snyonma yodkhanun nang chhanggu songkhanun, khoe shitia khyongs, yang khos khongun mana sang noro chhachuks. 25Yang Galilya nang Dekapolis nang Yerusalem nang Yudaya nang Yordani pharka na yongskhan chhopo mibongshik Khoe lza-a yongs.
© Société Biblique de Genève
